ଶିଵ କେଶାଦି ପାଦାଂତ ଵର୍ଣନ ସ୍ତୋତ୍ରଂ

shiva keshadi padanta varnana stotram in odia

ଦେୟାସୁର୍ମୂର୍ଧ୍ନି ରାଜତ୍ସରସସୁରସରିତ୍ପାରପର୍ୟଂତନିର୍ୟ-
-ତ୍ପ୍ରାଂଶୁସ୍ତଂବାଃ ପିଶଂଗାସ୍ତୁଲିତପରିଣତାରକ୍ତଶାଲୀଲତା ଵଃ ।
ଦୁର୍ଵାରାପତ୍ତିଗର୍ତଶ୍ରିତନିଖିଲଜନୋତ୍ତାରଣେ ରଜ୍ଜୁଭୂତା
ଘୋରାଘୋର୍ଵୀରୁହାଲୀଦହନଶିଖିଶିଖାଃ ଶର୍ମ ଶାର୍ଵାଃ କପର୍ଦାଃ ॥ 1 ॥

କୁର୍ଵନ୍ନିର୍ଵାଣମାର୍ଗପ୍ରଗମପରିଲସଦ୍ରୂପ୍ୟସୋପାନଶଂକାଂ
ଶକ୍ରାରୀଣାଂ ପୁରାଣାଂ ତ୍ରୟଵିଜୟକୃତସ୍ପଷ୍ଟରେଖାୟମାଣମ୍ ।
ଅଵ୍ୟାଦଵ୍ୟାଜମୁଚ୍ଚୈରଲିକହିମଧରାଧିତ୍ୟକାଂତସ୍ତ୍ରିଧୋଦ୍ୟ-
-ଜ୍ଜାହ୍ନଵ୍ୟାଭଂ ମୃଡାନୀକମିତୁରୁଡୁପରୁକ୍ପାଂଡରଂ ଵସ୍ତ୍ରିପୁଂଡ୍ରମ୍ ॥ 2 ॥

କ୍ରୁଧ୍ୟଦ୍ଗୌରୀପ୍ରସାଦାନତିସମୟପଦାଂଗୁଷ୍ଠସଂକ୍ରାଂତଲାକ୍ଷା-
-ବିଂଦୁସ୍ପର୍ଧି ସ୍ମରାରେଃ ସ୍ଫଟିକମଣିଦୃଷନ୍ମଗ୍ନମାଣିକ୍ୟଶୋଭମ୍ ।
ମୂର୍ଧ୍ନ୍ୟୁଦ୍ୟଦ୍ଦିଵ୍ୟସିଂଧୋଃ ପତିତଶଫରିକାକାରି ଵୋ ମସ୍ତକଂ ସ୍ତା-
-ଦସ୍ତୋକାପତ୍ତିକୃତ୍ୟୈ ହୁତଵହକଣିକାମୋକ୍ଷରୂକ୍ଷଂ ସଦାକ୍ଷି ॥ 3 ॥

ଭୂତ୍ୟୈ ଦୃଗ୍ଭୂତୟୋଃ ସ୍ୟାଦ୍ୟଦହିମହିମରୁଗ୍ବିଂବୟୋଃ ସ୍ନିଗ୍ଧଵର୍ଣୋ
ଦୈତ୍ୟୌଘଧ୍ଵଂସଶଂସୀ ସ୍ଫୁଟ ଇଵ ପରିଵେଷାଵଶେଷୋ ଵିଭାତି ।
ସର୍ଗସ୍ଥିତ୍ୟଂତଵୃତ୍ତିର୍ମୟି ସମୁପଗତେତୀଵ ନିର୍ଵୃତ୍ତଗର୍ଵଂ
ଶର୍ଵାଣୀଭର୍ତୁରୁଚ୍ଚୈର୍ୟୁଗଳମଥ ଦଧଦ୍ଵିଭ୍ରମଂ ତଦ୍ଭ୍ରୁଵୋର୍ଵଃ ॥ 4 ॥

