ಶ್ರೀ ಲಲಿತಾ ಸ್ತವರತ್ನಂ (ಆರ್ಯಾ ದ್ವಿಶತೀ)

sri lalitha stavaratnam arya dwishati in kannada

ವಂದೇ ಗಜೇಂದ್ರವದನಂ
ವಾಮಾಂಕಾರೂಢವಲ್ಲಭಾಶ್ಲಿಷ್ಟಮ್ ।
ಕುಂಕುಮಪರಾಗಶೋಣಂ
ಕುವಲಯಿನೀಜಾರಕೋರಕಾಪೀಡಮ್ ॥ 1 ॥

ಸ ಜಯತಿ ಸುವರ್ಣಶೈಲಃ
ಸಕಲಜಗಚ್ಚಕ್ರಸಂಘಟಿತಮೂರ್ತಿಃ ।
ಕಾಂಚನನಿಕುಂಜವಾಟೀ-
-ಕಂದಲದಮರೀಪ್ರಪಂಚಸಂಗೀತಃ ॥ 2 ॥

ಹರಿಹಯನೈರೃತಮಾರುತ-
-ಹರಿತಾಮಂತೇಷ್ವವಸ್ಥಿತಂ ತಸ್ಯ ।
ವಿನುಮಃ ಸಾನುತ್ರಿತಯಂ
ವಿಧಿಹರಿಗೌರೀಶವಿಷ್ಟಪಾಧಾರಮ್ ॥ 3 ॥

ಮಧ್ಯೇ ಪುನರ್ಮನೋಹರ-
-ರತ್ನರುಚಿಸ್ತಬಕರಂಜಿತದಿಗಂತಮ್ ।
ಉಪರಿ ಚತುಃಶತಯೋಜನ-
-ಮುತ್ತುಂಗಂ ಶೃಂಗಪುಂಗವಮುಪಾಸೇ ॥ 4 ॥

ತತ್ರ ಚತುಃಶತಯೋಜನ-
-ಪರಿಣಾಹಂ ದೇವಶಿಲ್ಪಿನಾ ರಚಿತಮ್ ।
ನಾನಾಸಾಲಮನೋಜ್ಞಂ
ನಮಾಮ್ಯಹಂ ನಗರಮಾದಿವಿದ್ಯಾಯಾಃ ॥ 5 ॥

ಪ್ರಥಮಂ ಸಹಸ್ರಪೂರ್ವಕ-
-ಷಟ್ಶತಸಂಖ್ಯಾಕಯೋಜನಂ ಪರಿತಃ ।
ವಲಯೀಕೃತಸ್ವಗಾತ್ರಂ
ವರಣಂ ಶರಣಂ ವ್ರಜಾಮ್ಯಯೋರೂಪಮ್ ॥ 6 ॥

ತಸ್ಯೋತ್ತರೇ ಸಮೀರಣ-
-ಯೋಜನದೂರೇ ತರಂಗಿತಚ್ಛಾಯಃ ।
ಘಟಯತು ಮುದಂ ದ್ವಿತೀಯೋ
ಘಂಟಾಸ್ತನಸಾರನಿರ್ಮಿತಃ ಸಾಲಃ ॥ 7 ॥

ಉಭಯೋರಂತರಸೀಮ-
-ನ್ಯುದ್ದಾಮಭ್ರಮರರಂಜಿತೋದಾರಮ್ ।
ಉಪವನಮುಪಾಸ್ಮಹೇ ವಯ-
-ಮೂರೀಕೃತಮಂದಮಾರುತಸ್ಯಂದಮ್ ॥ 8 ॥

ಆಲಿಂಗ್ಯ ಭದ್ರಕಾಲೀ-
-ಮಾಸೀನಸ್ತತ್ರ ಹರಿಶಿಲಾಶ್ಯಾಮಾಮ್ ।
ಮನಸಿ ಮಹಾಕಾಲೋ ಮೇ
ವಿಹರತು ಮಧುಪಾನವಿಭ್ರಮನ್ನೇತ್ರಃ ॥ 9 ॥

ತಾರ್ತೀಯೀಕೋ ವರಣ-
-ಸ್ತಸ್ಯೋತ್ತರಸೀಮ್ನಿ ವಾತಯೋಜನತಃ ।
ತಾಮ್ರೇಣ ರಚಿತಮೂರ್ತಿ-
-ಸ್ತನುತಾಮಾಚಂದ್ರತಾರಕಂ ಭದ್ರಮ್ ॥ 10 ॥

ಮಧ್ಯೇ ತಯೋಶ್ಚ ಮಣಿಮಯ-
-ಪಲ್ಲವಶಾಖಾಪ್ರಸೂನಪಕ್ಷ್ಮಲಿತಾಮ್ ।
ಕಲ್ಪಾನೋಕಹವಾಟೀಂ
ಕಲಯೇ ಮಕರಂದಪಂಕಿಲಾವಾಲಾಮ್ ॥ 11 ॥

ತತ್ರ ಮಧುಮಾಧವಶ್ರೀ-
-ತರುಣೀಭ್ಯಾಂ ತರಲದೃಕ್ಚಕೋರಾಭ್ಯಾಮ್ ।
ಆಲಿಂಗಿತೋಽವತಾನ್ಮಾ-
-ಮನಿಶಂ ಪ್ರಥಮರ್ತುರಾತ್ತಪುಷ್ಪಾಸ್ತ್ರಃ ॥ 12 ॥

ನಮತ ತದುತ್ತರಭಾಗೇ
ನಾಕಿಪಥೋಲ್ಲಂಘಿಶೃಂಗಸಂಘಾತಮ್ ।
ಸೀಸಾಕೃತಿಂ ತುರೀಯಂ
ಸಿತಕಿರಣಾಲೋಕನಿರ್ಮಲಂ ಸಾಲಮ್ ॥ 13 ॥

ಸಾಲದ್ವಯಾಂತರಾಲೇ
ಸರಲಾಲಿಕಪೋತಚಾಟುಸುಭಗಾಯಾಮ್ ।
ಸಂತಾನವಾಟಿಕಾಯಾಂ
ಸಕ್ತಂ ಚೇತೋಽಸ್ತು ಸತತಮಸ್ಮಾಕಮ್ ॥ 14 ॥

ತತ್ರ ತಪನಾತಿರೂಕ್ಷಃ
ಸಾಮ್ರಾಜ್ಞೀಚರಣಸಾಂದ್ರಿತಸ್ವಾಂತಃ ।
ಶುಕ್ರಶುಚಿಶ್ರೀಸಹಿತೋ
ಗ್ರೀಷ್ಮರ್ತುರ್ದಿಶತು ಕೀರ್ತಿಮಾಕಲ್ಪಮ್ ॥ 15 ॥

ಉತ್ತರಸೀಮನಿ ತಸ್ಯೋ-
-ನ್ನತಶಿಖರೋತ್ಕಂಪಿಹಾಟಕಪತಾಕಃ ।
ಪ್ರಕಟಯತು ಪಂಚಮೋ ನಃ
ಪ್ರಾಕಾರಃ ಕುಶಲಮಾರಕೂಟಮಯಃ ॥ 16 ॥

ಪ್ರಾಕಾರಯೋಶ್ಚ ಮಧ್ಯೇ
ಪಲ್ಲವಿತಾನ್ಯಭೃತಪಂಚಮೋನ್ಮೇಷಾ ।
ಹರಿಚಂದನದ್ರುವಾಟೀ-
-ಹರತಾದಾಮೂಲಮಸ್ಮದನುತಾಪಮ್ ॥ 17 ॥

ತತ್ರ ನಭಃ ಶ್ರೀಮುಖ್ಯೈ-
-ಸ್ತರುಣೀವರ್ಗೈಃ ಸಮನ್ವಿತಃ ಪರಿತಃ ।
ವಜ್ರಾಟ್ಟಹಾಸಮುಖರೋ
ವಾಂಛಾಪೂರ್ತಿಂ ತನೋತು ವರ್ಷರ್ತುಃ ॥ 18 ॥

ಮಾರುತಯೋಜನದೂರೇ
ಮಹನೀಯಸ್ತಸ್ಯ ಚೋತ್ತರೇ ಭಾಗೇ ।
ಭದ್ರಂ ಕೃಷೀಷ್ಟ ಷಷ್ಠಃ
ಪ್ರಾಕಾರಃ ಪಂಚಲೋಹಧಾತುಮಯಃ ॥ 19 ॥

ಅನಯೋರ್ಮಧ್ಯೇ ಸಂತತ-
-ಮಂಕೂರದ್ದಿವ್ಯಕುಸುಮಗಂಧಾಯಾಮ್ ।
ಮಂದಾರವಾಟಿಕಾಯಾಂ
ಮಾನಸಮಂಗೀಕರೋತು ಮೇ ವಿಹೃತಿಮ್ ॥ 20 ॥

ತಸ್ಯಾಮಿಷೋರ್ಜಲಕ್ಷ್ಮೀ-
-ತರುಣೀಭ್ಯಾಂ ಶರದೃತುಃ ಸದಾ ಸಹಿತಃ ।
ಅಭ್ಯರ್ಚಯನ್ ಸ ಜೀಯಾ-
-ದಂಬಾಮಾಮೋದಮೇದುರೈಃ ಕುಸುಮೈಃ ॥ 21 ॥

ತಸ್ಯರ್ಷಿಸಂಖ್ಯಯೋಜನ-
-ದೂರೇ ದೇದೀಪ್ಯಮಾನಶೃಂಗೌಘಃ ।
ಕಲಧೌತಕಲಿತಮೂರ್ತಿಃ
ಕಲ್ಯಾಣಂ ದಿಶತು ಸಪ್ತಮಃ ಸಾಲಃ ॥ 22 ॥

ಮಧ್ಯೇ ತಯೋರ್ಮರುತ್ಪಥ
ಲಂಘಿತವಿಟಪಾಗ್ರವಿರುತಕಲಕಂಠಾ ।
ಶ್ರೀಪಾರಿಜಾತವಾಟೀ
ಶ್ರಿಯಮನಿಶಂ ದಿಶತು ಶೀತಲೋದ್ದೇಶಾ ॥ 23 ॥

ತಸ್ಯಾಮತಿಪ್ರಿಯಾಭ್ಯಾಂ
ಸಹ ಖೇಲನ್ ಸಹಸಹಸ್ಯಲಕ್ಷ್ಮೀಭ್ಯಾಮ್ ।
ಸಾಮಂತೋ ಝಷಕೇತೋ-
-ರ್ಹೇಮಂತೋ ಭವತು ಹೇಮವೃದ್ಧ್ಯೈ ನಃ ॥ 24 ॥

ಉತ್ತರತಸ್ತಸ್ಯ ಮಹಾ-
-ನುದ್ಭಟಹುತಭುಕ್ಶಿಖಾರುಣಮಯೂಖಃ ।
ತಪನೀಯಖಂಡರಚಿತ-
-ಸ್ತನುತಾದಾಯುಷ್ಯಮಷ್ಟಮೋ ವರಣಃ ॥ 25 ॥

ಕಾದಂಬವಿಪಿನವಾಟೀ-
-ಮನಯೋರ್ಮಧ್ಯಭುವಿ ಕಲ್ಪಿತಾವಾಸಾಮ್ ।
ಕಲಯಾಮಿ ಸೂನಕೋರಕ-
-ಕಂದಲಿತಾಮೋದತುಂದಿಲಸಮೀರಾಮ್ ॥ 26 ॥

ತಸ್ಯಾಮತಿಶಿಶಿರಾಕೃತಿ-
-ರಾಸೀನಸ್ತಪತಪಸ್ಯಲಕ್ಷ್ಮೀಭ್ಯಾಮ್ ।
ಶಿವಮನಿಶಂ ಕುರುತಾನ್ಮೇ
ಶಿಶಿರರ್ತುಃ ಸತತಶೀತಲದಿಗಂತಃ ॥ 27 ॥

