ശ്രീ ലലിതാ സ്തവരത്നമ് (ആര്യാ ദ്വിശതീ)

sri lalitha stavaratnam arya dwishati in malayalam

വംദേ ഗജേംദ്രവദനം
വാമാംകാരൂഢവല്ലഭാശ്ലിഷ്ടമ് ।
കുംകുമപരാഗശോണം
കുവലയിനീജാരകോരകാപീഡമ് ॥ 1 ॥

സ ജയതി സുവര്ണശൈലഃ
സകലജഗച്ചക്രസംഘടിതമൂര്തിഃ ।
കാംചനനികുംജവാടീ-
-കംദലദമരീപ്രപംചസംഗീതഃ ॥ 2 ॥

ഹരിഹയനൈരൃതമാരുത-
-ഹരിതാമംതേഷ്വവസ്ഥിതം തസ്യ ।
വിനുമഃ സാനുത്രിതയം
വിധിഹരിഗൌരീശവിഷ്ടപാധാരമ് ॥ 3 ॥

മധ്യേ പുനര്മനോഹര-
-രത്നരുചിസ്തബകരംജിതദിഗംതമ് ।
ഉപരി ചതുഃശതയോജന-
-മുത്തുംഗം ശൃംഗപുംഗവമുപാസേ ॥ 4 ॥

തത്ര ചതുഃശതയോജന-
-പരിണാഹം ദേവശില്പിനാ രചിതമ് ।
നാനാസാലമനോജ്ഞം
നമാമ്യഹം നഗരമാദിവിദ്യായാഃ ॥ 5 ॥

പ്രഥമം സഹസ്രപൂർവക-
-ഷട്ശതസംഖ്യാകയോജനം പരിതഃ ।
വലയീകൃതസ്വഗാത്രം
വരണം ശരണം വ്രജാമ്യയോരൂപമ് ॥ 6 ॥

തസ്യോത്തരേ സമീരണ-
-യോജനദൂരേ തരംഗിതച്ഛായഃ ।
ഘടയതു മുദം ദ്വിതീയോ
ഘംടാസ്തനസാരനിര്മിതഃ സാലഃ ॥ 7 ॥

ഉഭയോരംതരസീമ-
-ന്യുദ്ദാമഭ്രമരരംജിതോദാരമ് ।
ഉപവനമുപാസ്മഹേ വയ-
-മൂരീകൃതമംദമാരുതസ്യംദമ് ॥ 8 ॥

ആലിംഗ്യ ഭദ്രകാലീ-
-മാസീനസ്തത്ര ഹരിശിലാശ്യാമാമ് ।
മനസി മഹാകാലോ മേ
വിഹരതു മധുപാനവിഭ്രമന്നേത്രഃ ॥ 9 ॥

താര്തീയീകോ വരണ-
-സ്തസ്യോത്തരസീമ്നി വാതയോജനതഃ ।
താമ്രേണ രചിതമൂര്തി-
-സ്തനുതാമാചംദ്രതാരകം ഭദ്രമ് ॥ 10 ॥

മധ്യേ തയോശ്ച മണിമയ-
-പല്ലവശാഖാപ്രസൂനപക്ഷ്മലിതാമ് ।
കല്പാനോകഹവാടീം
കലയേ മകരംദപംകിലാവാലാമ് ॥ 11 ॥

തത്ര മധുമാധവശ്രീ-
-തരുണീഭ്യാം തരലദൃക്ചകോരാഭ്യാമ് ।
ആലിംഗിതോഽവതാന്മാ-
-മനിശം പ്രഥമര്തുരാത്തപുഷ്പാസ്ത്രഃ ॥ 12 ॥

നമത തദുത്തരഭാഗേ
നാകിപഥോല്ലംഘിശൃംഗസംഘാതമ് ।
സീസാകൃതിം തുരീയം
സിതകിരണാലോകനിര്മലം സാലമ് ॥ 13 ॥

സാലദ്വയാംതരാലേ
സരലാലികപോതചാടുസുഭഗായാമ് ।
സംതാനവാടികായാം
സക്തം ചേതോഽസ്തു സതതമസ്മാകമ് ॥ 14 ॥

തത്ര തപനാതിരൂക്ഷഃ
സാമ്രാജ്ഞീചരണസാംദ്രിതസ്വാംതഃ ।
ശുക്രശുചിശ്രീസഹിതോ
ഗ്രീഷ്മര്തുര്ദിശതു കീര്തിമാകല്പമ് ॥ 15 ॥

ഉത്തരസീമനി തസ്യോ-
-ന്നതശിഖരോത്കംപിഹാടകപതാകഃ ।
പ്രകടയതു പംചമോ നഃ
പ്രാകാരഃ കുശലമാരകൂടമയഃ ॥ 16 ॥

പ്രാകാരയോശ്ച മധ്യേ
പല്ലവിതാന്യഭൃതപംചമോന്മേഷാ ।
ഹരിചംദനദ്രുവാടീ-
-ഹരതാദാമൂലമസ്മദനുതാപമ് ॥ 17 ॥

തത്ര നഭഃ ശ്രീമുഖ്യൈ-
-സ്തരുണീവര്ഗൈഃ സമന്വിതഃ പരിതഃ ।
വജ്രാട്ടഹാസമുഖരോ
വാംഛാപൂര്തിം തനോതു വര്ഷര്തുഃ ॥ 18 ॥

മാരുതയോജനദൂരേ
മഹനീയസ്തസ്യ ചോത്തരേ ഭാഗേ ।
ഭദ്രം കൃഷീഷ്ട ഷഷ്ഠഃ
പ്രാകാരഃ പംചലോഹധാതുമയഃ ॥ 19 ॥

അനയോര്മധ്യേ സംതത-
-മംകൂരദ്ദിവ്യകുസുമഗംധായാമ് ।
മംദാരവാടികായാം
മാനസമംഗീകരോതു മേ വിഹൃതിമ് ॥ 20 ॥

തസ്യാമിഷോര്ജലക്ഷ്മീ-
-തരുണീഭ്യാം ശരദൃതുഃ സദാ സഹിതഃ ।
അഭ്യര്ചയന് സ ജീയാ-
-ദംബാമാമോദമേദുരൈഃ കുസുമൈഃ ॥ 21 ॥

തസ്യര്ഷിസംഖ്യയോജന-
-ദൂരേ ദേദീപ്യമാനശൃംഗൌഘഃ ।
കലധൌതകലിതമൂര്തിഃ
കല്യാണം ദിശതു സപ്തമഃ സാലഃ ॥ 22 ॥

മധ്യേ തയോര്മരുത്പഥ
ലംഘിതവിടപാഗ്രവിരുതകലകംഠാ ।
ശ്രീപാരിജാതവാടീ
ശ്രിയമനിശം ദിശതു ശീതലോദ്ദേശാ ॥ 23 ॥

തസ്യാമതിപ്രിയാഭ്യാം
സഹ ഖേലന് സഹസഹസ്യലക്ഷ്മീഭ്യാമ് ।
സാമംതോ ഝഷകേതോ-
-ര്ഹേമംതോ ഭവതു ഹേമവൃദ്ധ്യൈ നഃ ॥ 24 ॥

ഉത്തരതസ്തസ്യ മഹാ-
-നുദ്ഭടഹുതഭുക്ശിഖാരുണമയൂഖഃ ।
തപനീയഖംഡരചിത-
-സ്തനുതാദായുഷ്യമഷ്ടമോ വരണഃ ॥ 25 ॥

കാദംബവിപിനവാടീ-
-മനയോര്മധ്യഭുവി കല്പിതാവാസാമ് ।
കലയാമി സൂനകോരക-
-കംദലിതാമോദതുംദിലസമീരാമ് ॥ 26 ॥

