ശിവ കേശാദി പാദാംത വര്ണന സ്തോത്രം

shiva keshadi padanta varnana stotram in malayalam

ദേയാസുര്മൂര്ധ്നി രാജത്സരസസുരസരിത്പാരപര്യംതനിര്യ-
-ത്പ്രാംശുസ്തംബാഃ പിശംഗാസ്തുലിതപരിണതാരക്തശാലീലതാ വഃ ।
ദുർവാരാപത്തിഗര്തശ്രിതനിഖിലജനോത്താരണേ രജ്ജുഭൂതാ
ഘോരാഘോർവീരുഹാലീദഹനശിഖിശിഖാഃ ശര്മ ശാർവാഃ കപര്ദാഃ ॥ 1 ॥

കുർവന്നിർവാണമാര്ഗപ്രഗമപരിലസദ്രൂപ്യസോപാനശംകാം
ശക്രാരീണാം പുരാണാം ത്രയവിജയകൃതസ്പഷ്ടരേഖായമാണമ് ।
അവ്യാദവ്യാജമുച്ചൈരലികഹിമധരാധിത്യകാംതസ്ത്രിധോദ്യ-
-ജ്ജാഹ്നവ്യാഭം മൃഡാനീകമിതുരുഡുപരുക്പാംഡരം വസ്ത്രിപുംഡ്രമ് ॥ 2 ॥

ക്രുധ്യദ്ഗൌരീപ്രസാദാനതിസമയപദാംഗുഷ്ഠസംക്രാംതലാക്ഷാ-
-ബിംദുസ്പര്ധി സ്മരാരേഃ സ്ഫടികമണിദൃഷന്മഗ്നമാണിക്യശോഭമ് ।
മൂര്ധ്ന്യുദ്യദ്ദിവ്യസിംധോഃ പതിതശഫരികാകാരി വോ മസ്തകം സ്താ-
-ദസ്തോകാപത്തികൃത്യൈ ഹുതവഹകണികാമോക്ഷരൂക്ഷം സദാക്ഷി ॥ 3 ॥

ഭൂത്യൈ ദൃഗ്ഭൂതയോഃ സ്യാദ്യദഹിമഹിമരുഗ്ബിംബയോഃ സ്നിഗ്ധവര്ണോ
ദൈത്യൌഘധ്വംസശംസീ സ്ഫുട ഇവ പരിവേഷാവശേഷോ വിഭാതി ।
സര്ഗസ്ഥിത്യംതവൃത്തിര്മയി സമുപഗതേതീവ നിർവൃത്തഗർവം
ശർവാണീഭര്തുരുച്ചൈര്യുഗളമഥ ദധദ്വിഭ്രമം തദ്ഭ്രുവോർവഃ ॥ 4 ॥

യുഗ്മേ രുക്മാബ്ജപിംഗേ ഗ്രഹ ഇവ പിഹിതേ ദ്രാഗ്യയോഃ പ്രാഗ്ദുഹിത്രാ
ശൈലസ്യ ധ്വാംതനീലാംബരരചിതബൃഹത്കംചുകോഽഭൂത്പ്രപംചഃ ।
തേ ത്രൈനേത്രേ പവിത്രേ ത്രിദശവരഘടാമിത്രജൈത്രോഗ്രശസ്ത്രേ
നേത്രേ നേത്രേ ഭവേതാം ദ്രുതമിഹ ഭവതാമിംദ്രിയാശ്വാന്വിയംതുമ് ॥ 5 ॥

ചംഡീവക്ത്രാര്പണേച്ഛോസ്തദനു ഭഗവതഃ പാംഡുരുക്പാംഡുഗംഡ-
-പ്രോദ്യത്കംഡൂം വിനേതും വിതനുത ഇവ യേ രത്നകോണൈർവിഘൃഷ്ടിമ് ।
ചംഡാര്ചിര്മംഡലാഭേ സതതനതജനധ്വാംതഖംഡാതിശൌംഡേ
ചാംഡീശേ തേ ശ്രിയേസ്താമധികമവനതാഖംഡലേ കുംഡലേ വഃ ॥ 6 ॥

ഖട്വാംഗോദഗ്രപാണേഃ സ്ഫുടവികടപുടോ വക്ത്രരംധ്രപ്രവേശ-
-പ്രേപ്സൂദംചത്ഫണോരുശ്വസദതിധവളാഹീംദ്രശംകാം ദധാനഃ ।
യുഷ്മാകം ക്രമവക്ത്രാംബുരുഹപരിലസത്കര്ണികാകാരശോഭഃ
ശശ്വത്ത്രാണായ ഭൂയാദലമതിവിമലോത്തുംഗകോണഃ സ ഘോണഃ ॥ 7 ॥

