ಶ್ರೀ ಬಗಳಾಮುಖೀ ಸ್ತವರಾಜಃ

ವಂದೇ ಸಕಲಸಂದೇಹದಾವಪಾವಕಮೀಶ್ವರಮ್ |
ಕರುಣಾವರುಣಾವಾಸಂ ಭಕ್ತಕಲ್ಪತರುಂ ಗುರುಮ್ || ೧ ||

ಉಲ್ಲಸತ್ ಪೀತವಿದ್ಯೋತಿ ವಿದ್ಯೋತಿತ ತನುತ್ರಯಮ್ |
ನಿಗಮಾಗಮಸರ್ವಸ್ವಮೀಡೇಽಹಂ ತನ್ಮಹನ್ಮಹಃ || ೨ ||

ಓಂ ಪೂರ್ವಂ ಸ್ಥಿರಮಾಯಾಂ ಚ ಬಗಲಾಮುಖಿ ಸರ್ವತಃ |
ದುಷ್ಟಾನಾಂ ವಾಚಮುಚ್ಚಾರ್ಯ ಮುಖಂ ಪದಂ ತಥೋದ್ಧರೇತ್ || ೩ ||

ಸ್ತಂಭಯೇತಿ ತತೋ ಜಿಹ್ವಾಂ ಕೀಲಯೇತಿ ಸಮುದ್ಧರೇತ್ |
ಬುದ್ಧಿಂ ವಿನಾಶಯೇತಿ ಪದಂ ಸ್ಥಿರಮಾಯಾಮನುಸ್ಮರೇತ್ || ೪ ||

ಪ್ರಣವಂ ವಹ್ನಿಜಾಯಾ ಚೇತ್ಯೇವ ಪೈತಾಂಬರೋ ಮನುಃ |
ಪಾತು ಮಾಂ ಸರ್ವದಾ ಸರ್ವಂ ನಿಗ್ರಹಾನುಗ್ರಹಕ್ಷಮಃ || ೫ ||

ಕಂಠಂ ನಾರದ ಋಷಿಃ ಪಾತು ಪಂಕ್ತಿಶ್ಛಂದೋಽವತಾನ್ಮುಖಮ್ |
ಪೀತಾಂಬರಾ ದೇವತಾ ತು ಹೃನ್ಮಧ್ಯಮವತಾನ್ಮಮ || ೬ ||

ಹ್ಲೀಂ ಬೀಜಂ ಸ್ತನಯೋರ್ಮೇಽವ್ಯಾತ್ ಸ್ವಾಹಾ ಶಕ್ತಿಶ್ಚ ದಂತಯೋಃ |
ಸ ಕೀಲಕಂ ತಥಾ ಗುಹ್ಯೇ ವಿನಿಯೋಗೋಽವತಾದ್ವಪುಃ || ೭ ||

ಷಡ್ದೀರ್ಘಭಾಜಾ ಬೀಜೇನ ನ್ಯಾಸೋಽವ್ಯಾನ್ಮೇ ಕರಾದಿಕಮ್ |
ದ್ವಿಪಂಚಪಂಚ ನಂದೇಷು ದಶಭಿರ್ಮಂತ್ರವರ್ಣಕೈಃ || ೮ ||

ಷಡಂಗಕಲ್ಪನಾ ಪಾತು ಷಡಂಗಾನಿ ಹ್ಯನುಕ್ರಮಾತ್ |
ಐಂ ವಿದ್ಯಾತತ್ತ್ವಂ ಕ್ಲೀಂ ಮಾಯಾತತ್ತ್ವಂ ಸೌಶ್ಚ ಶಿವಾತ್ಮಕಮ್ || ೯ ||

ತತ್ತ್ವತ್ರಯಂ ಸಂ ಬೀಜಂ ಚ ಮೂಲಂ ಹೃತ್ಕಂಠ ಮಧ್ಯಗಃ |
ಸುಧಾಬ್ಧೌ ಹೇಮಭೂರೂಢ ಚಂಪಕೋದ್ಯಾನ ಮಧ್ಯತಃ || ೧೦ ||

ಗಾರುಡೋತ್ಪಲನಿರ್ವ್ಯೂಢ ಸ್ವರ್ಣಸಿಂಹಾಸನೋಪರಿ |
ಸ್ವರ್ಣಪಂಕಜಸಂವಿಷ್ಟಾಂ ತ್ರಿನೇತ್ರಾಂ ಶಶಿಶೇಖರಾಮ್ || ೧೧ ||

ಪೀತಾಲಂಕಾರವಸನಾಂ ಮಲ್ಲೀಚಂದನಶೋಭಿತಾಮ್ |
ಸವ್ಯಾಭಾಂ ಪಂಚಶಾಖಾಯಾಂ ವಜ್ರಂ ಜಿಹ್ವಾಂ ಚ ಬಿಭ್ರತೀಮ್ || ೧೨ ||