ತಸ್ಯಾಂ ಕದಂಬವಾಟ್ಯಾಂ
ತತ್ಪ್ರಸವಾಮೋದಮಿಲಿತಮಧುಗಂಧಮ್ ।
ಸಪ್ತಾವರಣಮನೋಜ್ಞಂ
ಶರಣಂ ಸಮುಪೈಮಿ ಮಂತ್ರಿಣೀಶರಣಮ್ ॥ 28 ॥

ತತ್ರಾಲಯೇ ವಿಶಾಲೇ
ತಪನೀಯಾರಚಿತತರಲಸೋಪಾನೇ ।
ಮಾಣಿಕ್ಯಮಂಡಪಾಂತ-
-ರ್ಮಹಿತೇ ಸಿಂಹಾಸನೇ ಸುಮಣಿಖಚಿತೇ ॥ 29 ॥

ಬಿಂದುತ್ರಿಪಂಚಕೋಣ-
-ದ್ವಿಪನೃಪವಸುವೇದದಲಕುರೇಖಾಢ್ಯೇ ।
ಚಕ್ರೇ ಸದಾ ನಿವಿಷ್ಟಾಂ
ಷಷ್ಠ್ಯಷ್ಟತ್ರಿಂಶದಕ್ಷರೇಶಾನೀಮ್ ॥ 30 ॥

ತಾಪಿಂಛಮೇಚಕಾಭಾಂ
ತಾಲೀದಲಘಟಿತಕರ್ಣತಾಟಂಕಾಮ್ ।
ತಾಂಬೂಲಪೂರಿತಮುಖೀಂ
ತಾಮ್ರಾಧರಬಿಂಬದೃಷ್ಟದರಹಾಸಾಮ್ ॥ 31 ॥

ಕುಂಕುಮಪಂಕಿಲದೇಹಾಂ
ಕುವಲಯಜೀವಾತುಶಾವಕವತಂಸಾಮ್ ।
ಕೋಕನದಶೋಣಚರಣಾಂ
ಕೋಕಿಲನಿಕ್ವಾಣಕೋಮಲಾಲಾಪಾಮ್ ॥ 32 ॥

ವಾಮಾಂಗಗಲಿತಚೂಲೀಂ
ವನಮಾಲ್ಯಕದಂಬಮಾಲಿಕಾಭರಣಾಮ್ ।
ಮುಕ್ತಾಲಲಂತಿಕಾಂಚಿತ
ಮುಗ್ಧಾಲಿಕಮಿಲಿತಚಿತ್ರಕೋದಾರಾಮ್ ॥ 33 ॥

ಕರವಿಧೃತಕೀರಶಾವಕ-
-ಕಲನಿನದವ್ಯಕ್ತನಿಖಿಲನಿಗಮಾರ್ಥಾಮ್ ।
ವಾಮಕುಚಸಂಗಿವೀಣಾವಾದನ-
-ಸೌಖ್ಯಾರ್ಧಮೀಲಿತಾಕ್ಷಿಯುಗಾಮ್ ॥ 34 ॥

ಆಪಾಟಲಾಂಶುಕಧರಾ-
-ಮಾದಿರಸೋನ್ಮೇಷವಾಸಿತಕಟಾಕ್ಷಾಮ್ ।
ಆಮ್ನಾಯಸಾರಗುಲಿಕಾ-
-ಮಾದ್ಯಾಂ ಸಂಗೀತಮಾತೃಕಾಂ ವಂದೇ ॥ 35 ॥

ತಸ್ಯ ಚ ಸುವರ್ಣಸಾಲ-
-ಸ್ಯೋತ್ತರತಸ್ತರುಣಕುಂಕುಮಚ್ಛಾಯಃ ।
ಶಮಯತು ಮಮ ಸಂತಾಪಂ
ಸಾಲೋ ನವಮಃ ಸ ಪುಷ್ಪರಾಗಮಯಃ ॥ 36 ॥

ಅನಯೋರಂತರವಸುಧಾಃ
ಪ್ರಣುಮಃ ಪ್ರತ್ಯಗ್ರಪುಷ್ಪರಾಗಮಯೀಃ ।
ಸಿಂಹಾಸನೇಶ್ವರೀಮನು-
-ಚಿಂತನನಿಸ್ತಂದ್ರಸಿದ್ಧನೀರಂಧ್ರಾಃ ॥ 37 ॥

ತತ್ಸಾಲೋತ್ತರದೇಶೇ
ತರುಣಜಪಾಕಿರಣಧೋರಣೀಶೋಣಃ ।
ಪ್ರಶಮಯತು ಪದ್ಮರಾಗ-
-ಪ್ರಾಕಾರೋ ಮಮ ಪರಾಭವಂ ದಶಮಃ ॥ 38 ॥

ಅಂತರಭೂಕೃತವಾಸಾ-
-ನನಯೋರಪನೀತಚಿತ್ತವೈಮತ್ಯಾನ್ ।
ಚಕ್ರೇಶೀಪದಭಕ್ತಾಂ-
-ಶ್ಚಾರಣವರ್ಗಾನಹರ್ನಿಶಂ ಕಲಯೇ ॥ 39 ॥

ಸಾರಂಗವಾಹಯೋಜನದೂರೇ-
-ಽಸಂಘಟಿತಕೇತನಸ್ತಸ್ಯ ।
ಗೋಮೇದಕೇನ ರಚಿತೋ
ಗೋಪಾಯತು ಮಾಂ ಸಮುನ್ನತಃ ಸಾಲಃ ॥ 40 ॥

ವಪ್ರದ್ವಯಾಂತರೋರ್ವ್ಯಾಂ
ವಟುಕೈರ್ವಿವಿಧೈಶ್ಚ ಯೋಗಿನೀಬೃಂದೈಃ ।
ಸತತಂ ಸಮರ್ಚಿತಾಯಾಃ
ಸಂಕರ್ಷಣ್ಯಾಃ ಪ್ರಣೌಮಿ ಚರಣಾಬ್ಜಮ್ ॥ 41 ॥

ತಾಪಸಯೋಜನದೂರೇ
ತಸ್ಯ ಸಮುತ್ತುಂಗ ಗೋಪುರೋಪೇತಃ ।
ವಾಂಛಾಪೂರ್ತ್ಯೈ ಭವತಾ-
-ದ್ವಜ್ರಮಣೀನಿಕರನಿರ್ಮಿತೋ ವಪ್ರಃ ॥ 42 ॥

ವರಣದ್ವಿತಯಾಂತರತೋ
ವಾಸಜುಷೋ ವಿಹಿತಮಧುರಸಾಸ್ವಾದಾಃ ।
ರಂಭಾದಿವಿಬುಧವೇಶ್ಯಾ
ರಚಯಂತು ಮಹಾಂತಮಸ್ಮದಾನಂದಮ್ ॥ 43 ॥

ತತ್ರ ಸದಾ ಪ್ರವಹಂತೀ
ತಟಿನೀ ವಜ್ರಾಭಿಧಾ ಚಿರಂ ಜೀಯಾತ್ ।
ಚಟುಲೋರ್ಮಿಜಾಲನೃತ್ಯ-
-ತ್ಕಲಹಂಸೀಕುಲಕಲಕ್ವಣಿತಪುಷ್ಟಾ ॥ 44 ॥

ರೋಧಸಿ ತಸ್ಯಾ ರುಚಿರೇ
ವಜ್ರೇಶೀ ಜಯತಿ ವಜ್ರಭೂಷಾಢ್ಯಾ ।
ವಜ್ರಪ್ರದಾನತೋಷಿತ-
-ವಜ್ರಿಮುಖತ್ರಿದಶವಿನುತಚಾರಿತ್ರಾ ॥ 45 ॥

ತಸ್ಯೋದೀಚ್ಯಾಂ ಹರಿತಿ
ಸ್ತವಕಿತಸುಷಮಾವಲೀಢವಿಯದಂತಃ ।
ವೈಡೂರ್ಯರತ್ನರಚಿತೋ
ವೈಮಲ್ಯಂ ದಿಶತು ಚೇತಸೋ ವರಣಃ ॥ 46 ॥

ಅಧಿಮಧ್ಯಮೇತಯೋಃ ಪುನ-
-ರಂಬಾಚರಣಾವಲಂಬಿತಸ್ವಾಂತಾನ್ ।
ಕಾರ್ಕೋಟಕಾದಿನಾಗಾನ್
ಕಲಯಾಮಃ ಕಿಂ ಚ ಬಲಿಮುಖಾನ್ ದನುಜಾನ್ ॥ 47 ॥

ಗಂಧವಹಸಂಖ್ಯಯೋಜನ-
-ದೂರೇ ಗಗನೋರ್ಧ್ವಜಾಂಘಿಕಸ್ತಸ್ಯ ।
ವಾಸವಮಣಿಪ್ರಣೀತೋ
ವರಣೋ ಬಹಲಯತು ವೈದುಷೀಂ ವಿಶದಾಮ್ ॥ 48 ॥

ಮಧ್ಯಕ್ಷೋಣ್ಯಾಮನಯೋ-
-ರ್ಮಹೇಂದ್ರನೀಲಾತ್ಮಕಾನಿ ಚ ಸರಾಂಸಿ ।
ಶಾತೋದರೀಸಹಾಯಾ-
-ನ್ಭೂಪಾಲಾನಪಿ ಪುನಃ ಪುನಃ ಪ್ರಣುಮಃ ॥ 49 ॥

ಆಶುಗಯೋಜನದೂರೇ
ತಸ್ಯೋರ್ಧ್ವಂ ಕಾಂತಿಧವಲಿತದಿಗಂತಃ ।
ಮುಕ್ತಾವಿರಚಿತಗಾತ್ರೋ
ಮುಹುರಸ್ಮಾಕಂ ಮುದೇ ಭವತು ಸಾಲಃ ॥ 50 ॥

ಆವೃತ್ತ್ಯೋರಧಿಮಧ್ಯಂ
ಪೂರ್ವಸ್ಯಾಂ ದಿಶಿ ಪುರಂದರಃ ಶ್ರೀಮಾನ್ ।
ಅಭ್ರಮುವಿಟಾಧಿರೂಢೋ
ವಿಭ್ರಮಮಸ್ಮಾಕಮನಿಶಮಾತನುತಾತ್ ॥ 51 ॥

ತತ್ಕೋಣೇ ವ್ಯಜನಸ್ರು-
-ಕ್ತೋಮರಪಾತ್ರಸ್ರುವಾನ್ನಶಕ್ತಿಧರಃ ।
ಸ್ವಾಹಾಸ್ವಧಾಸಮೇತಃ
ಸುಖಯತು ಮಾಂ ಹವ್ಯವಾಹನಃ ಸುಚಿರಮ್ ॥ 52 ॥

ದಕ್ಷಿಣದಿಗಂತರಾಲೇ
ದಂಡಧರೋ ನೀಲನೀರದಚ್ಛಾಯಃ ।
ತ್ರಿಪುರಾಪದಾಬ್ಜಭಕ್ತಸ್ತಿರಯತು
ಮಮ ನಿಖಿಲಮಂಹಸಾಂ ನಿಕರಮ್ ॥ 53 ॥

ತಸ್ಯೈವ ಪಶ್ಚಿಮಾಯಾಂ
ದಿಶಿ ದಲಿತೇಂದೀವರಪ್ರಭಾಶ್ಯಾಮಃ ।
ಖೇಟಾಸಿಯಷ್ಟಿಧಾರೀ
ಖೇದಾನಪನಯತು ಯಾತುಧಾನೋ ಮೇ ॥ 54 ॥

