లింగమూర్తిం శివం స్తుత్వా గాయత్ర్యా యోగమాప్తవాన్ |
నిర్వాణం పరమం బ్రహ్మ వసిష్ఠోన్యశ్చ శంకరాత్ || ౧ ||
నమః కనకలింగాయ వేదలింగాయ వై నమః |
నమః పరమలింగాయ వ్యోమలింగాయ వై నమః || ౨ ||
నమస్సహస్రలింగాయ వహ్నిలింగాయ వై నమః |
నమః పురాణలింగాయ శ్రుతిలింగాయ వై నమః || ౩ ||
నమః పాతాళలింగాయ బ్రహ్మలింగాయ వై నమః |
నమో రహస్యలింగాయ సప్తద్వీపోర్ధ్వలింగినే || ౪ ||
నమస్సర్వాత్మలింగాయ సర్వలోకాంగలింగినే |
నమస్త్వవ్యక్తలింగాయ బుద్ధిలింగాయ వై నమః || ౫ ||
నమోహంకారలింగాయ భూతలింగాయ వై నమః |
నమ ఇంద్రియలింగాయ నమస్తన్మాత్రలింగినే || ౬ ||
నమః పురుషలింగాయ భావలింగాయ వై నమః |
నమోరజోఽర్ధలింగాయ సత్త్వలింగాయ వై నమః || ౭ ||
నమస్తే భవలింగాయ నమస్త్రైగుణ్యలింగినే |
నమో నాగతలింగాయ తేజోలింగాయ వై నమః || ౮ ||
నమో వాయూర్ధ్వలింగాయ శ్రుతిలింగాయ వై నమః |
నమస్తే ధర్మలింగాయ సామలింగాయ వై నమః || ౯ ||
నమో యజ్ఞాంగలింగాయ యజ్ఞలింగాయ వై నమః |
నమస్తే తత్త్వలింగాయ దేవానుగతలింగినే || ౧౦ ||
దిశ నః పరమం యోగమపత్యం మత్సమం తథా |
బ్రహ్మ చైవాక్షయం దేవ శమం చైవ పరం విభో |
అక్షయత్వం చ వంశస్య ధర్మే చ మతిమక్షయామ్ || ౧౧ ||
అగ్నిరువాచ –
వసిష్ఠేన స్తుతశ్శంభుస్తుష్టః శ్రీపర్వతే పురా |
వసిష్ఠాయ వరం దత్వా తత్రైవాంతరధీయత || ౧౨ ||
ఇతి శ్రీమహాపురాణే ఆగ్నేయే అగ్నివసిష్ఠసంవాదే వసిష్ఠకృత పరమేశ్వరస్తుతిర్నామ సప్తదశాధికద్విశతతమోధ్యాయః ||
మరిన్ని శ్రీ శివ స్తోత్రాలు చూడండి.
No Comments