শ্রী ললিতা স্তবরত্নম্ (আর্য়া দ্বিশতী)

sri lalitha stavaratnam arya dwishati in bengali

বংদে গজেংদ্রবদনং
বামাংকারূঢবল্লভাশ্লিষ্টম্ ।
কুংকুমপরাগশোণং
কুবলয়িনীজারকোরকাপীডম্ ॥ 1 ॥

স জযতি সুবর্ণশৈলঃ
সকলজগচ্চক্রসংঘটিতমূর্তিঃ ।
কাংচননিকুংজবাটী-
-কংদলদমরীপ্রপংচসংগীতঃ ॥ 2 ॥

হরিহযনৈরৃতমারুত-
-হরিতামংতেষ্ববস্থিতং তস্য় ।
বিনুমঃ সানুত্রিতয়ং
বিধিহরিগৌরীশবিষ্টপাধারম্ ॥ 3 ॥

মধ্য়ে পুনর্মনোহর-
-রত্নরুচিস্তবকরংজিতদিগংতম্ ।
উপরি চতুঃশতয়োজন-
-মুত্তুংগং শৃংগপুংগবমুপাসে ॥ 4 ॥

তত্র চতুঃশতয়োজন-
-পরিণাহং দেবশিল্পিনা রচিতম্ ।
নানাসালমনোজ্ঞং
নমাম্যহং নগরমাদিবিদ্য়ায়াঃ ॥ 5 ॥

প্রথমং সহস্রপূর্বক-
-ষট্শতসংখ্য়াকয়োজনং পরিতঃ ।
বলয়ীকৃতস্বগাত্রং
বরণং শরণং ব্রজাম্যয়োরূপম্ ॥ 6 ॥

তস্য়োত্তরে সমীরণ-
-য়োজনদূরে তরংগিতচ্ছায়ঃ ।
ঘটযতু মুদং দ্বিতীয়ো
ঘংটাস্তনসারনির্মিতঃ সালঃ ॥ 7 ॥

উভয়োরংতরসীম-
-ন্য়ুদ্দামভ্রমররংজিতোদারম্ ।
উপবনমুপাস্মহে বয়-
-মূরীকৃতমংদমারুতস্য়ংদম্ ॥ 8 ॥

আলিংগ্য় ভদ্রকালী-
-মাসীনস্তত্র হরিশিলাশ্য়ামাম্ ।
মনসি মহাকালো মে
বিহরতু মধুপানবিভ্রমন্নেত্রঃ ॥ 9 ॥

তার্তীয়ীকো বরণ-
-স্তস্য়োত্তরসীম্নি বাতয়োজনতঃ ।
তাম্রেণ রচিতমূর্তি-
-স্তনুতামাচংদ্রতারকং ভদ্রম্ ॥ 10 ॥

মধ্য়ে তয়োশ্চ মণিময়-
-পল্লবশাখাপ্রসূনপক্ষ্মলিতাম্ ।
কল্পানোকহবাটীং
কলয়ে মকরংদপংকিলাবালাম্ ॥ 11 ॥

তত্র মধুমাধবশ্রী-
-তরুণীভ্য়াং তরলদৃক্চকোরাভ্য়াম্ ।
আলিংগিতোঽবতান্মা-
-মনিশং প্রথমর্তুরাত্তপুষ্পাস্ত্রঃ ॥ 12 ॥

নমত তদুত্তরভাগে
নাকিপথোল্লংঘিশৃংগসংঘাতম্ ।
সীসাকৃতিং তুরীয়ং
সিতকিরণালোকনির্মলং সালম্ ॥ 13 ॥

সালদ্বয়াংতরালে
সরলালিকপোতচাটুসুভগায়াম্ ।
সংতানবাটিকায়াং
সক্তং চেতোঽস্তু সততমস্মাকম্ ॥ 14 ॥

তত্র তপনাতিরূক্ষঃ
সাম্রাজ্ঞীচরণসাংদ্রিতস্বাংতঃ ।
শুক্রশুচিশ্রীসহিতো
গ্রীষ্মর্তুর্দিশতু কীর্তিমাকল্পম্ ॥ 15 ॥

উত্তরসীমনি তস্য়ো-
-ন্নতশিখরোত্কংপিহাটকপতাকঃ ।
প্রকটযতু পংচমো নঃ
প্রাকারঃ কুশলমারকূটময়ঃ ॥ 16 ॥

প্রাকারয়োশ্চ মধ্য়ে
পল্লবিতান্যভৃতপংচমোন্মেষা ।
হরিচংদনদ্রুবাটী-
-হরতাদামূলমস্মদনুতাপম্ ॥ 17 ॥

তত্র নভঃ শ্রীমুখ্য়ৈ-
-স্তরুণীবর্গৈঃ সমন্বিতঃ পরিতঃ ।
বজ্রাট্টহাসমুখরো
বাংছাপূর্তিং তনোতু বর্ষর্তুঃ ॥ 18 ॥

মারুতয়োজনদূরে
মহনীযস্তস্য় চোত্তরে ভাগে ।
ভদ্রং কৃষীষ্ট ষষ্ঠঃ
প্রাকারঃ পংচলোহধাতুময়ঃ ॥ 19 ॥

অনয়োর্মধ্য়ে সংতত-
-মংকূরদ্দিব্যকুসুমগংধায়াম্ ।
মংদারবাটিকায়াং
মানসমংগীকরোতু মে বিহৃতিম্ ॥ 20 ॥

তস্য়ামিষোর্জলক্ষ্মী-
-তরুণীভ্য়াং শরদৃতুঃ সদা সহিতঃ ।
অভ্যর্চযন্ স জীয়া-
-দংবামামোদমেদুরৈঃ কুসুমৈঃ ॥ 21 ॥

তস্যর্ষিসংখ্যয়োজন-
-দূরে দেদীপ্যমানশৃংগৌঘঃ ।
কলধৌতকলিতমূর্তিঃ
কল্য়াণং দিশতু সপ্তমঃ সালঃ ॥ 22 ॥

মধ্য়ে তয়োর্মরুত্পথ
লংঘিতবিটপাগ্রবিরুতকলকংঠা ।
শ্রীপারিজাতবাটী
শ্রিযমনিশং দিশতু শীতলোদ্দেশা ॥ 23 ॥

তস্য়ামতিপ্রিয়াভ্য়াং
সহ খেলন্ সহসহস্যলক্ষ্মীভ্য়াম্ ।
সামংতো ঝষকেতো-
-র্হেমংতো ভবতু হেমবৃদ্ধ্য়ৈ নঃ ॥ 24 ॥

উত্তরতস্তস্য় মহা-
-নুদ্ভটহুতভুক্শিখারুণময়ূখঃ ।
তপনীযখংডরচিত-
-স্তনুতাদায়ুষ্যমষ্টমো বরণঃ ॥ 25 ॥

কাদংববিপিনবাটী-
-মনয়োর্মধ্যভুবি কল্পিতাবাসাম্ ।
কলয়ামি সূনকোরক-
-কংদলিতামোদতুংদিলসমীরাম্ ॥ 26 ॥