ತಸ್ಯಾ ಉತ್ತರದೇಶೇ
ಧವಲಾಂಗೋ ವಿಪುಲಝಷವರಾರೂಢಃ ।
ಪಾಶಾಯುಧಾತ್ತಪಾಣಿಃ
ಪಾಶೀ ವಿದಲಯತು ಪಾಶಜಾಲಾನಿ ॥ 55 ॥

ವಂದೇ ತದುತ್ತರಹರಿ-
-ತ್ಕೋಣೇ ವಾಯುಂ ಚಮೂರುವರವಾಹಮ್ ।
ಕೋರಕಿತತತ್ತ್ವಬೋಧಾ-
-ನ್ಗೋರಕ್ಷಪ್ರಮುಖಯೋಗಿನೋಽಪಿ ಮುಹುಃ ॥ 56 ॥

ತರುಣೀರಿಡಾಪ್ರಧಾನಾ-
-ಸ್ತಿಸ್ರೋ ವಾತಸ್ಯ ತಸ್ಯ ಕೃತವಾಸಾಃ ।
ಪ್ರತ್ಯಗ್ರಕಾಪಿಶಾಯನ-
-ಪಾನಪರಿಭ್ರಾಂತಲೋಚನಾಃ ಕಲಯೇ ॥ 57 ॥

ತಲ್ಲೋಕಪೂರ್ವಭಾಗೇ
ಧನದಂ ಧ್ಯಾಯಾಮಿ ಶೇವಧಿಕುಲೇಶಮ್ ।
ಅಪಿ ಮಾಣಿಭದ್ರಮುಖ್ಯಾ-
-ನಂಬಾಚರಣಾವಲಂಬಿನೋ ಯಕ್ಷಾನ್ ॥ 58 ॥

ತಸ್ಯೈವ ಪೂರ್ವಸೀಮನಿ
ತಪನೀಯಾರಚಿತಗೋಪುರೇ ನಗರೇ ।
ಕಾತ್ಯಾಯನೀಸಹಾಯಂ
ಕಲಯೇ ಶೀತಾಂಶುಖಂಡಚೂಡಾಲಮ್ ॥ 59 ॥

ತತ್ಪುರಷೋಡಶವರಣ-
-ಸ್ಥಲಭಾಜಸ್ತರುಣಚಂದ್ರಚೂಡಾಲಾನ್ ।
ರುದ್ರಾಧ್ಯಾಯೇ ಪಠಿತಾ-
-ನ್ರುದ್ರಾಣೀಸಹಚರಾನ್ಭಜೇ ರುದ್ರಾನ್ ॥ 60 ॥

ಪವಮಾನಸಂಖ್ಯಯೋಜನ-
-ದೂರೇ ಬಾಲತೃಣ್ಮೇಚಕಸ್ತಸ್ಯ ।
ಸಾಲೋ ಮರಕತರಚಿತಃ
ಸಂಪದಮಚಲಾಂ ಶ್ರಿಯಂ ಚ ಪುಷ್ಣಾತು ॥ 61 ॥

ಆವೃತಿಯುಗ್ಮಾಂತರತೋ
ಹರಿತಮಣೀನಿವಹಮೇಚಕೇ ದೇಶೇ ।
ಹಾಟಕತಾಲೀವಿಪಿನಂ
ಹಾಲಾಘಟಘಟಿತವಿಟಪಮಾಕಲಯೇ ॥ 62 ॥

ತತ್ರೈವ ಮಂತ್ರಿಣೀಗೃಹ-
-ಪರಿಣಾಹಂ ತರಲಕೇತನಂ ಸದನಮ್ ।
ಮರಕತಸೌಧಮನೋಜ್ಞಂ
ದದ್ಯಾದಾಯೂಂಷಿ ದಂಡನಾಥಾಯಾಃ ॥ 63 ॥

ಸದನೇ ತತ್ರ ಹರಿನ್ಮಣಿ-
-ಸಂಘಟಿತೇ ಮಂಡಪೇ ಶತಸ್ತಂಭೇ ।
ಕಾರ್ತಸ್ವರಮಯಪೀಠೇ
ಕನಕಮಯಾಂಬುರುಹಕರ್ಣಿಕಾಮಧ್ಯೇ ॥ 64 ॥

ಬಿಂದುತ್ರಿಕೋಣವರ್ತುಲ-
-ಷಡಸ್ರವೃತ್ತದ್ವಯಾನ್ವಿತೇ ಚಕ್ರೇ ।
ಸಂಚಾರಿಣೀ ದಶೋತ್ತರ-
ಶತಾರ್ಣಮನುರಾಜಕಮಲಕಲಹಂಸೀ ॥ 65 ॥

ಕೋಲವದನಾ ಕುಶೇಶಯ-
-ನಯನಾ ಕೋಕಾರಿಮಂಡಿತಶಿಖಂಡಾ ।
ಸಂತಪ್ತಕಾಂಚನಾಭಾ
ಸಂಧ್ಯಾರುಣಚೇಲಸಂವೃತನಿತಂಬಾ ॥ 66 ॥

ಹಲಮುಸಲಶಂಖಚಕ್ರಾ-
-ಽಂಕುಶಪಾಶಾಭಯವರಸ್ಫುರಿತಹಸ್ತಾ ।
ಕೂಲಂಕಷಾನುಕಂಪಾ
ಕುಂಕುಮಜಂಬಾಲಿತಸ್ತನಾಭೋಗಾ ॥ 67 ॥

ಧೂರ್ತಾನಾಮತಿದೂರಾ-
-ವಾರ್ತಾಶೇಷಾವಲಗ್ನಕಮನೀಯಾ ।
ಆರ್ತಾಲೀಶುಭದಾತ್ರೀ
ವಾರ್ತಾಲೀ ಭವತು ವಾಂಛಿತಾರ್ಥಾಯ ॥ 68 ॥

ತಸ್ಯಾಃ ಪರಿತೋ ದೇವೀಃ
ಸ್ವಪ್ನೇಶ್ಯುನ್ಮತ್ತಭೈರವೀಮುಖ್ಯಾಃ ।
ಪ್ರಣಮತ ಜಂಭಿನ್ಯಾದ್ಯಾಃ
ಭೈರವವರ್ಗಾಂಶ್ಚ ಹೇತುಕಪ್ರಮುಖಾನ್ ॥ 69 ॥

ಪೂರ್ವೋಕ್ತಸಂಖ್ಯಯೋಜನ-
-ದೂರೇ ಪೂಯಾಂಶುಪಾಟಲಸ್ತಸ್ಯ ।
ವಿದ್ರಾವಯತು ಮದಾರ್ತಿಂ
ವಿದ್ರುಮಸಾಲೋ ವಿಶಂಕಟದ್ವಾರಃ ॥ 70 ॥

ಆವರಣಯೋರಹರ್ನಿಶ-
-ಮಂತರಭೂಮೌಪ್ರಕಾಶಶಾಲಿನ್ಯಾಮ್ ।
ಆಸೀನಮಂಬುಜಾಸನ-
-ಮಭಿನವಸಿಂದೂರಗೌರಮಹಮೀಡೇ ॥ 71 ॥

ವರಣಸ್ಯ ತಸ್ಯ ಮಾರುತ-
-ಯೋಜನತೋ ವಿಪುಲಗೋಪುರದ್ವಾರಃ ।
ಸಾಲೋ ನಾನಾರತ್ನೈಃ
ಸಂಘಟಿತಾಂಗಃ ಕೃಷೀಷ್ಟ ಮದಭೀಷ್ಟಮ್ ॥ 72 ॥

ಅಂತರಕಕ್ಷ್ಯಾಮನಯೋ-
-ರವಿರಲಶೋಭಾಪಿಚಂಡಿಲೋದ್ದೇಶಾಮ್ ।
ಮಾಣಿಕ್ಯಮಂಡಪಾಖ್ಯಾಂ
ಮಹತೀಮಧಿಹೃದಯಮನಿಶಮಾಕಲಯೇ ॥ 73 ॥

ತತ್ರ ಸ್ಥಿತಂ ಪ್ರಸನ್ನಂ
ತರುಣತಮಾಲಪ್ರವಾಲಕಿರಣಾಭಮ್ ।
ಕರ್ಣಾವಲಂಬಿಕುಂಡಲ-
-ಕಂದಲಿತಾಭೀಶುಕವಚಿತಕಪೋಲಮ್ ॥ 74 ॥

ಶೋಣಾಧರಂ ಶುಚಿಸ್ಮಿತ-
-ಮೇಣಾಂಕವದನಮೇಧಮಾನಕೃಪಮ್ ।
ಮುಗ್ಧೈಣಮದವಿಶೇಷಕ-
-ಮುದ್ರಿತನಿಟಿಲೇಂದುರೇಖಿಕಾರುಚಿರಮ್ ॥ 75 ॥

ನಾಲೀಕದಲಸಹೋದರ-
-ನಯನಾಂಚಲಘಟಿತಮನಸಿಜಾಕೂತಮ್ ।
ಕಮಲಾಕಠಿನಪಯೋಧರ-
-ಕಸ್ತೂರೀಘುಸೃಣಪಂಕಿಲೋರಸ್ಕಮ್ ॥ 76 ॥

ಚಾಂಪೇಯಗಂಧಿಕೈಶ್ಯಂ
ಶಂಪಾಸಬ್ರಹ್ಮಚಾರಿಕೌಶೇಯಮ್ ।
ಶ್ರೀವತ್ಸಕೌಸ್ತುಭಧರಂ
ಶ್ರಿತಜನರಕ್ಷಾಧುರೀಣಚರಣಾಬ್ಜಮ್ ॥ 77 ॥

ಕಂಬುಸುದರ್ಶನವಿಲಸ-
-ತ್ಕರಪದ್ಮಂ ಕಂಠಲೋಲವನಮಾಲಮ್ ।
ಮುಚುಕುಂದಮೋಕ್ಷಫಲದಂ
ಮುಕುಂದಮಾನಂದಕಂದಮವಲಂಬೇ ॥ 78 ॥

ತದ್ವರಣೋತ್ತರಭಾಗೇ
ತಾರಾಪತಿಬಿಂಬಚುಂಬಿನಿಜಶೃಂಗಃ ।
ವಿವಿಧಮಣೀಗಣಘಟಿತೋ
ವಿತರತು ಸಾಲೋ ವಿನಿರ್ಮಲಾಂ ಧಿಷಣಾಮ್ ॥ 79 ॥

ಪ್ರಾಕಾರದ್ವಿತಯಾಂತರ-
-ಕಕ್ಷ್ಯಾಂ ಪೃಥುರತ್ನನಿಕರಸಂಕೀರ್ಣಾಮ್ ।
ನಮತ ಸಹಸ್ರಸ್ತಂಭಕ-
-ಮಂಡಪನಾಮ್ನಾತಿವಿಶ್ರುತಾಂ ಭುವನೇ ॥ 80 ॥

ಪ್ರಣುಮಸ್ತತ್ರ ಭವಾನೀ-
-ಸಹಚರಮೀಶಾನಮಿಂದುಖಂಡಧರಮ್ ।
ಶೃಂಗಾರನಾಯಿಕಾಮನು-
-ಶೀಲನಭಾಜೋಽಪಿ ಭೃಂಗಿನಂದಿಮುಖಾನ್ ॥ 81 ॥

ತಸ್ಯೈಣವಾಹಯೋಜನ-
-ದೂರೇ ವಂದೇ ಮನೋಮಯಂ ವಪ್ರಮ್ ।
ಅಂಕೂರನ್ಮಣಿಕಿರಣಾ-
-ಮಂತರಕಕ್ಷ್ಯಾಂ ಚ ನಿರ್ಮಲಾಮನಯೋಃ ॥ 82 ॥