ୟୁଗ୍ମେ ରୁକ୍ମାବ୍ଜପିଂଗେ ଗ୍ରହ ଇଵ ପିହିତେ ଦ୍ରାଗ୍ୟୟୋଃ ପ୍ରାଗ୍ଦୁହିତ୍ରା
ଶୈଲସ୍ୟ ଧ୍ଵାଂତନୀଲାଂବରରଚିତବୃହତ୍କଂଚୁକୋଽଭୂତ୍ପ୍ରପଂଚଃ ।
ତେ ତ୍ରୈନେତ୍ରେ ପଵିତ୍ରେ ତ୍ରିଦଶଵରଘଟାମିତ୍ରଜୈତ୍ରୋଗ୍ରଶସ୍ତ୍ରେ
ନେତ୍ରେ ନେତ୍ରେ ଭଵେତାଂ ଦ୍ରୁତମିହ ଭଵତାମିଂଦ୍ରିୟାଶ୍ଵାନ୍ଵିୟଂତୁମ୍ ॥ 5 ॥

ଚଂଡୀଵକ୍ତ୍ରାର୍ପଣେଚ୍ଛୋସ୍ତଦନୁ ଭଗଵତଃ ପାଂଡୁରୁକ୍ପାଂଡୁଗଂଡ-
-ପ୍ରୋଦ୍ୟତ୍କଂଡୂଂ ଵିନେତୁଂ ଵିତନୁତ ଇଵ ୟେ ରତ୍ନକୋଣୈର୍ଵିଘୃଷ୍ଟିମ୍ ।
ଚଂଡାର୍ଚିର୍ମଂଡଲାଭେ ସତତନତଜନଧ୍ଵାଂତଖଂଡାତିଶୌଂଡେ
ଚାଂଡୀଶେ ତେ ଶ୍ରିୟେସ୍ତାମଧିକମଵନତାଖଂଡଲେ କୁଂଡଲେ ଵଃ ॥ 6 ॥

ଖଟ୍ଵାଂଗୋଦଗ୍ରପାଣେଃ ସ୍ଫୁଟଵିକଟପୁଟୋ ଵକ୍ତ୍ରରଂଧ୍ରପ୍ରଵେଶ-
-ପ୍ରେପ୍ସୂଦଂଚତ୍ଫଣୋରୁଶ୍ଵସଦତିଧଵଳାହୀଂଦ୍ରଶଂକାଂ ଦଧାନଃ ।
ୟୁଷ୍ମାକଂ କ୍ରମଵକ୍ତ୍ରାଂବୁରୁହପରିଲସତ୍କର୍ଣିକାକାରଶୋଭଃ
ଶଶ୍ଵତ୍ତ୍ରାଣାୟ ଭୂୟାଦଲମତିଵିମଲୋତ୍ତୁଂଗକୋଣଃ ସ ଘୋଣଃ ॥ 7 ॥

କ୍ରୁଧ୍ୟତ୍ୟଦ୍ଧା ୟୟୋଃ ସ୍ଵାଂ ତନୁମତିଲସତୋର୍ବିଂବିତାଂ ଲକ୍ଷୟଂତୀ
ଭର୍ତ୍ରେ ସ୍ପର୍ଧାତିନିଘ୍ନା ମୁହୁରିତରଵଧୂଶଂକୟା ଶୈଲକନ୍ୟା ।
ୟୁଷ୍ମାଂସ୍ତୌ ଶଶ୍ଵଦୁଚ୍ଚୈରବହୁଳଦଶମୀଶର୍ଵରୀଶାତିଶୁଭ୍ରା-
-ଵଵ୍ୟାସ୍ତାଂ ଦିଵ୍ୟସିଂଧୋଃ କମିତୁରଵନମଲ୍ଲୋକପାଲୌ କପୋଲୌ ॥ 8 ॥

