೧ (ರುದ್ರಯಾಮಲೇ)

ವಿನಿಯೋಗಃ –
ಅಸ್ಯ ಶ್ರೀಪೀತಾಂಬರಾ ಬಗಳಾಮುಖೀ ಕವಚಸ್ಯ ಮಹಾದೇವ ಋಷಿಃ, ಉಷ್ಣಿಕ್ ಛಂದಃ, ಶ್ರೀಪೀತಾಂಬರಾ ದೇವತಾ, ಸ್ಥಿರಮಾಯಾ ಬೀಜಂ, ಸ್ವಾಹಾ ಶಕ್ತಿಃ, ಅಂ ಠಃ ಕೀಲಕಂ, ಮಮ ಸನ್ನಿಹಿತಾನಾಂ ದೂರಸ್ಥಾನಾಂ ಸರ್ವದುಷ್ಟಾನಾಂ ವಾಙ್ಮುಖಪದಜಿಹ್ವಾಪವರ್ಗಾಣಾಂ ಸ್ತಂಭನಪೂರ್ವಕಂ ಸರ್ವಸಂಪತ್ತಿಪ್ರಾಪ್ತಿ ಚತುರ್ವರ್ಗಫಲಸಾಧನಾರ್ಥೇ ಜಪೇ ವಿನಿಯೋಗಃ ||

ಧ್ಯಾನಮ್ –
ಮಧ್ಯೇಸುಧಾಬ್ಧಿಮಣಿಮಂಡಪರತ್ನವೇದ್ಯಾಂ
ಸಿಂಹಾಸನೋಪರಿಗತಾಂ ಪರಿಪೀತವರ್ಣಾಮ್ |
ಪೀತಾಂಬರಾಭರಣಮಾಲ್ಯವಿಭೂಷಿತಾಂಗೀಂ
ದೇವೀಂ ಭಜಾಮಿ ಧೃತಮುದ್ಗರವೈರಿಜಿಹ್ವಾಮ್ || ೧ ||

ಜಿಹ್ವಾಗ್ರಮಾದಾಯ ಕರೇಣ ದೇವೀಂ
ವಾಮೇನ ಶತ್ರೂನ್ ಪರಿಪೀಡಯಂತೀಮ್ |
ಗದಾಭಿಘಾತೇನ ಚ ದಕ್ಷಿಣೇನ
ಪೀತಾಂಬರಾಢ್ಯಾಂ ದ್ವಿಭುಜಾಂ ನಮಾಮಿ || ೨ ||

ಹಿಮವತ್ತನಯಾ ಗೌರೀ ಕೈಲಾಸೇಽಥ ಶಿಲೋಚ್ಚಯೇ |
ಅಪೃಚ್ಛದ್ಗಿರಿಶಂ ದೇವೀ ಸಾಧಕಾನುಗ್ರಹೇಚ್ಛಯಾ || ೧ ||

ಶ್ರೀಪಾರ್ವತ್ಯುವಾಚ |
ದೇವದೇವ ಮಹಾದೇವ ಭಕ್ತಾನುಗ್ರಹಕಾರಕ |
ಶೃಣು ವಿಜ್ಞಾಪ್ಯತೇ ಯತ್ತು ಶ್ರುತ್ವಾ ಸರ್ವಂ ನಿವೇದಯ || ೨ ||

ವಿಶುದ್ಧಾಃ ಕೌಲಿಕಾ ಲೋಕೇ ಯೇ ಮತ್ಕರ್ಮಪರಾಯಣಾಃ |
ತೇಷಾಂ ನಿಂದಾಕರಾ ಲೋಕೇ ಬಹವಃ ಕಿಲ ದುರ್ಜನಾಃ || ೩ ||

ಮನೋಬಾಧಾಂ ವಿದಧತೇ ಮುಹುಃ ಕಟುಭಿರುಕ್ತಿಭಿಃ |
ತೇಷಾಮಾಶು ವಿನಾಶಾಯ ತ್ವಯಾ ದೇವ ಪ್ರಕಾಶಿತಃ || ೪ ||

ಯೋ ಮಂತ್ರೋ ಬಗಳಾಮುಖ್ಯಾಃ ಸರ್ವಕಾಮಸಮೃದ್ಧಿದಃ |
ಕವಚಂ ತಸ್ಯ ಮಂತ್ರಸ್ಯ ಪ್ರಕಾಶಯ ದಯಾನಿಧೇ || ೫ ||

ಯಸ್ಯ ಸ್ಮರಣಮಾತ್ರೇಣ ಪಶೂನಾಂ ನಿಗ್ರಹೋ ಭವೇತ್ |
ಆತ್ಮಾನಂ ಸತತಂ ರಕ್ಷೇದ್ವ್ಯಾಘ್ರಾಗ್ನಿರಿಪುರಾಜತಃ || ೬ ||

ಶ್ರುತ್ವಾಽಥ ಪಾರ್ವತೀವಾಕ್ಯಂ ಜ್ಞಾತ್ವಾ ತಸ್ಯಾ ಮನೋಗತಮ್ |
ವಿಹಸ್ಯ ತಾಂ ಪರಿಷ್ವಜ್ಯ ಸಾಧು ಸಾಧ್ವಿತ್ಯಪೂಜಯತ್ || ೭ ||

ತದಾಹ ಕವಚಂ ದೇವ್ಯೈ ಕೃಪಯಾ ಕರುಣಾನಿಧಿಃ |
ಶ್ರೀಶಂಕರ ಉವಾಚ |
ಶೃಣು ತ್ವಂ ಬಗಳಾಮುಖ್ಯಾಃ ಕವಚಂ ಸರ್ವಕಾಮದಮ್ || ೮ ||