তস্য়ামতিশিশিরাকৃতি-
-রাসীনস্তপতপস্যলক্ষ্মীভ্য়াম্ ।
শিবমনিশং কুরুতান্মে
শিশিরর্তুঃ সততশীতলদিগংতঃ ॥ 27 ॥

তস্য়াং কদংববাট্য়াং
তত্প্রসবামোদমিলিতমধুগংধম্ ।
সপ্তাবরণমনোজ্ঞং
শরণং সমুপৈমি মংত্রিণীশরণম্ ॥ 28 ॥

তত্রালয়ে বিশালে
তপনীয়ারচিততরলসোপানে ।
মাণিক্যমংডপাংত-
-র্মহিতে সিংহাসনে সুমণিখচিতে ॥ 29 ॥

বিংদুত্রিপংচকোণ-
-দ্বিপনৃপবসুবেদদলকুরেখাঢ্য়ে ।
চক্রে সদা নিবিষ্টাং
ষষ্ঠ্যষ্টত্রিংশদক্ষরেশানীম্ ॥ 30 ॥

তাপিংছমেচকাভাং
তালীদলঘটিতকর্ণতাটংকাম্ ।
তাংবূলপূরিতমুখীং
তাম্রাধরবিংবদৃষ্টদরহাসাম্ ॥ 31 ॥

কুংকুমপংকিলদেহাং
কুবলযজীবাতুশাবকবতংসাম্ ।
কোকনদশোণচরণাং
কোকিলনিক্বাণকোমলালাপাম্ ॥ 32 ॥

বামাংগগলিতচূলীং
বনমাল্যকদংবমালিকাভরণাম্ ।
মুক্তাললংতিকাংচিত
মুগ্ধালিকমিলিতচিত্রকোদারাম্ ॥ 33 ॥

করবিধৃতকীরশাবক-
-কলনিনদব্যক্তনিখিলনিগমার্থাম্ ।
বামকুচসংগিবীণাবাদন-
-সৌখ্য়ার্ধমীলিতাক্ষিয়ুগাম্ ॥ 34 ॥

আপাটলাংশুকধরা-
-মাদিরসোন্মেষবাসিতকটাক্ষাম্ ।
আম্নাযসারগুলিকা-
-মাদ্য়াং সংগীতমাতৃকাং বংদে ॥ 35 ॥

তস্য় চ সুবর্ণসাল-
-স্য়োত্তরতস্তরুণকুংকুমচ্ছায়ঃ ।
শমযতু মম সংতাপং
সালো নবমঃ স পুষ্পরাগময়ঃ ॥ 36 ॥

অনয়োরংতরবসুধাঃ
প্রণুমঃ প্রত্যগ্রপুষ্পরাগময়ীঃ ।
সিংহাসনেশ্বরীমনু-
-চিংতননিস্তংদ্রসিদ্ধনীরংধ্রাঃ ॥ 37 ॥

তত্সালোত্তরদেশে
তরুণজপাকিরণধোরণীশোণঃ ।
প্রশমযতু পদ্মরাগ-
-প্রাকারো মম পরাভবং দশমঃ ॥ 38 ॥

অংতরভূকৃতবাসা-
-ননয়োরপনীতচিত্তবৈমত্য়ান্ ।
চক্রেশীপদভক্তাং-
-শ্চারণবর্গানহর্নিশং কলয়ে ॥ 39 ॥

সারংগবাহয়োজনদূরে-
-ঽসংঘটিতকেতনস্তস্য় ।
গোমেদকেন রচিতো
গোপাযতু মাং সমুন্নতঃ সালঃ ॥ 40 ॥

বপ্রদ্বয়াংতরোর্ব্য়াং
বটুকৈর্বিবিধৈশ্চ যোগিনীবৃংদৈঃ ।
সততং সমর্চিতায়াঃ
সংকর্ষণ্য়াঃ প্রণৌমি চরণাব্জম্ ॥ 41 ॥

তাপসয়োজনদূরে
তস্য় সমুত্তুংগ গোপুরোপেতঃ ।
বাংছাপূর্ত্য়ৈ ভবতা-
-দ্বজ্রমণীনিকরনির্মিতো বপ্রঃ ॥ 42 ॥

বরণদ্বিতয়াংতরতো
বাসজুষো বিহিতমধুরসাস্বাদাঃ ।
রংভাদিবিবুধবেশ্য়া
রচয়ংতু মহাংতমস্মদানংদম্ ॥ 43 ॥

তত্র সদা প্রবহংতী
তটিনী বজ্রাভিধা চিরং জীয়াত্ ।
চটুলোর্মিজালনৃত্য়-
-ত্কলহংসীকুলকলক্বণিতপুষ্টা ॥ 44 ॥

রোধসি তস্য়া রুচিরে
বজ্রেশী জযতি বজ্রভূষাঢ্য়া ।
বজ্রপ্রদানতোষিত-
-বজ্রিমুখত্রিদশবিনুতচারিত্রা ॥ 45 ॥

তস্য়োদীচ্য়াং হরিতি
স্তবকিতসুষমাবলীঢবিযদংতঃ ।
বৈডূর্যরত্নরচিতো
বৈমল্য়ং দিশতু চেতসো বরণঃ ॥ 46 ॥

অধিমধ্যমেতয়োঃ পুন-
-রংবাচরণাবলংবিতস্বাংতান্ ।
কার্কোটকাদিনাগান্
কলয়ামঃ কিং চ বলিমুখান্ দনুজান্ ॥ 47 ॥

গংধবহসংখ্যয়োজন-
-দূরে গগনোর্ধ্বজাংঘিকস্তস্য় ।
বাসবমণিপ্রণীতো
বরণো বহলযতু বৈদুষীং বিশদাম্ ॥ 48 ॥

মধ্যক্ষোণ্য়ামনয়ো-
-র্মহেংদ্রনীলাত্মকানি চ সরাংসি ।
শাতোদরীসহায়া-
-ন্ভূপালানপি পুনঃ পুনঃ প্রণুমঃ ॥ 49 ॥

আশুগয়োজনদূরে
তস্য়োর্ধ্বং কাংতিধবলিতদিগংতঃ ।
মুক্তাবিরচিতগাত্রো
মুহুরস্মাকং মুদে ভবতু সালঃ ॥ 50 ॥

আবৃত্ত্য়োরধিমধ্য়ং
পূর্বস্য়াং দিশি পুরংদরঃ শ্রীমান্ ।
অভ্রমুবিটাধিরূঢো
বিভ্রমমস্মাকমনিশমাতনুতাত্ ॥ 51 ॥

তত্কোণে ব্যজনস্রু-
-ক্তোমরপাত্রস্রুবান্নশক্তিধরঃ ।
স্বাহাস্বধাসমেতঃ
সুখযতু মাং হব্যবাহনঃ সুচিরম্ ॥ 52 ॥

দক্ষিণদিগংতরালে
দংডধরো নীলনীরদচ্ছায়ঃ ।
ত্রিপুরাপদাব্জভক্তস্তিরযতু
মম নিখিলমংহসাং নিকরম্ ॥ 53 ॥

তস্য়ৈব পশ্চিমায়াং
দিশি দলিতেংদীবরপ্রভাশ্য়ামঃ ।
খেটাসিযষ্টিধারী
খেদানপনযতু যাতুধানো মে ॥ 54 ॥

