బృహస్పతిరువాచ –
నమో హరాయ దేవాయ మహామాయా త్రిశూలినే |
తాపసాయ మహేశాయ తత్త్వజ్ఞానప్రదాయినే || ౧ ||
నమో మౌంజాయ శుద్ధాయ నమః కారుణ్యమూర్తయే |
నమో దేవాధిదేవాయ నమో వేదాంతదాయినే || ౨ ||
నమః పరాయ రుద్రాయ సుపారాయ నమో నమః |
విశ్వమూర్తే మహేశాయ విశ్వాధారాయ తే నమః || ౩ ||
నమో భక్త భవచ్ఛేద కారణాయాఽమలాత్మనే |
కాలకాలాయ కాలాయ కాలాతీతాయ తే నమః || ౪ ||
జితేంద్రియాయ నిత్యాయ జితక్రోధాయ తే నమః |
నమః పాషండభంగాయ నమః పాపహరాయ తే || ౫ ||
నమః పర్వతరాజేంద్ర కన్యకాపతయే నమః |
యోగానందాయ యోగాయ యోగినాంపతయే నమః || ౬ ||
ప్రాణాయామపరాణాం తు ప్రాణరక్షాయ తే నమః |
మూలాధారే ప్రవిష్టాయ మూలదీపాత్మనే నమః || ౭ ||
నాభికం తే ప్రవిష్టాయ నమో హృద్దేశవర్తినే |
సచ్చిదానందపూర్ణాయ నమస్సాక్షాత్పరాత్మనే || ౮ ||
నమశ్శివాయాద్భుతవిక్రమాయ తే
నమశ్శివాయాద్భుతవిగ్రహాయ తే |
నమశ్శివాయాఖిలనాయకాయ తే
నమశ్శివాయామృతహేతవే నమః || ౯ ||
సూత ఉవాచ –
య ఇదం పఠతే నిత్యం స్తోత్రం భక్త్యా సుసంయుతః |
తస్య ముక్తిః కరస్థా స్యాచ్ఛంకరప్రియకారణాత్ || ౧౦ ||
విద్యార్థీ లభతే విద్యాం వివాహార్థీ గృహీ భవేత్ |
వైరాగ్యకామో లభతే వైరాగ్యం భవతారకమ్ || ౧౧ ||
తస్మాద్దినే దినే యూయమిదం స్తోత్రం సమాహితాః |
పఠంతు భవనాశార్థమిదం వో భవనాశనమ్ || ౧౨ ||
ఇతి శ్రీస్కాందేమహాపురాణే సూతసంహితాయాం బృహస్పతికృత శివనవరత్నస్తవః |
మరిన్ని శ్రీ శివ స్తోత్రాలు చూడండి.
No Comments