vande sakalasandehadāvapāvakamīśvaram |
karuṇāvaruṇāvāsaṁ bhaktakalpataruṁ gurum || 1 ||
ullasat pītavidyoti vidyotita tanutrayam |
nigamāgamasarvasvamīḍe’haṁ tanmahanmahaḥ || 2 ||
oṁ pūrvaṁ sthiramāyāṁ ca bagalāmukhi sarvataḥ |
duṣṭānāṁ vācamuccārya mukhaṁ padaṁ tathoddharet || 3 ||
stambhayeti tato jihvāṁ kīlayeti samuddharet |
buddhiṁ vināśayeti padaṁ sthiramāyāmanusmaret || 4 ||
praṇavaṁ vahnijāyā cetyeva paitāmbaro manuḥ |
pātu māṁ sarvadā sarvaṁ nigrahānugrahakṣamaḥ || 5 ||
kaṇṭhaṁ nārada ṛṣiḥ pātu paṅktiśchando’vatānmukham |
pītāmbarā devatā tu hṛnmadhyamavatānmama || 6 ||
hlīṁ bījaṁ stanayorme’vyāt svāhā śaktiśca dantayoḥ |
sa kīlakaṁ tathā guhye viniyogo’vatādvapuḥ || 7 ||
ṣaḍdīrghabhājā bījena nyāso’vyānme karādikam |
dvipañcapañca nandeṣu daśabhirmantravarṇakaiḥ || 8 ||
ṣaḍaṅgakalpanā pātu ṣaḍaṅgāni hyanukramāt |
aiṁ vidyātattvaṁ klīṁ māyātattvaṁ sauśca śivātmakam || 9 ||
tattvatrayaṁ saṁ bījaṁ ca mūlaṁ hṛtkaṇṭha madhyagaḥ |
sudhābdhau hemabhūrūḍha campakodyāna madhyataḥ || 10 ||
gāruḍotpalanirvyūḍha svarṇasiṁhāsanopari |
svarṇapaṅkajasaṁviṣṭāṁ trinetrāṁ śaśiśekharām || 11 ||
pītālaṅkāravasanāṁ mallīcandanaśobhitām |
savyābhāṁ pañcaśākhāyāṁ vajraṁ jihvāṁ ca bibhratīm || 12 ||
mudgaraṁ nāgapāśaṁ ca dakṣiṇābhyāṁ madālasām |
bhaktārivigrahodyogapragalbhāṁ bagalāmukhīm || 13 ||
dhyāyamānasya me pātu śāstravodveṣaṇe bhṛśam |
bhūkalādaladikpatraṣaṭkoṇaṁ tryastrabaindukam || 14 ||
yantraṁ paitāmbaraṁ pātu sā māṁ pāyādavigrahā |
ādhāraśaktimārabhya jñānātmāntāstu śaktayaḥ || 15 ||
pīṭhādyāḥ pāntu pīṭhe’traṁ prathamaṁ māṁ ca rakṣatu |
śāntiśaṅkhaviśeṣātmaśaktibhūtāni pāntu mām || 16 ||
āvāhanādyāḥ pañcāpi mudrāśca sumanojalaiḥ |
trikoṇamadhyamārabhya pūjitā bagalāmukhi || 17 ||
krodhinī stambhinī cāpi dhāriṇyaścāpi madhyagāḥ |
ojaḥ pūṣādipīṭhāni koṇāgreṣu sthitāni vai || 18 ||
trikoṇa bāhyataḥ siddhanāthādyā guravastathā |
siddhanāthaḥ siddhānandanāthaḥ siddhaparameṣṭhi hi || 19 ||
nāthaḥ siddhaḥ śrīkaṇṭhaśca nāthaḥ siddhacatuṣṭayam |
pātu māmatha ṣaṭkoṇe subhagā bhagarūpiṇī || 20 ||
bhagodayā ca bhaganipātinī bhagamālinī |
bhagavāhā ca māṁ pātu ṣaṭkoṇāgreṣu ca kramāt || 21 ||
tvagātmā śoṇitātmā ca māṁsātmā medasātmakaḥ |
rūpātmā paramātmā ca pātu māṁ sthiravigrahā || 22 ||
aṣṭapatreṣu mūleṣu brāhmī māheśvarī tathā |
kaumārī vaiṣṇavī vārāhīndrāṇī ca tathā punaḥ || 23 ||
cāmuṇḍā ca mahālakṣmīstatra madhye punarjayā |
