શિવ કેશાદિ પાદાંત વર્ણન સ્તોત્રં

shiva keshadi padanta varnana stotram in gujarati

દેયાસુર્મૂર્ધ્નિ રાજત્સરસસુરસરિત્પારપર્યંતનિર્ય-
-ત્પ્રાંશુસ્તંબાઃ પિશંગાસ્તુલિતપરિણતારક્તશાલીલતા વઃ ।
દુર્વારાપત્તિગર્તશ્રિતનિખિલજનોત્તારણે રજ્જુભૂતા
ઘોરાઘોર્વીરુહાલીદહનશિખિશિખાઃ શર્મ શાર્વાઃ કપર્દાઃ ॥ 1 ॥

કુર્વન્નિર્વાણમાર્ગપ્રગમપરિલસદ્રૂપ્યસોપાનશંકાં
શક્રારીણાં પુરાણાં ત્રયવિજયકૃતસ્પષ્ટરેખાયમાણમ્ ।
અવ્યાદવ્યાજમુચ્ચૈરલિકહિમધરાધિત્યકાંતસ્ત્રિધોદ્ય-
-જ્જાહ્નવ્યાભં મૃડાનીકમિતુરુડુપરુક્પાંડરં વસ્ત્રિપુંડ્રમ્ ॥ 2 ॥

ક્રુધ્યદ્ગૌરીપ્રસાદાનતિસમયપદાંગુષ્ઠસંક્રાંતલાક્ષા-
-બિંદુસ્પર્ધિ સ્મરારેઃ સ્ફટિકમણિદૃષન્મગ્નમાણિક્યશોભમ્ ।
મૂર્ધ્ન્યુદ્યદ્દિવ્યસિંધોઃ પતિતશફરિકાકારિ વો મસ્તકં સ્તા-
-દસ્તોકાપત્તિકૃત્યૈ હુતવહકણિકામોક્ષરૂક્ષં સદાક્ષિ ॥ 3 ॥

ભૂત્યૈ દૃગ્ભૂતયોઃ સ્યાદ્યદહિમહિમરુગ્બિંબયોઃ સ્નિગ્ધવર્ણો
દૈત્યૌઘધ્વંસશંસી સ્ફુટ ઇવ પરિવેષાવશેષો વિભાતિ ।
સર્ગસ્થિત્યંતવૃત્તિર્મયિ સમુપગતેતીવ નિર્વૃત્તગર્વં
શર્વાણીભર્તુરુચ્ચૈર્યુગળમથ દધદ્વિભ્રમં તદ્ભ્રુવોર્વઃ ॥ 4 ॥

યુગ્મે રુક્માબ્જપિંગે ગ્રહ ઇવ પિહિતે દ્રાગ્યયોઃ પ્રાગ્દુહિત્રા
શૈલસ્ય ધ્વાંતનીલાંબરરચિતબૃહત્કંચુકોઽભૂત્પ્રપંચઃ ।
તે ત્રૈનેત્રે પવિત્રે ત્રિદશવરઘટામિત્રજૈત્રોગ્રશસ્ત્રે
નેત્રે નેત્રે ભવેતાં દ્રુતમિહ ભવતામિંદ્રિયાશ્વાન્વિયંતુમ્ ॥ 5 ॥

ચંડીવક્ત્રાર્પણેચ્છોસ્તદનુ ભગવતઃ પાંડુરુક્પાંડુગંડ-
-પ્રોદ્યત્કંડૂં વિનેતું વિતનુત ઇવ યે રત્નકોણૈર્વિઘૃષ્ટિમ્ ।
ચંડાર્ચિર્મંડલાભે સતતનતજનધ્વાંતખંડાતિશૌંડે
ચાંડીશે તે શ્રિયેસ્તામધિકમવનતાખંડલે કુંડલે વઃ ॥ 6 ॥

ખટ્વાંગોદગ્રપાણેઃ સ્ફુટવિકટપુટો વક્ત્રરંધ્રપ્રવેશ-
-પ્રેપ્સૂદંચત્ફણોરુશ્વસદતિધવળાહીંદ્રશંકાં દધાનઃ ।
યુષ્માકં ક્રમવક્ત્રાંબુરુહપરિલસત્કર્ણિકાકારશોભઃ
શશ્વત્ત્રાણાય ભૂયાદલમતિવિમલોત્તુંગકોણઃ સ ઘોણઃ ॥ 7 ॥

