শিব কেশাদি পাদাংত বর্ণন স্তোত্রং

shiva keshadi padanta varnana stotram in assamese

দেযাসুর্মূর্ধ্নি রাজত্সরসসুরসরিত্পারপর্যংতনির্য-
-ত্প্রাংশুস্তংবাঃ পিশংগাস্তুলিতপরিণতারক্তশালীলতা বঃ ।
দুর্বারাপত্তিগর্তশ্রিতনিখিলজনোত্তারণে রজ্জুভূতা
ঘোরাঘোর্বীরুহালীদহনশিখিশিখাঃ শর্ম শার্বাঃ কপর্দাঃ ॥ 1 ॥

কুর্বন্নির্বাণমার্গপ্রগমপরিলসদ্রূপ্যসোপানশংকাং
শক্রারীণাং পুরাণাং ত্রযবিজযকৃতস্পষ্টরেখাযমাণম্ ।
অব্যাদব্যাজমুচ্চৈরলিকহিমধরাধিত্যকাংতস্ত্রিধোদ্য-
-জ্জাহ্নব্যাভং মৃডানীকমিতুরুডুপরুক্পাংডরং বস্ত্রিপুংড্রম্ ॥ 2 ॥

ক্রুধ্যদ্গৌরীপ্রসাদানতিসমযপদাংগুষ্ঠসংক্রাংতলাক্ষা-
-বিংদুস্পর্ধি স্মরারেঃ স্ফটিকমণিদৃষন্মগ্নমাণিক্যশোভম্ ।
মূর্ধ্ন্যুদ্যদ্দিব্যসিংধোঃ পতিতশফরিকাকারি বো মস্তকং স্তা-
-দস্তোকাপত্তিকৃত্যৈ হুতবহকণিকামোক্ষরূক্ষং সদাক্ষি ॥ 3 ॥

ভূত্যৈ দৃগ্ভূতযোঃ স্যাদ্যদহিমহিমরুগ্বিংবযোঃ স্নিগ্ধবর্ণো
দৈত্যৌঘধ্বংসশংসী স্ফুট ইব পরিবেষাবশেষো বিভাতি ।
সর্গস্থিত্যংতবৃত্তির্মযি সমুপগতেতীব নির্বৃত্তগর্বং
শর্বাণীভর্তুরুচ্চৈর্যুগলমথ দধদ্বিভ্রমং তদ্ভ্রুবোর্বঃ ॥ 4 ॥

যুগ্মে রুক্মাব্জপিংগে গ্রহ ইব পিহিতে দ্রাগ্যযোঃ প্রাগ্দুহিত্রা
শৈলস্য ধ্বাংতনীলাংবররচিতবৃহত্কংচুকোঽভূত্প্রপংচঃ ।
তে ত্রৈনেত্রে পবিত্রে ত্রিদশবরঘটামিত্রজৈত্রোগ্রশস্ত্রে
নেত্রে নেত্রে ভবেতাং দ্রুতমিহ ভবতামিংদ্রিযাশ্বান্বিযংতুম্ ॥ 5 ॥

চংডীবক্ত্রার্পণেচ্ছোস্তদনু ভগবতঃ পাংডুরুক্পাংডুগংড-
-প্রোদ্যত্কংডূং বিনেতুং বিতনুত ইব যে রত্নকোণৈর্বিঘৃষ্টিম্ ।
চংডার্চির্মংডলাভে সততনতজনধ্বাংতখংডাতিশৌংডে
চাংডীশে তে শ্রিযেস্তামধিকমবনতাখংডলে কুংডলে বঃ ॥ 6 ॥

খট্বাংগোদগ্রপাণেঃ স্ফুটবিকটপুটো বক্ত্ররংধ্রপ্রবেশ-
-প্রেপ্সূদংচত্ফণোরুশ্বসদতিধবলাহীংদ্রশংকাং দধানঃ ।
যুষ্মাকং ক্রমবক্ত্রাংবুরুহপরিলসত্কর্ণিকাকারশোভঃ
শশ্বত্ত্রাণায ভূযাদলমতিবিমলোত্তুংগকোণঃ স ঘোণঃ ॥ 7 ॥