തസ്യാമതിശിശിരാകൃതി-
-രാസീനസ്തപതപസ്യലക്ഷ്മീഭ്യാമ് ।
ശിവമനിശം കുരുതാന്മേ
ശിശിരര്തുഃ സതതശീതലദിഗംതഃ ॥ 27 ॥

തസ്യാം കദംബവാട്യാം
തത്പ്രസവാമോദമിലിതമധുഗംധമ് ।
സപ്താവരണമനോജ്ഞം
ശരണം സമുപൈമി മംത്രിണീശരണമ് ॥ 28 ॥

തത്രാലയേ വിശാലേ
തപനീയാരചിതതരലസോപാനേ ।
മാണിക്യമംഡപാംത-
-ര്മഹിതേ സിംഹാസനേ സുമണിഖചിതേ ॥ 29 ॥

ബിംദുത്രിപംചകോണ-
-ദ്വിപനൃപവസുവേദദലകുരേഖാഢ്യേ ।
ചക്രേ സദാ നിവിഷ്ടാം
ഷഷ്ഠ്യഷ്ടത്രിംശദക്ഷരേശാനീമ് ॥ 30 ॥

താപിംഛമേചകാഭാം
താലീദലഘടിതകര്ണതാടംകാമ് ।
താംബൂലപൂരിതമുഖീം
താമ്രാധരബിംബദൃഷ്ടദരഹാസാമ് ॥ 31 ॥

കുംകുമപംകിലദേഹാം
കുവലയജീവാതുശാവകവതംസാമ് ।
കോകനദശോണചരണാം
കോകിലനിക്വാണകോമലാലാപാമ് ॥ 32 ॥

വാമാംഗഗലിതചൂലീം
വനമാല്യകദംബമാലികാഭരണാമ് ।
മുക്താലലംതികാംചിത
മുഗ്ധാലികമിലിതചിത്രകോദാരാമ് ॥ 33 ॥

കരവിധൃതകീരശാവക-
-കലനിനദവ്യക്തനിഖിലനിഗമാര്ഥാമ് ।
വാമകുചസംഗിവീണാവാദന-
-സൌഖ്യാര്ധമീലിതാക്ഷിയുഗാമ് ॥ 34 ॥

ആപാടലാംശുകധരാ-
-മാദിരസോന്മേഷവാസിതകടാക്ഷാമ് ।
ആമ്നായസാരഗുലികാ-
-മാദ്യാം സംഗീതമാതൃകാം വംദേ ॥ 35 ॥

തസ്യ ച സുവര്ണസാല-
-സ്യോത്തരതസ്തരുണകുംകുമച്ഛായഃ ।
ശമയതു മമ സംതാപം
സാലോ നവമഃ സ പുഷ്പരാഗമയഃ ॥ 36 ॥

അനയോരംതരവസുധാഃ
പ്രണുമഃ പ്രത്യഗ്രപുഷ്പരാഗമയീഃ ।
സിംഹാസനേശ്വരീമനു-
-ചിംതനനിസ്തംദ്രസിദ്ധനീരംധ്രാഃ ॥ 37 ॥

തത്സാലോത്തരദേശേ
തരുണജപാകിരണധോരണീശോണഃ ।
പ്രശമയതു പദ്മരാഗ-
-പ്രാകാരോ മമ പരാഭവം ദശമഃ ॥ 38 ॥

അംതരഭൂകൃതവാസാ-
-നനയോരപനീതചിത്തവൈമത്യാന് ।
ചക്രേശീപദഭക്താം-
-ശ്ചാരണവര്ഗാനഹര്നിശം കലയേ ॥ 39 ॥

സാരംഗവാഹയോജനദൂരേ-
-ഽസംഘടിതകേതനസ്തസ്യ ।
ഗോമേദകേന രചിതോ
ഗോപായതു മാം സമുന്നതഃ സാലഃ ॥ 40 ॥

വപ്രദ്വയാംതരോർവ്യാം
വടുകൈർവിവിധൈശ്ച യോഗിനീബൃംദൈഃ ।
സതതം സമര്ചിതായാഃ
സംകര്ഷണ്യാഃ പ്രണൌമി ചരണാബ്ജമ് ॥ 41 ॥

താപസയോജനദൂരേ
തസ്യ സമുത്തുംഗ ഗോപുരോപേതഃ ।
വാംഛാപൂര്ത്യൈ ഭവതാ-
-ദ്വജ്രമണീനികരനിര്മിതോ വപ്രഃ ॥ 42 ॥

വരണദ്വിതയാംതരതോ
വാസജുഷോ വിഹിതമധുരസാസ്വാദാഃ ।
രംഭാദിവിബുധവേശ്യാ
രചയംതു മഹാംതമസ്മദാനംദമ് ॥ 43 ॥

തത്ര സദാ പ്രവഹംതീ
തടിനീ വജ്രാഭിധാ ചിരം ജീയാത് ।
ചടുലോര്മിജാലനൃത്യ-
-ത്കലഹംസീകുലകലക്വണിതപുഷ്ടാ ॥ 44 ॥

രോധസി തസ്യാ രുചിരേ
വജ്രേശീ ജയതി വജ്രഭൂഷാഢ്യാ ।
വജ്രപ്രദാനതോഷിത-
-വജ്രിമുഖത്രിദശവിനുതചാരിത്രാ ॥ 45 ॥

തസ്യോദീച്യാം ഹരിതി
സ്തവകിതസുഷമാവലീഢവിയദംതഃ ।
വൈഡൂര്യരത്നരചിതോ
വൈമല്യം ദിശതു ചേതസോ വരണഃ ॥ 46 ॥

അധിമധ്യമേതയോഃ പുന-
-രംബാചരണാവലംബിതസ്വാംതാന് ।
കാര്കോടകാദിനാഗാന്
കലയാമഃ കിം ച ബലിമുഖാന് ദനുജാന് ॥ 47 ॥

ഗംധവഹസംഖ്യയോജന-
-ദൂരേ ഗഗനോര്ധ്വജാംഘികസ്തസ്യ ।
വാസവമണിപ്രണീതോ
വരണോ ബഹലയതു വൈദുഷീം വിശദാമ് ॥ 48 ॥

മധ്യക്ഷോണ്യാമനയോ-
-ര്മഹേംദ്രനീലാത്മകാനി ച സരാംസി ।
ശാതോദരീസഹായാ-
-ന്ഭൂപാലാനപി പുനഃ പുനഃ പ്രണുമഃ ॥ 49 ॥

ആശുഗയോജനദൂരേ
തസ്യോര്ധ്വം കാംതിധവലിതദിഗംതഃ ।
മുക്താവിരചിതഗാത്രോ
മുഹുരസ്മാകം മുദേ ഭവതു സാലഃ ॥ 50 ॥

ആവൃത്ത്യോരധിമധ്യം
പൂർവസ്യാം ദിശി പുരംദരഃ ശ്രീമാന് ।
അഭ്രമുവിടാധിരൂഢോ
വിഭ്രമമസ്മാകമനിശമാതനുതാത് ॥ 51 ॥

തത്കോണേ വ്യജനസ്രു-
-ക്തോമരപാത്രസ്രുവാന്നശക്തിധരഃ ।
സ്വാഹാസ്വധാസമേതഃ
സുഖയതു മാം ഹവ്യവാഹനഃ സുചിരമ് ॥ 52 ॥

ദക്ഷിണദിഗംതരാലേ
ദംഡധരോ നീലനീരദച്ഛായഃ ।
ത്രിപുരാപദാബ്ജഭക്തസ്തിരയതു
മമ നിഖിലമംഹസാം നികരമ് ॥ 53 ॥

തസ്യൈവ പശ്ചിമായാം
ദിശി ദലിതേംദീവരപ്രഭാശ്യാമഃ ।
ഖേടാസിയഷ്ടിധാരീ
ഖേദാനപനയതു യാതുധാനോ മേ ॥ 54 ॥