ୟୋ ଭାସା ଭାତ୍ୟୁପାଂତସ୍ଥିତ ଇଵ ନିଭୃତଂ କୌସ୍ତୁଭୋ ଦ୍ରଷ୍ଟୁମିଚ୍ଛ-
-ନ୍ସୋତ୍ଥସ୍ନେହାନ୍ନିତାଂତଂ ଗଳଗତଗରଳଂ ପତ୍ୟୁରୁଚ୍ଚୈଃ ପଶୂନାମ୍ ।
ପ୍ରୋଦ୍ୟତ୍ପ୍ରେମ୍ଣା ୟମାର୍ଦ୍ରା ପିବତି ଗିରିସୁତା ସଂପଦଃ ସାତିରେକା
ଲୋକାଃ ଶୋଣୀକୃତାଂତା ୟଦଧରମହସା ସୋଽଧରୋ ଵୋ ଵିଧତ୍ତାମ୍ ॥ 9 ॥

ଅତ୍ୟର୍ଥଂ ରାଜତେ ୟା ଵଦନଶଶଧରାଦୁଦ୍ଗଲଚ୍ଚାରୁଵାଣୀ-
-ପୀୟୂଷାଂଭଃପ୍ରଵାହପ୍ରସରପରିଲସତ୍ଫେନବିଂଦ୍ଵାଵଳୀଵ ।
ଦେୟାତ୍ସା ଦଂତପଂକ୍ତିଶ୍ଚିରମିହ ଦନୁଦାୟାଦଦୌଵାରିକସ୍ୟ
ଦ୍ୟୁତ୍ୟା ଦୀପ୍ତେଂଦୁକୁଂଦଚ୍ଛଵିରମଲତରପ୍ରୋନ୍ନତାଗ୍ରା ମୁଦଂ ଵଃ ॥ 10 ॥

ନ୍ୟକ୍କୁର୍ଵନ୍ନୁର୍ଵରାଭୃନ୍ନିଭଘନସମୟୋଦ୍ଧୁଷ୍ଟମେଘୌଘଘୋଷଂ
ସ୍ଫୂର୍ଜଦ୍ଵାର୍ଧ୍ୟୁତ୍ଥିତୋରୁଧ୍ଵନିତମପି ପରବ୍ରହ୍ମଭୂତୋ ଗଭୀରଃ ।
ସୁଵ୍ୟକ୍ତୋ ଵ୍ୟକ୍ତମୂର୍ତେଃ ପ୍ରକଟିତକରଣଃ ପ୍ରାଣନାଥସ୍ୟ ସତ୍ୟାଃ
ପ୍ରୀତ୍ୟା ଵଃ ସଂଵିଦଧ୍ୟାତ୍ଫଲଵିକଲମଲଂ ଜନ୍ମ ନାଦଃ ସ ନାଦଃ ॥ 11 ॥

ଭାସା ୟସ୍ୟ ତ୍ରିଲୋକୀ ଲସତି ପରିଲସତ୍ଫେନବିଂଦ୍ଵର୍ଣଵାଂତ-
-ର୍ଵ୍ୟାମଗ୍ନେଵାତିଗୌରସ୍ତୁଲିତସୁରସରିଦ୍ଵାରିପୂରପ୍ରସାରଃ ।
ପୀନାତ୍ମା ଦଂତଭାଭିର୍ଭୃଶମହହହକାରାତିଭୀମଃ ସଦେଷ୍ଟାଂ
ପୁଷ୍ଟାଂ ତୁଷ୍ଟିଂ କୃଷୀଷ୍ଟ ସ୍ଫୁଟମିହ ଭଵତାମଟ୍ଟହାସୋଽଷ୍ଟମୂର୍ତେଃ ॥ 12 ॥