তস্য়া উত্তরদেশে
ধবলাংগো বিপুলঝষবরারূঢঃ ।
পাশায়ুধাত্তপাণিঃ
পাশী বিদলযতু পাশজালানি ॥ 55 ॥

বংদে তদুত্তরহরি-
-ত্কোণে বায়ুং চমূরুবরবাহম্ ।
কোরকিততত্ত্ববোধা-
-ন্গোরক্ষপ্রমুখয়োগিনোঽপি মুহুঃ ॥ 56 ॥

তরুণীরিডাপ্রধানা-
-স্তিস্রো বাতস্য় তস্য় কৃতবাসাঃ ।
প্রত্যগ্রকাপিশাযন-
-পানপরিভ্রাংতলোচনাঃ কলয়ে ॥ 57 ॥

তল্লোকপূর্বভাগে
ধনদং ধ্য়ায়ামি শেবধিকুলেশম্ ।
অপি মাণিভদ্রমুখ্য়া-
-নংবাচরণাবলংবিনো যক্ষান্ ॥ 58 ॥

তস্য়ৈব পূর্বসীমনি
তপনীয়ারচিতগোপুরে নগরে ।
কাত্য়াযনীসহায়ং
কলয়ে শীতাংশুখংডচূডালম্ ॥ 59 ॥

তত্পুরষোডশবরণ-
-স্থলভাজস্তরুণচংদ্রচূডালান্ ।
রুদ্রাধ্য়ায়ে পঠিতা-
-ন্রুদ্রাণীসহচরান্ভজে রুদ্রান্ ॥ 60 ॥

পবমানসংখ্যয়োজন-
-দূরে বালতৃণ্মেচকস্তস্য় ।
সালো মরকতরচিতঃ
সংপদমচলাং শ্রিয়ং চ পুষ্ণাতু ॥ 61 ॥

আবৃতিয়ুগ্মাংতরতো
হরিতমণীনিবহমেচকে দেশে ।
হাটকতালীবিপিনং
হালাঘটঘটিতবিটপমাকলয়ে ॥ 62 ॥

তত্রৈব মংত্রিণীগৃহ-
-পরিণাহং তরলকেতনং সদনম্ ।
মরকতসৌধমনোজ্ঞং
দদ্য়াদায়ূংষি দংডনাথায়াঃ ॥ 63 ॥

সদনে তত্র হরিন্মণি-
-সংঘটিতে মংডপে শতস্তংভে ।
কার্তস্বরমযপীঠে
কনকময়াংবুরুহকর্ণিকামধ্য়ে ॥ 64 ॥

বিংদুত্রিকোণবর্তুল-
-ষডস্রবৃত্তদ্বয়ান্বিতে চক্রে ।
সংচারিণী দশোত্তর-
শতার্ণমনুরাজকমলকলহংসী ॥ 65 ॥

কোলবদনা কুশেশয়-
-নযনা কোকারিমংডিতশিখংডা ।
সংতপ্তকাংচনাভা
সংধ্য়ারুণচেলসংবৃতনিতংবা ॥ 66 ॥

হলমুসলশংখচক্রা-
-ঽংকুশপাশাভযবরস্ফুরিতহস্তা ।
কূলংকষানুকংপা
কুংকুমজংবালিতস্তনাভোগা ॥ 67 ॥

ধূর্তানামতিদূরা-
-বার্তাশেষাবলগ্নকমনীয়া ।
আর্তালীশুভদাত্রী
বার্তালী ভবতু বাংছিতার্থায় ॥ 68 ॥

তস্য়াঃ পরিতো দেবীঃ
স্বপ্নেশ্য়ুন্মত্তভৈরবীমুখ্য়াঃ ।
প্রণমত জংভিন্য়াদ্য়াঃ
ভৈরববর্গাংশ্চ হেতুকপ্রমুখান্ ॥ 69 ॥

পূর্বোক্তসংখ্যয়োজন-
-দূরে পূয়াংশুপাটলস্তস্য় ।
বিদ্রাবযতু মদার্তিং
বিদ্রুমসালো বিশংকটদ্বারঃ ॥ 70 ॥

আবরণয়োরহর্নিশ-
-মংতরভূমৌপ্রকাশশালিন্য়াম্ ।
আসীনমংবুজাসন-
-মভিনবসিংদূরগৌরমহমীডে ॥ 71 ॥

বরণস্য় তস্য় মারুত-
-য়োজনতো বিপুলগোপুরদ্বারঃ ।
সালো নানারত্নৈঃ
সংঘটিতাংগঃ কৃষীষ্ট মদভীষ্টম্ ॥ 72 ॥

অংতরকক্ষ্য়ামনয়ো-
-রবিরলশোভাপিচংডিলোদ্দেশাম্ ।
মাণিক্যমংডপাখ্য়াং
মহতীমধিহৃদযমনিশমাকলয়ে ॥ 73 ॥

তত্র স্থিতং প্রসন্নং
তরুণতমালপ্রবালকিরণাভম্ ।
কর্ণাবলংবিকুংডল-
-কংদলিতাভীশুকবচিতকপোলম্ ॥ 74 ॥

শোণাধরং শুচিস্মিত-
-মেণাংকবদনমেধমানকৃপম্ ।
মুগ্ধৈণমদবিশেষক-
-মুদ্রিতনিটিলেংদুরেখিকারুচিরম্ ॥ 75 ॥

নালীকদলসহোদর-
-নযনাংচলঘটিতমনসিজাকূতম্ ।
কমলাকঠিনপয়োধর-
-কস্তূরীঘুসৃণপংকিলোরস্কম্ ॥ 76 ॥

চাংপেযগংধিকৈশ্য়ং
শংপাসব্রহ্মচারিকৌশেযম্ ।
শ্রীবত্সকৌস্তুভধরং
শ্রিতজনরক্ষাধুরীণচরণাব্জম্ ॥ 77 ॥

কংবুসুদর্শনবিলস-
-ত্করপদ্মং কংঠলোলবনমালম্ ।
মুচুকুংদমোক্ষফলদং
মুকুংদমানংদকংদমবলংবে ॥ 78 ॥

তদ্বরণোত্তরভাগে
তারাপতিবিংবচুংবিনিজশৃংগঃ ।
বিবিধমণীগণঘটিতো
বিতরতু সালো বিনির্মলাং ধিষণাম্ ॥ 79 ॥

প্রাকারদ্বিতয়াংতর-
-কক্ষ্য়াং পৃথুরত্ননিকরসংকীর্ণাম্ ।
নমত সহস্রস্তংভক-
-মংডপনাম্নাতিবিশ্রুতাং ভুবনে ॥ 80 ॥

প্রণুমস্তত্র ভবানী-
-সহচরমীশানমিংদুখংডধরম্ ।
শৃংগারনায়িকামনু-
-শীলনভাজোঽপি ভৃংগিনংদিমুখান্ ॥ 81 ॥

তস্য়ৈণবাহয়োজন-
-দূরে বংদে মনোময়ং বপ্রম্ ।
অংকূরন্মণিকিরণা-
-মংতরকক্ষ্য়াং চ নির্মলামনয়োঃ ॥ 82 ॥