ক্রুধ্যত্যদ্ধা যযোঃ স্বাং তনুমতিলসতোর্বিংবিতাং লক্ষযংতী
ভর্ত্রে স্পর্ধাতিনিঘ্না মুহুরিতরবধূশংকযা শৈলকন্যা ।
যুষ্মাংস্তৌ শশ্বদুচ্চৈরবহুলদশমীশর্বরীশাতিশুভ্রা-
-বব্যাস্তাং দিব্যসিংধোঃ কমিতুরবনমল্লোকপালৌ কপোলৌ ॥ 8 ॥

যো ভাসা ভাত্যুপাংতস্থিত ইব নিভৃতং কৌস্তুভো দ্রষ্টুমিচ্ছ-
-ন্সোত্থস্নেহান্নিতাংতং গলগতগরলং পত্যুরুচ্চৈঃ পশূনাম্ ।
প্রোদ্যত্প্রেম্ণা যমার্দ্রা পিবতি গিরিসুতা সংপদঃ সাতিরেকা
লোকাঃ শোণীকৃতাংতা যদধরমহসা সোঽধরো বো বিধত্তাম্ ॥ 9 ॥

অত্যর্থং রাজতে যা বদনশশধরাদুদ্গলচ্চারুবাণী-
-পীযূষাংভঃপ্রবাহপ্রসরপরিলসত্ফেনবিংদ্বাবলীব ।
দেযাত্সা দংতপংক্তিশ্চিরমিহ দনুদাযাদদৌবারিকস্য
দ্যুত্যা দীপ্তেংদুকুংদচ্ছবিরমলতরপ্রোন্নতাগ্রা মুদং বঃ ॥ 10 ॥

ন্যক্কুর্বন্নুর্বরাভৃন্নিভঘনসমযোদ্ধুষ্টমেঘৌঘঘোষং
স্ফূর্জদ্বার্ধ্যুত্থিতোরুধ্বনিতমপি পরব্রহ্মভূতো গভীরঃ ।
সুব্যক্তো ব্যক্তমূর্তেঃ প্রকটিতকরণঃ প্রাণনাথস্য সত্যাঃ
প্রীত্যা বঃ সংবিদধ্যাত্ফলবিকলমলং জন্ম নাদঃ স নাদঃ ॥ 11 ॥

ভাসা যস্য ত্রিলোকী লসতি পরিলসত্ফেনবিংদ্বর্ণবাংত-
-র্ব্যামগ্নেবাতিগৌরস্তুলিতসুরসরিদ্বারিপূরপ্রসারঃ ।
পীনাত্মা দংতভাভির্ভৃশমহহহকারাতিভীমঃ সদেষ্টাং
পুষ্টাং তুষ্টিং কৃষীষ্ট স্ফুটমিহ ভবতামট্টহাসোঽষ্টমূর্তেঃ ॥ 12 ॥

সদ্যোজাতাখ্যমাপ্যং যদুবিমলমুদগ্বর্তি যদ্বামদেবং
নাম্না হেম্না সদৃক্ষং জলদনিভমঘোরাহ্বযং দক্ষিণং যত্ ।
যদ্বালার্কপ্রভং তত্পুরুষনিগদিতং পূর্বমীশানসংজ্ঞং
যদ্দিব্যং তানি শংভোর্ভবদভিলষিতং পংচ দদ্যুর্মুখানি ॥ 13 ॥

আত্মপ্রেম্ণো ভবান্যা স্বযমিব রচিতাঃ সাদরং সাংবনন্যা
মষ্যা তিস্রঃসুনীলাংজননিভগররেখাঃ সমাভাংতি যস্যাম্ ।
অকল্পানল্পভাসা ভৃশরুচিরতরা কংবুকল্পাংবিকাযাঃ
পত্যুঃ সাত্যংতমংতর্বিলসতু সততং মংথরা কংধরা বঃ ॥ 14 ॥

বক্ত্রেংদোর্দংতলক্ষ্ম্যাশ্চিরমধরমহাকৌস্তুভস্যাপ্যুপাংতে
সোত্থানাং প্রার্থযন্যঃ স্থিতিমচলভুবে বারযংত্যৈ নিবেশম্ ।
প্রাযুংক্তেবাশিষো যঃ প্রতিপদমমৃতত্বে স্থিতঃ কালশত্রোঃ
কালং কুর্বন্গলং বো হৃদযমযমলং ক্ষালযেত্কালকূটঃ ॥ 15 ॥