ସଦ୍ୟୋଜାତାଖ୍ୟମାପ୍ୟଂ ୟଦୁଵିମଲମୁଦଗ୍ଵର୍ତି ୟଦ୍ଵାମଦେଵଂ
ନାମ୍ନା ହେମ୍ନା ସଦୃକ୍ଷଂ ଜଲଦନିଭମଘୋରାହ୍ଵୟଂ ଦକ୍ଷିଣଂ ୟତ୍ ।
ୟଦ୍ବାଲାର୍କପ୍ରଭଂ ତତ୍ପୁରୁଷନିଗଦିତଂ ପୂର୍ଵମୀଶାନସଂଜ୍ଞଂ
ୟଦ୍ଦିଵ୍ୟଂ ତାନି ଶଂଭୋର୍ଭଵଦଭିଲଷିତଂ ପଂଚ ଦଦ୍ୟୁର୍ମୁଖାନି ॥ 13 ॥

ଆତ୍ମପ୍ରେମ୍ଣୋ ଭଵାନ୍ୟା ସ୍ଵୟମିଵ ରଚିତାଃ ସାଦରଂ ସାଂଵନନ୍ୟା
ମଷ୍ୟା ତିସ୍ରଃସୁନୀଲାଂଜନନିଭଗରରେଖାଃ ସମାଭାଂତି ୟସ୍ୟାମ୍ ।
ଅକଲ୍ପାନଲ୍ପଭାସା ଭୃଶରୁଚିରତରା କଂବୁକଲ୍ପାଂବିକାୟାଃ
ପତ୍ୟୁଃ ସାତ୍ୟଂତମଂତର୍ଵିଲସତୁ ସତତଂ ମଂଥରା କଂଧରା ଵଃ ॥ 14 ॥

ଵକ୍ତ୍ରେଂଦୋର୍ଦଂତଲକ୍ଷ୍ମ୍ୟାଶ୍ଚିରମଧରମହାକୌସ୍ତୁଭସ୍ୟାପ୍ୟୁପାଂତେ
ସୋତ୍ଥାନାଂ ପ୍ରାର୍ଥୟନ୍ୟଃ ସ୍ଥିତିମଚଲଭୁଵେ ଵାରୟଂତ୍ୟୈ ନିଵେଶମ୍ ।
ପ୍ରାୟୁଂକ୍ତେଵାଶିଷୋ ୟଃ ପ୍ରତିପଦମମୃତତ୍ଵେ ସ୍ଥିତଃ କାଲଶତ୍ରୋଃ
କାଲଂ କୁର୍ଵନ୍ଗଳଂ ଵୋ ହୃଦୟମୟମଲଂ କ୍ଷାଳୟେତ୍କାଲକୂଟଃ ॥ 15 ॥

ପ୍ରୌଢପ୍ରେମାକୁଲାୟା ଦୃଢତରପରିରଂଭେଷୁ ପର୍ଵେଂଦୁମୁଖ୍ୟାଃ
ପାର୍ଵତ୍ୟାଶ୍ଚାରୁଚାମୀକରଵଲୟପଦୈରଂକିତଂ କାଂତିଶାଲି ।
ରଂଗନ୍ନାଗାଂଗଦାଢ୍ୟଂ ସତତମଵିହିତଂ କର୍ମ ନିର୍ମୂଲୟେତ୍ତ-
-ଦ୍ଦୋର୍ମୂଲଂ ନିର୍ମଲଂ ୟଦ୍ଧୃଦି ଦୁରିତମପାସ୍ୟାର୍ଜିତଂ ଧୂର୍ଜଟେର୍ଵଃ ॥ 16 ॥