ಮುದ್ಗರಂ ನಾಗಪಾಶಂ ಚ ದಕ್ಷಿಣಾಭ್ಯಾಂ ಮದಾಲಸಾಮ್ |
ಭಕ್ತಾರಿವಿಗ್ರಹೋದ್ಯೋಗಪ್ರಗಲ್ಭಾಂ ಬಗಳಾಮುಖೀಮ್ || ೧೩ ||

ಧ್ಯಾಯಮಾನಸ್ಯ ಮೇ ಪಾತು ಶಾಸ್ತ್ರವೋದ್ವೇಷಣೇ ಭೃಶಮ್ |
ಭೂಕಲಾದಲದಿಕ್ಪತ್ರಷಟ್ಕೋಣಂ ತ್ರ್ಯಸ್ತ್ರಬೈಂದುಕಮ್ || ೧೪ ||

ಯಂತ್ರಂ ಪೈತಾಂಬರಂ ಪಾತು ಸಾ ಮಾಂ ಪಾಯಾದವಿಗ್ರಹಾ |
ಆಧಾರಶಕ್ತಿಮಾರಭ್ಯ ಜ್ಞಾನಾತ್ಮಾಂತಾಸ್ತು ಶಕ್ತಯಃ || ೧೫ ||

ಪೀಠಾದ್ಯಾಃ ಪಾಂತು ಪೀಠೇಽತ್ರಂ ಪ್ರಥಮಂ ಮಾಂ ಚ ರಕ್ಷತು |
ಶಾಂತಿಶಂಖವಿಶೇಷಾತ್ಮಶಕ್ತಿಭೂತಾನಿ ಪಾಂತು ಮಾಮ್ || ೧೬ ||

ಆವಾಹನಾದ್ಯಾಃ ಪಂಚಾಪಿ ಮುದ್ರಾಶ್ಚ ಸುಮನೋಜಲೈಃ |
ತ್ರಿಕೋಣಮಧ್ಯಮಾರಭ್ಯ ಪೂಜಿತಾ ಬಗಳಾಮುಖಿ || ೧೭ ||

ಕ್ರೋಧಿನೀ ಸ್ತಂಭಿನೀ ಚಾಪಿ ಧಾರಿಣ್ಯಶ್ಚಾಪಿ ಮಧ್ಯಗಾಃ |
ಓಜಃ ಪೂಷಾದಿಪೀಠಾನಿ ಕೋಣಾಗ್ರೇಷು ಸ್ಥಿತಾನಿ ವೈ || ೧೮ ||

ತ್ರಿಕೋಣ ಬಾಹ್ಯತಃ ಸಿದ್ಧನಾಥಾದ್ಯಾ ಗುರವಸ್ತಥಾ |
ಸಿದ್ಧನಾಥಃ ಸಿದ್ಧಾನಂದನಾಥಃ ಸಿದ್ಧಪರಮೇಷ್ಠಿ ಹಿ || ೧೯ ||

ನಾಥಃ ಸಿದ್ಧಃ ಶ್ರೀಕಂಠಶ್ಚ ನಾಥಃ ಸಿದ್ಧಚತುಷ್ಟಯಮ್ |
ಪಾತು ಮಾಮಥ ಷಟ್ಕೋಣೇ ಸುಭಗಾ ಭಗರೂಪಿಣೀ || ೨೦ ||

ಭಗೋದಯಾ ಚ ಭಗನಿಪಾತಿನೀ ಭಗಮಾಲಿನೀ |
ಭಗವಾಹಾ ಚ ಮಾಂ ಪಾತು ಷಟ್ಕೋಣಾಗ್ರೇಷು ಚ ಕ್ರಮಾತ್ || ೨೧ ||

ತ್ವಗಾತ್ಮಾ ಶೋಣಿತಾತ್ಮಾ ಚ ಮಾಂಸಾತ್ಮಾ ಮೇದಸಾತ್ಮಕಃ |
ರೂಪಾತ್ಮಾ ಪರಮಾತ್ಮಾ ಚ ಪಾತು ಮಾಂ ಸ್ಥಿರವಿಗ್ರಹಾ || ೨೨ ||

ಅಷ್ಟಪತ್ರೇಷು ಮೂಲೇಷು ಬ್ರಾಹ್ಮೀ ಮಾಹೇಶ್ವರೀ ತಥಾ |
ಕೌಮಾರೀ ವೈಷ್ಣವೀ ವಾರಾಹೀಂದ್ರಾಣೀ ಚ ತಥಾ ಪುನಃ || ೨೩ ||