ತತ್ರೈವಾಮೃತವಾಪೀಂ
ತರಲತರಂಗಾವಲೀಢತಟಯುಗ್ಮಾಮ್ ।
ಮುಕ್ತಾಮಯಕಲಹಂಸೀ-
-ಮುದ್ರಿತಕನಕಾರವಿಂದಸಂದೋಹಾಮ್ ॥ 83 ॥

ಶಕ್ರೋಪಲಮಯಭೃಂಗೀ-
-ಸಂಗೀತೋನ್ಮೇಷಘೋಷಿತದಿಗಂತಾಮ್ ।
ಕಾಂಚನಮಯಾಂಗವಿಲಸ-
-ತ್ಕಾರಂಡವಷಂಡತಾಂಡವಮನೋಜ್ಞಾಮ್ ॥ 84 ॥

ಕುರುವಿಂದಾತ್ಮಕಹಲ್ಲಕ-
-ಕೋರಕಸುಷಮಾಸಮೂಹಪಾಟಲಿತಾಮ್ ।
ಕಲಯೇ ಸುಧಾಸ್ವರೂಪಾಂ
ಕಂದಲಿತಾಮಂದಕೈರವಾಮೋದಾಮ್ ॥ 85 ॥

ತದ್ವಾಪಿಕಾಂತರಾಲೇ ತರಲೇ
ಮಣಿಪೋತಸೀಮ್ನಿ ವಿಹರಂತೀಮ್ ।
ಸಿಂದೂರಪಾಟಲಾಂಗೀಂ
ಸಿತಕಿರಣಾಂಕೂರಕಲ್ಪಿತವತಂಸಾಮ್ ॥ 86 ॥

ಪರ್ವೇಂದುಬಿಂಬವದನಾಂ
ಪಲ್ಲವಶೋಣಾಧರಸ್ಫುರಿತಹಾಸಾಮ್ ।
ಕುಟಿಲಕಬರೀಂ ಕುರಂಗೀ-
-ಶಿಶುನಯನಾಂ ಕುಂಡಲಸ್ಫುರಿತಗಂಡಾಮ್ ॥ 87 ॥

ನಿಕಟಸ್ಥಪೋತನಿಲಯಾಃ
ಶಕ್ತೀಃ ಶಯವಿಧೃತಹೇಮಶೃಂಗಜಲೈಃ ।
ಪರಿಷಿಂಚಂತೀಂ ಪರಿತ-
-ಸ್ತಾರಾಂ ತಾರುಣ್ಯಗರ್ವಿತಾಂ ವಂದೇ ॥ 88 ॥

ಪ್ರಾಗುಕ್ತಸಂಖ್ಯಯೋಜನದೂರೇ
ಪ್ರಣಮಾಮಿ ಬುದ್ಧಿಮಯಸಾಲಮ್ ।
ಅನಯೋರಂತರಕಕ್ಷ್ಯಾ-
-ಮಷ್ಟಾಪದಪುಷ್ಟಮೇದಿನೀಂ ರುಚಿರಾಮ್ ॥ 89 ॥

ಕಾದಂಬರೀನಿಧಾನಾಂ
ಕಲಯಾಮ್ಯಾನಂದವಾಪಿಕಾಂ ತಸ್ಯಾಮ್ ।
ಶೋಣಾಶ್ಮನಿವಹನಿರ್ಮಿತ-
-ಸೋಪಾನಶ್ರೇಣಿಶೋಭಮಾನತಟೀಮ್ ॥ 90 ॥

ಮಾಣಿಕ್ಯತರಣಿನಿಲಯಾಂ
ಮಧ್ಯೇ ತಸ್ಯಾ ಮದಾರುಣಕಪೋಲಾಮ್ ।
ಅಮೃತೇಶೀತ್ಯಭಿಧಾನಾ-
-ಮಂತಃ ಕಲಯಾಮಿ ವಾರುಣೀಂ ದೇವೀಮ್ ॥ 91 ॥

ಸೌವರ್ಣಕೇನಿಪಾತನ-
-ಹಸ್ತಾಃ ಸೌಂದರ್ಯಗರ್ವಿತಾ ದೇವ್ಯಃ ।
ತತ್ಪುರತಃ ಸ್ಥಿತಿಭಾಜೋ
ವಿತರಂತ್ವಸ್ಮಾಕಮಾಯುಷೋ ವೃದ್ಧಿಮ್ ॥ 92 ॥

ತಸ್ಯ ಪೃಷದಶ್ವಯೋಜನ-
-ದೂರೇಽಹಂಕಾರಸಾಲಮತಿತುಂಗಮ್ ।
ವಂದೇ ತಯೋಶ್ಚ ಮಧ್ಯೇ
ಕಕ್ಷ್ಯಾಂ ವಲಮಾನಮಲಯಪವಮಾನಾಮ್ ॥ 93 ॥

ವಿನುಮೋ ವಿಮರ್ಶವಾಪೀಂ
ಸೌಷುಮ್ನಸುಧಾಸ್ವರೂಪಿಣೀಂ ತತ್ರ ।
ವೇಲಾತಿಲಂಘ್ಯವೀಚೀ-
-ಕೋಲಾಹಲಭರಿತಕೂಲವನವಾಟೀಮ್ ॥ 94 ॥

ತತ್ರೈವ ಸಲಿಲಮಧ್ಯೇ
ತಾಪಿಂಛದಲಪ್ರಪಂಚಸುಷಮಾಭಾಮ್ ।
ಶ್ಯಾಮಲಕಂಚುಕಲಸಿತಾಂ
ಶ್ಯಾಮಾವಿಟಬಿಂಬಡಂಬರಹರಾಸ್ಯಾಮ್ ॥ 95 ॥

ಆಭುಗ್ನಮಸೃಣಚಿಲ್ಲೀ-
-ಹಸಿತಾಯುಗ್ಮಶರಕಾರ್ಮುಕವಿಲಾಸಾಮ್ ।
ಮಂದಸ್ಮಿತಾಂಚಿತಮುಖೀಂ
ಮಣಿಮಯತಾಟಂಕಮಂಡಿತಕಪೋಲಾಮ್ ॥ 96 ॥

ಕುರುವಿಂದತರಣಿನಿಲಯಾಂ
ಕುಲಾಚಲಸ್ಪರ್ಧಿಕುಚನಮನ್ಮಧ್ಯಾಮ್ ।
ಕುಂಕುಮವಿಲಿಪ್ತಗಾತ್ರೀಂ
ಕುರುಕುಲ್ಲಾಂ ಮನಸಿ ಕುರ್ಮಹೇ ಸತತಮ್ ॥ 97 ॥

ತತ್ಸಾಲೋತ್ತರಭಾಗೇ
ಭಾನುಮಯಂ ವಪ್ರಮಾಶ್ರಯೇ ದೀಪ್ತಮ್ ।
ಮಧ್ಯಂ ಚ ವಿಪುಲಮನಯೋ-
-ರ್ಮನ್ಯೇ ವಿಶ್ರಾಂತಮಾತಪೋದ್ಗಾರಮ್ ॥ 98 ॥

ತತ್ರ ಕುರುವಿಂದಪೀಠೇ
ತಾಮರಸೇ ಕನಕಕರ್ಣಿಕಾಘಟಿತೇ ।
ಆಸೀನಮರುಣವಾಸಸ-
-ಮಮ್ಲಾನಪ್ರಸವಮಾಲಿಕಾಭರಣಮ್ ॥ 99 ॥

ಚಕ್ಷುಷ್ಮತೀಪ್ರಕಾಶನ-
-ಶಕ್ತಿಚ್ಛಾಯಾಸಮಾರಚಿತಕೇಲಿಮ್ ।
ಮಾಣಿಕ್ಯಮುಕುಟರಮ್ಯಂ
ಮನ್ಯೇ ಮಾರ್ತಾಂಡಭೈರವಂ ಹೃದಯೇ ॥ 100 ॥

ಇಂದುಮಯಸಾಲಮೀಡೇ
ತಸ್ಯೋತ್ತರತಸ್ತುಷಾರಗಿರಿಗೌರಮ್ ।
ಅತ್ಯಂತಶಿಶಿರಮಾರುತ-
-ಮನಯೋರ್ಮಧ್ಯಂ ಚ ಚಂದ್ರಿಕೋದ್ಗಾರಮ್ ॥ 101 ॥

ತತ್ರ ಪ್ರಕಾಶಮಾನಂ
ತಾರಾನಿಕರೈಃ ಪರಿಷ್ಕೃತೋದ್ದೇಶಮ್ ।
ಅಮೃತಮಯಕಾಂತಿಕಂದಲ-
-ಮಂತಃ ಕಲಯಾಮಿ ಕುಂದಸಿತಮಿಂದುಮ್ ॥ 102 ॥

ಶೃಂಗಾರಸಾಲಮೀಡೇ
ಶೃಂಗೋಲ್ಲಸಿತಂ ತದುತ್ತರೇ ಭಾಗೇ ।
ಮಧ್ಯಸ್ಥಲೇ ತಯೋರಪಿ
ಮಹಿತಾಂ ಶೃಂಗಾರಪೂರ್ವಿಕಾಂ ಪರಿಖಾಮ್ ॥ 103 ॥

ತತ್ರ ಮಣಿನೌಸ್ಥಿತಾಭಿ-
-ಸ್ತಪನೀಯಾವಿರಚಿತಾಗ್ರಹಸ್ತಾಭಿಃ ।
ಶೃಂಗಾರದೇವತಾಭಿಃ
ಸಹಿತಂ ಪರಿಖಾಧಿಪಂ ಭಜೇ ಮದನಮ್ ॥ 104 ॥

ಶೃಂಗಾರವರಣವರ್ಯಸ್ಯೋತ್ತರತಃ
ಸಕಲವಿಬುಧಸಂಸೇವ್ಯಮ್ ।
ಚಿಂತಾಮಣಿಗಣರಚಿತಂ
ಚಿಂತಾಂ ದೂರೀಕರೋತು ಮೇ ಸದನಮ್ ॥ 105 ॥

ಮಣಿಸದನಸಾಲಯೋರಧಿ-
-ಮಧ್ಯಂ ದಶತಾಲಭೂಮಿರುಹದೀರ್ಘೈಃ ।
ಪರ್ಣೈಃ ಸುವರ್ಣವರ್ಣೈ-
-ರ್ಯುಕ್ತಾಂ ಕಾಂಡೈಶ್ಚ ಯೋಜನೋತ್ತುಂಗೈಃ ॥ 106 ॥

ಮೃದುಲೈಸ್ತಾಲೀಪಂಚಕ-
-ಮಾನೈರ್ಮಿಲಿತಾಂ ಚ ಕೇಸರಕದಂಬೈಃ ।
ಸಂತತಗಲಿತಮರಂದ-
-ಸ್ರೋತೋನಿರ್ಯನ್ಮಿಲಿಂದಸಂದೋಹಾಮ್ ॥ 107 ॥

ಪಾಟೀರಪವನಬಾಲಕ-
-ಧಾಟೀನಿರ್ಯತ್ಪರಾಗಪಿಂಜರಿತಾಮ್ ।
ಕಲಹಂಸೀಕುಲಕಲಕಲ-
-ಕೂಲಂಕಷನಿನದನಿಚಯಕಮನೀಯಾಮ್ ॥ 108 ॥

ಪದ್ಮಾಟವೀಂ ಭಜಾಮಃ
ಪರಿಮಲಕಲ್ಲೋಲಪಕ್ಷ್ಮಲೋಪಾಂತಾಮ್ ।
[ ದೇವ್ಯರ್ಘ್ಯಪಾತ್ರಧಾರೀ
ತಸ್ಯಾಃ ಪೂರ್ವದಿಶಿ ದಶಕಲಾಯುಕ್ತಃ । ]
ವಲಯಿತಮೂರ್ತಿರ್ಭಗವಾ-
-ನ್ವಹ್ನಿಃ ಕ್ರೋಶೋನ್ನತಶ್ಚಿರಂ ಪಾಯಾತ್ ॥ 109 ॥