କଂଠାଶ୍ଲେଷାର୍ଥମାପ୍ତା ଦିଵ ଇଵ କମିତୁଃ ସ୍ଵର୍ଗସିଂଧୋଃ ପ୍ରଵାହାଃ
କ୍ରାଂତ୍ୟୈ ସଂସାରସିଂଧୋଃ ସ୍ଫଟିକମଣିମହାସଂକ୍ରମାକାରଦୀର୍ଘାଃ ।
ତିର୍ୟଗ୍ଵିଷ୍କଂଭଭୂତାସ୍ତ୍ରିଭୁଵନଵସତେର୍ଭିନ୍ନଦୈତ୍ୟେଭଦେହା
ବାହା ଵସ୍ତା ହରସ୍ୟ ଦ୍ରୁତମିହ ନିଵହାନଂହସାଂ ସଂହରଂତୁ ॥ 17 ॥

ଵକ୍ଷୋ ଦକ୍ଷଦ୍ଵିଷୋଽଲଂ ସ୍ମରଭରଵିନମଦ୍ଦକ୍ଷଜାକ୍ଷୀଣଵକ୍ଷୋ-
-ଜାଂତର୍ନିକ୍ଷିପ୍ତଶୁଂଭନ୍ମଲୟଜମିଳିତୋଦ୍ଭାସି ଭସ୍ମୋକ୍ଷିତଂ ୟତ୍ ।
କ୍ଷିପ୍ରଂ ତଦ୍ରୂକ୍ଷଚକ୍ଷୁଃ ଶ୍ରୁତିଗଣଫଣରତ୍ନୌଘଭାଭୀକ୍ଷ୍ଣଶୋଭଂ
ୟୁଷ୍ମାକଂ ଶଶ୍ଵଦେନଃ ସ୍ଫଟିକମଣିଶିଲାମଂଡଲାଭଂ କ୍ଷିଣୋତୁ ॥ 18 ॥

ମୁକ୍ତାମୁକ୍ତେ ଵିଚିତ୍ରାକୁଲଵଲିଲହରୀଜାଲଶାଲିନ୍ୟଵାଂଚ-
-ନ୍ନାଭ୍ୟାଵର୍ତେ ଵିଲୋଲଦ୍ଭୁଜଗଵରୟୁତେ କାଲଶତ୍ରୋର୍ଵିଶାଲେ ।
ୟୁଷ୍ମଚ୍ଚିତ୍ତତ୍ରିଧାମା ପ୍ରତିନଵରୁଚିରେ ମଂଦିରେ କାଂତିଲକ୍ଷ୍ମ୍ୟାଃ
ଶେତାଂ ଶୀତାଂଶୁଗୌରେ ଚିରତରମୁଦରକ୍ଷୀରସିଂଧୌ ସଲୀଲମ୍ ॥ 19 ॥

ଵୈୟାଘ୍ରୀ ୟତ୍ର କୃତ୍ତିଃ ସ୍ଫୁରତି ହିମଗିରେର୍ଵିସ୍ତୃତୋପତ୍ୟକାଂତଃ
ସାଂଦ୍ରାଵଶ୍ୟାୟମିଶ୍ରା ପରିତ ଇଵ ଵୃତା ନୀଲଜୀମୂତମାଲା ।
ଆବଦ୍ଧାହୀଂଦ୍ରକାଂଚୀଗୁଣମତିପୃଥୁଲଂ ଶୈଲଜାକ୍ରୀଡଭୂମି-
-ସ୍ତଦ୍ଵୋ ନିଃଶ୍ରେୟସେ ସ୍ୟାଜ୍ଜଘନମତିଘନଂ ବାଲଶୀତାଂଶୁମୌଳେଃ ॥ 20 ॥

ପୁଷ୍ଟାଵଷ୍ଟଂଭଭୂତୌ ପୃଥୁତରଜଘନସ୍ୟାପି ନିତ୍ୟଂ ତ୍ରିଲୋକ୍ୟାଃ
ସମ୍ୟଗ୍ଵୃତ୍ତୌ ସୁରେଂଦ୍ରଦ୍ଵିରଦଵରକରୋଦାରକାଂତିଂ ଦଧାନୌ ।
ସାରାଵୂରୂ ପୁରାରେଃ ପ୍ରସଭମରିଘଟାଘସ୍ମରୌ ଭସ୍ମଶୁଭ୍ରୌ
ଭକ୍ତୈରତ୍ୟାର୍ଦ୍ରଚିତ୍ତୈରଧିକମଵନତୌ ଵାଂଛିତଂ ଵୋ ଵିଧତ୍ତାମ୍ ॥ 21 ॥