vijayā ca jayāmbā ca rājitā jṛmbhiṇī tathā || 24 ||
stambhinī mohinī vaśyā’karṣiṇyatha tadagrake |
asitāṅgo ruruścaṇḍaḥ kraudhonmattakapālinaḥ |
bhīṣaṇāścāpi saṁhāra ete rakṣantu māṁ sadā || 25 ||
tataḥ ṣoḍaśapatreṣu maṅgalā stambhinī tathā |
jṛmbhiṇī mohinī vaśyā jvālā siṁhī balāhakā || 26 ||
bhūdharā kalmaṣā dhātrī kanyakā kālakarṣiṇī |
bhāntikā mandagamanā bhogasthā bhāvaketi ca || 27 ||
pātu māmatha bhūsadma daśadikṣu digīśvarāḥ |
indro’nalo yamo rakṣo varuṇo mārutaḥ śaśī || 28 ||
īśo’nantaḥ svayambhūśca daśaite pāntu me vapuḥ |
vajraśaktirdaṇḍakhaḍgau pāśāṅkuśagadāḥ kramāt |
śūlaṁ cakraṁ sarojaṁ ca tattacchastrāṇi pāntu mām || 29 ||
atha ca pūrvādi caturdvāreṣu parataḥ kramāt |
pātu vighneśabaṭukau yoginī kṣetrapālakaḥ || 30 ||
gurutrayaṁ trirekhāsu pātu me vapurañjasā |
punaḥ pītāmbarā pātu upacāraiḥ prapūjitā || 31 ||
sāṅgāvaraṇaśaktiśca jayaśrīḥ pātu sarvadā |
valayaṁ baṭukādibhyo rakṣāṁ kurvantu me sadā || 32 ||
śaktayaḥ sādhakā vīrāḥ pāntu me devatā imāḥ |
ityarcākramataḥ proktaṁ stotraṁ paitāmbaraṁ param || 33 ||
yaḥ paṭhet sakṛdapyetat so’rcāphalamavāpnuyāt |
sarvathā kārayet kṣipraṁ prapadyante gadāturān || 34 ||
rājāno rājapatnyāśca paurajānapadāstathā |
vaśagāstasya jāyante satataṁ sevakā iva || 35 ||
gurukalpāśca vibudhā mūkatāṁ yānti te’grataḥ |
sthirā bhavati tadgehe capalāpi haripriyā || 36 ||
pītāmbarāṅgavasano yadi lakṣasaṅkhyaṁ
paitāmbaraṁ manumamuṁ prajapennaro yaḥ |
hemī sakṛnniyamavān vidhinā haridrā-
-mālāṁ dadhadbhavati tadvaśagā trilokī || 37 ||
bhavāni bagalāmukhi tridaśakalpavalli prabho
kṛpājalanidhe tava caraṇadhūtabādhākhilaḥ |
surāsuranarādikasakalabhaktabhāgyaprade
tvadaṅghrisarasīruhadvayamahaṁ tu dhyāye sadā || 38 ||
tvamasya jagatāṁ janisthitivināśabījaṁ nija-
-prakāśabahuladyutirbhavati bhaktahṛnmadhyagā |
trayīmanu supūjitā hariharādi vṛndārakai-
-ranukṣaṇamanukṣaṇaṁ mayi śive kṣaṇaṁ vīkṣyatām || 39 ||
śive tava tanūmahaṁ hariharādyagamyāṁ parāṁ
nikhilatāpapratyūhahṛdayābhāvayuktāṁ smare |
vidāraya vicūrṇaya glapaya śoṣaya stambhaya
praṇodaya virodhaya pravilaya prabaddhāriṇām || 40 ||
pārvati kṛpālasanmayi kaṭākṣapātaṁ manā-
-ganākulatayā kṣaṇaṁ kṣipa vipakṣasaṅkṣobhiṇi |
yadīkṣaṇapathaṁ gataḥ sakṛdapi prabhuḥ kaścana
sphuṭaṁ mama vaśaṁ vado bhavatu tena pītāmbare || 41 ||
oṁ namo bhagavate mahārudrāya huṁ phaṭ svāhā |
iti atharvaṇarahasye śrī bagalāmukhī stavarājaḥ ||
Leave a Comment