প্রৌঢপ্রেমাকুলাযা দৃঢতরপরিরংভেষু পর্বেংদুমুখ্যাঃ
পার্বত্যাশ্চারুচামীকরবলযপদৈরংকিতং কাংতিশালি ।
রংগন্নাগাংগদাঢ্যং সততমবিহিতং কর্ম নির্মূলযেত্ত-
-দ্দোর্মূলং নির্মলং যদ্ধৃদি দুরিতমপাস্যার্জিতং ধূর্জটের্বঃ ॥ 16 ॥

কংঠাশ্লেষার্থমাপ্তা দিব ইব কমিতুঃ স্বর্গসিংধোঃ প্রবাহাঃ
ক্রাংত্যৈ সংসারসিংধোঃ স্ফটিকমণিমহাসংক্রমাকারদীর্ঘাঃ ।
তির্যগ্বিষ্কংভভূতাস্ত্রিভুবনবসতের্ভিন্নদৈত্যেভদেহা
বাহা বস্তা হরস্য দ্রুতমিহ নিবহানংহসাং সংহরংতু ॥ 17 ॥

বক্ষো দক্ষদ্বিষোঽলং স্মরভরবিনমদ্দক্ষজাক্ষীণবক্ষো-
-জাংতর্নিক্ষিপ্তশুংভন্মলযজমিলিতোদ্ভাসি ভস্মোক্ষিতং যত্ ।
ক্ষিপ্রং তদ্রূক্ষচক্ষুঃ শ্রুতিগণফণরত্নৌঘভাভীক্ষ্ণশোভং
যুষ্মাকং শশ্বদেনঃ স্ফটিকমণিশিলামংডলাভং ক্ষিণোতু ॥ 18 ॥

মুক্তামুক্তে বিচিত্রাকুলবলিলহরীজালশালিন্যবাংচ-
-ন্নাভ্যাবর্তে বিলোলদ্ভুজগবরযুতে কালশত্রোর্বিশালে ।
যুষ্মচ্চিত্তত্রিধামা প্রতিনবরুচিরে মংদিরে কাংতিলক্ষ্ম্যাঃ
শেতাং শীতাংশুগৌরে চিরতরমুদরক্ষীরসিংধৌ সলীলম্ ॥ 19 ॥

বৈযাঘ্রী যত্র কৃত্তিঃ স্ফুরতি হিমগিরের্বিস্তৃতোপত্যকাংতঃ
সাংদ্রাবশ্যাযমিশ্রা পরিত ইব বৃতা নীলজীমূতমালা ।
আবদ্ধাহীংদ্রকাংচীগুণমতিপৃথুলং শৈলজাক্রীডভূমি-
-স্তদ্বো নিঃশ্রেযসে স্যাজ্জঘনমতিঘনং বালশীতাংশুমৌলেঃ ॥ 20 ॥

পুষ্টাবষ্টংভভূতৌ পৃথুতরজঘনস্যাপি নিত্যং ত্রিলোক্যাঃ
সম্যগ্বৃত্তৌ সুরেংদ্রদ্বিরদবরকরোদারকাংতিং দধানৌ ।
সারাবূরূ পুরারেঃ প্রসভমরিঘটাঘস্মরৌ ভস্মশুভ্রৌ
ভক্তৈরত্যার্দ্রচিত্তৈরধিকমবনতৌ বাংছিতং বো বিধত্তাম্ ॥ 21 ॥

আনংদাযেংদুকাংতোপলরচিতসমুদ্গাযিতে যে মুনীনাং
চিত্তাদর্শং নিধাতুং বিদধতি চরণে তাংডবাকুংচনানি ।
কাংচীভোগীংদ্রমূর্ধ্নাং প্রতিমুহুরুপধানাযমানে ক্ষণং তে
কাংতে স্তামংতকারের্দ্যুতিবিজিতসুধাভানুনী জানুনী বঃ ॥ 22 ॥