তত্রৈবামৃতবাপীং
তরলতরংগাবলীঢতটয়ুগ্মাম্ ।
মুক্তামযকলহংসী-
-মুদ্রিতকনকারবিংদসংদোহাম্ ॥ 83 ॥

শক্রোপলমযভৃংগী-
-সংগীতোন্মেষঘোষিতদিগংতাম্ ।
কাংচনময়াংগবিলস-
-ত্কারংডবষংডতাংডবমনোজ্ঞাম্ ॥ 84 ॥

কুরুবিংদাত্মকহল্লক-
-কোরকসুষমাসমূহপাটলিতাম্ ।
কলয়ে সুধাস্বরূপাং
কংদলিতামংদকৈরবামোদাম্ ॥ 85 ॥

তদ্বাপিকাংতরালে তরলে
মণিপোতসীম্নি বিহরংতীম্ ।
সিংদূরপাটলাংগীং
সিতকিরণাংকূরকল্পিতবতংসাম্ ॥ 86 ॥

পর্বেংদুবিংববদনাং
পল্লবশোণাধরস্ফুরিতহাসাম্ ।
কুটিলকবরীং কুরংগী-
-শিশুনযনাং কুংডলস্ফুরিতগংডাম্ ॥ 87 ॥

নিকটস্থপোতনিলয়াঃ
শক্তীঃ শযবিধৃতহেমশৃংগজলৈঃ ।
পরিষিংচংতীং পরিত-
-স্তারাং তারুণ্যগর্বিতাং বংদে ॥ 88 ॥

প্রাগুক্তসংখ্যয়োজনদূরে
প্রণমামি বুদ্ধিমযসালম্ ।
অনয়োরংতরকক্ষ্য়া-
-মষ্টাপদপুষ্টমেদিনীং রুচিরাম্ ॥ 89 ॥

কাদংবরীনিধানাং
কলয়াম্য়ানংদবাপিকাং তস্য়াম্ ।
শোণাশ্মনিবহনির্মিত-
-সোপানশ্রেণিশোভমানতটীম্ ॥ 90 ॥

মাণিক্যতরণিনিলয়াং
মধ্য়ে তস্য়া মদারুণকপোলাম্ ।
অমৃতেশীত্যভিধানা-
-মংতঃ কলয়ামি বারুণীং দেবীম্ ॥ 91 ॥

সৌবর্ণকেনিপাতন-
-হস্তাঃ সৌংদর্যগর্বিতা দেব্য়ঃ ।
তত্পুরতঃ স্থিতিভাজো
বিতরংত্বস্মাকমায়ুষো বৃদ্ধিম্ ॥ 92 ॥

তস্য় পৃষদশ্বয়োজন-
-দূরেঽহংকারসালমতিতুংগম্ ।
বংদে তয়োশ্চ মধ্য়ে
কক্ষ্য়াং বলমানমলযপবমানাম্ ॥ 93 ॥

বিনুমো বিমর্শবাপীং
সৌষুম্নসুধাস্বরূপিণীং তত্র ।
বেলাতিলংঘ্যবীচী-
-কোলাহলভরিতকূলবনবাটীম্ ॥ 94 ॥

তত্রৈব সলিলমধ্য়ে
তাপিংছদলপ্রপংচসুষমাভাম্ ।
শ্য়ামলকংচুকলসিতাং
শ্য়ামাবিটবিংবডংবরহরাস্য়াম্ ॥ 95 ॥

আভুগ্নমসৃণচিল্লী-
-হসিতায়ুগ্মশরকার্মুকবিলাসাম্ ।
মংদস্মিতাংচিতমুখীং
মণিমযতাটংকমংডিতকপোলাম্ ॥ 96 ॥

কুরুবিংদতরণিনিলয়াং
কুলাচলস্পর্ধিকুচনমন্মধ্য়াম্ ।
কুংকুমবিলিপ্তগাত্রীং
কুরুকুল্লাং মনসি কুর্মহে সততম্ ॥ 97 ॥

তত্সালোত্তরভাগে
ভানুময়ং বপ্রমাশ্রয়ে দীপ্তম্ ।
মধ্য়ং চ বিপুলমনয়ো-
-র্মন্য়ে বিশ্রাংতমাতপোদ্গারম্ ॥ 98 ॥

তত্র কুরুবিংদপীঠে
তামরসে কনককর্ণিকাঘটিতে ।
আসীনমরুণবাসস-
-মম্লানপ্রসবমালিকাভরণম্ ॥ 99 ॥

চক্ষুষ্মতীপ্রকাশন-
-শক্তিচ্ছায়াসমারচিতকেলিম্ ।
মাণিক্যমুকুটরম্য়ং
মন্য়ে মার্তাংডভৈরবং হৃদয়ে ॥ 100 ॥

ইংদুমযসালমীডে
তস্য়োত্তরতস্তুষারগিরিগৌরম্ ।
অত্য়ংতশিশিরমারুত-
-মনয়োর্মধ্য়ং চ চংদ্রিকোদ্গারম্ ॥ 101 ॥

তত্র প্রকাশমানং
তারানিকরৈঃ পরিষ্কৃতোদ্দেশম্ ।
অমৃতমযকাংতিকংদল-
-মংতঃ কলয়ামি কুংদসিতমিংদুম্ ॥ 102 ॥

শৃংগারসালমীডে
শৃংগোল্লসিতং তদুত্তরে ভাগে ।
মধ্যস্থলে তয়োরপি
মহিতাং শৃংগারপূর্বিকাং পরিখাম্ ॥ 103 ॥

তত্র মণিনৌস্থিতাভি-
-স্তপনীয়াবিরচিতাগ্রহস্তাভিঃ ।
শৃংগারদেবতাভিঃ
সহিতং পরিখাধিপং ভজে মদনম্ ॥ 104 ॥

শৃংগারবরণবর্যস্য়োত্তরতঃ
সকলবিবুধসংসেব্যম্ ।
চিংতামণিগণরচিতং
চিংতাং দূরীকরোতু মে সদনম্ ॥ 105 ॥

মণিসদনসালয়োরধি-
-মধ্য়ং দশতালভূমিরুহদীর্ঘৈঃ ।
পর্ণৈঃ সুবর্ণবর্ণৈ-
-র্য়ুক্তাং কাংডৈশ্চ যোজনোত্তুংগৈঃ ॥ 106 ॥

মৃদুলৈস্তালীপংচক-
-মানৈর্মিলিতাং চ কেসরকদংবৈঃ ।
সংততগলিতমরংদ-
-স্রোতোনির্যন্মিলিংদসংদোহাম্ ॥ 107 ॥

পাটীরপবনবালক-
-ধাটীনির্যত্পরাগপিংজরিতাম্ ।
কলহংসীকুলকলকল-
-কূলংকষনিনদনিচযকমনীয়াম্ ॥ 108 ॥

পদ্মাটবীং ভজামঃ
পরিমলকল্লোলপক্ষ্মলোপাংতাম্ ।
[ দেব্যর্ঘ্যপাত্রধারী
তস্য়াঃ পূর্বদিশি দশকলায়ুক্তঃ । ]
বলয়িতমূর্তির্ভগবা-
-ন্বহ্নিঃ ক্রোশোন্নতশ্চিরং পায়াত্ ॥ 109 ॥