ತತ್ರಾಧಾರೇ ದೇವ್ಯಾಃ
ಪಾತ್ರೀರೂಪಃ ಪ್ರಭಾಕರಃ ಶ್ರೀಮಾನ್ ।
ದ್ವಾದಶಕಲಾಸಮೇತೋ
ಧ್ವಾಂತಂ ಮಮ ಬಹುಲಮಾಂತರಂ ಭಿಂದ್ಯಾತ್ ॥ 110 ॥

ತಸ್ಮಿನ್ ದಿನೇಶಪಾತ್ರೇ
ತರಂಗಿತಾಮೋದಮಮೃತಮಯಮರ್ಘ್ಯಮ್ ।
ಚಂದ್ರಕಲಾತ್ಮಕಮಮೃತಂ
ಸಾಂದ್ರೀಕುರ್ಯಾದಮಂದಮಾನಂದಮ್ ॥ 111 ॥

ಅಮೃತೇ ತಸ್ಮಿನ್ನಭಿತೋ
ವಿಹರಂತ್ಯೋ ವಿವಿಧಮಣಿತರಣಿಭಾಜಃ ।
ಷೋಡಶ ಕಲಾಃ ಸುಧಾಂಶೋಃ
ಶೋಕಾದುತ್ತಾರಯಂತು ಮಾಮನಿಶಮ್ ॥ 112 ॥

ತತ್ರೈವ ವಿಹೃತಿಭಾಜೋ
ಧಾತೃಮುಖಾನಾಂ ಚ ಕಾರಣೇಶಾನಾಮ್ ।
ಸೃಷ್ಟ್ಯಾದಿರೂಪಿಕಾಸ್ತಾಃ
ಶಮಯಂತ್ವಖಿಲಾಃ ಕಲಾಶ್ಚ ಸಂತಾಪಮ್ ॥ 113 ॥

ಕೀನಾಶವರುಣಕಿನ್ನರ-
-ರಾಜದಿಗಂತೇಷು ರತ್ನಗೇಹಸ್ಯ ।
ಕಲಯಾಮಿ ತಾನ್ಯಜಸ್ರಂ
ಕಲಯಂತ್ವಾಯುಷ್ಯಮರ್ಘ್ಯಪಾತ್ರಾಣಿ ॥ 114 ॥

ಪಾತ್ರಸ್ಥಲಸ್ಯ ಪುರತಃ
ಪದ್ಮಾರಮಣವಿಧಿಪಾರ್ವತೀಶಾನಾಮ್ ।
ಭವನಾನಿ ಶರ್ಮಣೇ ನೋ
ಭವಂತು ಭಾಸಾ ಪ್ರದೀಪಿತಜಗಂತಿ ॥ 115 ॥

ಸದನಸ್ಯಾನಲಕೋಣೇ
ಸತತಂ ಪ್ರಣಮಾಮಿ ಕುಂಡಮಾಗ್ನೇಯಮ್ ।
ತತ್ರ ಸ್ಥಿತಂ ಚ ವಹ್ನಿಂ
ತರಲಶಿಖಾಜಟಿಲಮಂಬಿಕಾಜನಕಮ್ ॥ 116 ॥

ತಸ್ಯಾಸುರದಿಶಿ ತಾದೃಶ-
-ರತ್ನಪರಿಸ್ಫುರಿತಪರ್ವನವಕಾಢ್ಯಮ್ ।
ಚಕ್ರಾತ್ಮಕಂ ಶತಾಂಗಂ
ಶತಯೋಜನಮುನ್ನತಂ ಭಜೇ ದಿವ್ಯಮ್ ॥ 117 ॥

ತತ್ರೈವ ದಿಶಿ ನಿಷಣ್ಣಂ
ತಪನೀಯಧ್ವಜಪರಂಪರಾಶ್ಲಿಷ್ಟಮ್ ।
ರಥಮಪರಂ ಚ ಭವಾನ್ಯಾ
ರಚಯಾಮೋ ಮನಸಿ ರತ್ನಮಯಚೂಡಮ್ ॥ 118 ॥

ಭವನಸ್ಯ ವಾಯುಭಾಗೇ
ಪರಿಷ್ಕೃತೋ ವಿವಿಧವೈಜಯಂತೀಭಿಃ ।
ರಚಯತು ಮುದಂ ರಥೇಂದ್ರಃ
ಸಚಿವೇಶಾನ್ಯಾಃ ಸಮಸ್ತವಂದ್ಯಾಯಾಃ ॥ 119 ॥

ಕುರ್ಮೋಽಧಿಹೃದಯಮನಿಶಂ
ಕ್ರೋಡಾಸ್ಯಾಯಾಃ ಶತಾಂಗಮೂರ್ಧನ್ಯಮ್ ।
ರುದ್ರದಿಶಿ ರತ್ನಧಾಮ್ನೋ
ರುಚಿರಶಲಾಕಾಪ್ರಪಂಚಕಂಚುಕಿತಮ್ ॥ 120 ॥

ಪರಿತೋ ದೇವೀಧಾಮ್ನಃ
ಪ್ರಣೀತವಾಸಾ ಮನುಸ್ವರೂಪಿಣ್ಯಃ ।
ಕುರ್ವಂತು ರಶ್ಮಿಮಾಲಾ-
-ಕೃತಯಃ ಕುಶಲಾನಿ ದೇವತಾ ನಿಖಿಲಾಃ ॥ 121 ॥

ಪ್ರಾಗ್ದ್ವಾರಸ್ಯ ಭವಾನೀ-
-ಧಾಮ್ನಃ ಪಾರ್ಶ್ವದ್ವಯಾರಚಿತವಾಸೇ ।
ಮಾತಂಗೀಕಿಟಿಮುಖ್ಯೌ
ಮಣಿಸದನೇ ಮನಸಿ ಭಾವಯಾಮಿ ಚಿರಮ್ ॥ 122 ॥

ಯೋಜನಯುಗಲಾಭೋಗಾ
ತತ್ಕ್ರೋಶಪರಿಣಾಹಯೈವ ಭಿತ್ತ್ಯಾ ಚ ।
ಚಿಂತಾಮಣಿಗೃಹಭೂಮಿ-
-ರ್ಜೀಯಾದಾಮ್ನಾಯಮಯಚತುರ್ದ್ವಾರಾ ॥ 123 ॥

ದ್ವಾರೇ ದ್ವಾರೇ ಧಾಮ್ನಃ
ಪಿಂಡೀಭೂತಾ ನವೀನಬಿಂಬಾಭಾಃ ।
ವಿದಧತು ವಿಪುಲಾಂ ಕೀರ್ತಿಂ
ದಿವ್ಯಾ ಲೌಹಿತ್ಯಸಿದ್ಧ್ಯೋ ದೇವ್ಯಃ ॥ 124 ॥

ಮಣಿಸದನಸ್ಯಾಂತರತೋ
ಮಹನೀಯೇ ರತ್ನವೇದಿಕಾಮಧ್ಯೇ ।
ಬಿಂದುಮಯಚಕ್ರಮೀಡೇ
ಪೀಠಾನಾಮುಪರಿ ವಿರಚಿತಾವಾಸಮ್ ॥ 125 ॥

ಚಕ್ರಾಣಾಂ ಸಕಲಾನಾಂ
ಪ್ರಥಮಮಧಃ ಸೀಮಫಲಕವಾಸ್ತವ್ಯಾಃ ।
ಅಣಿಮಾದಿಸಿದ್ಧಯೋ ಮಾ-
-ಮವಂತು ದೇವೀ ಪ್ರಭಾಸ್ವರೂಪಿಣ್ಯಃ ॥ 126 ॥

ಅಣಿಮಾದಿಸಿದ್ಧಿಫಲಕ-
-ಸ್ಯೋಪರಿಹರಿಣಾಂಕಖಂಡಕೃತಚೂಡಾಃ ।
ಭದ್ರಂ ಪಕ್ಷ್ಮಲಯಂತು
ಬ್ರಾಹ್ಮೀಪ್ರಮುಖಾಶ್ಚ ಮಾತರೋಽಸ್ಮಾಕಮ್ ॥ 127 ॥

ತಸ್ಯೋಪರಿ ಮಣಿಫಲಕೇ
ತಾರುಣ್ಯೋತ್ತುಂಗಪೀನಕುಚಭಾರಾಃ ।
ಸಂಕ್ಷೋಭಿಣೀಪ್ರಧಾನಾಃ
ಭ್ರಾಂತಿ ವಿದ್ರಾವಯಂತು ದಶ ಮುದ್ರಾಃ ॥ 128 ॥

ಫಲಕತ್ರಯಸ್ವರೂಪೇ
ಪೃಥುಲೇ ತ್ರೈಲೋಕ್ಯಮೋಹನೇ ಚಕ್ರೇ ।
ದೀವ್ಯಂತು ಪ್ರಕಟಾಖ್ಯಾ-
-ಸ್ತಾಸಾಂ ಕರ್ತ್ರೀಂ ಚ ಭಗವತೀ ತ್ರಿಪುರಾ ॥ 129 ॥

ತದುಪರಿ ವಿಪುಲೇ ಧಿಷ್ಣ್ಯೇ
ತರಲದೃಶಸ್ತರುಣಕೋಕನದಭಾಸಃ ।
ಕಾಮಾಕರ್ಷಿಣ್ಯಾದ್ಯಾಃ
ಕಲಯೇ ದೇವೀಃ ಕಲಾಧರಶಿಖಂಡಾಃ ॥ 130 ॥

ಸರ್ವಾಶಾಪರಿಪೂರಕಚಕ್ರೇ-
-ಽಸ್ಮಿನ್ ಗುಪ್ತಯೋಗಿನೀಸೇವ್ಯಾಃ ।
ತ್ರಿಪುರೇಶೀ ಮಮ ದುರಿತಂ
ತುದ್ಯಾತ್ ಕಂಠಾವಲಂಬಿಮಣಿಹಾರಾ ॥ 131 ॥

ತಸ್ಯೋಪರಿ ಮಣಿಪೀಠೇ
ತಾಮ್ರಾಂಭೋರುಹದಲಪ್ರಭಾಶೋಣಾಃ ।
ಧ್ಯಾಯಾಮ್ಯನಂಗಕುಸುಮಾ-
-ಪ್ರಮುಖಾ ದೇವೀಶ್ಚ ವಿಧೃತಕೂರ್ಪಾಸಾಃ ॥ 132 ॥

ಸಂಕ್ಷೋಭಕಾರಕೇಽಸ್ಮಿಂ-
-ಶ್ಚಕ್ರೇ ಶ್ರೀತ್ರಿಪುರಸುಂದರೀ ಸಾಕ್ಷಾತ್ ।
ಗೋಪ್ತ್ರೀ ಗುಪ್ತತರಾಖ್ಯಾಃ
ಗೋಪಾಯತು ಮಾಂ ಕೃಪಾರ್ದ್ರಯಾ ದೃಷ್ಟ್ಯಾ ॥ 133 ॥

ಸಂಕ್ಷೋಭಿಣೀಪ್ರಧಾನಾಃ
ಶಕ್ತೀಸ್ತಸ್ಯೋರ್ಧ್ವವಲಯಕೃತವಾಸಾಃ ।
ಆಲೋಲನೀಲವೇಣೀ-
-ರಂತಃ ಕಲಯಾಮಿ ಯೌವನೋನ್ಮತ್ತಾಃ ॥ 134 ॥