ક્રુધ્યત્યદ્ધા યયોઃ સ્વાં તનુમતિલસતોર્બિંબિતાં લક્ષયંતી
ભર્ત્રે સ્પર્ધાતિનિઘ્ના મુહુરિતરવધૂશંકયા શૈલકન્યા ।
યુષ્માંસ્તૌ શશ્વદુચ્ચૈરબહુળદશમીશર્વરીશાતિશુભ્રા-
-વવ્યાસ્તાં દિવ્યસિંધોઃ કમિતુરવનમલ્લોકપાલૌ કપોલૌ ॥ 8 ॥

યો ભાસા ભાત્યુપાંતસ્થિત ઇવ નિભૃતં કૌસ્તુભો દ્રષ્ટુમિચ્છ-
-ન્સોત્થસ્નેહાન્નિતાંતં ગળગતગરળં પત્યુરુચ્ચૈઃ પશૂનામ્ ।
પ્રોદ્યત્પ્રેમ્ણા યમાર્દ્રા પિબતિ ગિરિસુતા સંપદઃ સાતિરેકા
લોકાઃ શોણીકૃતાંતા યદધરમહસા સોઽધરો વો વિધત્તામ્ ॥ 9 ॥

અત્યર્થં રાજતે યા વદનશશધરાદુદ્ગલચ્ચારુવાણી-
-પીયૂષાંભઃપ્રવાહપ્રસરપરિલસત્ફેનબિંદ્વાવળીવ ।
દેયાત્સા દંતપંક્તિશ્ચિરમિહ દનુદાયાદદૌવારિકસ્ય
દ્યુત્યા દીપ્તેંદુકુંદચ્છવિરમલતરપ્રોન્નતાગ્રા મુદં વઃ ॥ 10 ॥

ન્યક્કુર્વન્નુર્વરાભૃન્નિભઘનસમયોદ્ધુષ્ટમેઘૌઘઘોષં
સ્ફૂર્જદ્વાર્ધ્યુત્થિતોરુધ્વનિતમપિ પરબ્રહ્મભૂતો ગભીરઃ ।
સુવ્યક્તો વ્યક્તમૂર્તેઃ પ્રકટિતકરણઃ પ્રાણનાથસ્ય સત્યાઃ
પ્રીત્યા વઃ સંવિદધ્યાત્ફલવિકલમલં જન્મ નાદઃ સ નાદઃ ॥ 11 ॥

ભાસા યસ્ય ત્રિલોકી લસતિ પરિલસત્ફેનબિંદ્વર્ણવાંત-
-ર્વ્યામગ્નેવાતિગૌરસ્તુલિતસુરસરિદ્વારિપૂરપ્રસારઃ ।
પીનાત્મા દંતભાભિર્ભૃશમહહહકારાતિભીમઃ સદેષ્ટાં
પુષ્ટાં તુષ્ટિં કૃષીષ્ટ સ્ફુટમિહ ભવતામટ્ટહાસોઽષ્ટમૂર્તેઃ ॥ 12 ॥

સદ્યોજાતાખ્યમાપ્યં યદુવિમલમુદગ્વર્તિ યદ્વામદેવં
નામ્ના હેમ્ના સદૃક્ષં જલદનિભમઘોરાહ્વયં દક્ષિણં યત્ ।
યદ્બાલાર્કપ્રભં તત્પુરુષનિગદિતં પૂર્વમીશાનસંજ્ઞં
યદ્દિવ્યં તાનિ શંભોર્ભવદભિલષિતં પંચ દદ્યુર્મુખાનિ ॥ 13 ॥

આત્મપ્રેમ્ણો ભવાન્યા સ્વયમિવ રચિતાઃ સાદરં સાંવનન્યા
મષ્યા તિસ્રઃસુનીલાંજનનિભગરરેખાઃ સમાભાંતિ યસ્યામ્ ।
અકલ્પાનલ્પભાસા ભૃશરુચિરતરા કંબુકલ્પાંબિકાયાઃ
પત્યુઃ સાત્યંતમંતર્વિલસતુ સતતં મંથરા કંધરા વઃ ॥ 14 ॥

