గోవింద దామోదర స్తోత్రం (లఘు)

govinda damodara stotram selected verses in telugu

కరారవిందేన పదారవిందం
ముఖారవిందే వినివేశయంతమ్ ।
వటస్య పత్రస్య పుటే శయానం
బాలం ముకుందం మనసా స్మరామి ॥

శ్రీకృష్ణ గోవింద హరే మురారే
హే నాథ నారాయణ వాసుదేవ ।
జిహ్వే పిబస్వామృతమేతదేవ
గోవింద దామోదర మాధవేతి ॥ 1

విక్రేతుకామాఖిలగోపకన్యా
మురారిపాదార్పితచిత్తవృత్తిః ।
దధ్యాదికం మోహవశాదవోచత్
గోవింద దామోదర మాధవేతి ॥ 2

గృహే గృహే గోపవధూకదంబాః
సర్వే మిలిత్వా సమవాప్య యోగమ్ ।
పుణ్యాని నామాని పఠంతి నిత్యం
గోవింద దామోదర మాధవేతి ॥ 3

సుఖం శయానా నిలయే నిజేఽపి
నామాని విష్ణోః ప్రవదంతి మర్త్యాః ।
తే నిశ్చితం తన్మయతాం వ్రజంతి
గోవింద దామోదర మాధవేతి ॥ 4

జిహ్వే సదైవం భజ సుందరాణి
నామాని కృష్ణస్య మనోహరాణి ।
సమస్త భక్తార్తివినాశనాని
గోవింద దామోదర మాధవేతి ॥ 5

సుఖావసానే ఇదమేవ సారం
దుఃఖావసానే ఇదమేవ జ్ఞేయమ్ ।
దేహావసానే ఇదమేవ జాప్యం
గోవింద దామోదర మాధవేతి ॥ 6

జిహ్వే రసజ్ఞే మధురప్రియే త్వం
సత్యం హితం త్వాం పరమం వదామి ।
అవర్ణయేథా మధురాక్షరాణి
గోవింద దామోదర మాధవేతి ॥ 7

త్వామేవ యాచే మమ దేహి జిహ్వే
సమాగతే దండధరే కృతాంతే ।
వక్తవ్యమేవం మధురం సుభక్త్యా
గోవింద దామోదర మాధవేతి ॥ 8

శ్రీకృష్ణ రాధావర గోకులేశ
గోపాల గోవర్ధననాథ విష్ణో ।
జిహ్వే పిబస్వామృతమేతదేవ
గోవింద దామోదర మాధవేతి ॥ 9

govinda damodara stotram selected verses in telugu