ಸೌಭಾಗ್ಯದಾಯಕೇಽಸ್ಮಿಂ-
-ಶ್ಚಕ್ರೇಶೀ ತ್ರಿಪುರವಾಸಿನೀ ಜೀಯಾತ್ ।
ಶಕ್ತೀಶ್ಚ ಸಂಪ್ರದಾಯಾಭಿಧಾಃ
ಸಮಸ್ತಾಃ ಪ್ರಮೋದಯಂತ್ವನಿಶಮ್ ॥ 135 ॥

ಮಣಿಪೀಠೋಪರಿ ತಾಸಾಂ
ಮಹತಿ ಚತುರ್ಹಸ್ತವಿಸ್ತೃತೇ ವಲಯೇ ।
ಸಂತತವಿರಚಿತವಾಸಾಃ
ಶಕ್ತೀಃ ಕಲಯಾಮಿ ಸರ್ವಸಿದ್ಧಿಮುಖಾಃ ॥ 136 ॥

ಸರ್ವಾರ್ಥಸಾಧಕಾಖ್ಯೇ
ಚಕ್ರೇಽಮುಷ್ಮಿನ್ ಸಮಸ್ತಫಲದಾತ್ರೀ ।
ತ್ರಿಪುರಾ ಶ್ರೀರ್ಮಮ ಕುಶಲಂ
ದಿಶತಾದುತ್ತೀರ್ಣಯೋಗಿನೀಸೇವ್ಯಾ ॥ 137 ॥

ತಾಸಾಂ ನಿಲಯಸ್ಯೋಪರಿ
ಧಿಷ್ಣ್ಯೇ ಕೌಸುಂಭಕಂಚುಕಮನೋಜ್ಞಾಃ ।
ಸರ್ವಾಜ್ಞಾದ್ಯಾಃ ದೇವ್ಯಃ
ಸಕಲಾಃ ಸಂಪಾದಯಂತು ಮಮ ಕೀರ್ತಿಮ್ ॥ 138 ॥

ಚಕ್ರೇ ಸಮಸ್ತರಕ್ಷಾ-
-ಕರನಾಮ್ನ್ಯಸ್ಮಿನ್ ಸಮಸ್ತಜನಸೇವ್ಯಾಮ್ ।
ಮನಸಿ ನಿಗರ್ಭಾಸಹಿತಾಂ
ಮನ್ಯೇ ಶ್ರೀತ್ರಿಪುರಮಾಲಿನೀಂ ದೇವೀಮ್ ॥ 139 ॥

ಸರ್ವಜ್ಞಾಸದನಸ್ಯೋಪರಿ
ಚಕ್ರೇ ವಿಪುಲೇ ಸಮಾಕಲಿತಗೇಹಾಃ ।
ವಂದೇ ವಶಿನೀಮುಖ್ಯಾಃ
ಶಕ್ತೀಃ ಸಿಂದೂರರೇಣುರುಚಃ ॥ 140 ॥

ಶ್ರೀಸರ್ವರೋಗಹರಾಖ್ಯ-
-ಚಕ್ರೇಽಸ್ಮಿಂಸ್ತ್ರಿಪುರಪೂರ್ವಿಕಾಂ ಸಿದ್ಧಾಮ್ ।
ವಂದೇ ರಹಸ್ಯನಾಮ್ನಾ
ವೇದ್ಯಾಭಿಃ ಶಕ್ತಿಭಿಃ ಸದಾ ಸೇವ್ಯಾಮ್ ॥ 141 ॥

ವಶಿನೀಗೃಹೋಪರಿಷ್ಟಾ-
-ದ್ವಿಂಶತಿಹಸ್ತೋನ್ನತೇ ಮಹಾಪೀಠೇ ।
ಶಮಯಂತು ಶತ್ರುಬೃಂದಂ
ಶಸ್ತ್ರಾಣ್ಯಸ್ತ್ರಾಣಿ ಚಾದಿದಂಪತ್ಯೋಃ ॥ 142 ॥

ಶಸ್ತ್ರಸದನೋಪರಿಷ್ಟಾ-
-ದ್ವಲಯೇ ವಲವೈರಿರತ್ನಸಂಘಟಿತೇ ।
ಕಾಮೇಶ್ವರೀಪ್ರಧಾನಾಃ
ಕಲಯೇ ದೇವೀಃ ಸಮಸ್ತಜನವಂದ್ಯಾಃ ॥ 143 ॥

ಚಕ್ರೇಽತ್ರ ಸರ್ವಸಿದ್ಧಿಪ್ರದ-
-ನಾಮನಿ ಸರ್ವಫಲದಾತ್ರೀ ।
ತ್ರಿಪುರಾಂಬಾವತು ಸತತಂ
ಪರಾಪರರಹಸ್ಯಯೋಗಿನೀಸೇವ್ಯಾ ॥ 144 ॥

ಕಾಮೇಶ್ವರೀಗೃಹೋಪರಿವಲಯೇ
ವಿವಿಧಮನುಸಂಪ್ರದಾಯಜ್ಞಾಃ ।
ಚತ್ವಾರೋ ಯುಗನಾಥಾ
ಜಯಂತು ಮಿತ್ರೇಶಪೂರ್ವಕಾಃ ಗುರವಃ ॥ 145 ॥

ನಾಥಭವನೋಪರಿಷ್ಟಾ-
-ನ್ನಾನಾರತ್ನಚಯಮೇದುರೇ ಪೀಠೇ ।
ಕಾಮೇಶ್ಯಾದ್ಯಾ ನಿತ್ಯಾಃ
ಕಲಯಂತು ಮುದಂ ತಿಥಿಸ್ವರೂಪಿಣ್ಯಃ ॥ 146 ॥

ನಿತ್ಯಾಸದನಸ್ಯೋಪರಿ
ನಿರ್ಮಲಮಣಿನಿವಹವಿರಚಿತೇ ಧಿಷ್ಣ್ಯೇ ।
ಕುಶಲಂ ಷಡಂಗದೇವ್ಯಃ
ಕಲಯಂತ್ವಸ್ಮಾಕಮುತ್ತರಲನೇತ್ರಾಃ ॥ 147 ॥

ಸದನಸ್ಯೋಪರಿ ತಾಸಾಂ
ಸರ್ವಾನಂದಮಯನಾಮಕೇ ಬಿಂದೌ ।
ಪಂಚಬ್ರಹ್ಮಾಕಾರಾಂ
ಮಂಚಂ ಪ್ರಣಮಾಮಿ ಮಣಿಗಣಾಕೀರ್ಣಮ್ ॥ 148 ॥

ಪರಿತೋ ಮಣಿಮಂಚಸ್ಯ
ಪ್ರಲಂಬಮಾನಾ ನಿಯಂತ್ರಿತಾ ಪಾಶೈಃ ।
ಮಾಯಾಮಯೀ ಜವನಿಕಾ
ಮಮ ದುರಿತಂ ಹರತು ಮೇಚಕಚ್ಛಾಯಾ ॥ 149 ॥

ಮಂಚಸ್ಯೋಪರಿ ಲಂಬ-
-ನ್ಮದನೀಪುನ್ನಾಗಮಾಲಿಕಾಭರಿತಮ್ ।
ಹರಿಗೋಪಮಯವಿತಾನಂ
ಹರತಾದಾಲಸ್ಯಮನಿಶಮಸ್ಮಾಕಮ್ ॥ 150 ॥

ಪರ್ಯಂಕಸ್ಯ ಭಜಾಮಃ
ಪಾದಾನ್ಬಿಂಬಾಂಬುದೇಂದುಹೇಮರುಚಃ ।
ಅಜಹರಿರುದ್ರೇಶಮಯಾ-
-ನನಲಾಸುರಮಾರುತೇಶಕೋಣಸ್ಥಾನ್ ॥ 151 ॥

ಫಲಕಂ ಸದಾಶಿವಮಯಂ
ಪ್ರಣೌಮಿ ಸಿಂದೂರರೇಣುಕಿರಣಾಭಮ್ ।
ಆರಭ್ಯಾಂಗೇಶೀನಾಂ
ಸದನಾತ್ಕಲಿತಂ ಚ ರತ್ನಸೋಪಾನಮ್ ॥ 152 ॥

ಪಟ್ಟೋಪಧಾನಗಂಡಕ-
-ಚತುಷ್ಟಯಸ್ಫುರಿತಪಾಟಲಾಸ್ತರಣಮ್ ।
ಪರ್ಯಂಕೋಪರಿ ಘಟಿತಂ
ಪಾತು ಚಿರಂ ಹಂಸತೂಲಶಯನಂ ನಃ ॥ 153 ॥

ತಸ್ಯೋಪರಿ ನಿವಸಂತಂ
ತಾರುಣ್ಯಶ್ರೀನಿಷೇವಿತಂ ಸತತಮ್ ।
ಆವೃಂತಪುಲ್ಲಹಲ್ಲಕ-
-ಮರೀಚಿಕಾಪುಂಜಮಂಜುಲಚ್ಛಾಯಮ್ ॥ 154 ॥

ಸಿಂದೂರಶೋಣವಸನಂ
ಶೀತಾಂಶುಸ್ತಬಕಚುಂಬಿತಕಿರೀಟಮ್ ।
ಕುಂಕುಮತಿಲಕಮನೋಹರ-
-ಕುಟಿಲಾಲಿಕಹಸಿತಕುಮುದಬಂಧುಶಿಶುಮ್ ॥ 155 ॥

ಪೂರ್ಣೇಂದುಬಿಂಬವದನಂ
ಫುಲ್ಲಸರೋಜಾತಲೋಚನತ್ರಿತಯಮ್ ।
ತರಲಾಪಾಂಗತರಂಗಿತ-
-ಶಫರಾಂಕನಶಾಸ್ತ್ರಸಂಪ್ರದಾಯಾರ್ಥಮ್ ॥ 156 ॥

ಮಣಿಮಯಕುಂಡಲಪುಷ್ಯ-
-ನ್ಮರೀಚಿಕಲ್ಲೋಲಮಾಂಸಲಕಪೋಲಮ್ ।
ವಿದ್ರುಮಸಹೋದರಾಧರ-
-ವಿಸೃಮರಸುಸ್ಮಿತಕಿಶೋರಸಂಚಾರಮ್ ॥ 157 ॥

ಆಮೋದಿಕುಸುಮಶೇಖರ-
-ಮಾನೀಲಭ್ರೂಲತಾಯುಗಮನೋಜ್ಞಮ್ ।
ವೀಟೀಸೌರಭವೀಚೀ-
-ದ್ವಿಗುಣಿತವಕ್ತ್ರಾರವಿಂದಸೌರಭ್ಯಮ್ ॥ 158 ॥

ಪಾಶಾಂಕುಶೇಕ್ಷುಚಾಪ-
-ಪ್ರಸವಶರಸ್ಫುರಿತಕೋಮಲಕರಾಬ್ಜಮ್ ।
ಕಾಶ್ಮೀರಪಂಕಿಲಾಂಗಂ
ಕಾಮೇಶಂ ಮನಸಿ ಕುರ್ಮಹೇ ಸತತಮ್ ॥ 159 ॥

ತಸ್ಯಾಂಕಭುವಿ ನಿಷಣ್ಣಾಂ
ತರುಣಕದಂಬಪ್ರಸೂನಕಿರಣಾಭಾಮ್ ।
ಶೀತಾಂಶುಖಂಡಚೂಡಾಂ
ಸೀಮಂತನ್ಯಸ್ತಸಾಂದ್ರಸಿಂದೂರಾಮ್ ॥ 160 ॥

ಕುಂಕುಮಲಲಾಮಭಾಸ್ವ-
-ನ್ನಿಟಿಲಾಂ ಕುಟಿಲತರಚಿಲ್ಲಿಕಾಯುಗಲಾಮ್ ।
ನಾಲೀಕತುಲ್ಯನಯನಾಂ
ನಾಸಾಂಚಲನಟಿತಮೌಕ್ತಿಕಾಭರಣಾಮ್ ॥ 161 ॥