তত্রাধারে দেব্য়াঃ
পাত্রীরূপঃ প্রভাকরঃ শ্রীমান্ ।
দ্বাদশকলাসমেতো
ধ্বাংতং মম বহুলমাংতরং ভিংদ্য়াত্ ॥ 110 ॥

তস্মিন্ দিনেশপাত্রে
তরংগিতামোদমমৃতমযমর্ঘ্যম্ ।
চংদ্রকলাত্মকমমৃতং
সাংদ্রীকুর্য়াদমংদমানংদম্ ॥ 111 ॥

অমৃতে তস্মিন্নভিতো
বিহরংত্য়ো বিবিধমণিতরণিভাজঃ ।
ষোডশ কলাঃ সুধাংশোঃ
শোকাদুত্তারয়ংতু মামনিশম্ ॥ 112 ॥

তত্রৈব বিহৃতিভাজো
ধাতৃমুখানাং চ কারণেশানাম্ ।
সৃষ্ট্য়াদিরূপিকাস্তাঃ
শময়ংত্বখিলাঃ কলাশ্চ সংতাপম্ ॥ 113 ॥

কীনাশবরুণকিন্নর-
-রাজদিগংতেষু রত্নগেহস্য় ।
কলয়ামি তান্যজস্রং
কলয়ংত্বায়ুষ্যমর্ঘ্যপাত্রাণি ॥ 114 ॥

পাত্রস্থলস্য় পুরতঃ
পদ্মারমণবিধিপার্বতীশানাম্ ।
ভবনানি শর্মণে নো
ভবংতু ভাসা প্রদীপিতজগংতি ॥ 115 ॥

সদনস্য়ানলকোণে
সততং প্রণমামি কুংডমাগ্নেযম্ ।
তত্র স্থিতং চ বহ্নিং
তরলশিখাজটিলমংবিকাজনকম্ ॥ 116 ॥

তস্য়াসুরদিশি তাদৃশ-
-রত্নপরিস্ফুরিতপর্বনবকাঢ্যম্ ।
চক্রাত্মকং শতাংগং
শতয়োজনমুন্নতং ভজে দিব্যম্ ॥ 117 ॥

তত্রৈব দিশি নিষণ্ণং
তপনীযধ্বজপরংপরাশ্লিষ্টম্ ।
রথমপরং চ ভবান্য়া
রচয়ামো মনসি রত্নমযচূডম্ ॥ 118 ॥

ভবনস্য় বায়ুভাগে
পরিষ্কৃতো বিবিধবৈজয়ংতীভিঃ ।
রচযতু মুদং রথেংদ্রঃ
সচিবেশান্য়াঃ সমস্তবংদ্য়ায়াঃ ॥ 119 ॥

কুর্মোঽধিহৃদযমনিশং
ক্রোডাস্য়ায়াঃ শতাংগমূর্ধন্যম্ ।
রুদ্রদিশি রত্নধাম্নো
রুচিরশলাকাপ্রপংচকংচুকিতম্ ॥ 120 ॥

পরিতো দেবীধাম্নঃ
প্রণীতবাসা মনুস্বরূপিণ্য়ঃ ।
কুর্বংতু রশ্মিমালা-
-কৃতয়ঃ কুশলানি দেবতা নিখিলাঃ ॥ 121 ॥

প্রাগ্দ্বারস্য় ভবানী-
-ধাম্নঃ পার্শ্বদ্বয়ারচিতবাসে ।
মাতংগীকিটিমুখ্য়ৌ
মণিসদনে মনসি ভাবয়ামি চিরম্ ॥ 122 ॥

যোজনয়ুগলাভোগা
তত্ক্রোশপরিণাহয়ৈব ভিত্ত্য়া চ ।
চিংতামণিগৃহভূমি-
-র্জীয়াদাম্নাযমযচতুর্দ্বারা ॥ 123 ॥

দ্বারে দ্বারে ধাম্নঃ
পিংডীভূতা নবীনবিংবাভাঃ ।
বিদধতু বিপুলাং কীর্তিং
দিব্য়া লৌহিত্যসিদ্ধ্য়ো দেব্য়ঃ ॥ 124 ॥

মণিসদনস্য়াংতরতো
মহনীয়ে রত্নবেদিকামধ্য়ে ।
বিংদুমযচক্রমীডে
পীঠানামুপরি বিরচিতাবাসম্ ॥ 125 ॥

চক্রাণাং সকলানাং
প্রথমমধঃ সীমফলকবাস্তব্য়াঃ ।
অণিমাদিসিদ্ধয়ো মা-
-মবংতু দেবী প্রভাস্বরূপিণ্য়ঃ ॥ 126 ॥

অণিমাদিসিদ্ধিফলক-
-স্য়োপরিহরিণাংকখংডকৃতচূডাঃ ।
ভদ্রং পক্ষ্মলয়ংতু
ব্রাহ্মীপ্রমুখাশ্চ মাতরোঽস্মাকম্ ॥ 127 ॥

তস্য়োপরি মণিফলকে
তারুণ্য়োত্তুংগপীনকুচভারাঃ ।
সংক্ষোভিণীপ্রধানাঃ
ভ্রাংতি বিদ্রাবয়ংতু দশ মুদ্রাঃ ॥ 128 ॥

ফলকত্রযস্বরূপে
পৃথুলে ত্রৈলোক্যমোহনে চক্রে ।
দীব্য়ংতু প্রকটাখ্য়া-
-স্তাসাং কর্ত্রীং চ ভগবতী ত্রিপুরা ॥ 129 ॥

তদুপরি বিপুলে ধিষ্ণ্য়ে
তরলদৃশস্তরুণকোকনদভাসঃ ।
কামাকর্ষিণ্য়াদ্য়াঃ
কলয়ে দেবীঃ কলাধরশিখংডাঃ ॥ 130 ॥

সর্বাশাপরিপূরকচক্রে-
-ঽস্মিন্ গুপ্তয়োগিনীসেব্য়াঃ ।
ত্রিপুরেশী মম দুরিতং
তুদ্য়াত্ কংঠাবলংবিমণিহারা ॥ 131 ॥

তস্য়োপরি মণিপীঠে
তাম্রাংভোরুহদলপ্রভাশোণাঃ ।
ধ্য়ায়াম্যনংগকুসুমা-
-প্রমুখা দেবীশ্চ বিধৃতকূর্পাসাঃ ॥ 132 ॥

সংক্ষোভকারকেঽস্মিং-
-শ্চক্রে শ্রীত্রিপুরসুংদরী সাক্ষাত্ ।
গোপ্ত্রী গুপ্ততরাখ্য়াঃ
গোপাযতু মাং কৃপার্দ্রয়া দৃষ্ট্য়া ॥ 133 ॥

সংক্ষোভিণীপ্রধানাঃ
শক্তীস্তস্য়োর্ধ্ববলযকৃতবাসাঃ ।
আলোলনীলবেণী-
-রংতঃ কলয়ামি যৌবনোন্মত্তাঃ ॥ 134 ॥