തസ്യാ ഉത്തരദേശേ
ധവലാംഗോ വിപുലഝഷവരാരൂഢഃ ।
പാശായുധാത്തപാണിഃ
പാശീ വിദലയതു പാശജാലാനി ॥ 55 ॥

വംദേ തദുത്തരഹരി-
-ത്കോണേ വായും ചമൂരുവരവാഹമ് ।
കോരകിതതത്ത്വബോധാ-
-ന്ഗോരക്ഷപ്രമുഖയോഗിനോഽപി മുഹുഃ ॥ 56 ॥

തരുണീരിഡാപ്രധാനാ-
-സ്തിസ്രോ വാതസ്യ തസ്യ കൃതവാസാഃ ।
പ്രത്യഗ്രകാപിശായന-
-പാനപരിഭ്രാംതലോചനാഃ കലയേ ॥ 57 ॥

തല്ലോകപൂർവഭാഗേ
ധനദം ധ്യായാമി ശേവധികുലേശമ് ।
അപി മാണിഭദ്രമുഖ്യാ-
-നംബാചരണാവലംബിനോ യക്ഷാന് ॥ 58 ॥

തസ്യൈവ പൂർവസീമനി
തപനീയാരചിതഗോപുരേ നഗരേ ।
കാത്യായനീസഹായം
കലയേ ശീതാംശുഖംഡചൂഡാലമ് ॥ 59 ॥

തത്പുരഷോഡശവരണ-
-സ്ഥലഭാജസ്തരുണചംദ്രചൂഡാലാന് ।
രുദ്രാധ്യായേ പഠിതാ-
-ന്രുദ്രാണീസഹചരാന്ഭജേ രുദ്രാന് ॥ 60 ॥

പവമാനസംഖ്യയോജന-
-ദൂരേ ബാലതൃണ്മേചകസ്തസ്യ ।
സാലോ മരകതരചിതഃ
സംപദമചലാം ശ്രിയം ച പുഷ്ണാതു ॥ 61 ॥

ആവൃതിയുഗ്മാംതരതോ
ഹരിതമണീനിവഹമേചകേ ദേശേ ।
ഹാടകതാലീവിപിനം
ഹാലാഘടഘടിതവിടപമാകലയേ ॥ 62 ॥

തത്രൈവ മംത്രിണീഗൃഹ-
-പരിണാഹം തരലകേതനം സദനമ് ।
മരകതസൌധമനോജ്ഞം
ദദ്യാദായൂംഷി ദംഡനാഥായാഃ ॥ 63 ॥

സദനേ തത്ര ഹരിന്മണി-
-സംഘടിതേ മംഡപേ ശതസ്തംഭേ ।
കാര്തസ്വരമയപീഠേ
കനകമയാംബുരുഹകര്ണികാമധ്യേ ॥ 64 ॥

ബിംദുത്രികോണവര്തുല-
-ഷഡസ്രവൃത്തദ്വയാന്വിതേ ചക്രേ ।
സംചാരിണീ ദശോത്തര-
ശതാര്ണമനുരാജകമലകലഹംസീ ॥ 65 ॥

കോലവദനാ കുശേശയ-
-നയനാ കോകാരിമംഡിതശിഖംഡാ ।
സംതപ്തകാംചനാഭാ
സംധ്യാരുണചേലസംവൃതനിതംബാ ॥ 66 ॥

ഹലമുസലശംഖചക്രാ-
-ഽംകുശപാശാഭയവരസ്ഫുരിതഹസ്താ ।
കൂലംകഷാനുകംപാ
കുംകുമജംബാലിതസ്തനാഭോഗാ ॥ 67 ॥

ധൂര്താനാമതിദൂരാ-
-വാര്താശേഷാവലഗ്നകമനീയാ ।
ആര്താലീശുഭദാത്രീ
വാര്താലീ ഭവതു വാംഛിതാര്ഥായ ॥ 68 ॥

തസ്യാഃ പരിതോ ദേവീഃ
സ്വപ്നേശ്യുന്മത്തഭൈരവീമുഖ്യാഃ ।
പ്രണമത ജംഭിന്യാദ്യാഃ
ഭൈരവവര്ഗാംശ്ച ഹേതുകപ്രമുഖാന് ॥ 69 ॥

പൂർവോക്തസംഖ്യയോജന-
-ദൂരേ പൂയാംശുപാടലസ്തസ്യ ।
വിദ്രാവയതു മദാര്തിം
വിദ്രുമസാലോ വിശംകടദ്വാരഃ ॥ 70 ॥

ആവരണയോരഹര്നിശ-
-മംതരഭൂമൌപ്രകാശശാലിന്യാമ് ।
ആസീനമംബുജാസന-
-മഭിനവസിംദൂരഗൌരമഹമീഡേ ॥ 71 ॥

വരണസ്യ തസ്യ മാരുത-
-യോജനതോ വിപുലഗോപുരദ്വാരഃ ।
സാലോ നാനാരത്നൈഃ
സംഘടിതാംഗഃ കൃഷീഷ്ട മദഭീഷ്ടമ് ॥ 72 ॥

അംതരകക്ഷ്യാമനയോ-
-രവിരലശോഭാപിചംഡിലോദ്ദേശാമ് ।
മാണിക്യമംഡപാഖ്യാം
മഹതീമധിഹൃദയമനിശമാകലയേ ॥ 73 ॥

തത്ര സ്ഥിതം പ്രസന്നം
തരുണതമാലപ്രവാലകിരണാഭമ് ।
കര്ണാവലംബികുംഡല-
-കംദലിതാഭീശുകവചിതകപോലമ് ॥ 74 ॥

ശോണാധരം ശുചിസ്മിത-
-മേണാംകവദനമേധമാനകൃപമ് ।
മുഗ്ധൈണമദവിശേഷക-
-മുദ്രിതനിടിലേംദുരേഖികാരുചിരമ് ॥ 75 ॥

നാലീകദലസഹോദര-
-നയനാംചലഘടിതമനസിജാകൂതമ് ।
കമലാകഠിനപയോധര-
-കസ്തൂരീഘുസൃണപംകിലോരസ്കമ് ॥ 76 ॥

ചാംപേയഗംധികൈശ്യം
ശംപാസബ്രഹ്മചാരികൌശേയമ് ।
ശ്രീവത്സകൌസ്തുഭധരം
ശ്രിതജനരക്ഷാധുരീണചരണാബ്ജമ് ॥ 77 ॥

കംബുസുദര്ശനവിലസ-
-ത്കരപദ്മം കംഠലോലവനമാലമ് ।
മുചുകുംദമോക്ഷഫലദം
മുകുംദമാനംദകംദമവലംബേ ॥ 78 ॥

തദ്വരണോത്തരഭാഗേ
താരാപതിബിംബചുംബിനിജശൃംഗഃ ।
വിവിധമണീഗണഘടിതോ
വിതരതു സാലോ വിനിര്മലാം ധിഷണാമ് ॥ 79 ॥

പ്രാകാരദ്വിതയാംതര-
-കക്ഷ്യാം പൃഥുരത്നനികരസംകീര്ണാമ് ।
നമത സഹസ്രസ്തംഭക-
-മംഡപനാമ്നാതിവിശ്രുതാം ഭുവനേ ॥ 80 ॥

പ്രണുമസ്തത്ര ഭവാനീ-
-സഹചരമീശാനമിംദുഖംഡധരമ് ।
ശൃംഗാരനായികാമനു-
-ശീലനഭാജോഽപി ഭൃംഗിനംദിമുഖാന് ॥ 81 ॥

