వందే గజేంద్రవదనం వామాంకారూఢవల్లభాశ్లిష్టమ్ | కుంకుమపరాగశోణం కువలయినీజారకోరకాపీడమ్ || ౧ || స జయతి సువర్ణశైలః సకలజగచ్చక్రసంఘటితమూర్తిః | కాంచననికుంజవాటీ- -కందలదమరీప్రపంచసంగీతః || ౨ || హరిహయనైరృతమారుత- -హరితామంతేష్వవస్థితం తస్య | వినుమః సానుత్రితయం విధిహరిగౌరీశవిష్టపాధారమ్ || ౩ || మధ్యే పునర్మనోహర- -రత్నరుచిస్తబకరంజితదిగంతమ్ | ఉపరి చతుఃశతయోజన- -ముత్తుంగం శృంగపుంగవముపాసే || ౪ || తత్ర చతుఃశతయోజన- -పరిణాహం దేవశిల్పినా రచితమ్ | నానాసాలమనోజ్ఞం నమామ్యహం నగరమాదివిద్యాయాః || ౫ || ప్రథమం సహస్రపూర్వక- -షట్శతసంఖ్యాకయోజనం పరితః | వలయీకృతస్వగాత్రం వరణం శరణం…