সৌভাগ্যদাযকেঽস্মিং-
-শ্চক্রেশী ত্রিপুরবাসিনী জীয়াত্ ।
শক্তীশ্চ সংপ্রদায়াভিধাঃ
সমস্তাঃ প্রমোদয়ংত্বনিশম্ ॥ 135 ॥

মণিপীঠোপরি তাসাং
মহতি চতুর্হস্তবিস্তৃতে বলয়ে ।
সংততবিরচিতবাসাঃ
শক্তীঃ কলয়ামি সর্বসিদ্ধিমুখাঃ ॥ 136 ॥

সর্বার্থসাধকাখ্য়ে
চক্রেঽমুষ্মিন্ সমস্তফলদাত্রী ।
ত্রিপুরা শ্রীর্মম কুশলং
দিশতাদুত্তীর্ণয়োগিনীসেব্য়া ॥ 137 ॥

তাসাং নিলযস্য়োপরি
ধিষ্ণ্য়ে কৌসুংভকংচুকমনোজ্ঞাঃ ।
সর্বাজ্ঞাদ্য়াঃ দেব্য়ঃ
সকলাঃ সংপাদয়ংতু মম কীর্তিম্ ॥ 138 ॥

চক্রে সমস্তরক্ষা-
-করনাম্ন্যস্মিন্ সমস্তজনসেব্য়াম্ ।
মনসি নিগর্ভাসহিতাং
মন্য়ে শ্রীত্রিপুরমালিনীং দেবীম্ ॥ 139 ॥

সর্বজ্ঞাসদনস্য়োপরি
চক্রে বিপুলে সমাকলিতগেহাঃ ।
বংদে বশিনীমুখ্য়াঃ
শক্তীঃ সিংদূররেণুরুচঃ ॥ 140 ॥

শ্রীসর্বরোগহরাখ্য়-
-চক্রেঽস্মিংস্ত্রিপুরপূর্বিকাং সিদ্ধাম্ ।
বংদে রহস্যনাম্না
বেদ্য়াভিঃ শক্তিভিঃ সদা সেব্য়াম্ ॥ 141 ॥

বশিনীগৃহোপরিষ্টা-
-দ্বিংশতিহস্তোন্নতে মহাপীঠে ।
শময়ংতু শত্রুবৃংদং
শস্ত্রাণ্যস্ত্রাণি চাদিদংপত্য়োঃ ॥ 142 ॥

শস্ত্রসদনোপরিষ্টা-
-দ্বলয়ে বলবৈরিরত্নসংঘটিতে ।
কামেশ্বরীপ্রধানাঃ
কলয়ে দেবীঃ সমস্তজনবংদ্য়াঃ ॥ 143 ॥

চক্রেঽত্র সর্বসিদ্ধিপ্রদ-
-নামনি সর্বফলদাত্রী ।
ত্রিপুরাংবাবতু সততং
পরাপররহস্যয়োগিনীসেব্য়া ॥ 144 ॥

কামেশ্বরীগৃহোপরিবলয়ে
বিবিধমনুসংপ্রদাযজ্ঞাঃ ।
চত্বারো যুগনাথা
জয়ংতু মিত্রেশপূর্বকাঃ গুরবঃ ॥ 145 ॥

নাথভবনোপরিষ্টা-
-ন্নানারত্নচযমেদুরে পীঠে ।
কামেশ্য়াদ্য়া নিত্য়াঃ
কলয়ংতু মুদং তিথিস্বরূপিণ্য়ঃ ॥ 146 ॥

নিত্য়াসদনস্য়োপরি
নির্মলমণিনিবহবিরচিতে ধিষ্ণ্য়ে ।
কুশলং ষডংগদেব্য়ঃ
কলয়ংত্বস্মাকমুত্তরলনেত্রাঃ ॥ 147 ॥

সদনস্য়োপরি তাসাং
সর্বানংদমযনামকে বিংদৌ ।
পংচব্রহ্মাকারাং
মংচং প্রণমামি মণিগণাকীর্ণম্ ॥ 148 ॥

পরিতো মণিমংচস্য়
প্রলংবমানা নিয়ংত্রিতা পাশৈঃ ।
মায়াময়ী জবনিকা
মম দুরিতং হরতু মেচকচ্ছায়া ॥ 149 ॥

মংচস্য়োপরি লংব-
-ন্মদনীপুন্নাগমালিকাভরিতম্ ।
হরিগোপমযবিতানং
হরতাদালস্যমনিশমস্মাকম্ ॥ 150 ॥

পর্য়ংকস্য় ভজামঃ
পাদান্বিংবাংবুদেংদুহেমরুচঃ ।
অজহরিরুদ্রেশময়া-
-ননলাসুরমারুতেশকোণস্থান্ ॥ 151 ॥

ফলকং সদাশিবময়ং
প্রণৌমি সিংদূররেণুকিরণাভম্ ।
আরভ্য়াংগেশীনাং
সদনাত্কলিতং চ রত্নসোপানম্ ॥ 152 ॥

পট্টোপধানগংডক-
-চতুষ্টযস্ফুরিতপাটলাস্তরণম্ ।
পর্য়ংকোপরি ঘটিতং
পাতু চিরং হংসতূলশযনং নঃ ॥ 153 ॥

তস্য়োপরি নিবসংতং
তারুণ্যশ্রীনিষেবিতং সততম্ ।
আবৃংতপুল্লহল্লক-
-মরীচিকাপুংজমংজুলচ্ছাযম্ ॥ 154 ॥

সিংদূরশোণবসনং
শীতাংশুস্তবকচুংবিতকিরীটম্ ।
কুংকুমতিলকমনোহর-
-কুটিলালিকহসিতকুমুদবংধুশিশুম্ ॥ 155 ॥

পূর্ণেংদুবিংববদনং
ফুল্লসরোজাতলোচনত্রিতযম্ ।
তরলাপাংগতরংগিত-
-শফরাংকনশাস্ত্রসংপ্রদায়ার্থম্ ॥ 156 ॥

মণিমযকুংডলপুষ্য়-
-ন্মরীচিকল্লোলমাংসলকপোলম্ ।
বিদ্রুমসহোদরাধর-
-বিসৃমরসুস্মিতকিশোরসংচারম্ ॥ 157 ॥

আমোদিকুসুমশেখর-
-মানীলভ্রূলতায়ুগমনোজ্ঞম্ ।
বীটীসৌরভবীচী-
-দ্বিগুণিতবক্ত্রারবিংদসৌরভ্যম্ ॥ 158 ॥

পাশাংকুশেক্ষুচাপ-
-প্রসবশরস্ফুরিতকোমলকরাব্জম্ ।
কাশ্মীরপংকিলাংগং
কামেশং মনসি কুর্মহে সততম্ ॥ 159 ॥

তস্য়াংকভুবি নিষণ্ণাং
তরুণকদংবপ্রসূনকিরণাভাম্ ।
শীতাংশুখংডচূডাং
সীমংতন্যস্তসাংদ্রসিংদূরাম্ ॥ 160 ॥

কুংকুমললামভাস্ব-
-ন্নিটিলাং কুটিলতরচিল্লিকায়ুগলাম্ ।
নালীকতুল্যনযনাং
নাসাংচলনটিতমৌক্তিকাভরণাম্ ॥ 161 ॥

