viniyogaḥ –
asya śrīpītāmbarā bagalāmukhī kavacasya mahādeva ṛṣiḥ, uṣṇik chandaḥ, śrīpītāmbarā devatā, sthiramāyā bījaṁ, svāhā śaktiḥ, aṁ ṭhaḥ kīlakaṁ, mama sannihitānāṁ dūrasthānāṁ sarvaduṣṭānāṁ vāṅmukhapadajihvāpavargāṇāṁ stambhanapūrvakaṁ sarvasampattiprāpti caturvargaphalasādhanārthe jape viniyogaḥ ||
dhyānam –
madhyesudhābdhimaṇimaṇḍaparatnavedyāṁ
siṁhāsanoparigatāṁ paripītavarṇām |
pītāmbarābharaṇamālyavibhūṣitāṅgīṁ
devīṁ bhajāmi dhṛtamudgaravairijihvām || 1 ||
jihvāgramādāya kareṇa devīṁ
vāmena śatrūn paripīḍayantīm |
gadābhighātena ca dakṣiṇena
pītāmbarāḍhyāṁ dvibhujāṁ namāmi || 2 ||
himavattanayā gaurī kailāse’tha śiloccaye |
apṛcchadgiriśaṁ devī sādhakānugrahecchayā || 1 ||
śrīpārvatyuvāca |
devadeva mahādeva bhaktānugrahakāraka |
śṛṇu vijñāpyate yattu śrutvā sarvaṁ nivedaya || 2 ||
viśuddhāḥ kaulikā loke ye matkarmaparāyaṇāḥ |
teṣāṁ nindākarā loke bahavaḥ kila durjanāḥ || 3 ||
manobādhāṁ vidadhate muhuḥ kaṭubhiruktibhiḥ |
teṣāmāśu vināśāya tvayā deva prakāśitaḥ || 4 ||
yo mantro bagalāmukhyāḥ sarvakāmasamṛddhidaḥ |
kavacaṁ tasya mantrasya prakāśaya dayānidhe || 5 ||
yasya smaraṇamātreṇa paśūnāṁ nigraho bhavet |
ātmānaṁ satataṁ rakṣedvyāghrāgniripurājataḥ || 6 ||
śrutvā’tha pārvatīvākyaṁ jñātvā tasyā manogatam |
vihasya tāṁ pariṣvajya sādhu sādhvityapūjayat || 7 ||
tadāha kavacaṁ devyai kṛpayā karuṇānidhiḥ |
śrīśaṅkara uvāca |
śṛṇu tvaṁ bagalāmukhyāḥ kavacaṁ sarvakāmadam || 8 ||
yasya smaraṇamātreṇa bagalāmukhī prasīdati |
sarvasiddhipradā prācyāṁ pātu māṁ bagalāmukhī || 9 ||
pītāmbarā tu cāgneyyāṁ yāmyāṁ mahiṣamardinī |
nairṛtyāṁ caṇḍikā pātu bhaktānugrahakāriṇī || 10 ||
pātu nityaṁ mahādevī pratīcyāṁ śūkarānanā |
vāyavye pātu māṁ kālī kauberyāṁ tripurā’vatu || 11 ||
īśānyāṁ bhairavī pātu pātu nityaṁ surapriyā |
ūrdhvaṁ vāgīśvarī pātu madhye māṁ lalitā’vatu || 12 ||
adhastādapi māṁ pātu vārāhī cakradhāriṇī |
mastakaṁ pātu me nityaṁ śrīdevī bagalāmukhī || 13 ||
phālaṁ pītāmbarā pātu netre tripurabhairavī |
śravaṇau vijayā pātu nāsikāyugalaṁ jayā || 14 ||
śāradā vacanaṁ pātu jihvāṁ pātu sureśvarī |
kaṇṭhaṁ rakṣatu rudrāṇī skandhau me vindhyavāsinī || 15 ||
sundarī pātu bāhū me jayā pātu karau sadā |
bhavānī hṛdayaṁ pātu madhyaṁ me bhuvaneśvarī || 16 ||
nābhiṁ pātu mahāmāyā kaṭiṁ kamalalocanā |
ūrū me pātu mātaṅgī jānunī cāparājitā || 17 ||
jaṅghe kapālinī pātu caraṇau cañcalekṣaṇā |
sarvataḥ pātu māṁ tārā yoginī pātu cāgrataḥ || 18 ||
pṛṣṭhaṁ me pātu kaumārī dakṣapārśve śivā’vatu |
rudrāṇī vāmapārśve tu pātu māṁ sarvadeṣṭadā || 19 ||
stutā sarveṣu deveṣu raktabījavināśinī |
ityetat kavacaṁ divyaṁ dharmakāmārthasādhanam || 20 ||
gopanīyaṁ prayatnena kasyacinna prakāśayet |
yaḥ sakṛcchṛṇuyādetat kavacaṁ manmukhoditam || 21 ||
sa sarvān labhate kāmān mūrkho vidyāmavāpnuyāt |
tasyāśu śatravo yānti yamasya bhavane śive || 22 ||
iti śrīrudrayāmale mahātantre śrī bagalāmukhī kavacam |
Leave a Comment