ଶ୍ରୀ ଵେଂକଟେଶ୍ଵର ମଂଗଳାଷ୍ଟକମ୍

sri venkateswara mangalashtakam in odia

ଶ୍ରୀକ୍ଷୋଣ୍ୟୌ ରମଣୀୟୁଗଂ ସୁରମଣୀପୁତ୍ରୋଽପି ଵାଣୀପତିଃ
ପୌତ୍ରଶ୍ଚଂଦ୍ରଶିରୋମଣିଃ ଫଣିପତିଃ ଶୟ୍ୟା ସୁରାଃ ସେଵକାଃ ।
ତାର୍କ୍ଷ୍ୟୋ ୟସ୍ୟ ରଥୋ ମହଶ୍ଚ ଭଵନଂ ବ୍ରହ୍ମାଂଡମାଦ୍ୟଃ ପୁମାନ୍
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 1 ॥

ୟତ୍ତେଜୋ ରଵିକୋଟିକୋଟିକିରଣାନ୍ ଧିକ୍କୃତ୍ୟ ଜେଜୀୟତେ
ୟସ୍ୟ ଶ୍ରୀଵଦନାଂବୁଜସ୍ୟ ସୁଷମା ରାକେଂଦୁକୋଟୀରପି ।
ସୌଂଦର୍ୟଂ ଚ ମନୋଭଵାନପି ବହୂନ୍ କାଂତିଶ୍ଚ କାଦଂବିନୀଂ
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 2 ॥

ନାନାରତ୍ନ କିରୀଟକୁଂଡଲମୁଖୈର୍ଭୂଷାଗଣୈର୍ଭୂଷିତଃ
ଶ୍ରୀମତ୍କୌସ୍ତୁଭରତ୍ନ ଭଵ୍ୟହୃଦୟଃ ଶ୍ରୀଵତ୍ସସଲ୍ଲାଂଛନଃ ।
ଵିଦ୍ୟୁଦ୍ଵର୍ଣସୁଵର୍ଣଵସ୍ତ୍ରରୁଚିରୋ ୟଃ ଶଂଖଚକ୍ରାଦିଭିଃ
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 3 ॥

ୟତ୍ଫାଲେ ମୃଗନାଭିଚାରୁତିଲକୋ ନେତ୍ରେଽବ୍ଜପତ୍ରାୟତେ
କସ୍ତୂରୀଘନସାରକେସରମିଲଚ୍ଛ୍ରୀଗଂଧସାରୋ ଦ୍ରଵୈଃ ।
ଗଂଧୈର୍ଲିପ୍ତତନୁଃ ସୁଗଂଧସୁମନୋମାଲାଧରୋ ୟଃ ପ୍ରଭୁଃ
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 4 ॥

ଏତଦ୍ଦିଵ୍ୟପଦଂ ମମାସ୍ତି ଭୁଵି ତତ୍ସଂପଶ୍ୟତେତ୍ୟାଦରା-
-ଦ୍ଭକ୍ତେଭ୍ୟଃ ସ୍ଵକରେଣ ଦର୍ଶୟତି ୟଦ୍ଦୃଷ୍ଟ୍ୟାଽତିସୌଖ୍ୟଂ ଗତଃ ।
ଏତଦ୍ଭକ୍ତିମତୋ ମହାନପି ଭଵାଂଭୋଧିର୍ନଦୀତି ସ୍ପୃଶନ୍
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 5 ॥

ୟଃ ସ୍ଵାମୀ ସରସସ୍ତଟେ ଵିହରତୋ ଶ୍ରୀସ୍ଵାମିନାମ୍ନଃ ସଦା
ସୌଵର୍ଣାଲୟମଂଦିରୋ ଵିଧିମୁଖୈର୍ବର୍ହିର୍ମୁଖୈଃ ସେଵିତଃ ।
ୟଃ ଶତ୍ରୂନ୍ ହନୟନ୍ ନିଜାନଵତି ଚ ଶ୍ରୀଭୂଵରାହାତ୍ମକଃ
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 6 ॥

ୟୋ ବ୍ରହ୍ମାଦିସୁରାନ୍ ମୁନୀଂଶ୍ଚ ମନୁଜାନ୍ ବ୍ରହ୍ମୋତ୍ସଵାୟାଗତାନ୍
ଦୃଷ୍ଟ୍ଵା ହୃଷ୍ଟମନା ବଭୂଵ ବହୁଶସ୍ତୈରର୍ଚିତଃ ସଂସ୍ତୁତଃ ।
ତେଭ୍ୟୋ ୟଃ ପ୍ରଦଦାଦ୍ଵରାନ୍ ବହୁଵିଧାନ୍ ଲକ୍ଷ୍ମୀନିଵାସୋ ଵିଭୁଃ
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 7 ॥

ୟୋ ଦେଵୋ ଭୁଵି ଵର୍ତତେ କଲିୟୁଗେ ଵୈକୁଂଠଲୋକସ୍ଥିତୋ
ଭକ୍ତାନାଂ ପରିପାଲନାୟ ସତତଂ କାରୁଣ୍ୟଵାରାଂ ନିଧିଃ ।
ଶ୍ରୀଶେଷାଖ୍ୟମହୀଂଧ୍ରମସ୍ତକମଣିର୍ଭକ୍ତୈକଚିଂତାମଣିଃ
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 8 ॥

ଶେଷାଦ୍ରିପ୍ରଭୁମଂଗଳାଷ୍ଟକମିଦଂ ତୁଷ୍ଟେନ ୟସ୍ୟେଶିତୁଃ
ପ୍ରୀତ୍ୟର୍ଥଂ ରଚିତଂ ରମେଶଚରଣଦ୍ଵଂଦ୍ଵୈକନିଷ୍ଠାଵତା ।
ଵୈଵାହ୍ୟାଦିଶୁଭକ୍ରିୟାସୁ ପଠିତଂ ୟୈଃ ସାଧୁ ତେଷାମପି
ଶ୍ରୀମଦ୍ଵେଂକଟଭୂଧରେଂଦ୍ରରମଣଃ କୁର୍ୟାଦ୍ଧରିର୍ମଂଗଳମ୍ ॥ 9 ॥

ଇତି ଶ୍ରୀ ଵେଂକଟେଶ ମଂଗଳାଷ୍ଟକମ୍ ।

sri venkateswara mangalashtakam in odia