തസ്യൈണവാഹയോജന-
-ദൂരേ വംദേ മനോമയം വപ്രമ് ।
അംകൂരന്മണികിരണാ-
-മംതരകക്ഷ്യാം ച നിര്മലാമനയോഃ ॥ 82 ॥

തത്രൈവാമൃതവാപീം
തരലതരംഗാവലീഢതടയുഗ്മാമ് ।
മുക്താമയകലഹംസീ-
-മുദ്രിതകനകാരവിംദസംദോഹാമ് ॥ 83 ॥

ശക്രോപലമയഭൃംഗീ-
-സംഗീതോന്മേഷഘോഷിതദിഗംതാമ് ।
കാംചനമയാംഗവിലസ-
-ത്കാരംഡവഷംഡതാംഡവമനോജ്ഞാമ് ॥ 84 ॥

കുരുവിംദാത്മകഹല്ലക-
-കോരകസുഷമാസമൂഹപാടലിതാമ് ।
കലയേ സുധാസ്വരൂപാം
കംദലിതാമംദകൈരവാമോദാമ് ॥ 85 ॥

തദ്വാപികാംതരാലേ തരലേ
മണിപോതസീമ്നി വിഹരംതീമ് ।
സിംദൂരപാടലാംഗീം
സിതകിരണാംകൂരകല്പിതവതംസാമ് ॥ 86 ॥

പർവേംദുബിംബവദനാം
പല്ലവശോണാധരസ്ഫുരിതഹാസാമ് ।
കുടിലകബരീം കുരംഗീ-
-ശിശുനയനാം കുംഡലസ്ഫുരിതഗംഡാമ് ॥ 87 ॥

നികടസ്ഥപോതനിലയാഃ
ശക്തീഃ ശയവിധൃതഹേമശൃംഗജലൈഃ ।
പരിഷിംചംതീം പരിത-
-സ്താരാം താരുണ്യഗർവിതാം വംദേ ॥ 88 ॥

പ്രാഗുക്തസംഖ്യയോജനദൂരേ
പ്രണമാമി ബുദ്ധിമയസാലമ് ।
അനയോരംതരകക്ഷ്യാ-
-മഷ്ടാപദപുഷ്ടമേദിനീം രുചിരാമ് ॥ 89 ॥

കാദംബരീനിധാനാം
കലയാമ്യാനംദവാപികാം തസ്യാമ് ।
ശോണാശ്മനിവഹനിര്മിത-
-സോപാനശ്രേണിശോഭമാനതടീമ് ॥ 90 ॥

മാണിക്യതരണിനിലയാം
മധ്യേ തസ്യാ മദാരുണകപോലാമ് ।
അമൃതേശീത്യഭിധാനാ-
-മംതഃ കലയാമി വാരുണീം ദേവീമ് ॥ 91 ॥

സൌവര്ണകേനിപാതന-
-ഹസ്താഃ സൌംദര്യഗർവിതാ ദേവ്യഃ ।
തത്പുരതഃ സ്ഥിതിഭാജോ
വിതരംത്വസ്മാകമായുഷോ വൃദ്ധിമ് ॥ 92 ॥

തസ്യ പൃഷദശ്വയോജന-
-ദൂരേഽഹംകാരസാലമതിതുംഗമ് ।
വംദേ തയോശ്ച മധ്യേ
കക്ഷ്യാം വലമാനമലയപവമാനാമ് ॥ 93 ॥

വിനുമോ വിമര്ശവാപീം
സൌഷുമ്നസുധാസ്വരൂപിണീം തത്ര ।
വേലാതിലംഘ്യവീചീ-
-കോലാഹലഭരിതകൂലവനവാടീമ് ॥ 94 ॥

തത്രൈവ സലിലമധ്യേ
താപിംഛദലപ്രപംചസുഷമാഭാമ് ।
ശ്യാമലകംചുകലസിതാം
ശ്യാമാവിടബിംബഡംബരഹരാസ്യാമ് ॥ 95 ॥

ആഭുഗ്നമസൃണചില്ലീ-
-ഹസിതായുഗ്മശരകാര്മുകവിലാസാമ് ।
മംദസ്മിതാംചിതമുഖീം
മണിമയതാടംകമംഡിതകപോലാമ് ॥ 96 ॥

കുരുവിംദതരണിനിലയാം
കുലാചലസ്പര്ധികുചനമന്മധ്യാമ് ।
കുംകുമവിലിപ്തഗാത്രീം
കുരുകുല്ലാം മനസി കുര്മഹേ സതതമ് ॥ 97 ॥

തത്സാലോത്തരഭാഗേ
ഭാനുമയം വപ്രമാശ്രയേ ദീപ്തമ് ।
മധ്യം ച വിപുലമനയോ-
-ര്മന്യേ വിശ്രാംതമാതപോദ്ഗാരമ് ॥ 98 ॥

തത്ര കുരുവിംദപീഠേ
താമരസേ കനകകര്ണികാഘടിതേ ।
ആസീനമരുണവാസസ-
-മമ്ലാനപ്രസവമാലികാഭരണമ് ॥ 99 ॥

ചക്ഷുഷ്മതീപ്രകാശന-
-ശക്തിച്ഛായാസമാരചിതകേലിമ് ।
മാണിക്യമുകുടരമ്യം
മന്യേ മാര്താംഡഭൈരവം ഹൃദയേ ॥ 100 ॥

ഇംദുമയസാലമീഡേ
തസ്യോത്തരതസ്തുഷാരഗിരിഗൌരമ് ।
അത്യംതശിശിരമാരുത-
-മനയോര്മധ്യം ച ചംദ്രികോദ്ഗാരമ് ॥ 101 ॥

തത്ര പ്രകാശമാനം
താരാനികരൈഃ പരിഷ്കൃതോദ്ദേശമ് ।
അമൃതമയകാംതികംദല-
-മംതഃ കലയാമി കുംദസിതമിംദുമ് ॥ 102 ॥

ശൃംഗാരസാലമീഡേ
ശൃംഗോല്ലസിതം തദുത്തരേ ഭാഗേ ।
മധ്യസ്ഥലേ തയോരപി
മഹിതാം ശൃംഗാരപൂർവികാം പരിഖാമ് ॥ 103 ॥

തത്ര മണിനൌസ്ഥിതാഭി-
-സ്തപനീയാവിരചിതാഗ്രഹസ്താഭിഃ ।
ശൃംഗാരദേവതാഭിഃ
സഹിതം പരിഖാധിപം ഭജേ മദനമ് ॥ 104 ॥

ശൃംഗാരവരണവര്യസ്യോത്തരതഃ
സകലവിബുധസംസേവ്യമ് ।
ചിംതാമണിഗണരചിതം
ചിംതാം ദൂരീകരോതു മേ സദനമ് ॥ 105 ॥

മണിസദനസാലയോരധി-
-മധ്യം ദശതാലഭൂമിരുഹദീര്ഘൈഃ ।
പര്ണൈഃ സുവര്ണവര്ണൈ-
-ര്യുക്താം കാംഡൈശ്ച യോജനോത്തുംഗൈഃ ॥ 106 ॥

മൃദുലൈസ്താലീപംചക-
-മാനൈര്മിലിതാം ച കേസരകദംബൈഃ ।
സംതതഗലിതമരംദ-
-സ്രോതോനിര്യന്മിലിംദസംദോഹാമ് ॥ 107 ॥

പാടീരപവനബാലക-
-ധാടീനിര്യത്പരാഗപിംജരിതാമ് ।
കലഹംസീകുലകലകല-
-കൂലംകഷനിനദനിചയകമനീയാമ് ॥ 108 ॥