ക്രുധ്യത്യദ്ധാ യയോഃ സ്വാം തനുമതിലസതോര്ബിംബിതാം ലക്ഷയംതീ
ഭര്ത്രേ സ്പര്ധാതിനിഘ്നാ മുഹുരിതരവധൂശംകയാ ശൈലകന്യാ ।
യുഷ്മാംസ്തൌ ശശ്വദുച്ചൈരബഹുളദശമീശർവരീശാതിശുഭ്രാ-
-വവ്യാസ്താം ദിവ്യസിംധോഃ കമിതുരവനമല്ലോകപാലൌ കപോലൌ ॥ 8 ॥

യോ ഭാസാ ഭാത്യുപാംതസ്ഥിത ഇവ നിഭൃതം കൌസ്തുഭോ ദ്രഷ്ടുമിച്ഛ-
-ന്സോത്ഥസ്നേഹാന്നിതാംതം ഗളഗതഗരളം പത്യുരുച്ചൈഃ പശൂനാമ് ।
പ്രോദ്യത്പ്രേമ്ണാ യമാര്ദ്രാ പിബതി ഗിരിസുതാ സംപദഃ സാതിരേകാ
ലോകാഃ ശോണീകൃതാംതാ യദധരമഹസാ സോഽധരോ വോ വിധത്താമ് ॥ 9 ॥

അത്യര്ഥം രാജതേ യാ വദനശശധരാദുദ്ഗലച്ചാരുവാണീ-
-പീയൂഷാംഭഃപ്രവാഹപ്രസരപരിലസത്ഫേനബിംദ്വാവളീവ ।
ദേയാത്സാ ദംതപംക്തിശ്ചിരമിഹ ദനുദായാദദൌവാരികസ്യ
ദ്യുത്യാ ദീപ്തേംദുകുംദച്ഛവിരമലതരപ്രോന്നതാഗ്രാ മുദം വഃ ॥ 10 ॥

ന്യക്കുർവന്നുർവരാഭൃന്നിഭഘനസമയോദ്ധുഷ്ടമേഘൌഘഘോഷം
സ്ഫൂര്ജദ്വാര്ധ്യുത്ഥിതോരുധ്വനിതമപി പരബ്രഹ്മഭൂതോ ഗഭീരഃ ।
സുവ്യക്തോ വ്യക്തമൂര്തേഃ പ്രകടിതകരണഃ പ്രാണനാഥസ്യ സത്യാഃ
പ്രീത്യാ വഃ സംവിദധ്യാത്ഫലവികലമലം ജന്മ നാദഃ സ നാദഃ ॥ 11 ॥

ഭാസാ യസ്യ ത്രിലോകീ ലസതി പരിലസത്ഫേനബിംദ്വര്ണവാംത-
-ർവ്യാമഗ്നേവാതിഗൌരസ്തുലിതസുരസരിദ്വാരിപൂരപ്രസാരഃ ।
പീനാത്മാ ദംതഭാഭിര്ഭൃശമഹഹഹകാരാതിഭീമഃ സദേഷ്ടാം
പുഷ്ടാം തുഷ്ടിം കൃഷീഷ്ട സ്ഫുടമിഹ ഭവതാമട്ടഹാസോഽഷ്ടമൂര്തേഃ ॥ 12 ॥

സദ്യോജാതാഖ്യമാപ്യം യദുവിമലമുദഗ്വര്തി യദ്വാമദേവം
നാമ്നാ ഹേമ്നാ സദൃക്ഷം ജലദനിഭമഘോരാഹ്വയം ദക്ഷിണം യത് ।
യദ്ബാലാര്കപ്രഭം തത്പുരുഷനിഗദിതം പൂർവമീശാനസംജ്ഞം
യദ്ദിവ്യം താനി ശംഭോര്ഭവദഭിലഷിതം പംച ദദ്യുര്മുഖാനി ॥ 13 ॥

ആത്മപ്രേമ്ണോ ഭവാന്യാ സ്വയമിവ രചിതാഃ സാദരം സാംവനന്യാ
മഷ്യാ തിസ്രഃസുനീലാംജനനിഭഗരരേഖാഃ സമാഭാംതി യസ്യാമ് ।
അകല്പാനല്പഭാസാ ഭൃശരുചിരതരാ കംബുകല്പാംബികായാഃ
പത്യുഃ സാത്യംതമംതർവിലസതു സതതം മംഥരാ കംധരാ വഃ ॥ 14 ॥