વક્ત્રેંદોર્દંતલક્ષ્મ્યાશ્ચિરમધરમહાકૌસ્તુભસ્યાપ્યુપાંતે
સોત્થાનાં પ્રાર્થયન્યઃ સ્થિતિમચલભુવે વારયંત્યૈ નિવેશમ્ ।
પ્રાયુંક્તેવાશિષો યઃ પ્રતિપદમમૃતત્વે સ્થિતઃ કાલશત્રોઃ
કાલં કુર્વન્ગળં વો હૃદયમયમલં ક્ષાળયેત્કાલકૂટઃ ॥ 15 ॥

પ્રૌઢપ્રેમાકુલાયા દૃઢતરપરિરંભેષુ પર્વેંદુમુખ્યાઃ
પાર્વત્યાશ્ચારુચામીકરવલયપદૈરંકિતં કાંતિશાલિ ।
રંગન્નાગાંગદાઢ્યં સતતમવિહિતં કર્મ નિર્મૂલયેત્ત-
-દ્દોર્મૂલં નિર્મલં યદ્ધૃદિ દુરિતમપાસ્યાર્જિતં ધૂર્જટેર્વઃ ॥ 16 ॥

કંઠાશ્લેષાર્થમાપ્તા દિવ ઇવ કમિતુઃ સ્વર્ગસિંધોઃ પ્રવાહાઃ
ક્રાંત્યૈ સંસારસિંધોઃ સ્ફટિકમણિમહાસંક્રમાકારદીર્ઘાઃ ।
તિર્યગ્વિષ્કંભભૂતાસ્ત્રિભુવનવસતેર્ભિન્નદૈત્યેભદેહા
બાહા વસ્તા હરસ્ય દ્રુતમિહ નિવહાનંહસાં સંહરંતુ ॥ 17 ॥

વક્ષો દક્ષદ્વિષોઽલં સ્મરભરવિનમદ્દક્ષજાક્ષીણવક્ષો-
-જાંતર્નિક્ષિપ્તશુંભન્મલયજમિળિતોદ્ભાસિ ભસ્મોક્ષિતં યત્ ।
ક્ષિપ્રં તદ્રૂક્ષચક્ષુઃ શ્રુતિગણફણરત્નૌઘભાભીક્ષ્ણશોભં
યુષ્માકં શશ્વદેનઃ સ્ફટિકમણિશિલામંડલાભં ક્ષિણોતુ ॥ 18 ॥

મુક્તામુક્તે વિચિત્રાકુલવલિલહરીજાલશાલિન્યવાંચ-
-ન્નાભ્યાવર્તે વિલોલદ્ભુજગવરયુતે કાલશત્રોર્વિશાલે ।
યુષ્મચ્ચિત્તત્રિધામા પ્રતિનવરુચિરે મંદિરે કાંતિલક્ષ્મ્યાઃ
શેતાં શીતાંશુગૌરે ચિરતરમુદરક્ષીરસિંધૌ સલીલમ્ ॥ 19 ॥

વૈયાઘ્રી યત્ર કૃત્તિઃ સ્ફુરતિ હિમગિરેર્વિસ્તૃતોપત્યકાંતઃ
સાંદ્રાવશ્યાયમિશ્રા પરિત ઇવ વૃતા નીલજીમૂતમાલા ।
આબદ્ધાહીંદ્રકાંચીગુણમતિપૃથુલં શૈલજાક્રીડભૂમિ-
-સ્તદ્વો નિઃશ્રેયસે સ્યાજ્જઘનમતિઘનં બાલશીતાંશુમૌળેઃ ॥ 20 ॥

પુષ્ટાવષ્ટંભભૂતૌ પૃથુતરજઘનસ્યાપિ નિત્યં ત્રિલોક્યાઃ
સમ્યગ્વૃત્તૌ સુરેંદ્રદ્વિરદવરકરોદારકાંતિં દધાનૌ ।
સારાવૂરૂ પુરારેઃ પ્રસભમરિઘટાઘસ્મરૌ ભસ્મશુભ્રૌ
ભક્તૈરત્યાર્દ્રચિત્તૈરધિકમવનતૌ વાંછિતં વો વિધત્તામ્ ॥ 21 ॥

આનંદાયેંદુકાંતોપલરચિતસમુદ્ગાયિતે યે મુનીનાં
ચિત્તાદર્શં નિધાતું વિદધતિ ચરણે તાંડવાકુંચનાનિ ।
કાંચીભોગીંદ્રમૂર્ધ્નાં પ્રતિમુહુરુપધાનાયમાને ક્ષણં તે
કાંતે સ્તામંતકારેર્દ્યુતિવિજિતસુધાભાનુની જાનુની વઃ ॥ 22 ॥