പദ്മാടവീം ഭജാമഃ
പരിമലകല്ലോലപക്ഷ്മലോപാംതാമ് ।
[ ദേവ്യര്ഘ്യപാത്രധാരീ
തസ്യാഃ പൂർവദിശി ദശകലായുക്തഃ । ]
വലയിതമൂര്തിര്ഭഗവാ-
-ന്വഹ്നിഃ ക്രോശോന്നതശ്ചിരം പായാത് ॥ 109 ॥

തത്രാധാരേ ദേവ്യാഃ
പാത്രീരൂപഃ പ്രഭാകരഃ ശ്രീമാന് ।
ദ്വാദശകലാസമേതോ
ധ്വാംതം മമ ബഹുലമാംതരം ഭിംദ്യാത് ॥ 110 ॥

തസ്മിന് ദിനേശപാത്രേ
തരംഗിതാമോദമമൃതമയമര്ഘ്യമ് ।
ചംദ്രകലാത്മകമമൃതം
സാംദ്രീകുര്യാദമംദമാനംദമ് ॥ 111 ॥

അമൃതേ തസ്മിന്നഭിതോ
വിഹരംത്യോ വിവിധമണിതരണിഭാജഃ ।
ഷോഡശ കലാഃ സുധാംശോഃ
ശോകാദുത്താരയംതു മാമനിശമ് ॥ 112 ॥

തത്രൈവ വിഹൃതിഭാജോ
ധാതൃമുഖാനാം ച കാരണേശാനാമ് ।
സൃഷ്ട്യാദിരൂപികാസ്താഃ
ശമയംത്വഖിലാഃ കലാശ്ച സംതാപമ് ॥ 113 ॥

കീനാശവരുണകിന്നര-
-രാജദിഗംതേഷു രത്നഗേഹസ്യ ।
കലയാമി താന്യജസ്രം
കലയംത്വായുഷ്യമര്ഘ്യപാത്രാണി ॥ 114 ॥

പാത്രസ്ഥലസ്യ പുരതഃ
പദ്മാരമണവിധിപാർവതീശാനാമ് ।
ഭവനാനി ശര്മണേ നോ
ഭവംതു ഭാസാ പ്രദീപിതജഗംതി ॥ 115 ॥

സദനസ്യാനലകോണേ
സതതം പ്രണമാമി കുംഡമാഗ്നേയമ് ।
തത്ര സ്ഥിതം ച വഹ്നിം
തരലശിഖാജടിലമംബികാജനകമ് ॥ 116 ॥

തസ്യാസുരദിശി താദൃശ-
-രത്നപരിസ്ഫുരിതപർവനവകാഢ്യമ് ।
ചക്രാത്മകം ശതാംഗം
ശതയോജനമുന്നതം ഭജേ ദിവ്യമ് ॥ 117 ॥

തത്രൈവ ദിശി നിഷണ്ണം
തപനീയധ്വജപരംപരാശ്ലിഷ്ടമ് ।
രഥമപരം ച ഭവാന്യാ
രചയാമോ മനസി രത്നമയചൂഡമ് ॥ 118 ॥

ഭവനസ്യ വായുഭാഗേ
പരിഷ്കൃതോ വിവിധവൈജയംതീഭിഃ ।
രചയതു മുദം രഥേംദ്രഃ
സചിവേശാന്യാഃ സമസ്തവംദ്യായാഃ ॥ 119 ॥

കുര്മോഽധിഹൃദയമനിശം
ക്രോഡാസ്യായാഃ ശതാംഗമൂര്ധന്യമ് ।
രുദ്രദിശി രത്നധാമ്നോ
രുചിരശലാകാപ്രപംചകംചുകിതമ് ॥ 120 ॥

പരിതോ ദേവീധാമ്നഃ
പ്രണീതവാസാ മനുസ്വരൂപിണ്യഃ ।
കുർവംതു രശ്മിമാലാ-
-കൃതയഃ കുശലാനി ദേവതാ നിഖിലാഃ ॥ 121 ॥

പ്രാഗ്ദ്വാരസ്യ ഭവാനീ-
-ധാമ്നഃ പാര്ശ്വദ്വയാരചിതവാസേ ।
മാതംഗീകിടിമുഖ്യൌ
മണിസദനേ മനസി ഭാവയാമി ചിരമ് ॥ 122 ॥

യോജനയുഗലാഭോഗാ
തത്ക്രോശപരിണാഹയൈവ ഭിത്ത്യാ ച ।
ചിംതാമണിഗൃഹഭൂമി-
-ര്ജീയാദാമ്നായമയചതുര്ദ്വാരാ ॥ 123 ॥

ദ്വാരേ ദ്വാരേ ധാമ്നഃ
പിംഡീഭൂതാ നവീനബിംബാഭാഃ ।
വിദധതു വിപുലാം കീര്തിം
ദിവ്യാ ലൌഹിത്യസിദ്ധ്യോ ദേവ്യഃ ॥ 124 ॥

മണിസദനസ്യാംതരതോ
മഹനീയേ രത്നവേദികാമധ്യേ ।
ബിംദുമയചക്രമീഡേ
പീഠാനാമുപരി വിരചിതാവാസമ് ॥ 125 ॥

ചക്രാണാം സകലാനാം
പ്രഥമമധഃ സീമഫലകവാസ്തവ്യാഃ ।
അണിമാദിസിദ്ധയോ മാ-
-മവംതു ദേവീ പ്രഭാസ്വരൂപിണ്യഃ ॥ 126 ॥

അണിമാദിസിദ്ധിഫലക-
-സ്യോപരിഹരിണാംകഖംഡകൃതചൂഡാഃ ।
ഭദ്രം പക്ഷ്മലയംതു
ബ്രാഹ്മീപ്രമുഖാശ്ച മാതരോഽസ്മാകമ് ॥ 127 ॥

തസ്യോപരി മണിഫലകേ
താരുണ്യോത്തുംഗപീനകുചഭാരാഃ ।
സംക്ഷോഭിണീപ്രധാനാഃ
ഭ്രാംതി വിദ്രാവയംതു ദശ മുദ്രാഃ ॥ 128 ॥

ഫലകത്രയസ്വരൂപേ
പൃഥുലേ ത്രൈലോക്യമോഹനേ ചക്രേ ।
ദീവ്യംതു പ്രകടാഖ്യാ-
-സ്താസാം കര്ത്രീം ച ഭഗവതീ ത്രിപുരാ ॥ 129 ॥

തദുപരി വിപുലേ ധിഷ്ണ്യേ
തരലദൃശസ്തരുണകോകനദഭാസഃ ।
കാമാകര്ഷിണ്യാദ്യാഃ
കലയേ ദേവീഃ കലാധരശിഖംഡാഃ ॥ 130 ॥

സർവാശാപരിപൂരകചക്രേ-
-ഽസ്മിന് ഗുപ്തയോഗിനീസേവ്യാഃ ।
ത്രിപുരേശീ മമ ദുരിതം
തുദ്യാത് കംഠാവലംബിമണിഹാരാ ॥ 131 ॥

തസ്യോപരി മണിപീഠേ
താമ്രാംഭോരുഹദലപ്രഭാശോണാഃ ।
ധ്യായാമ്യനംഗകുസുമാ-
-പ്രമുഖാ ദേവീശ്ച വിധൃതകൂര്പാസാഃ ॥ 132 ॥

സംക്ഷോഭകാരകേഽസ്മിം-
-ശ്ചക്രേ ശ്രീത്രിപുരസുംദരീ സാക്ഷാത് ।
ഗോപ്ത്രീ ഗുപ്തതരാഖ്യാഃ
ഗോപായതു മാം കൃപാര്ദ്രയാ ദൃഷ്ട്യാ ॥ 133 ॥

സംക്ഷോഭിണീപ്രധാനാഃ
ശക്തീസ്തസ്യോര്ധ്വവലയകൃതവാസാഃ ।
ആലോലനീലവേണീ-
-രംതഃ കലയാമി യൌവനോന്മത്താഃ ॥ 134 ॥