വക്ത്രേംദോര്ദംതലക്ഷ്മ്യാശ്ചിരമധരമഹാകൌസ്തുഭസ്യാപ്യുപാംതേ
സോത്ഥാനാം പ്രാര്ഥയന്യഃ സ്ഥിതിമചലഭുവേ വാരയംത്യൈ നിവേശമ് ।
പ്രായുംക്തേവാശിഷോ യഃ പ്രതിപദമമൃതത്വേ സ്ഥിതഃ കാലശത്രോഃ
കാലം കുർവന്ഗളം വോ ഹൃദയമയമലം ക്ഷാളയേത്കാലകൂടഃ ॥ 15 ॥

പ്രൌഢപ്രേമാകുലായാ ദൃഢതരപരിരംഭേഷു പർവേംദുമുഖ്യാഃ
പാർവത്യാശ്ചാരുചാമീകരവലയപദൈരംകിതം കാംതിശാലി ।
രംഗന്നാഗാംഗദാഢ്യം സതതമവിഹിതം കര്മ നിര്മൂലയേത്ത-
-ദ്ദോര്മൂലം നിര്മലം യദ്ധൃദി ദുരിതമപാസ്യാര്ജിതം ധൂര്ജടേർവഃ ॥ 16 ॥

കംഠാശ്ലേഷാര്ഥമാപ്താ ദിവ ഇവ കമിതുഃ സ്വര്ഗസിംധോഃ പ്രവാഹാഃ
ക്രാംത്യൈ സംസാരസിംധോഃ സ്ഫടികമണിമഹാസംക്രമാകാരദീര്ഘാഃ ।
തിര്യഗ്വിഷ്കംഭഭൂതാസ്ത്രിഭുവനവസതേര്ഭിന്നദൈത്യേഭദേഹാ
ബാഹാ വസ്താ ഹരസ്യ ദ്രുതമിഹ നിവഹാനംഹസാം സംഹരംതു ॥ 17 ॥

വക്ഷോ ദക്ഷദ്വിഷോഽലം സ്മരഭരവിനമദ്ദക്ഷജാക്ഷീണവക്ഷോ-
-ജാംതര്നിക്ഷിപ്തശുംഭന്മലയജമിളിതോദ്ഭാസി ഭസ്മോക്ഷിതം യത് ।
ക്ഷിപ്രം തദ്രൂക്ഷചക്ഷുഃ ശ്രുതിഗണഫണരത്നൌഘഭാഭീക്ഷ്ണശോഭം
യുഷ്മാകം ശശ്വദേനഃ സ്ഫടികമണിശിലാമംഡലാഭം ക്ഷിണോതു ॥ 18 ॥

മുക്താമുക്തേ വിചിത്രാകുലവലിലഹരീജാലശാലിന്യവാംച-
-ന്നാഭ്യാവര്തേ വിലോലദ്ഭുജഗവരയുതേ കാലശത്രോർവിശാലേ ।
യുഷ്മച്ചിത്തത്രിധാമാ പ്രതിനവരുചിരേ മംദിരേ കാംതിലക്ഷ്മ്യാഃ
ശേതാം ശീതാംശുഗൌരേ ചിരതരമുദരക്ഷീരസിംധൌ സലീലമ് ॥ 19 ॥

വൈയാഘ്രീ യത്ര കൃത്തിഃ സ്ഫുരതി ഹിമഗിരേർവിസ്തൃതോപത്യകാംതഃ
സാംദ്രാവശ്യായമിശ്രാ പരിത ഇവ വൃതാ നീലജീമൂതമാലാ ।
ആബദ്ധാഹീംദ്രകാംചീഗുണമതിപൃഥുലം ശൈലജാക്രീഡഭൂമി-
-സ്തദ്വോ നിഃശ്രേയസേ സ്യാജ്ജഘനമതിഘനം ബാലശീതാംശുമൌളേഃ ॥ 20 ॥

പുഷ്ടാവഷ്ടംഭഭൂതൌ പൃഥുതരജഘനസ്യാപി നിത്യം ത്രിലോക്യാഃ
സമ്യഗ്വൃത്തൌ സുരേംദ്രദ്വിരദവരകരോദാരകാംതിം ദധാനൌ ।
സാരാവൂരൂ പുരാരേഃ പ്രസഭമരിഘടാഘസ്മരൌ ഭസ്മശുഭ്രൌ
ഭക്തൈരത്യാര്ദ്രചിത്തൈരധികമവനതൌ വാംഛിതം വോ വിധത്താമ് ॥ 21 ॥

ആനംദായേംദുകാംതോപലരചിതസമുദ്ഗായിതേ യേ മുനീനാം
ചിത്താദര്ശം നിധാതും വിദധതി ചരണേ താംഡവാകുംചനാനി ।
കാംചീഭോഗീംദ്രമൂര്ധ്നാം പ്രതിമുഹുരുപധാനായമാനേ ക്ഷണം തേ
കാംതേ സ്താമംതകാരേര്ദ്യുതിവിജിതസുധാഭാനുനീ ജാനുനീ വഃ ॥ 22 ॥