ଆନଂଦାୟେଂଦୁକାଂତୋପଲରଚିତସମୁଦ୍ଗାୟିତେ ୟେ ମୁନୀନାଂ
ଚିତ୍ତାଦର୍ଶଂ ନିଧାତୁଂ ଵିଦଧତି ଚରଣେ ତାଂଡଵାକୁଂଚନାନି ।
କାଂଚୀଭୋଗୀଂଦ୍ରମୂର୍ଧ୍ନାଂ ପ୍ରତିମୁହୁରୁପଧାନାୟମାନେ କ୍ଷଣଂ ତେ
କାଂତେ ସ୍ତାମଂତକାରେର୍ଦ୍ୟୁତିଵିଜିତସୁଧାଭାନୁନୀ ଜାନୁନୀ ଵଃ ॥ 22 ॥

ମଂଜୀରୀଭୂତଭୋଗିପ୍ରଵରଗଣଫଣାମଂଡଲାଂତର୍ନିତାଂତ-
-ଵ୍ୟାଦୀର୍ଘାନର୍ଘରତ୍ନଦ୍ୟୁତିକିସଲୟତେ ସ୍ତୂୟମାନେ ଦ୍ୟୁସଦ୍ଭିଃ ।
ବିଭ୍ରତ୍ୟୌ ଵିଭ୍ରମଂ ଵଃ ସ୍ଫଟିକମଣିବୃହଦ୍ଦଂଡଵଦ୍ଭାସିତେ ୟେ
ଜଂଘେ ଶଂଖେଂଦୁଶୁଭ୍ରେ ଭୃଶମିହ ଭଵତାଂ ମାନସେ ଶୂଲପାଣେଃ ॥ 23 ॥

ଅସ୍ତୋକସ୍ତୋମଶସ୍ତ୍ରୈରପଚିତିମମଲାଂ ଭୂରିଭାଵୋପହାରୈଃ
କୁର୍ଵଦ୍ଭିଃ ସର୍ଵଦୋଚ୍ଚୈଃ ସତତମଭିଵୃତୌ ବ୍ରହ୍ମଵିଦ୍ଦେଵଲାଦ୍ୟୈଃ ।
ସମ୍ୟକ୍ସଂପୂଜ୍ୟମାନାଵିହ ହୃଦି ସରସୀଵାନିଶଂ ୟୁଷ୍ମଦୀୟେ
ଶର୍ଵସ୍ୟ କ୍ରୀଡତାଂ ତୌ ପ୍ରପଦଵରବୃହତ୍କଚ୍ଛପାଵଚ୍ଛଭାସୌ ॥ 24 ॥

ୟାଃ ସ୍ଵସ୍ୟୈକାଂଶପାତାଦତିବହଲଗଲଦ୍ରକ୍ତଵକ୍ତ୍ରଂ ପ୍ରଣୁନ୍ନ-
-ପ୍ରାଣଂ ପ୍ରାକ୍ରୋଶୟନ୍ପ୍ରାଙ୍ନିଜମଚଲଵରଂ ଚାଲୟଂତଂ ଦଶାସ୍ୟମ୍ ।
ପାଦାଂଗୁଲ୍ୟୋ ଦିଶଂତୁ ଦ୍ରୁତମୟୁଗଦୃଶଃ କଲ୍ମଷପ୍ଲୋଷକଲ୍ୟାଃ
କଳ୍ୟାଣଂ ଫୁଲ୍ଲମାଲ୍ୟପ୍ରକରଵିଲସିତା ଵଃ ପ୍ରଣଦ୍ଧାହିଵଲ୍ଲ୍ୟଃ ॥ 25 ॥

