શ્રી વેંકટેશ્વર મંગળાષ્ટકમ્

sri venkateswara mangalashtakam in gujarati

શ્રીક્ષોણ્યૌ રમણીયુગં સુરમણીપુત્રોઽપિ વાણીપતિઃ
પૌત્રશ્ચંદ્રશિરોમણિઃ ફણિપતિઃ શય્યા સુરાઃ સેવકાઃ ।
તાર્ક્ષ્યો યસ્ય રથો મહશ્ચ ભવનં બ્રહ્માંડમાદ્યઃ પુમાન્
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 1 ॥

યત્તેજો રવિકોટિકોટિકિરણાન્ ધિક્કૃત્ય જેજીયતે
યસ્ય શ્રીવદનાંબુજસ્ય સુષમા રાકેંદુકોટીરપિ ।
સૌંદર્યં ચ મનોભવાનપિ બહૂન્ કાંતિશ્ચ કાદંબિનીં
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 2 ॥

નાનારત્ન કિરીટકુંડલમુખૈર્ભૂષાગણૈર્ભૂષિતઃ
શ્રીમત્કૌસ્તુભરત્ન ભવ્યહૃદયઃ શ્રીવત્સસલ્લાંછનઃ ।
વિદ્યુદ્વર્ણસુવર્ણવસ્ત્રરુચિરો યઃ શંખચક્રાદિભિઃ
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 3 ॥

યત્ફાલે મૃગનાભિચારુતિલકો નેત્રેઽબ્જપત્રાયતે
કસ્તૂરીઘનસારકેસરમિલચ્છ્રીગંધસારો દ્રવૈઃ ।
ગંધૈર્લિપ્તતનુઃ સુગંધસુમનોમાલાધરો યઃ પ્રભુઃ
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 4 ॥

એતદ્દિવ્યપદં મમાસ્તિ ભુવિ તત્સંપશ્યતેત્યાદરા-
-દ્ભક્તેભ્યઃ સ્વકરેણ દર્શયતિ યદ્દૃષ્ટ્યાઽતિસૌખ્યં ગતઃ ।
એતદ્ભક્તિમતો મહાનપિ ભવાંભોધિર્નદીતિ સ્પૃશન્
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 5 ॥

યઃ સ્વામી સરસસ્તટે વિહરતો શ્રીસ્વામિનામ્નઃ સદા
સૌવર્ણાલયમંદિરો વિધિમુખૈર્બર્હિર્મુખૈઃ સેવિતઃ ।
યઃ શત્રૂન્ હનયન્ નિજાનવતિ ચ શ્રીભૂવરાહાત્મકઃ
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 6 ॥

યો બ્રહ્માદિસુરાન્ મુનીંશ્ચ મનુજાન્ બ્રહ્મોત્સવાયાગતાન્
દૃષ્ટ્વા હૃષ્ટમના બભૂવ બહુશસ્તૈરર્ચિતઃ સંસ્તુતઃ ।
તેભ્યો યઃ પ્રદદાદ્વરાન્ બહુવિધાન્ લક્ષ્મીનિવાસો વિભુઃ
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 7 ॥

યો દેવો ભુવિ વર્તતે કલિયુગે વૈકુંઠલોકસ્થિતો
ભક્તાનાં પરિપાલનાય સતતં કારુણ્યવારાં નિધિઃ ।
શ્રીશેષાખ્યમહીંધ્રમસ્તકમણિર્ભક્તૈકચિંતામણિઃ
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 8 ॥

શેષાદ્રિપ્રભુમંગળાષ્ટકમિદં તુષ્ટેન યસ્યેશિતુઃ
પ્રીત્યર્થં રચિતં રમેશચરણદ્વંદ્વૈકનિષ્ઠાવતા ।
વૈવાહ્યાદિશુભક્રિયાસુ પઠિતં યૈઃ સાધુ તેષામપિ
શ્રીમદ્વેંકટભૂધરેંદ્રરમણઃ કુર્યાદ્ધરિર્મંગળમ્ ॥ 9 ॥

ઇતિ શ્રી વેંકટેશ મંગળાષ્ટકમ્ ।

sri venkateswara mangalashtakam in gujarati