తవ యద్యుదయో న స్యాదంధం జగదిదం భవేత్ |
న చ ధర్మార్థకామేషు ప్రవర్తేరన్ మనీషిణః || ౧ ||
ఆధానపశుబన్ధేష్టిమంత్రయజ్ఞతపఃక్రియాః |
త్వత్ప్రసాదాదవాప్యంతే బ్రహ్మక్షత్రవిశాం గణైః || ౨ ||
యదహర్బ్రహ్మణః ప్రోక్తం సహస్రయుగసంమితమ్ |
తస్య త్వమాదిరంతశ్చ కాలజ్ఞైః పరికీర్తితః || ౩ ||
మనూనాం మనుపుత్రాణాం జగతోఽమానవస్య చ |
మన్వంతరాణాం సర్వేషామీశ్వరాణాం త్వమీశ్వరః || ౪ ||
సంహారకాలే సంప్రాప్తే తవ క్రోధవినిఃసృతః |
సంవర్తకాగ్నిః త్రైలోక్యం భస్మీకృత్యావతిష్ఠతే || ౫ ||
త్వద్దీధితిసముత్పన్నాః నానావర్ణా మహాఘనాః |
సైరావతాః సాశనయః కుర్వంత్యాభూతసంప్లవమ్ || ౬ ||
కృత్వా ద్వాదశధాఽఽత్మానం ద్వాదశాదిత్యతాం గతః |
సంహృత్యైకార్ణవం సర్వం త్వం శోషయసి రశ్మిభిః || ౭ ||
త్వామింద్రమాహుస్త్వం రుద్రస్త్వం విష్ణుస్త్వం ప్రజాపతిః |
త్వమగ్నిస్త్వం మనః సూక్ష్మం ప్రభుస్త్వం బ్రహ్మ శాశ్వతమ్ || ౮ ||
త్వం హంసః సవితా భానురంశుమాలీ వృషాకపిః |
వివస్వాన్మిహిరః పూషా మిత్రో ధర్మస్తథైవ చ || ౯ ||
సహస్రరశ్మిరాదిత్యస్తపనస్త్వం గవాం పతిః |
మార్తాండోఽర్కో రవిః సూర్యః శరణ్యో దినకృత్తథా || ౧౦ ||
దివాకరః సప్తసప్తిర్ధామకేశీ విరోచనః |
ఆశుగామీ తమోఘ్నశ్చ హరితాశ్వచ్చ కీర్త్యసే || ౧౧ ||
సప్తమ్యామథవా షష్ఠ్యాం భక్త్యా పూజాం కరోతి యః |
అనిర్విణ్ణోఽనహంకారీ తం లక్ష్మీర్భజతే నరమ్ || ౧౨ ||
న తేషామాపదః సంతి నాధయో వ్యాధయస్తథా |
యే తవానన్యమనసః కుర్వంత్యర్చనవందనమ్ || ౧౩ ||
సర్వరోగైర్విరహితాః సర్వపాపవివర్జితాః |
త్వద్భావభక్త్యాః సుఖినో భవంతి చిరజీవినః || ౧౪ ||
త్వం మమాపన్నకామస్య సర్వాతిథ్యం చికీర్షతః |
అన్నమన్నపతే దాతుమభితః శ్రద్ధయాఽర్హసి || ౧౫ ||
యేచ తేఽనుచరాః సర్వే పాదోపాంతం సమాశ్రితాః |
మాఠరారుణదండాద్యాస్తాంస్యాన్వందేఽశనిక్షుభాన్ || ౧౬ ||
క్షుభయా సహితా మైత్రీ యాశ్చాన్యా భూతమాతరః |
తాశ్చ సర్వా నమస్యామి పాతుం మాం శరణాగతమ్ || ౧౭ ||
ఇతి శ్రీమన్మహాభారతే అరణ్యపర్వణి ఆదిత్యస్తోత్రం సంపూర్ణమ్ ||
No Comments