ಚಾಮುಂಡಾ ಚ ಮಹಾಲಕ್ಷ್ಮೀಸ್ತತ್ರ ಮಧ್ಯೇ ಪುನರ್ಜಯಾ |
ವಿಜಯಾ ಚ ಜಯಾಂಬಾ ಚ ರಾಜಿತಾ ಜೃಂಭಿಣೀ ತಥಾ || ೨೪ ||

ಸ್ತಂಭಿನೀ ಮೋಹಿನೀ ವಶ್ಯಾಽಕರ್ಷಿಣ್ಯಥ ತದಗ್ರಕೇ |
ಅಸಿತಾಂಗೋ ರುರುಶ್ಚಂಡಃ ಕ್ರೌಧೋನ್ಮತ್ತಕಪಾಲಿನಃ |
ಭೀಷಣಾಶ್ಚಾಪಿ ಸಂಹಾರ ಏತೇ ರಕ್ಷಂತು ಮಾಂ ಸದಾ || ೨೫ ||

ತತಃ ಷೋಡಶಪತ್ರೇಷು ಮಂಗಳಾ ಸ್ತಂಭಿನೀ ತಥಾ |
ಜೃಂಭಿಣೀ ಮೋಹಿನೀ ವಶ್ಯಾ ಜ್ವಾಲಾ ಸಿಂಹೀ ಬಲಾಹಕಾ || ೨೬ ||

ಭೂಧರಾ ಕಲ್ಮಷಾ ಧಾತ್ರೀ ಕನ್ಯಕಾ ಕಾಲಕರ್ಷಿಣೀ |
ಭಾಂತಿಕಾ ಮಂದಗಮನಾ ಭೋಗಸ್ಥಾ ಭಾವಕೇತಿ ಚ || ೨೭ ||

ಪಾತು ಮಾಮಥ ಭೂಸದ್ಮ ದಶದಿಕ್ಷು ದಿಗೀಶ್ವರಾಃ |
ಇಂದ್ರೋಽನಲೋ ಯಮೋ ರಕ್ಷೋ ವರುಣೋ ಮಾರುತಃ ಶಶೀ || ೨೮ ||

ಈಶೋಽನಂತಃ ಸ್ವಯಂಭೂಶ್ಚ ದಶೈತೇ ಪಾಂತು ಮೇ ವಪುಃ |
ವಜ್ರಶಕ್ತಿರ್ದಂಡಖಡ್ಗೌ ಪಾಶಾಂಕುಶಗದಾಃ ಕ್ರಮಾತ್ |
ಶೂಲಂ ಚಕ್ರಂ ಸರೋಜಂ ಚ ತತ್ತಚ್ಛಸ್ತ್ರಾಣಿ ಪಾಂತು ಮಾಮ್ || ೨೯ ||

ಅಥ ಚ ಪೂರ್ವಾದಿ ಚತುರ್ದ್ವಾರೇಷು ಪರತಃ ಕ್ರಮಾತ್ |
ಪಾತು ವಿಘ್ನೇಶಬಟುಕೌ ಯೋಗಿನೀ ಕ್ಷೇತ್ರಪಾಲಕಃ || ೩೦ ||

ಗುರುತ್ರಯಂ ತ್ರಿರೇಖಾಸು ಪಾತು ಮೇ ವಪುರಂಜಸಾ |
ಪುನಃ ಪೀತಾಂಬರಾ ಪಾತು ಉಪಚಾರೈಃ ಪ್ರಪೂಜಿತಾ || ೩೧ ||

ಸಾಂಗಾವರಣಶಕ್ತಿಶ್ಚ ಜಯಶ್ರೀಃ ಪಾತು ಸರ್ವದಾ |
ವಲಯಂ ಬಟುಕಾದಿಭ್ಯೋ ರಕ್ಷಾಂ ಕುರ್ವಂತು ಮೇ ಸದಾ || ೩೨ ||

ಶಕ್ತಯಃ ಸಾಧಕಾ ವೀರಾಃ ಪಾಂತು ಮೇ ದೇವತಾ ಇಮಾಃ |
ಇತ್ಯರ್ಚಾಕ್ರಮತಃ ಪ್ರೋಕ್ತಂ ಸ್ತೋತ್ರಂ ಪೈತಾಂಬರಂ ಪರಮ್ || ೩೩ ||

ಯಃ ಪಠೇತ್ ಸಕೃದಪ್ಯೇತತ್ ಸೋಽರ್ಚಾಫಲಮವಾಪ್ನುಯಾತ್ |
ಸರ್ವಥಾ ಕಾರಯೇತ್ ಕ್ಷಿಪ್ರಂ ಪ್ರಪದ್ಯಂತೇ ಗದಾತುರಾನ್ || ೩೪ ||