ಅಂಕುರಿತಮಂದಹಾಸ-
-ಮರುಣಾಧರಕಾಂತಿವಿಜಿತಬಿಂಬಾಭಾಮ್ ।
ಕಸ್ತೂರೀಮಕರೀಯುತ-
-ಕಪೋಲಸಂಕ್ರಾಂತಕನಕತಾಟಂಕಾಮ್ ॥ 162 ॥

ಕರ್ಪೂರಸಾಂದ್ರವೀಟೀ-
-ಕಬಲಿತವದನಾರವಿಂದಕಮನೀಯಾಮ್ ।
ಕಂಬುಸಹೋದರಕಂಠ-
-ಪ್ರಲಂಬಮಾನಾಚ್ಛಮೌಕ್ತಿಕಕಲಾಪಾಮ್ ॥ 163 ॥

ಕಹ್ಲಾರದಾಮಕೋಮಲ-
-ಭುಜಯುಗಲಸ್ಫುರಿತರತ್ನಕೇಯೂರಾಮ್ ।
ಕರಪದ್ಮಮೂಲವಿಲಸ-
-ತ್ಕಾಂಚನಮಯಕಟಕವಲಯಸಂದೋಹಾಮ್ ॥ 164 ॥

ಪಾಣಿಚತುಷ್ಟಯವಿಲಸ-
-ತ್ಪಾಶಾಂಕುಶಪುಂಡ್ರಚಾಪಪುಷ್ಪಾಸ್ತ್ರಾಮ್ ।
ಕೂಲಂಕಷಕುಚಶಿಖರಾಂ
ಕುಂಕುಮಕರ್ದಮಿತರತ್ನಕೂರ್ಪಾಸಾಮ್ ॥ 165 ॥

ಅಣುದಾಯಾದವಲಗ್ನಾ-
-ಮಂಬುದಶೋಭಾಸನಾಭಿರೋಮಲತಾಮ್ ।
ಮಾಣಿಕ್ಯಖಚಿತಕಾಂಚೀ-
-ಮರೀಚಿಕಾಕ್ರಾಂತಮಾಂಸಲನಿತಂಬಾಮ್ ॥ 166 ॥

ಕರಭೋರುಕಾಂಡಯುಗಲಾಂ
ಜಂಘಾಜಿತಕಾಮಜೈತ್ರತೂಣೀರಾಮ್ ।
ಪ್ರಪದಪರಿಭೂತಕೂರ್ಮಾಂ
ಪಲ್ಲವಸಚ್ಛಾಯಪದಯುಗಮನೋಜ್ಞಾಮ್ ॥ 167 ॥

ಕಮಲಭವಕಂಜಲೋಚನ-
-ಕಿರೀಟರತ್ನಾಂಶುರಂಜಿತಪದಾಬ್ಜಾಮ್ ।
ಉನ್ಮಸ್ತಕಾನುಕಂಪಾ-
-ಮುತ್ತರಲಾಪಾಂಗಪೋಷಿತಾನಂಗಾಮ್ ॥ 168 ॥

ಆದಿಮರಸಾವಲಂಬಾ-
-ಮನಿದಂ ಪ್ರಥಮೋಕ್ತಿವಲ್ಲರೀಕಲಿಕಾಮ್ ।
ಆಬ್ರಹ್ಮಕೀಟಜನನೀ-
-ಮಂತಃ ಕಲಯಾಮಿ ಸುಂದರೀಮನಿಶಮ್ ॥ 169 ॥

ಕಸ್ತು ಕ್ಷಿತೌ ಪಟೀಯಾ-
-ನ್ವಸ್ತು ಸ್ತೋತುಂ ಶಿವಾಂಕವಾಸ್ತವ್ಯಮ್ ।
ಅಸ್ತು ಚಿರಂತನಸುಕೃತೈಃ
ಪ್ರಸ್ತುತಕಾಮ್ಯಾಯ ತನ್ಮಮ ಪುರಸ್ತಾತ್ ॥ 170 ॥

ಪ್ರಭುಸಮ್ಮಿತೋಕ್ತಿಗಮ್ಯಂ
ಪರಮಶಿವೋತ್ಸಂಗತುಂಗಪರ್ಯಂಕಮ್ ।
ತೇಜಃ ಕಿಂಚನ ದಿವ್ಯಂ
ಪುರತೋ ಮೇ ಭವತು ಪುಂಡ್ರಕೋದಂಡಮ್ ॥ 171 ॥

ಮಧುರಿಮಭರಿತಶರಾಸಂ
ಮಕರಂದಸ್ಯಂದಿಮಾರ್ಗಣೋದಾರಮ್ ।
ಕೈರವಿಣೀವಿಟಚೂಡಂ
ಕೈವಲ್ಯಾಯಾಸ್ತು ಕಿಂಚನ ಮಹೋ ನಃ ॥ 172 ॥

ಅಕ್ಷುದ್ರಮಿಕ್ಷುಚಾಪಂ
ಪರೋಕ್ಷಮವಲಗ್ನಸೀಮ್ನಿ ತ್ರ್ಯಕ್ಷಮ್ ।
ಕ್ಷಪಯತು ಮೇ ಕ್ಷೇಮೇತರ-
-ಮುಕ್ಷರಥಪ್ರೇಮಪಕ್ಷ್ಮಲಂ ತೇಜಃ ॥ 173 ॥

ಭೃಂಗರುಚಿಸಂಗರಕರಾಪಾಂಗಂ
ಶೃಂಗಾರತುಂಗಮರುಣಾಂಗಮ್ ।
ಮಂಗಲಮಭಂಗುರಂ ಮೇ
ಘಟಯತು ಗಂಗಾಧರಾಂಗಸಂಗಿ ಮಹಃ ॥ 174 ॥

ಪ್ರಪದಾಜಿತಕೂರ್ಮಮೂರ್ಜಿತ-
-ಕರುಣಂ ಭರ್ಮರುಚಿನಿರ್ಮಥನದೇಹಮ್ ।
ಶ್ರಿತವರ್ಮ ಮರ್ಮ ಶಂಭೋಃ
ಕಿಂಚನ ಮಮ ನರ್ಮ ಶರ್ಮ ನಿರ್ಮಾತು ॥ 175 ॥

ಕಾಲಕುರಲಾಲಿಕಾಲಿಮ-
-ಕಂದಲವಿಜಿತಾಲಿ ವಿಧೃತಮಣಿವಾಲಿ ।
ಮಿಲತು ಹೃದಿ ಪುಲಿನಜಘನಂ
ಬಹುಲಿತಗಲಗರಲಕೇಲಿ ಕಿಮಪಿ ಮಹಃ ॥ 176 ॥

ಕುಂಕುಮತಿಲಕಿತಫಾಲಾ
ಕುರುವಿಂದಚ್ಛಾಯಪಾಟಲದುಕೂಲಾ ।
ಕರುಣಾಪಯೋಧಿವೇಲಾ
ಕಾಚನ ಚಿತ್ತೇ ಚಕಾಸ್ತು ಮೇ ಲೀಲಾ ॥ 177 ॥

ಪುಷ್ಪಂಧಯರುಚಿವೇಣ್ಯಃ
ಪುಲಿನಾಭೋಗತ್ರಪಾಕರಶ್ರೇಣ್ಯಃ ।
ಜೀಯಾಸುರಿಕ್ಷುಪಾಣ್ಯಃ
ಕಾಶ್ಚನ ಕಾಮಾರಿಕೇಲಿಸಾಕ್ಷಿಣ್ಯಃ ॥ 178 ॥

ತಪನೀಯಾಂಶುಕಭಾಂಸಿ
ದ್ರಾಕ್ಷಾಮಾಧುರ್ಯನಾಸ್ತಿಕವಚಾಂಸಿ ।
ಕತಿಚನ ಶುಚಂ ಮಹಾಂಸಿ
ಕ್ಷಪಯತು ಕಪಾಲಿತೋಷಿತಮನಾಂಸಿ ॥ 179 ॥

ಅಸಿತಕಚಮಾಯತಾಕ್ಷಂ
ಕುಸುಮಶರಂ ಕೂಲಮುದ್ವಹಕೃಪಾರ್ದ್ರಮ್ ।
ಆದಿಮರಸಾಧಿದೈವತ-
-ಮಂತಃ ಕಲಯೇ ಹರಾಂಕವಾಸಿ ಮಹಃ ॥ 180 ॥

ಕರ್ಣೋಪಾಂತತರಂಗಿತ-
-ಕಟಾಕ್ಷವಿಸ್ಪಂದಿಕಂಠದಘ್ನಕೃಪಾಮ್ ।
ಕಾಮೇಶ್ವರಾಂಕನಿಲಯಾಂ
ಕಾಮಪಿ ವಿದ್ಯಾಂ ಪುರಾತನೀಂ ಕಲಯೇ ॥ 181 ॥

ಅರವಿಂದಕಾಂತ್ಯರುಂತುದ-
-ವಿಲೋಚನದ್ವಂದ್ವಸುಂದರಮುಖೇಂದು ।
ಛಂದಃ ಕಂದಲಮಂದಿರ-
-ಮಂತಃಪುರಮೈಂದುಶೇಖರಂ ವಂದೇ ॥ 182 ॥

ಬಿಂಬಿನಿಕುರಂಬಡಂಬರ-
-ವಿಡಂಬಕಚ್ಛಾಯಮಂಬರವಲಗ್ನಮ್ ।
ಕಂಬುಗಲಮಂಬುದಕುಚಂ
ಬಿಂಬೋಕಂ ಕಮಪಿ ಚುಂಬತು ಮನೋ ಮೇ ॥ 183 ॥

ಕಮಪಿ ಕಮನೀಯರೂಪಂ
ಕಲಯಾಮ್ಯಂತಃ ಕದಂಬಕುಸುಮಾಢ್ಯಮ್ ।
ಚಂಪಕರುಚಿರಸುವೇಷೈಃ
ಸಂಪಾದಿತಕಾಂತ್ಯಲಂಕೃತದಿಗಂತಮ್ ॥ 184 ॥

ಶಂಪಾರುಚಿಭರ-
-ಗರ್ಹಾಸಂಪಾದಕಕಾಂತಿಕವಚಿತದಿಗಂತಮ್ ।
ಸಿದ್ಧಾಂತಂ ನಿಗಮಾನಾಂ
ಶುದ್ಧಾಂತಂ ಕಿಮಪಿ ಶೂಲಿನಃ ಕಲಯೇ ॥ 185 ॥

ಉದ್ಯದ್ದಿನಕರಶೋಣಾ-
-ನುತ್ಪಲಬಂಧುಸ್ತನಂಧಯಾಪೀಡಾನ್ ।
ಕರಕಲಿತಪುಂಡ್ರಚಾಪಾ-
-ನ್ಕಲಯೇ ಕಾನಪಿ ಕಪರ್ದಿನಃ ಪ್ರಾಣಾನ್ ॥ 186 ॥

ರಶನಾಲಸಜ್ಜಘನಯಾ
ರಸನಾಜೀವಾತುಚಾಪಭಾಸುರಯಾ ।
ಘ್ರಾಣಾಯುಷ್ಕರಶರಯಾ
ಘ್ರಾತಂ ಚಿತ್ತಂ ಕಯಾಪಿ ವಾಸನಯಾ ॥ 187 ॥

ಸರಸಿಜಸಹಯುಧ್ವದೃಶಾ
ಶಂಪಾಲತಿಕಾಸನಾಭಿವಿಗ್ರಹಯಾ ।
ಭಾಸಾ ಕಯಾಪಿ ಚೇತೋ
ನಾಸಾಮಣಿಶೋಭಿವದನಯಾ ಭರಿತಮ್ ॥ 188 ॥