મંજીરીભૂતભોગિપ્રવરગણફણામંડલાંતર્નિતાંત-
-વ્યાદીર્ઘાનર્ઘરત્નદ્યુતિકિસલયતે સ્તૂયમાને દ્યુસદ્ભિઃ ।
બિભ્રત્યૌ વિભ્રમં વઃ સ્ફટિકમણિબૃહદ્દંડવદ્ભાસિતે યે
જંઘે શંખેંદુશુભ્રે ભૃશમિહ ભવતાં માનસે શૂલપાણેઃ ॥ 23 ॥

અસ્તોકસ્તોમશસ્ત્રૈરપચિતિમમલાં ભૂરિભાવોપહારૈઃ
કુર્વદ્ભિઃ સર્વદોચ્ચૈઃ સતતમભિવૃતૌ બ્રહ્મવિદ્દેવલાદ્યૈઃ ।
સમ્યક્સંપૂજ્યમાનાવિહ હૃદિ સરસીવાનિશં યુષ્મદીયે
શર્વસ્ય ક્રીડતાં તૌ પ્રપદવરબૃહત્કચ્છપાવચ્છભાસૌ ॥ 24 ॥

યાઃ સ્વસ્યૈકાંશપાતાદતિબહલગલદ્રક્તવક્ત્રં પ્રણુન્ન-
-પ્રાણં પ્રાક્રોશયન્પ્રાઙ્નિજમચલવરં ચાલયંતં દશાસ્યમ્ ।
પાદાંગુલ્યો દિશંતુ દ્રુતમયુગદૃશઃ કલ્મષપ્લોષકલ્યાઃ
કળ્યાણં ફુલ્લમાલ્યપ્રકરવિલસિતા વઃ પ્રણદ્ધાહિવલ્લ્યઃ ॥ 25 ॥

પ્રહ્વપ્રાચીનબર્હિઃપ્રમુખસુરવરપ્રસ્ફુરન્મૌળિસક્ત-
-જ્યાયોરત્નોત્કરોસ્રૈરવિરતમમલા ભૂરિનીરાજિતા યા ।
પ્રોદગ્રાગ્રા પ્રદેયાત્તતિરિવ રુચિરા તારકાણાં નિતાંતં
નીલગ્રીવસ્ય પાદાંબુરુહવિલસિતા સા નખાળી સુખં વઃ ॥ 26 ॥

સત્યાઃ સત્યાનનેંદાવપિ સવિધગતે યે વિકાસં દધાતે
સ્વાંતે સ્વાં તે લભંતે શ્રિયમિહ સરસીવામરા યે દધાનાઃ ।
લોલં લોલંબકાનાં કુલમિવ સુધિયાં સેવતે યે સદા સ્તાં
ભૂત્યૈ ભૂત્યૈણપાણેર્વિમલતરરુચસ્તે પદાંભોરુહે વઃ ॥ 27 ॥

યેષાં રાગાદિદોષાક્ષતમતિ યતયો યાંતિ મુક્તિં પ્રસાદા-
-દ્યે વા નમ્રાત્મમૂર્તિદ્યુસદૃષિપરિષન્મૂર્ધ્નિ શેષાયમાણાઃ ।
શ્રીકંઠસ્યારુણોદ્યચ્ચરણસરસિજપ્રોત્થિતાસ્તે ભાવાખ્યા-
-ત્પારાવારાચ્ચિરં વો દુરિતહતિકૃતસ્તારયેયુઃ પરાગાઃ ॥ 28 ॥

ભૂમ્ના યસ્યાસ્તસીમ્ના ભુવનમનુસૃતં યત્પરં ધામ ધામ્નાં
સામ્નામામ્નાયતત્ત્વં યદપિ ચ પરમં યદ્ગુણાતીતમાદ્યમ્ ।
યચ્ચાંહોહન્નિરીહં ગહનમિતિ મુહુઃ પ્રાહુરુચ્ચૈર્મહાંતો
માહેશં તન્મહો મે મહિતમહરહર્મોહરોહં નિહંતુ ॥ 29 ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ શ્રી શિવ કેશાદિપાદાંતવર્ણન સ્તોત્રમ્ ॥

shiva keshadi padanta varnana stotram in gujarati