ଅଷ୍ଟାଵକ୍ର ଗୀତା ଏକାଦଶୋଽଧ୍ୟାୟଃ

ashtavakra gita chapter 11 in odia

ଅଷ୍ଟାଵକ୍ର ଉଵାଚ ॥

ଭାଵାଭାଵଵିକାରଶ୍ଚ ସ୍ଵଭାଵାଦିତି ନିଶ୍ଚୟୀ ।
ନିର୍ଵିକାରୋ ଗତକ୍ଲେଶଃ ସୁଖେନୈଵୋପଶାମ୍ୟତି ॥ 11-1॥

ଈଶ୍ଵରଃ ସର୍ଵନିର୍ମାତା ନେହାନ୍ୟ ଇତି ନିଶ୍ଚୟୀ ।
ଅଂତର୍ଗଲିତସର୍ଵାଶଃ ଶାଂତଃ କ୍ଵାପି ନ ସଜ୍ଜତେ ॥ 11-2॥

ଆପଦଃ ସଂପଦଃ କାଲେ ଦୈଵାଦେଵେତି ନିଶ୍ଚୟୀ ।
ତୃପ୍ତଃ ସ୍ଵସ୍ଥେଂଦ୍ରିୟୋ ନିତ୍ୟଂ ନ ଵାଂଛତି ନ ଶୋଚତି ॥ 11-3॥

ସୁଖଦୁଃଖେ ଜନ୍ମମୃତ୍ୟୂ ଦୈଵାଦେଵେତି ନିଶ୍ଚୟୀ ।
ସାଧ୍ୟାଦର୍ଶୀ ନିରାୟାସଃ କୁର୍ଵନ୍ନପି ନ ଲିପ୍ୟତେ ॥ 11-4॥

ଚିଂତୟା ଜାୟତେ ଦୁଃଖଂ ନାନ୍ୟଥେହେତି ନିଶ୍ଚୟୀ ।
ତୟା ହୀନଃ ସୁଖୀ ଶାଂତଃ ସର୍ଵତ୍ର ଗଲିତସ୍ପୃହଃ ॥ 11-5॥

ନାହଂ ଦେହୋ ନ ମେ ଦେହୋ ବୋଧୋଽହମିତି ନିଶ୍ଚୟୀ ।
କୈଵଲ୍ୟମିଵ ସଂପ୍ରାପ୍ତୋ ନ ସ୍ମରତ୍ୟକୃତଂ କୃତମ୍ ॥ 11-6॥

ଆବ୍ରହ୍ମସ୍ତଂବପର୍ୟଂତମହମେଵେତି ନିଶ୍ଚୟୀ ।
ନିର୍ଵିକଲ୍ପଃ ଶୁଚିଃ ଶାଂତଃ ପ୍ରାପ୍ତାପ୍ରାପ୍ତଵିନିର୍ଵୃତଃ ॥ 11-7॥

ନାନାଶ୍ଚର୍ୟମିଦଂ ଵିଶ୍ଵଂ ନ କିଂଚିଦିତି ନିଶ୍ଚୟୀ ।
ନିର୍ଵାସନଃ ସ୍ଫୂର୍ତିମାତ୍ରୋ ନ କିଂଚିଦିଵ ଶାମ୍ୟତି ॥ 11-8॥

ashtavakra gita chapter 11 in odia