സൌഭാഗ്യദായകേഽസ്മിം-
-ശ്ചക്രേശീ ത്രിപുരവാസിനീ ജീയാത് ।
ശക്തീശ്ച സംപ്രദായാഭിധാഃ
സമസ്താഃ പ്രമോദയംത്വനിശമ് ॥ 135 ॥

മണിപീഠോപരി താസാം
മഹതി ചതുര്ഹസ്തവിസ്തൃതേ വലയേ ।
സംതതവിരചിതവാസാഃ
ശക്തീഃ കലയാമി സർവസിദ്ധിമുഖാഃ ॥ 136 ॥

സർവാര്ഥസാധകാഖ്യേ
ചക്രേഽമുഷ്മിന് സമസ്തഫലദാത്രീ ।
ത്രിപുരാ ശ്രീര്മമ കുശലം
ദിശതാദുത്തീര്ണയോഗിനീസേവ്യാ ॥ 137 ॥

താസാം നിലയസ്യോപരി
ധിഷ്ണ്യേ കൌസുംഭകംചുകമനോജ്ഞാഃ ।
സർവാജ്ഞാദ്യാഃ ദേവ്യഃ
സകലാഃ സംപാദയംതു മമ കീര്തിമ് ॥ 138 ॥

ചക്രേ സമസ്തരക്ഷാ-
-കരനാമ്ന്യസ്മിന് സമസ്തജനസേവ്യാമ് ।
മനസി നിഗര്ഭാസഹിതാം
മന്യേ ശ്രീത്രിപുരമാലിനീം ദേവീമ് ॥ 139 ॥

സർവജ്ഞാസദനസ്യോപരി
ചക്രേ വിപുലേ സമാകലിതഗേഹാഃ ।
വംദേ വശിനീമുഖ്യാഃ
ശക്തീഃ സിംദൂരരേണുരുചഃ ॥ 140 ॥

ശ്രീസർവരോഗഹരാഖ്യ-
-ചക്രേഽസ്മിംസ്ത്രിപുരപൂർവികാം സിദ്ധാമ് ।
വംദേ രഹസ്യനാമ്നാ
വേദ്യാഭിഃ ശക്തിഭിഃ സദാ സേവ്യാമ് ॥ 141 ॥

വശിനീഗൃഹോപരിഷ്ടാ-
-ദ്വിംശതിഹസ്തോന്നതേ മഹാപീഠേ ।
ശമയംതു ശത്രുബൃംദം
ശസ്ത്രാണ്യസ്ത്രാണി ചാദിദംപത്യോഃ ॥ 142 ॥

ശസ്ത്രസദനോപരിഷ്ടാ-
-ദ്വലയേ വലവൈരിരത്നസംഘടിതേ ।
കാമേശ്വരീപ്രധാനാഃ
കലയേ ദേവീഃ സമസ്തജനവംദ്യാഃ ॥ 143 ॥

ചക്രേഽത്ര സർവസിദ്ധിപ്രദ-
-നാമനി സർവഫലദാത്രീ ।
ത്രിപുരാംബാവതു സതതം
പരാപരരഹസ്യയോഗിനീസേവ്യാ ॥ 144 ॥

കാമേശ്വരീഗൃഹോപരിവലയേ
വിവിധമനുസംപ്രദായജ്ഞാഃ ।
ചത്വാരോ യുഗനാഥാ
ജയംതു മിത്രേശപൂർവകാഃ ഗുരവഃ ॥ 145 ॥

നാഥഭവനോപരിഷ്ടാ-
-ന്നാനാരത്നചയമേദുരേ പീഠേ ।
കാമേശ്യാദ്യാ നിത്യാഃ
കലയംതു മുദം തിഥിസ്വരൂപിണ്യഃ ॥ 146 ॥

നിത്യാസദനസ്യോപരി
നിര്മലമണിനിവഹവിരചിതേ ധിഷ്ണ്യേ ।
കുശലം ഷഡംഗദേവ്യഃ
കലയംത്വസ്മാകമുത്തരലനേത്രാഃ ॥ 147 ॥

സദനസ്യോപരി താസാം
സർവാനംദമയനാമകേ ബിംദൌ ।
പംചബ്രഹ്മാകാരാം
മംചം പ്രണമാമി മണിഗണാകീര്ണമ് ॥ 148 ॥

പരിതോ മണിമംചസ്യ
പ്രലംബമാനാ നിയംത്രിതാ പാശൈഃ ।
മായാമയീ ജവനികാ
മമ ദുരിതം ഹരതു മേചകച്ഛായാ ॥ 149 ॥

മംചസ്യോപരി ലംബ-
-ന്മദനീപുന്നാഗമാലികാഭരിതമ് ।
ഹരിഗോപമയവിതാനം
ഹരതാദാലസ്യമനിശമസ്മാകമ് ॥ 150 ॥

പര്യംകസ്യ ഭജാമഃ
പാദാന്ബിംബാംബുദേംദുഹേമരുചഃ ।
അജഹരിരുദ്രേശമയാ-
-നനലാസുരമാരുതേശകോണസ്ഥാന് ॥ 151 ॥

ഫലകം സദാശിവമയം
പ്രണൌമി സിംദൂരരേണുകിരണാഭമ് ।
ആരഭ്യാംഗേശീനാം
സദനാത്കലിതം ച രത്നസോപാനമ് ॥ 152 ॥

പട്ടോപധാനഗംഡക-
-ചതുഷ്ടയസ്ഫുരിതപാടലാസ്തരണമ് ।
പര്യംകോപരി ഘടിതം
പാതു ചിരം ഹംസതൂലശയനം നഃ ॥ 153 ॥

തസ്യോപരി നിവസംതം
താരുണ്യശ്രീനിഷേവിതം സതതമ് ।
ആവൃംതപുല്ലഹല്ലക-
-മരീചികാപുംജമംജുലച്ഛായമ് ॥ 154 ॥

സിംദൂരശോണവസനം
ശീതാംശുസ്തബകചുംബിതകിരീടമ് ।
കുംകുമതിലകമനോഹര-
-കുടിലാലികഹസിതകുമുദബംധുശിശുമ് ॥ 155 ॥

പൂര്ണേംദുബിംബവദനം
ഫുല്ലസരോജാതലോചനത്രിതയമ് ।
തരലാപാംഗതരംഗിത-
-ശഫരാംകനശാസ്ത്രസംപ്രദായാര്ഥമ് ॥ 156 ॥

മണിമയകുംഡലപുഷ്യ-
-ന്മരീചികല്ലോലമാംസലകപോലമ് ।
വിദ്രുമസഹോദരാധര-
-വിസൃമരസുസ്മിതകിശോരസംചാരമ് ॥ 157 ॥

ആമോദികുസുമശേഖര-
-മാനീലഭ്രൂലതായുഗമനോജ്ഞമ് ।
വീടീസൌരഭവീചീ-
-ദ്വിഗുണിതവക്ത്രാരവിംദസൌരഭ്യമ് ॥ 158 ॥

പാശാംകുശേക്ഷുചാപ-
-പ്രസവശരസ്ഫുരിതകോമലകരാബ്ജമ് ।
കാശ്മീരപംകിലാംഗം
കാമേശം മനസി കുര്മഹേ സതതമ് ॥ 159 ॥

തസ്യാംകഭുവി നിഷണ്ണാം
തരുണകദംബപ്രസൂനകിരണാഭാമ് ।
ശീതാംശുഖംഡചൂഡാം
സീമംതന്യസ്തസാംദ്രസിംദൂരാമ് ॥ 160 ॥