ರಾಜಾನೋ ರಾಜಪತ್ನ್ಯಾಶ್ಚ ಪೌರಜಾನಪದಾಸ್ತಥಾ |
ವಶಗಾಸ್ತಸ್ಯ ಜಾಯಂತೇ ಸತತಂ ಸೇವಕಾ ಇವ || ೩೫ ||

ಗುರುಕಲ್ಪಾಶ್ಚ ವಿಬುಧಾ ಮೂಕತಾಂ ಯಾಂತಿ ತೇಽಗ್ರತಃ |
ಸ್ಥಿರಾ ಭವತಿ ತದ್ಗೇಹೇ ಚಪಲಾಪಿ ಹರಿಪ್ರಿಯಾ || ೩೬ ||

ಪೀತಾಂಬರಾಂಗವಸನೋ ಯದಿ ಲಕ್ಷಸಂಖ್ಯಂ
ಪೈತಾಂಬರಂ ಮನುಮಮುಂ ಪ್ರಜಪೇನ್ನರೋ ಯಃ |
ಹೇಮೀ ಸಕೃನ್ನಿಯಮವಾನ್ ವಿಧಿನಾ ಹರಿದ್ರಾ-
-ಮಾಲಾಂ ದಧದ್ಭವತಿ ತದ್ವಶಗಾ ತ್ರಿಲೋಕೀ || ೩೭ ||

ಭವಾನಿ ಬಗಳಾಮುಖಿ ತ್ರಿದಶಕಲ್ಪವಲ್ಲಿ ಪ್ರಭೋ
ಕೃಪಾಜಲನಿಧೇ ತವ ಚರಣಧೂತಬಾಧಾಖಿಲಃ |
ಸುರಾಸುರನರಾದಿಕಸಕಲಭಕ್ತಭಾಗ್ಯಪ್ರದೇ
ತ್ವದಂಘ್ರಿಸರಸೀರುಹದ್ವಯಮಹಂ ತು ಧ್ಯಾಯೇ ಸದಾ || ೩೮ ||

ತ್ವಮಸ್ಯ ಜಗತಾಂ ಜನಿಸ್ಥಿತಿವಿನಾಶಬೀಜಂ ನಿಜ-
-ಪ್ರಕಾಶಬಹುಲದ್ಯುತಿರ್ಭವತಿ ಭಕ್ತಹೃನ್ಮಧ್ಯಗಾ |
ತ್ರಯೀಮನು ಸುಪೂಜಿತಾ ಹರಿಹರಾದಿ ವೃಂದಾರಕೈ-
-ರನುಕ್ಷಣಮನುಕ್ಷಣಂ ಮಯಿ ಶಿವೇ ಕ್ಷಣಂ ವೀಕ್ಷ್ಯತಾಮ್ || ೩೯ ||

ಶಿವೇ ತವ ತನೂಮಹಂ ಹರಿಹರಾದ್ಯಗಮ್ಯಾಂ ಪರಾಂ
ನಿಖಿಲತಾಪಪ್ರತ್ಯೂಹಹೃದಯಾಭಾವಯುಕ್ತಾಂ ಸ್ಮರೇ |
ವಿದಾರಯ ವಿಚೂರ್ಣಯ ಗ್ಲಪಯ ಶೋಷಯ ಸ್ತಂಭಯ
ಪ್ರಣೋದಯ ವಿರೋಧಯ ಪ್ರವಿಲಯ ಪ್ರಬದ್ಧಾರಿಣಾಮ್ || ೪೦ ||

ಪಾರ್ವತಿ ಕೃಪಾಲಸನ್ಮಯಿ ಕಟಾಕ್ಷಪಾತಂ ಮನಾ-
-ಗನಾಕುಲತಯಾ ಕ್ಷಣಂ ಕ್ಷಿಪ ವಿಪಕ್ಷಸಂಕ್ಷೋಭಿಣಿ |
ಯದೀಕ್ಷಣಪಥಂ ಗತಃ ಸಕೃದಪಿ ಪ್ರಭುಃ ಕಶ್ಚನ
ಸ್ಫುಟಂ ಮಮ ವಶಂ ವದೋ ಭವತು ತೇನ ಪೀತಾಂಬರೇ || ೪೧ ||

ಓಂ ನಮೋ ಭಗವತೇ ಮಹಾರುದ್ರಾಯ ಹುಂ ಫಟ್ ಸ್ವಾಹಾ |

ಇತಿ ಅಥರ್ವಣರಹಸ್ಯೇ ಶ್ರೀ ಬಗಳಾಮುಖೀ ಸ್ತವರಾಜಃ ||