అష్టావక్ర గీతా త్రయోదశోఽధ్యాయః

ashtavakra gita chapter 13 in telugu

జనక ఉవాచ ॥

అకించనభవం స్వాస్థ్యం కౌపీనత్వేఽపి దుర్లభమ్ ।
త్యాగాదానే విహాయాస్మాదహమాసే యథాసుఖమ్ ॥ 13-1॥

కుత్రాపి ఖేదః కాయస్య జిహ్వా కుత్రాపి ఖిద్యతే ।
మనః కుత్రాపి తత్త్యక్త్వా పురుషార్థే స్థితః సుఖమ్ ॥ 13-2॥

కృతం కిమపి నైవ స్యాద్ ఇతి సంచింత్య తత్త్వతః ।
యదా యత్కర్తుమాయాతి తత్ కృత్వాసే యథాసుఖమ్ ॥ 13-3॥

కర్మనైష్కర్మ్యనిర్బంధభావా దేహస్థయోగినః ।
సంయోగాయోగవిరహాదహమాసే యథాసుఖమ్ ॥ 13-4॥

అర్థానర్థౌ న మే స్థిత్యా గత్యా న శయనేన వా ।
తిష్ఠన్ గచ్ఛన్ స్వపన్ తస్మాదహమాసే యథాసుఖమ్ ॥ 13-5॥

స్వపతో నాస్తి మే హానిః సిద్ధిర్యత్నవతో న వా ।
నాశోల్లాసౌ విహాయాస్మాదహమాసే యథాసుఖమ్ ॥ 13-6॥

సుఖాదిరూపా నియమం భావేష్వాలోక్య భూరిశః ।
శుభాశుభే విహాయాస్మాదహమాసే యథాసుఖమ్ ॥ 13-7॥

ashtavakra gita chapter 13 in telugu