Andhaka Krita Shiva Stuti – శ్రీ శివ స్తుతిః (అంధక కృతం)

Andhaka Krita Shiva Stuti

నమోఽస్తుతే భైరవ భీమమూర్తే త్రైలోక్య గోప్త్రేశితశూలపాణే |
కపాలపాణే భుజగేశహార త్రినేత్ర మాం పాహి విపన్న బుద్ధిమ్ || ౧ ||

జయస్వ సర్వేశ్వర విశ్వమూర్తే సురాసురైర్వందితపాదపీఠ |
త్రైలోక్య మాతర్గురవే వృషాంక భీతశ్శరణ్యం శరణా గతోస్మి || ౨ ||

త్వం నాథ దేవాశ్శివమీరయంతి సిద్ధా హరం స్థాణుమమర్షితాశ్చ |
భీమం చ యక్షా మనుజా మహేశ్వరం భూతాని భూతాధిప ముచ్చరంతి || ౩ ||

నిశాచరాస్తూగ్రముపాచరంతి భవేతి పుణ్యాః పితరో నమస్తే |
దాసోఽస్మి తుభ్యం హర పాహి మహ్యం పాపక్షయం మే కురు లోకనాథ || ౪ ||

భవాం-స్త్రిదేవ-స్త్రియుగ-స్త్రిధర్మా త్రిపుష్కరశ్చాసి విభో త్రినేత్ర |
త్రయారుణిస్త్వం శ్రుతిరవ్యయాత్మా పునీహి మాం త్వాం శరణం గతోఽస్మి || ౫ ||

త్రిణాచికేత-స్త్రిపదప్రతిష్ఠ-ష్షడంగవిత్ స్త్రీవిషయేష్వలుబ్ధః |
త్రైలోక్యనాథోసి పునీహి శంభో దాసోఽస్మి భీతశ్శరణాగతస్తే || ౬ ||

కృతో మహాశంకర తేఽపరాధో మయా మహాభూతపతే గిరీశ |
కామారిణా నిర్జితమానసేన ప్రసాదయే త్వాం శిరసా నతోఽస్మి || ౭ ||

పాపోఽహం పాపకర్మాఽహం పాపాత్మా పాపసంభవః |
త్రాహి మాం దేవదేవేశ సర్వపాపహరో భవ || ౮ ||

మమ దైవాపరాధోస్తి త్వయా వై తాదృశోప్యహమ్ |
స్పృష్టః పాపసమాచారో మాం ప్రసన్నో భవేశ్వర || ౯ ||

త్వం కర్తా చైవ ధాతా చ జయత్వం చ మహాజయ |
త్వం మంగల్యస్త్వమోంకార-స్త్వమోంకారో వ్యయో ధృతః || ౧౦ ||

త్వం బ్రహ్మసృష్టికృన్నాథస్త్వం విష్ణుస్త్వం మహేశ్వరః |
త్వమింద్రస్త్వం వషట్కారో ధర్మస్త్వం తు హితోత్తమః || ౧౧ ||

సూక్ష్మస్త్వం వ్యక్తరూపస్త్వం త్వమవ్యక్తశ్చధీవరః |
త్వయా సర్వమిదం వ్యాప్తం జగత్ స్థావరజంగమమ్ || ౧౨ ||

త్వమాదిరంతో మధ్యం చ త్వమేవ చ సహస్రపాత్ |
విజయస్త్వం సహస్రాక్షో చిత్తపాఖ్యో మహాభుజః || ౧౩ ||

అనంతస్సర్వగో వ్యాపీ హంసః పుణ్యాధికోచ్యుతః |
గీర్వాణపతిరవ్యగ్రో రుద్రః పశుపతిశ్శివః || ౧౪ ||

త్రైవిద్యస్త్వం జితక్రోధో జితారాతిర్జితేంద్రియః |
జయశ్చ శూలపాణి స్త్వం పాహి మాం శరణాగతమ్ || ౧౫ ||

ఇతి శ్రీవామనపురాణాన్తర్గత అంధక కృత శివ స్తుతిః |

Andhaka Krita Shiva Stuti in telugu

మరిన్ని శ్రీ శివ స్తోత్రాలు చూడండి.