കുംകുമലലാമഭാസ്വ-
-ന്നിടിലാം കുടിലതരചില്ലികായുഗലാമ് ।
നാലീകതുല്യനയനാം
നാസാംചലനടിതമൌക്തികാഭരണാമ് ॥ 161 ॥

അംകുരിതമംദഹാസ-
-മരുണാധരകാംതിവിജിതബിംബാഭാമ് ।
കസ്തൂരീമകരീയുത-
-കപോലസംക്രാംതകനകതാടംകാമ് ॥ 162 ॥

കര്പൂരസാംദ്രവീടീ-
-കബലിതവദനാരവിംദകമനീയാമ് ।
കംബുസഹോദരകംഠ-
-പ്രലംബമാനാച്ഛമൌക്തികകലാപാമ് ॥ 163 ॥

കഹ്ലാരദാമകോമല-
-ഭുജയുഗലസ്ഫുരിതരത്നകേയൂരാമ് ।
കരപദ്മമൂലവിലസ-
-ത്കാംചനമയകടകവലയസംദോഹാമ് ॥ 164 ॥

പാണിചതുഷ്ടയവിലസ-
-ത്പാശാംകുശപുംഡ്രചാപപുഷ്പാസ്ത്രാമ് ।
കൂലംകഷകുചശിഖരാം
കുംകുമകര്ദമിതരത്നകൂര്പാസാമ് ॥ 165 ॥

അണുദായാദവലഗ്നാ-
-മംബുദശോഭാസനാഭിരോമലതാമ് ।
മാണിക്യഖചിതകാംചീ-
-മരീചികാക്രാംതമാംസലനിതംബാമ് ॥ 166 ॥

കരഭോരുകാംഡയുഗലാം
ജംഘാജിതകാമജൈത്രതൂണീരാമ് ।
പ്രപദപരിഭൂതകൂര്മാം
പല്ലവസച്ഛായപദയുഗമനോജ്ഞാമ് ॥ 167 ॥

കമലഭവകംജലോചന-
-കിരീടരത്നാംശുരംജിതപദാബ്ജാമ് ।
ഉന്മസ്തകാനുകംപാ-
-മുത്തരലാപാംഗപോഷിതാനംഗാമ് ॥ 168 ॥

ആദിമരസാവലംബാ-
-മനിദം പ്രഥമോക്തിവല്ലരീകലികാമ് ।
ആബ്രഹ്മകീടജനനീ-
-മംതഃ കലയാമി സുംദരീമനിശമ് ॥ 169 ॥

കസ്തു ക്ഷിതൌ പടീയാ-
-ന്വസ്തു സ്തോതും ശിവാംകവാസ്തവ്യമ് ।
അസ്തു ചിരംതനസുകൃതൈഃ
പ്രസ്തുതകാമ്യായ തന്മമ പുരസ്താത് ॥ 170 ॥

പ്രഭുസമ്മിതോക്തിഗമ്യം
പരമശിവോത്സംഗതുംഗപര്യംകമ് ।
തേജഃ കിംചന ദിവ്യം
പുരതോ മേ ഭവതു പുംഡ്രകോദംഡമ് ॥ 171 ॥

മധുരിമഭരിതശരാസം
മകരംദസ്യംദിമാര്ഗണോദാരമ് ।
കൈരവിണീവിടചൂഡം
കൈവല്യായാസ്തു കിംചന മഹോ നഃ ॥ 172 ॥

അക്ഷുദ്രമിക്ഷുചാപം
പരോക്ഷമവലഗ്നസീമ്നി ത്ര്യക്ഷമ് ।
ക്ഷപയതു മേ ക്ഷേമേതര-
-മുക്ഷരഥപ്രേമപക്ഷ്മലം തേജഃ ॥ 173 ॥

ഭൃംഗരുചിസംഗരകരാപാംഗം
ശൃംഗാരതുംഗമരുണാംഗമ് ।
മംഗലമഭംഗുരം മേ
ഘടയതു ഗംഗാധരാംഗസംഗി മഹഃ ॥ 174 ॥

പ്രപദാജിതകൂര്മമൂര്ജിത-
-കരുണം ഭര്മരുചിനിര്മഥനദേഹമ് ।
ശ്രിതവര്മ മര്മ ശംഭോഃ
കിംചന മമ നര്മ ശര്മ നിര്മാതു ॥ 175 ॥

കാലകുരലാലികാലിമ-
-കംദലവിജിതാലി വിധൃതമണിവാലി ।
മിലതു ഹൃദി പുലിനജഘനം
ബഹുലിതഗലഗരലകേലി കിമപി മഹഃ ॥ 176 ॥

കുംകുമതിലകിതഫാലാ
കുരുവിംദച്ഛായപാടലദുകൂലാ ।
കരുണാപയോധിവേലാ
കാചന ചിത്തേ ചകാസ്തു മേ ലീലാ ॥ 177 ॥

പുഷ്പംധയരുചിവേണ്യഃ
പുലിനാഭോഗത്രപാകരശ്രേണ്യഃ ।
ജീയാസുരിക്ഷുപാണ്യഃ
കാശ്ചന കാമാരികേലിസാക്ഷിണ്യഃ ॥ 178 ॥

തപനീയാംശുകഭാംസി
ദ്രാക്ഷാമാധുര്യനാസ്തികവചാംസി ।
കതിചന ശുചം മഹാംസി
ക്ഷപയതു കപാലിതോഷിതമനാംസി ॥ 179 ॥

അസിതകചമായതാക്ഷം
കുസുമശരം കൂലമുദ്വഹകൃപാര്ദ്രമ് ।
ആദിമരസാധിദൈവത-
-മംതഃ കലയേ ഹരാംകവാസി മഹഃ ॥ 180 ॥

കര്ണോപാംതതരംഗിത-
-കടാക്ഷവിസ്പംദികംഠദഘ്നകൃപാമ് ।
കാമേശ്വരാംകനിലയാം
കാമപി വിദ്യാം പുരാതനീം കലയേ ॥ 181 ॥

അരവിംദകാംത്യരുംതുദ-
-വിലോചനദ്വംദ്വസുംദരമുഖേംദു ।
ഛംദഃ കംദലമംദിര-
-മംതഃപുരമൈംദുശേഖരം വംദേ ॥ 182 ॥

ബിംബിനികുരംബഡംബര-
-വിഡംബകച്ഛായമംബരവലഗ്നമ് ।
കംബുഗലമംബുദകുചം
ബിംബോകം കമപി ചുംബതു മനോ മേ ॥ 183 ॥

കമപി കമനീയരൂപം
കലയാമ്യംതഃ കദംബകുസുമാഢ്യമ് ।
ചംപകരുചിരസുവേഷൈഃ
സംപാദിതകാംത്യലംകൃതദിഗംതമ് ॥ 184 ॥

ശംപാരുചിഭര-
-ഗര്ഹാസംപാദകകാംതികവചിതദിഗംതമ് ।
സിദ്ധാംതം നിഗമാനാം
ശുദ്ധാംതം കിമപി ശൂലിനഃ കലയേ ॥ 185 ॥

ഉദ്യദ്ദിനകരശോണാ-
-നുത്പലബംധുസ്തനംധയാപീഡാന് ।
കരകലിതപുംഡ്രചാപാ-
-ന്കലയേ കാനപി കപര്ദിനഃ പ്രാണാന് ॥ 186 ॥

രശനാലസജ്ജഘനയാ
രസനാജീവാതുചാപഭാസുരയാ ।
ഘ്രാണായുഷ്കരശരയാ
ഘ്രാതം ചിത്തം കയാപി വാസനയാ ॥ 187 ॥

സരസിജസഹയുധ്വദൃശാ
ശംപാലതികാസനാഭിവിഗ്രഹയാ ।
ഭാസാ കയാപി ചേതോ
നാസാമണിശോഭിവദനയാ ഭരിതമ് ॥ 188 ॥

