śrīdevyuvāca |
namaste śambhave tubhyaṁ namaste śaśiśekhara |
tvatprasādācchrutaṁ sarvamadhunā kavacaṁ vada || 1 ||
śrīśiva uvāca |
śṛṇu devi pravakṣyāmi kavacaṁ paramādbhutam |
yasya smaraṇamātreṇa ripoḥ stambho bhavet kṣaṇāt || 2 ||
kavacasya ca deveśi mahāmāyāprabhāvataḥ |
paṅktiśchandaḥ samuddiṣṭaṁ devatā bagalāmukhī || 3 ||
dharmārthakāmamokṣeṣu viniyogaḥ prakīrtitaḥ |
oṅkāro me śiraḥ pātu hlīṅkāro vadane’vatu || 4 ||
bagalāmukhi doryugmaṁ kaṇṭhe sarva sarvadā’vatu |
duṣṭānāṁ pātu hṛdayaṁ vācaṁ mukhaṁ tataḥ padam || 5 ||
udare sarvadā pātu stambhayeti sadā mama |
jihvāṁ kīlaya me mātarbagalā sarvadā’vatu || 6 ||
buddhiṁ vināśaya pādau tu hlīṁ oṁ me digvidikṣu ca |
svāhā me sarvadā pātu sarvatra sarvasandhiṣu || 7 ||
iti te kathitaṁ devi kavacaṁ paramādbhutam |
yasya smaraṇamātreṇa sarvastambho bhavet kṣaṇāt || 8 ||
yaddhṛtvā vividhā daityā vāsavena hatāḥ purā |
yasya prasādāt siddho’haṁ hariḥ sattvaguṇānvitaḥ || 9 ||
vedhā sṛṣṭiṁ vitanute kāmaḥ sarvajagajjayī |
likhitvā dhārayedyastu kaṇṭhe vā dakṣiṇe bhuje || 10 ||
ṣaṭkarmasiddhistasyāśu mama tulyo bhaveddhruvam |
ajñātvā kavacaṁ devi tasya mantro na sidhyati || 11 ||
iti śatruvināśaka śrī bagalāmukhī kavacam ||
Leave a Comment