অংকুরিতমংদহাস-
-মরুণাধরকাংতিবিজিতবিংবাভাম্ ।
কস্তূরীমকরীয়ুত-
-কপোলসংক্রাংতকনকতাটংকাম্ ॥ 162 ॥

কর্পূরসাংদ্রবীটী-
-কবলিতবদনারবিংদকমনীয়াম্ ।
কংবুসহোদরকংঠ-
-প্রলংবমানাচ্ছমৌক্তিককলাপাম্ ॥ 163 ॥

কহ্লারদামকোমল-
-ভুজয়ুগলস্ফুরিতরত্নকেয়ূরাম্ ।
করপদ্মমূলবিলস-
-ত্কাংচনমযকটকবলযসংদোহাম্ ॥ 164 ॥

পাণিচতুষ্টযবিলস-
-ত্পাশাংকুশপুংড্রচাপপুষ্পাস্ত্রাম্ ।
কূলংকষকুচশিখরাং
কুংকুমকর্দমিতরত্নকূর্পাসাম্ ॥ 165 ॥

অণুদায়াদবলগ্না-
-মংবুদশোভাসনাভিরোমলতাম্ ।
মাণিক্যখচিতকাংচী-
-মরীচিকাক্রাংতমাংসলনিতংবাম্ ॥ 166 ॥

করভোরুকাংডয়ুগলাং
জংঘাজিতকামজৈত্রতূণীরাম্ ।
প্রপদপরিভূতকূর্মাং
পল্লবসচ্ছাযপদয়ুগমনোজ্ঞাম্ ॥ 167 ॥

কমলভবকংজলোচন-
-কিরীটরত্নাংশুরংজিতপদাব্জাম্ ।
উন্মস্তকানুকংপা-
-মুত্তরলাপাংগপোষিতানংগাম্ ॥ 168 ॥

আদিমরসাবলংবা-
-মনিদং প্রথমোক্তিবল্লরীকলিকাম্ ।
আব্রহ্মকীটজননী-
-মংতঃ কলয়ামি সুংদরীমনিশম্ ॥ 169 ॥

কস্তু ক্ষিতৌ পটীয়া-
-ন্বস্তু স্তোতুং শিবাংকবাস্তব্যম্ ।
অস্তু চিরংতনসুকৃতৈঃ
প্রস্তুতকাম্য়ায় তন্মম পুরস্তাত্ ॥ 170 ॥

প্রভুসম্মিতোক্তিগম্য়ং
পরমশিবোত্সংগতুংগপর্য়ংকম্ ।
তেজঃ কিংচন দিব্য়ং
পুরতো মে ভবতু পুংড্রকোদংডম্ ॥ 171 ॥

মধুরিমভরিতশরাসং
মকরংদস্য়ংদিমার্গণোদারম্ ।
কৈরবিণীবিটচূডং
কৈবল্য়ায়াস্তু কিংচন মহো নঃ ॥ 172 ॥

অক্ষুদ্রমিক্ষুচাপং
পরোক্ষমবলগ্নসীম্নি ত্র্যক্ষম্ ।
ক্ষপযতু মে ক্ষেমেতর-
-মুক্ষরথপ্রেমপক্ষ্মলং তেজঃ ॥ 173 ॥

ভৃংগরুচিসংগরকরাপাংগং
শৃংগারতুংগমরুণাংগম্ ।
মংগলমভংগুরং মে
ঘটযতু গংগাধরাংগসংগি মহঃ ॥ 174 ॥

প্রপদাজিতকূর্মমূর্জিত-
-করুণং ভর্মরুচিনির্মথনদেহম্ ।
শ্রিতবর্ম মর্ম শংভোঃ
কিংচন মম নর্ম শর্ম নির্মাতু ॥ 175 ॥

কালকুরলালিকালিম-
-কংদলবিজিতালি বিধৃতমণিবালি ।
মিলতু হৃদি পুলিনজঘনং
বহুলিতগলগরলকেলি কিমপি মহঃ ॥ 176 ॥

কুংকুমতিলকিতফালা
কুরুবিংদচ্ছাযপাটলদুকূলা ।
করুণাপয়োধিবেলা
কাচন চিত্তে চকাস্তু মে লীলা ॥ 177 ॥

পুষ্পংধযরুচিবেণ্য়ঃ
পুলিনাভোগত্রপাকরশ্রেণ্য়ঃ ।
জীয়াসুরিক্ষুপাণ্য়ঃ
কাশ্চন কামারিকেলিসাক্ষিণ্য়ঃ ॥ 178 ॥

তপনীয়াংশুকভাংসি
দ্রাক্ষামাধুর্যনাস্তিকবচাংসি ।
কতিচন শুচং মহাংসি
ক্ষপযতু কপালিতোষিতমনাংসি ॥ 179 ॥

অসিতকচমাযতাক্ষং
কুসুমশরং কূলমুদ্বহকৃপার্দ্রম্ ।
আদিমরসাধিদৈবত-
-মংতঃ কলয়ে হরাংকবাসি মহঃ ॥ 180 ॥

কর্ণোপাংততরংগিত-
-কটাক্ষবিস্পংদিকংঠদঘ্নকৃপাম্ ।
কামেশ্বরাংকনিলয়াং
কামপি বিদ্য়াং পুরাতনীং কলয়ে ॥ 181 ॥

অরবিংদকাংত্যরুংতুদ-
-বিলোচনদ্বংদ্বসুংদরমুখেংদু ।
ছংদঃ কংদলমংদির-
-মংতঃপুরমৈংদুশেখরং বংদে ॥ 182 ॥

বিংবিনিকুরংবডংবর-
-বিডংবকচ্ছাযমংবরবলগ্নম্ ।
কংবুগলমংবুদকুচং
বিংবোকং কমপি চুংবতু মনো মে ॥ 183 ॥

কমপি কমনীযরূপং
কলয়াম্য়ংতঃ কদংবকুসুমাঢ্যম্ ।
চংপকরুচিরসুবেষৈঃ
সংপাদিতকাংত্যলংকৃতদিগংতম্ ॥ 184 ॥

শংপারুচিভর-
-গর্হাসংপাদককাংতিকবচিতদিগংতম্ ।
সিদ্ধাংতং নিগমানাং
শুদ্ধাংতং কিমপি শূলিনঃ কলয়ে ॥ 185 ॥

উদ্যদ্দিনকরশোণা-
-নুত্পলবংধুস্তনংধয়াপীডান্ ।
করকলিতপুংড্রচাপা-
-ন্কলয়ে কানপি কপর্দিনঃ প্রাণান্ ॥ 186 ॥

রশনালসজ্জঘনয়া
রসনাজীবাতুচাপভাসুরয়া ।
ঘ্রাণায়ুষ্করশরয়া
ঘ্রাতং চিত্তং কয়াপি বাসনয়া ॥ 187 ॥

সরসিজসহয়ুধ্বদৃশা
শংপালতিকাসনাভিবিগ্রহয়া ।
ভাসা কয়াপি চেতো
নাসামণিশোভিবদনয়া ভরিতম্ ॥ 188 ॥