ಯಸ್ಯ ಸ್ಮರಣಮಾತ್ರೇಣ ಬಗಳಾಮುಖೀ ಪ್ರಸೀದತಿ |
ಸರ್ವಸಿದ್ಧಿಪ್ರದಾ ಪ್ರಾಚ್ಯಾಂ ಪಾತು ಮಾಂ ಬಗಳಾಮುಖೀ || ೯ ||

ಪೀತಾಂಬರಾ ತು ಚಾಗ್ನೇಯ್ಯಾಂ ಯಾಮ್ಯಾಂ ಮಹಿಷಮರ್ದಿನೀ |
ನೈರೃತ್ಯಾಂ ಚಂಡಿಕಾ ಪಾತು ಭಕ್ತಾನುಗ್ರಹಕಾರಿಣೀ || ೧೦ ||

ಪಾತು ನಿತ್ಯಂ ಮಹಾದೇವೀ ಪ್ರತೀಚ್ಯಾಂ ಶೂಕರಾನನಾ |
ವಾಯವ್ಯೇ ಪಾತು ಮಾಂ ಕಾಳೀ ಕೌಬೇರ್ಯಾಂ ತ್ರಿಪುರಾಽವತು || ೧೧ ||

ಈಶಾನ್ಯಾಂ ಭೈರವೀ ಪಾತು ಪಾತು ನಿತ್ಯಂ ಸುರಪ್ರಿಯಾ |
ಊರ್ಧ್ವಂ ವಾಗೀಶ್ವರೀ ಪಾತು ಮಧ್ಯೇ ಮಾಂ ಲಲಿತಾಽವತು || ೧೨ ||

ಅಧಸ್ತಾದಪಿ ಮಾಂ ಪಾತು ವಾರಾಹೀ ಚಕ್ರಧಾರಿಣೀ |
ಮಸ್ತಕಂ ಪಾತು ಮೇ ನಿತ್ಯಂ ಶ್ರೀದೇವೀ ಬಗಳಾಮುಖೀ || ೧೩ ||

ಫಾಲಂ ಪೀತಾಂಬರಾ ಪಾತು ನೇತ್ರೇ ತ್ರಿಪುರಭೈರವೀ |
ಶ್ರವಣೌ ವಿಜಯಾ ಪಾತು ನಾಸಿಕಾಯುಗಳಂ ಜಯಾ || ೧೪ ||

ಶಾರದಾ ವಚನಂ ಪಾತು ಜಿಹ್ವಾಂ ಪಾತು ಸುರೇಶ್ವರೀ |
ಕಂಠಂ ರಕ್ಷತು ರುದ್ರಾಣೀ ಸ್ಕಂಧೌ ಮೇ ವಿಂಧ್ಯವಾಸಿನೀ || ೧೫ ||

ಸುಂದರೀ ಪಾತು ಬಾಹೂ ಮೇ ಜಯಾ ಪಾತು ಕರೌ ಸದಾ |
ಭವಾನೀ ಹೃದಯಂ ಪಾತು ಮಧ್ಯಂ ಮೇ ಭುವನೇಶ್ವರೀ || ೧೬ ||

ನಾಭಿಂ ಪಾತು ಮಹಾಮಾಯಾ ಕಟಿಂ ಕಮಲಲೋಚನಾ |
ಊರೂ ಮೇ ಪಾತು ಮಾತಂಗೀ ಜಾನುನೀ ಚಾಪರಾಜಿತಾ || ೧೭ ||

ಜಂಘೇ ಕಪಾಲಿನೀ ಪಾತು ಚರಣೌ ಚಂಚಲೇಕ್ಷಣಾ |
ಸರ್ವತಃ ಪಾತು ಮಾಂ ತಾರಾ ಯೋಗಿನೀ ಪಾತು ಚಾಗ್ರತಃ || ೧೮ ||

ಪೃಷ್ಠಂ ಮೇ ಪಾತು ಕೌಮಾರೀ ದಕ್ಷಪಾರ್ಶ್ವೇ ಶಿವಾಽವತು |
ರುದ್ರಾಣೀ ವಾಮಪಾರ್ಶ್ವೇ ತು ಪಾತು ಮಾಂ ಸರ್ವದೇಷ್ಟದಾ || ೧೯ ||

ಸ್ತುತಾ ಸರ್ವೇಷು ದೇವೇಷು ರಕ್ತಬೀಜವಿನಾಶಿನೀ |
ಇತ್ಯೇತತ್ ಕವಚಂ ದಿವ್ಯಂ ಧರ್ಮಕಾಮಾರ್ಥಸಾಧನಮ್ || ೨೦ ||

ಗೋಪನೀಯಂ ಪ್ರಯತ್ನೇನ ಕಸ್ಯಚಿನ್ನ ಪ್ರಕಾಶಯೇತ್ |
ಯಃ ಸಕೃಚ್ಛೃಣುಯಾದೇತತ್ ಕವಚಂ ಮನ್ಮುಖೋದಿತಮ್ || ೨೧ ||

ಸ ಸರ್ವಾನ್ ಲಭತೇ ಕಾಮಾನ್ ಮೂರ್ಖೋ ವಿದ್ಯಾಮವಾಪ್ನುಯಾತ್ |
ತಸ್ಯಾಶು ಶತ್ರವೋ ಯಾಂತಿ ಯಮಸ್ಯ ಭವನೇ ಶಿವೇ || ೨೨ ||

ಇತಿ ಶ್ರೀರುದ್ರಯಾಮಲೇ ಮಹಾತಂತ್ರೇ ಶ್ರೀ ಬಗಳಾಮುಖೀ ಕವಚಮ್ |