ನವಯಾವಕಾಭಸಿಚಯಾನ್ವಿತಯಾ
ಗಜಯಾನಯಾ ದಯಾಪರಯಾ ।
ಧೃತಯಾಮಿನೀಶಕಲಯಾ
ಧಿಯಾ ಕಯಾಪಿ ಕ್ಷತಾಮಯಾ ಹಿ ವಯಮ್ ॥ 189 ॥

ಅಲಮಲಮಕುಸುಮಬಾಣೈ-
-ರಬಿಂಬಶೋಣೈರಪುಂಡ್ರಕೋದಂಡೈಃ ।
ಅಕುಮುದಬಾಂಧವಚೂಡೈ-
-ರನ್ಯೈರಿಹ ಜಗತಿ ದೈವತಂ ಮನ್ಯೈಃ ॥ 190 ॥

ಕುವಲಯಸದೃಕ್ಷನಯನೈಃ
ಕುಲಗಿರಿಕೂಟಸ್ಥಬಂಧುಕುಚಭಾರೈಃ ।
ಕರುಣಾಸ್ಪಂದಿಕಟಾಕ್ಷೈಃ
ಕವಚಿತಚಿತ್ತೋಽಸ್ಮಿ ಕತಿಪಯೈಃ ಕುತುಕೈಃ ॥ 191 ॥

ನತಜನಸುಲಭಾಯ ನಮೋ
ನಾಲೀಕಸನಾಭಿಲೋಚನಾಯ ನಮಃ ।
ನಂದಿತಗಿರಿಶಾಯ ನಮೋ
ಮಹಸೇ ನವನೀಪಪಾಟಲಾಯ ನಮಃ ॥ 192 ॥

ಕಾದಂಬಕುಸುಮದಾಮ್ನೇ
ಕಾಯಚ್ಛಾಯಾಕಣಾಯಿತಾರ್ಯಮ್ಣೇ ।
ಸೀಮ್ನೇ ಚಿರಂತನಗಿರಾಂ
ಭೂಮ್ನೇ ಕಸ್ಮೈಚಿದಾದದೇ ಪ್ರಣತಿಮ್ ॥ 193 ॥

ಕುಟಿಲಕಬರೀಭರೇಭ್ಯಃ
ಕುಂಕುಮಸಬ್ರಹ್ಮಚಾರಿಕಿರಣೇಭ್ಯಃ ।
ಕೂಲಂಕಷಸ್ತನೇಭ್ಯಃ
ಕುರ್ಮಃ ಪ್ರಣತಿಂ ಕುಲಾದ್ರಿಕುತುಕೇಭ್ಯಃ ॥ 194 ॥

ಕೋಕನದಶೋಣಚರಣಾ-
-ತ್ಕೋಮಲಕುರಲಾಲಿವಿಜಿತಶೈವಾಲಾತ್ ।
ಉತ್ಪಲಸಗಂಧಿನಯನಾ-
-ದುರರೀಕುರ್ಮೋ ನ ದೇವತಮಾನ್ಯಾಮ್ ॥ 195 ॥

ಆಪಾಟಲಾಧರಾಣಾ-
-ಮಾನೀಲಸ್ನಿಗ್ಧಬರ್ಬರಕಚಾನಾಮ್ ।
ಆಮ್ನಾಯಜೀವನಾನಾ-
-ಮಾಕೂತಾನಾಂ ಹರಸ್ಯ ದಾಸೋಽಹಮ್ ॥ 196 ॥

ಪುಂಖಿತವಿಲಾಸಹಾಸ-
-ಸ್ಫುರಿತಾಸು ಪುರಾಹಿತಾಂಕನಿಲಯಾಸು ।
ಮಗ್ನಂ ಮನೋ ಮದೀಯಂ
ಕಾಸ್ವಪಿ ಕಾಮಾರಿಜೀವನಾಡೀಷು ॥ 197 ॥

ಲಲಿತಾ ಪಾತು ಶಿರೋ ಮೇ
ಲಲಾಟಮಂಬಾ ಚ ಮಧುಮತೀರೂಪಾ ।
ಭ್ರೂಯುಗ್ಮಂ ಚ ಭವಾನೀ
ಪುಷ್ಪಶರಾ ಪಾತು ಲೋಚನದ್ವಂದ್ವಮ್ ॥ 198 ॥

ಪಾಯಾನ್ನಾಸಾಂ ಬಾಲಾ
ಸುಭಗಾ ದಂತಾಂಶ್ಚ ಸುಂದರೀ ಜಿಹ್ವಾಮ್ ।
ಅಧರೋಷ್ಠಮಾದಿಶಕ್ತಿ-
-ಶ್ಚಕ್ರೇಶೀ ಪಾತು ಮೇ ಚಿರಂ ಚಿಬುಕಮ್ ॥ 199 ॥

ಕಾಮೇಶ್ವರೀ ಚ ಕರ್ಣೌ
ಕಾಮಾಕ್ಷೀ ಪಾತು ಗಂಡಯೋರ್ಯುಗಲಮ್ ।
ಶೃಂಗಾರನಾಯಿಕಾವ್ಯಾ-
-ದ್ವದನಂ ಸಿಂಹಾಸನೇಶ್ವರೀ ಚ ಗಲಮ್ ॥ 200 ॥

ಸ್ಕಂದಪ್ರಸೂಶ್ಚ ಪಾತು
ಸ್ಕಂಧೌ ಬಾಹೂ ಚ ಪಾಟಲಾಂಗೀ ಮೇ ।
ಪಾಣೀ ಚ ಪದ್ಮನಿಲಯಾ
ಪಾಯಾದನಿಶಂ ನಖಾವಲೀರ್ವಿಜಯಾ ॥ 201 ॥

ಕೋದಂಡಿನೀ ಚ ವಕ್ಷಃ
ಕುಕ್ಷಿಂ ಚಾವ್ಯಾತ್ ಕುಲಾಚಲತನೂಜಾ ।
ಕಲ್ಯಾಣೀ ಚ ವಲಗ್ನಂ
ಕಟಿಂ ಚ ಪಾಯಾತ್ಕಲಾಧರಶಿಖಂಡಾ ॥ 202 ॥

ಊರುದ್ವಯಂ ಚ ಪಾಯಾ-
-ದುಮಾ ಮೃಡಾನೀ ಚ ಜಾನುನೀ ರಕ್ಷೇತ್ ।
ಜಂಘೇ ಚ ಷೋಡಶೀ ಮೇ
ಪಾಯಾತ್ ಪಾದೌ ಚ ಪಾಶಸೃಣಿಹಸ್ತಾ ॥ 203 ॥

ಪ್ರಾತಃ ಪಾತು ಪರಾ ಮಾಂ
ಮಧ್ಯಾಹ್ನೇ ಪಾತು ಮಣಿಗೃಹಾಧೀಶಾ ।
ಶರ್ವಾಣ್ಯವತು ಚ ಸಾಯಂ
ಪಾಯಾದ್ರಾತ್ರೌ ಚ ಭೈರವೀ ಸಾಕ್ಷಾತ್ ॥ 204 ॥

ಭಾರ್ಯಾಂ ರಕ್ಷತು ಗೌರೀಂ
ಪಾಯಾತ್ ಪುತ್ರಾಂಶ್ಚ ಬಿಂದುಗೃಹಪೀಠಾ ।
ಶ್ರೀವಿದ್ಯಾ ಚ ಯಶೋ ಮೇ
ಶೀಲಂ ಚಾವ್ಯಾಚ್ಚಿರಂ ಮಹಾರಾಜ್ಞೀ ॥ 205 ॥

ಪವನಮಯಿ ಪಾವಕಮಯಿ
ಕ್ಷೋಣೀಮಯಿ ಗಗನಮಯಿ ಕೃಪೀಟಮಯಿ ।
ರವಿಮಯಿ ಶಶಿಮಯಿ ದಿಙ್ಮಯಿ
ಸಮಯಮಯಿ ಪ್ರಾಣಮಯಿ ಶಿವೇ ಪಾಹಿ ॥ 206 ॥

ಕಾಲಿ ಕಪಾಲಿನಿ ಶೂಲಿನಿ
ಭೈರವಿ ಮಾತಂಗಿ ಪಂಚಮಿ ತ್ರಿಪುರೇ ।
ವಾಗ್ದೇವಿ ವಿಂಧ್ಯವಾಸಿನಿ
ಬಾಲೇ ಭುವನೇಶಿ ಪಾಲಯ ಚಿರಂ ಮಾಮ್ ॥ 207 ॥

ಅಭಿನವಸಿಂದೂರಾಭಾ-
-ಮಂಬ ತ್ವಾಂ ಚಿಂತಯಂತಿ ಯೇ ಹೃದಯೇ ।
ಉಪರಿ ನಿಪತಂತಿ ತೇಷಾ-
-ಮುತ್ಪಲನಯನಾಕಟಾಕ್ಷಕಲ್ಲೋಲಾಃ ॥ 208 ॥

ವರ್ಗಾಷ್ಟಕಮಿಲಿತಾಭಿ-
-ರ್ವಶಿನೀಮುಖ್ಯಾಭಿರಾವೃತಾಂ ಭವತೀಮ್ ।
ಚಿಂತಯತಾಂ ಸಿತವರ್ಣಾಂ
ವಾಚೋ ನಿರ್ಯಾಂತ್ಯಯತ್ನತೋ ವದನಾತ್ ॥ 209 ॥

ಕನಕಶಲಾಕಾಗೌರೀಂ
ಕರ್ಣವ್ಯಾಲೋಲಕುಂಡಲದ್ವಿತಯಾಮ್ ।
ಪ್ರಹಸಿತಮುಖೀಂ ಚ ಭವತೀಂ
ಧ್ಯಾಯಂತೋ ಯೇ ತ ಏವ ಭೂಧನದಾಃ ॥ 210 ॥

ಶೀರ್ಷಾಂಭೋರುಹಮಧ್ಯೇ
ಶೀತಲಪೀಯೂಷವರ್ಷಿಣೀಂ ಭವತೀಮ್ ।
ಅನುದಿನಮನುಚಿಂತಯತಾ-
-ಮಾಯುಷ್ಯಂ ಭವತಿ ಪುಷ್ಕಲಮವನ್ಯಾಮ್ ॥ 211 ॥

ಮಧುರಸ್ಮಿತಾಂ ಮದಾರುಣನಯನಾಂ
ಮಾತಂಗಕುಂಭವಕ್ಷೋಜಾಮ್ ।
ಚಂದ್ರವತಂಸಿನೀಂ ತ್ವಾಂ
ಸವಿಧೇ ಪಶ್ಯಂತಿ ಸುಕೃತಿನಃ ಕೇಚಿತ್ ॥ 212 ॥

ಲಲಿತಾಯಾಃ ಸ್ತವರತ್ನಂ
ಲಲಿತಪದಾಭಿಃ ಪ್ರಣೀತಮಾರ್ಯಾಭಿಃ ।
ಪ್ರತಿದಿನಮವನೌ ಪಠತಾಂ
ಫಲಾನಿ ವಕ್ತುಂ ಪ್ರಗಲ್ಭತೇ ಸೈವ ॥ 213 ॥

ಸದಸದನುಗ್ರಹನಿಗ್ರಹ-
-ಗೃಹೀತಮುನಿವಿಗ್ರಹೋ ಭಗವಾನ್ ।
ಸರ್ವಾಸಾಮುಪನಿಷದಾಂ
ದುರ್ವಾಸಾ ಜಯತಿ ದೇಶಿಕಃ ಪ್ರಥಮಃ ॥ 214 ॥

ಇತಿ ಮಹರ್ಷಿದುರ್ವಾಸಃ ವಿರಚಿತಂ ಶ್ರೀಲಲಿತಾಸ್ತವರತ್ನಮ್ ।

sri lalitha stavaratnam arya dwishati in kannada