নবয়াবকাভসিচয়ান্বিতয়া
গজয়ানয়া দয়াপরয়া ।
ধৃতয়ামিনীশকলয়া
ধিয়া কয়াপি ক্ষতাময়া হি বযম্ ॥ 189 ॥

অলমলমকুসুমবাণৈ-
-রবিংবশোণৈরপুংড্রকোদংডৈঃ ।
অকুমুদবাংধবচূডৈ-
-রন্য়ৈরিহ জগতি দৈবতং মন্য়ৈঃ ॥ 190 ॥

কুবলযসদৃক্ষনযনৈঃ
কুলগিরিকূটস্থবংধুকুচভারৈঃ ।
করুণাস্পংদিকটাক্ষৈঃ
কবচিতচিত্তোঽস্মি কতিপয়ৈঃ কুতুকৈঃ ॥ 191 ॥

নতজনসুলভায় নমো
নালীকসনাভিলোচনায় নমঃ ।
নংদিতগিরিশায় নমো
মহসে নবনীপপাটলায় নমঃ ॥ 192 ॥

কাদংবকুসুমদাম্নে
কাযচ্ছায়াকণায়িতার্যম্ণে ।
সীম্নে চিরংতনগিরাং
ভূম্নে কস্মৈচিদাদদে প্রণতিম্ ॥ 193 ॥

কুটিলকবরীভরেভ্য়ঃ
কুংকুমসব্রহ্মচারিকিরণেভ্য়ঃ ।
কূলংকষস্তনেভ্য়ঃ
কুর্মঃ প্রণতিং কুলাদ্রিকুতুকেভ্য়ঃ ॥ 194 ॥

কোকনদশোণচরণা-
-ত্কোমলকুরলালিবিজিতশৈবালাত্ ।
উত্পলসগংধিনযনা-
-দুররীকুর্মো ন দেবতমান্য়াম্ ॥ 195 ॥

আপাটলাধরাণা-
-মানীলস্নিগ্ধবর্বরকচানাম্ ।
আম্নাযজীবনানা-
-মাকূতানাং হরস্য় দাসোঽহম্ ॥ 196 ॥

পুংখিতবিলাসহাস-
-স্ফুরিতাসু পুরাহিতাংকনিলয়াসু ।
মগ্নং মনো মদীয়ং
কাস্বপি কামারিজীবনাডীষু ॥ 197 ॥

ললিতা পাতু শিরো মে
ললাটমংবা চ মধুমতীরূপা ।
ভ্রূয়ুগ্মং চ ভবানী
পুষ্পশরা পাতু লোচনদ্বংদ্বম্ ॥ 198 ॥

পায়ান্নাসাং বালা
সুভগা দংতাংশ্চ সুংদরী জিহ্বাম্ ।
অধরোষ্ঠমাদিশক্তি-
-শ্চক্রেশী পাতু মে চিরং চিবুকম্ ॥ 199 ॥

কামেশ্বরী চ কর্ণৌ
কামাক্ষী পাতু গংডয়োর্য়ুগলম্ ।
শৃংগারনায়িকাব্য়া-
-দ্বদনং সিংহাসনেশ্বরী চ গলম্ ॥ 200 ॥

স্কংদপ্রসূশ্চ পাতু
স্কংধৌ বাহূ চ পাটলাংগী মে ।
পাণী চ পদ্মনিলয়া
পায়াদনিশং নখাবলীর্বিজয়া ॥ 201 ॥

কোদংডিনী চ বক্ষঃ
কুক্ষিং চাব্য়াত্ কুলাচলতনূজা ।
কল্য়াণী চ বলগ্নং
কটিং চ পায়াত্কলাধরশিখংডা ॥ 202 ॥

ঊরুদ্বয়ং চ পায়া-
-দুমা মৃডানী চ জানুনী রক্ষেত্ ।
জংঘে চ ষোডশী মে
পায়াত্ পাদৌ চ পাশসৃণিহস্তা ॥ 203 ॥

প্রাতঃ পাতু পরা মাং
মধ্য়াহ্নে পাতু মণিগৃহাধীশা ।
শর্বাণ্যবতু চ সায়ং
পায়াদ্রাত্রৌ চ ভৈরবী সাক্ষাত্ ॥ 204 ॥

ভার্য়াং রক্ষতু গৌরীং
পায়াত্ পুত্রাংশ্চ বিংদুগৃহপীঠা ।
শ্রীবিদ্য়া চ যশো মে
শীলং চাব্য়াচ্চিরং মহারাজ্ঞী ॥ 205 ॥

পবনময়ি পাবকময়ি
ক্ষোণীময়ি গগনময়ি কৃপীটময়ি ।
রবিময়ি শশিময়ি দিঙ্ময়ি
সমযময়ি প্রাণময়ি শিবে পাহি ॥ 206 ॥

কালি কপালিনি শূলিনি
ভৈরবি মাতংগি পংচমি ত্রিপুরে ।
বাগ্দেবি বিংধ্যবাসিনি
বালে ভুবনেশি পালয় চিরং মাম্ ॥ 207 ॥

অভিনবসিংদূরাভা-
-মংব ত্বাং চিংতয়ংতি যে হৃদয়ে ।
উপরি নিপতংতি তেষা-
-মুত্পলনযনাকটাক্ষকল্লোলাঃ ॥ 208 ॥

বর্গাষ্টকমিলিতাভি-
-র্বশিনীমুখ্য়াভিরাবৃতাং ভবতীম্ ।
চিংতযতাং সিতবর্ণাং
বাচো নির্য়াংত্যযত্নতো বদনাত্ ॥ 209 ॥

কনকশলাকাগৌরীং
কর্ণব্য়ালোলকুংডলদ্বিতয়াম্ ।
প্রহসিতমুখীং চ ভবতীং
ধ্য়ায়ংতো যে ত এব ভূধনদাঃ ॥ 210 ॥

শীর্ষাংভোরুহমধ্য়ে
শীতলপীয়ূষবর্ষিণীং ভবতীম্ ।
অনুদিনমনুচিংতযতা-
-মায়ুষ্য়ং ভবতি পুষ্কলমবন্য়াম্ ॥ 211 ॥

মধুরস্মিতাং মদারুণনযনাং
মাতংগকুংভবক্ষোজাম্ ।
চংদ্রবতংসিনীং ত্বাং
সবিধে পশ্য়ংতি সুকৃতিনঃ কেচিত্ ॥ 212 ॥

ললিতায়াঃ স্তবরত্নং
ললিতপদাভিঃ প্রণীতমার্য়াভিঃ ।
প্রতিদিনমবনৌ পঠতাং
ফলানি বক্তুং প্রগল্ভতে সৈব ॥ 213 ॥

সদসদনুগ্রহনিগ্রহ-
-গৃহীতমুনিবিগ্রহো ভগবান্ ।
সর্বাসামুপনিষদাং
দুর্বাসা জযতি দেশিকঃ প্রথমঃ ॥ 214 ॥

ইতি মহর্ষিদুর্বাসঃ বিরচিতং শ্রীললিতাস্তবরত্নম্ ।

sri lalitha stavaratnam arya dwishati in bengali