ପ୍ରହ୍ଵପ୍ରାଚୀନବର୍ହିଃପ୍ରମୁଖସୁରଵରପ୍ରସ୍ଫୁରନ୍ମୌଳିସକ୍ତ-
-ଜ୍ୟାୟୋରତ୍ନୋତ୍କରୋସ୍ରୈରଵିରତମମଲା ଭୂରିନୀରାଜିତା ୟା ।
ପ୍ରୋଦଗ୍ରାଗ୍ରା ପ୍ରଦେୟାତ୍ତତିରିଵ ରୁଚିରା ତାରକାଣାଂ ନିତାଂତଂ
ନୀଲଗ୍ରୀଵସ୍ୟ ପାଦାଂବୁରୁହଵିଲସିତା ସା ନଖାଳୀ ସୁଖଂ ଵଃ ॥ 26 ॥

ସତ୍ୟାଃ ସତ୍ୟାନନେଂଦାଵପି ସଵିଧଗତେ ୟେ ଵିକାସଂ ଦଧାତେ
ସ୍ଵାଂତେ ସ୍ଵାଂ ତେ ଲଭଂତେ ଶ୍ରିୟମିହ ସରସୀଵାମରା ୟେ ଦଧାନାଃ ।
ଲୋଲଂ ଲୋଲଂବକାନାଂ କୁଲମିଵ ସୁଧିୟାଂ ସେଵତେ ୟେ ସଦା ସ୍ତାଂ
ଭୂତ୍ୟୈ ଭୂତ୍ୟୈଣପାଣେର୍ଵିମଲତରରୁଚସ୍ତେ ପଦାଂଭୋରୁହେ ଵଃ ॥ 27 ॥

ୟେଷାଂ ରାଗାଦିଦୋଷାକ୍ଷତମତି ୟତୟୋ ୟାଂତି ମୁକ୍ତିଂ ପ୍ରସାଦା-
-ଦ୍ୟେ ଵା ନମ୍ରାତ୍ମମୂର୍ତିଦ୍ୟୁସଦୃଷିପରିଷନ୍ମୂର୍ଧ୍ନି ଶେଷାୟମାଣାଃ ।
ଶ୍ରୀକଂଠସ୍ୟାରୁଣୋଦ୍ୟଚ୍ଚରଣସରସିଜପ୍ରୋତ୍ଥିତାସ୍ତେ ଭାଵାଖ୍ୟା-
-ତ୍ପାରାଵାରାଚ୍ଚିରଂ ଵୋ ଦୁରିତହତିକୃତସ୍ତାରୟେୟୁଃ ପରାଗାଃ ॥ 28 ॥

ଭୂମ୍ନା ୟସ୍ୟାସ୍ତସୀମ୍ନା ଭୁଵନମନୁସୃତଂ ୟତ୍ପରଂ ଧାମ ଧାମ୍ନାଂ
ସାମ୍ନାମାମ୍ନାୟତତ୍ତ୍ଵଂ ୟଦପି ଚ ପରମଂ ୟଦ୍ଗୁଣାତୀତମାଦ୍ୟମ୍ ।
ୟଚ୍ଚାଂହୋହନ୍ନିରୀହଂ ଗହନମିତି ମୁହୁଃ ପ୍ରାହୁରୁଚ୍ଚୈର୍ମହାଂତୋ
ମାହେଶଂ ତନ୍ମହୋ ମେ ମହିତମହରହର୍ମୋହରୋହଂ ନିହଂତୁ ॥ 29 ॥

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଶ୍ରୀ ଶିଵ କେଶାଦିପାଦାଂତଵର୍ଣନ ସ୍ତୋତ୍ରମ୍ ॥

shiva keshadi padanta varnana stotram in odia