মংজীরীভূতভোগিপ্রবরগণফণামংডলাংতর্নিতাংত-
-ব্যাদীর্ঘানর্ঘরত্নদ্যুতিকিসলযতে স্তূযমানে দ্যুসদ্ভিঃ ।
বিভ্রত্যৌ বিভ্রমং বঃ স্ফটিকমণিবৃহদ্দংডবদ্ভাসিতে যে
জংঘে শংখেংদুশুভ্রে ভৃশমিহ ভবতাং মানসে শূলপাণেঃ ॥ 23 ॥

অস্তোকস্তোমশস্ত্রৈরপচিতিমমলাং ভূরিভাবোপহারৈঃ
কুর্বদ্ভিঃ সর্বদোচ্চৈঃ সততমভিবৃতৌ ব্রহ্মবিদ্দেবলাদ্যৈঃ ।
সম্যক্সংপূজ্যমানাবিহ হৃদি সরসীবানিশং যুষ্মদীযে
শর্বস্য ক্রীডতাং তৌ প্রপদবরবৃহত্কচ্ছপাবচ্ছভাসৌ ॥ 24 ॥

যাঃ স্বস্যৈকাংশপাতাদতিবহলগলদ্রক্তবক্ত্রং প্রণুন্ন-
-প্রাণং প্রাক্রোশযন্প্রাঙ্নিজমচলবরং চালযংতং দশাস্যম্ ।
পাদাংগুল্যো দিশংতু দ্রুতমযুগদৃশঃ কল্মষপ্লোষকল্যাঃ
কল্যাণং ফুল্লমাল্যপ্রকরবিলসিতা বঃ প্রণদ্ধাহিবল্ল্যঃ ॥ 25 ॥

প্রহ্বপ্রাচীনবর্হিঃপ্রমুখসুরবরপ্রস্ফুরন্মৌলিসক্ত-
-জ্যাযোরত্নোত্করোস্রৈরবিরতমমলা ভূরিনীরাজিতা যা ।
প্রোদগ্রাগ্রা প্রদেযাত্ততিরিব রুচিরা তারকাণাং নিতাংতং
নীলগ্রীবস্য পাদাংবুরুহবিলসিতা সা নখালী সুখং বঃ ॥ 26 ॥

সত্যাঃ সত্যাননেংদাবপি সবিধগতে যে বিকাসং দধাতে
স্বাংতে স্বাং তে লভংতে শ্রিযমিহ সরসীবামরা যে দধানাঃ ।
লোলং লোলংবকানাং কুলমিব সুধিযাং সেবতে যে সদা স্তাং
ভূত্যৈ ভূত্যৈণপাণের্বিমলতররুচস্তে পদাংভোরুহে বঃ ॥ 27 ॥

যেষাং রাগাদিদোষাক্ষতমতি যতযো যাংতি মুক্তিং প্রসাদা-
-দ্যে বা নম্রাত্মমূর্তিদ্যুসদৃষিপরিষন্মূর্ধ্নি শেষাযমাণাঃ ।
শ্রীকংঠস্যারুণোদ্যচ্চরণসরসিজপ্রোত্থিতাস্তে ভাবাখ্যা-
-ত্পারাবারাচ্চিরং বো দুরিতহতিকৃতস্তারযেযুঃ পরাগাঃ ॥ 28 ॥

ভূম্না যস্যাস্তসীম্না ভুবনমনুসৃতং যত্পরং ধাম ধাম্নাং
সাম্নামাম্নাযতত্ত্বং যদপি চ পরমং যদ্গুণাতীতমাদ্যম্ ।
যচ্চাংহোহন্নিরীহং গহনমিতি মুহুঃ প্রাহুরুচ্চৈর্মহাংতো
মাহেশং তন্মহো মে মহিতমহরহর্মোহরোহং নিহংতু ॥ 29 ॥

ইতি শ্রীমত্পরমহংসপরিব্রাজকাচার্যস্য শ্রীগোবিংদভগবত্পূজ্যপাদশিষ্যস্য শ্রীমচ্ছংকরভগবতঃ কৃতৌ শ্রী শিব কেশাদিপাদাংতবর্ণন স্তোত্রম্ ॥

shiva keshadi padanta varnana stotram in assamese