നവയാവകാഭസിചയാന്വിതയാ
ഗജയാനയാ ദയാപരയാ ।
ധൃതയാമിനീശകലയാ
ധിയാ കയാപി ക്ഷതാമയാ ഹി വയമ് ॥ 189 ॥

അലമലമകുസുമബാണൈ-
-രബിംബശോണൈരപുംഡ്രകോദംഡൈഃ ।
അകുമുദബാംധവചൂഡൈ-
-രന്യൈരിഹ ജഗതി ദൈവതം മന്യൈഃ ॥ 190 ॥

കുവലയസദൃക്ഷനയനൈഃ
കുലഗിരികൂടസ്ഥബംധുകുചഭാരൈഃ ।
കരുണാസ്പംദികടാക്ഷൈഃ
കവചിതചിത്തോഽസ്മി കതിപയൈഃ കുതുകൈഃ ॥ 191 ॥

നതജനസുലഭായ നമോ
നാലീകസനാഭിലോചനായ നമഃ ।
നംദിതഗിരിശായ നമോ
മഹസേ നവനീപപാടലായ നമഃ ॥ 192 ॥

കാദംബകുസുമദാമ്നേ
കായച്ഛായാകണായിതാര്യമ്ണേ ।
സീമ്നേ ചിരംതനഗിരാം
ഭൂമ്നേ കസ്മൈചിദാദദേ പ്രണതിമ് ॥ 193 ॥

കുടിലകബരീഭരേഭ്യഃ
കുംകുമസബ്രഹ്മചാരികിരണേഭ്യഃ ।
കൂലംകഷസ്തനേഭ്യഃ
കുര്മഃ പ്രണതിം കുലാദ്രികുതുകേഭ്യഃ ॥ 194 ॥

കോകനദശോണചരണാ-
-ത്കോമലകുരലാലിവിജിതശൈവാലാത് ।
ഉത്പലസഗംധിനയനാ-
-ദുരരീകുര്മോ ന ദേവതമാന്യാമ് ॥ 195 ॥

ആപാടലാധരാണാ-
-മാനീലസ്നിഗ്ധബര്ബരകചാനാമ് ।
ആമ്നായജീവനാനാ-
-മാകൂതാനാം ഹരസ്യ ദാസോഽഹമ് ॥ 196 ॥

പുംഖിതവിലാസഹാസ-
-സ്ഫുരിതാസു പുരാഹിതാംകനിലയാസു ।
മഗ്നം മനോ മദീയം
കാസ്വപി കാമാരിജീവനാഡീഷു ॥ 197 ॥

ലലിതാ പാതു ശിരോ മേ
ലലാടമംബാ ച മധുമതീരൂപാ ।
ഭ്രൂയുഗ്മം ച ഭവാനീ
പുഷ്പശരാ പാതു ലോചനദ്വംദ്വമ് ॥ 198 ॥

പായാന്നാസാം ബാലാ
സുഭഗാ ദംതാംശ്ച സുംദരീ ജിഹ്വാമ് ।
അധരോഷ്ഠമാദിശക്തി-
-ശ്ചക്രേശീ പാതു മേ ചിരം ചിബുകമ് ॥ 199 ॥

കാമേശ്വരീ ച കര്ണൌ
കാമാക്ഷീ പാതു ഗംഡയോര്യുഗലമ് ।
ശൃംഗാരനായികാവ്യാ-
-ദ്വദനം സിംഹാസനേശ്വരീ ച ഗലമ് ॥ 200 ॥

സ്കംദപ്രസൂശ്ച പാതു
സ്കംധൌ ബാഹൂ ച പാടലാംഗീ മേ ।
പാണീ ച പദ്മനിലയാ
പായാദനിശം നഖാവലീർവിജയാ ॥ 201 ॥

കോദംഡിനീ ച വക്ഷഃ
കുക്ഷിം ചാവ്യാത് കുലാചലതനൂജാ ।
കല്യാണീ ച വലഗ്നം
കടിം ച പായാത്കലാധരശിഖംഡാ ॥ 202 ॥

ഊരുദ്വയം ച പായാ-
-ദുമാ മൃഡാനീ ച ജാനുനീ രക്ഷേത് ।
ജംഘേ ച ഷോഡശീ മേ
പായാത് പാദൌ ച പാശസൃണിഹസ്താ ॥ 203 ॥

പ്രാതഃ പാതു പരാ മാം
മധ്യാഹ്നേ പാതു മണിഗൃഹാധീശാ ।
ശർവാണ്യവതു ച സായം
പായാദ്രാത്രൌ ച ഭൈരവീ സാക്ഷാത് ॥ 204 ॥

ഭാര്യാം രക്ഷതു ഗൌരീം
പായാത് പുത്രാംശ്ച ബിംദുഗൃഹപീഠാ ।
ശ്രീവിദ്യാ ച യശോ മേ
ശീലം ചാവ്യാച്ചിരം മഹാരാജ്ഞീ ॥ 205 ॥

പവനമയി പാവകമയി
ക്ഷോണീമയി ഗഗനമയി കൃപീടമയി ।
രവിമയി ശശിമയി ദിങ്മയി
സമയമയി പ്രാണമയി ശിവേ പാഹി ॥ 206 ॥

കാലി കപാലിനി ശൂലിനി
ഭൈരവി മാതംഗി പംചമി ത്രിപുരേ ।
വാഗ്ദേവി വിംധ്യവാസിനി
ബാലേ ഭുവനേശി പാലയ ചിരം മാമ് ॥ 207 ॥

അഭിനവസിംദൂരാഭാ-
-മംബ ത്വാം ചിംതയംതി യേ ഹൃദയേ ।
ഉപരി നിപതംതി തേഷാ-
-മുത്പലനയനാകടാക്ഷകല്ലോലാഃ ॥ 208 ॥

വര്ഗാഷ്ടകമിലിതാഭി-
-ർവശിനീമുഖ്യാഭിരാവൃതാം ഭവതീമ് ।
ചിംതയതാം സിതവര്ണാം
വാചോ നിര്യാംത്യയത്നതോ വദനാത് ॥ 209 ॥

കനകശലാകാഗൌരീം
കര്ണവ്യാലോലകുംഡലദ്വിതയാമ് ।
പ്രഹസിതമുഖീം ച ഭവതീം
ധ്യായംതോ യേ ത ഏവ ഭൂധനദാഃ ॥ 210 ॥

ശീര്ഷാംഭോരുഹമധ്യേ
ശീതലപീയൂഷവര്ഷിണീം ഭവതീമ് ।
അനുദിനമനുചിംതയതാ-
-മായുഷ്യം ഭവതി പുഷ്കലമവന്യാമ് ॥ 211 ॥

മധുരസ്മിതാം മദാരുണനയനാം
മാതംഗകുംഭവക്ഷോജാമ് ।
ചംദ്രവതംസിനീം ത്വാം
സവിധേ പശ്യംതി സുകൃതിനഃ കേചിത് ॥ 212 ॥

ലലിതായാഃ സ്തവരത്നം
ലലിതപദാഭിഃ പ്രണീതമാര്യാഭിഃ ।
പ്രതിദിനമവനൌ പഠതാം
ഫലാനി വക്തും പ്രഗല്ഭതേ സൈവ ॥ 213 ॥

സദസദനുഗ്രഹനിഗ്രഹ-
-ഗൃഹീതമുനിവിഗ്രഹോ ഭഗവാന് ।
സർവാസാമുപനിഷദാം
ദുർവാസാ ജയതി ദേശികഃ പ്രഥമഃ ॥ 214 ॥

ഇതി മഹര്ഷിദുർവാസഃ വിരചിതം ശ്രീലലിതാസ്തവരത്നമ് ।

sri lalitha stavaratnam arya dwishati in malayalam