മംജീരീഭൂതഭോഗിപ്രവരഗണഫണാമംഡലാംതര്നിതാംത-
-വ്യാദീര്ഘാനര്ഘരത്നദ്യുതികിസലയതേ സ്തൂയമാനേ ദ്യുസദ്ഭിഃ ।
ബിഭ്രത്യൌ വിഭ്രമം വഃ സ്ഫടികമണിബൃഹദ്ദംഡവദ്ഭാസിതേ യേ
ജംഘേ ശംഖേംദുശുഭ്രേ ഭൃശമിഹ ഭവതാം മാനസേ ശൂലപാണേഃ ॥ 23 ॥

അസ്തോകസ്തോമശസ്ത്രൈരപചിതിമമലാം ഭൂരിഭാവോപഹാരൈഃ
കുർവദ്ഭിഃ സർവദോച്ചൈഃ സതതമഭിവൃതൌ ബ്രഹ്മവിദ്ദേവലാദ്യൈഃ ।
സമ്യക്സംപൂജ്യമാനാവിഹ ഹൃദി സരസീവാനിശം യുഷ്മദീയേ
ശർവസ്യ ക്രീഡതാം തൌ പ്രപദവരബൃഹത്കച്ഛപാവച്ഛഭാസൌ ॥ 24 ॥

യാഃ സ്വസ്യൈകാംശപാതാദതിബഹലഗലദ്രക്തവക്ത്രം പ്രണുന്ന-
-പ്രാണം പ്രാക്രോശയന്പ്രാങ്നിജമചലവരം ചാലയംതം ദശാസ്യമ് ।
പാദാംഗുല്യോ ദിശംതു ദ്രുതമയുഗദൃശഃ കല്മഷപ്ലോഷകല്യാഃ
കള്യാണം ഫുല്ലമാല്യപ്രകരവിലസിതാ വഃ പ്രണദ്ധാഹിവല്ല്യഃ ॥ 25 ॥

പ്രഹ്വപ്രാചീനബര്ഹിഃപ്രമുഖസുരവരപ്രസ്ഫുരന്മൌളിസക്ത-
-ജ്യായോരത്നോത്കരോസ്രൈരവിരതമമലാ ഭൂരിനീരാജിതാ യാ ।
പ്രോദഗ്രാഗ്രാ പ്രദേയാത്തതിരിവ രുചിരാ താരകാണാം നിതാംതം
നീലഗ്രീവസ്യ പാദാംബുരുഹവിലസിതാ സാ നഖാളീ സുഖം വഃ ॥ 26 ॥

സത്യാഃ സത്യാനനേംദാവപി സവിധഗതേ യേ വികാസം ദധാതേ
സ്വാംതേ സ്വാം തേ ലഭംതേ ശ്രിയമിഹ സരസീവാമരാ യേ ദധാനാഃ ।
ലോലം ലോലംബകാനാം കുലമിവ സുധിയാം സേവതേ യേ സദാ സ്താം
ഭൂത്യൈ ഭൂത്യൈണപാണേർവിമലതരരുചസ്തേ പദാംഭോരുഹേ വഃ ॥ 27 ॥

യേഷാം രാഗാദിദോഷാക്ഷതമതി യതയോ യാംതി മുക്തിം പ്രസാദാ-
-ദ്യേ വാ നമ്രാത്മമൂര്തിദ്യുസദൃഷിപരിഷന്മൂര്ധ്നി ശേഷായമാണാഃ ।
ശ്രീകംഠസ്യാരുണോദ്യച്ചരണസരസിജപ്രോത്ഥിതാസ്തേ ഭാവാഖ്യാ-
-ത്പാരാവാരാച്ചിരം വോ ദുരിതഹതികൃതസ്താരയേയുഃ പരാഗാഃ ॥ 28 ॥

ഭൂമ്നാ യസ്യാസ്തസീമ്നാ ഭുവനമനുസൃതം യത്പരം ധാമ ധാമ്നാം
സാമ്നാമാമ്നായതത്ത്വം യദപി ച പരമം യദ്ഗുണാതീതമാദ്യമ് ।
യച്ചാംഹോഹന്നിരീഹം ഗഹനമിതി മുഹുഃ പ്രാഹുരുച്ചൈര്മഹാംതോ
മാഹേശം തന്മഹോ മേ മഹിതമഹരഹര്മോഹരോഹം നിഹംതു ॥ 29 ॥

ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ ശ്രീ ശിവ കേശാദിപാദാംതവര്ണന സ്തോത്രമ് ॥

shiva keshadi padanta varnana stotram in malayalam