ନାରାୟଣୀୟଂ ଦଶକ 65 – ଗୋପିକାନାଂ ଭଗଵତ୍ସାମୀପ୍ୟପ୍ରାପ୍ତିଃ

narayaniyam dashaka 65 in odia

ଗୋପୀଜନାୟ କଥିତଂ ନିୟମାଵସାନେ
ମାରୋତ୍ସଵଂ ତ୍ଵମଥ ସାଧୟିତୁଂ ପ୍ରଵୃତ୍ତଃ ।
ସାଂଦ୍ରେଣ ଚାଂଦ୍ରମହସା ଶିଶିରୀକୃତାଶେ
ପ୍ରାପୂରୟୋ ମୁରଲିକାଂ ୟମୁନାଵନାଂତେ ॥1॥

ସମ୍ମୂର୍ଛନାଭିରୁଦିତସ୍ଵରମଂଡଲାଭିଃ
ସମ୍ମୂର୍ଛୟଂତମଖିଲଂ ଭୁଵନାଂତରାଲମ୍ ।
ତ୍ଵଦ୍ଵେଣୁନାଦମୁପକର୍ଣ୍ୟ ଵିଭୋ ତରୁଣ୍ୟ-
ସ୍ତତ୍ତାଦୃଶଂ କମପି ଚିତ୍ତଵିମୋହମାପୁଃ ॥2॥

ତା ଗେହକୃତ୍ୟନିରତାସ୍ତନୟପ୍ରସକ୍ତାଃ
କାଂତୋପସେଵନପରାଶ୍ଚ ସରୋରୁହାକ୍ଷ୍ୟଃ ।
ସର୍ଵଂ ଵିସୃଜ୍ୟ ମୁରଲୀରଵମୋହିତାସ୍ତେ
କାଂତାରଦେଶମୟି କାଂତତନୋ ସମେତାଃ ॥3॥

କାଶ୍ଚିନ୍ନିଜାଂଗପରିଭୂଷଣମାଦଧାନା
ଵେଣୁପ୍ରଣାଦମୁପକର୍ଣ୍ୟ କୃତାର୍ଧଭୂଷାଃ ।
ତ୍ଵାମାଗତା ନନୁ ତଥୈଵ ଵିଭୂଷିତାଭ୍ୟ-
ସ୍ତା ଏଵ ସଂରୁରୁଚିରେ ତଵ ଲୋଚନାୟ ॥4॥

ହାରଂ ନିତଂବଭୁଵି କାଚନ ଧାରୟଂତୀ
କାଂଚୀଂ ଚ କଂଠଭୁଵି ଦେଵ ସମାଗତା ତ୍ଵାମ୍ ।
ହାରିତ୍ଵମାତ୍ମଜଘନସ୍ୟ ମୁକୁଂଦ ତୁଭ୍ୟଂ
ଵ୍ୟକ୍ତଂ ବଭାଷ ଇଵ ମୁଗ୍ଧମୁଖୀ ଵିଶେଷାତ୍ ॥5॥

କାଚିତ୍ କୁଚେ ପୁନରସଜ୍ଜିତକଂଚୁଲୀକା
ଵ୍ୟାମୋହତଃ ପରଵଧୂଭିରଲକ୍ଷ୍ୟମାଣା ।
ତ୍ଵାମାୟୟୌ ନିରୁପମପ୍ରଣୟାତିଭାର-
ରାଜ୍ୟାଭିଷେକଵିଧୟେ କଲଶୀଧରେଵ ॥6॥

କାଶ୍ଚିତ୍ ଗୃହାତ୍ କିଲ ନିରେତୁମପାରୟଂତ୍ୟ-
ସ୍ତ୍ଵାମେଵ ଦେଵ ହୃଦୟେ ସୁଦୃଢଂ ଵିଭାଵ୍ୟ ।
ଦେହଂ ଵିଧୂୟ ପରଚିତ୍ସୁଖରୂପମେକଂ
ତ୍ଵାମାଵିଶନ୍ ପରମିମା ନନୁ ଧନ୍ୟଧନ୍ୟାଃ ॥7॥

ଜାରାତ୍ମନା ନ ପରମାତ୍ମତୟା ସ୍ମରଂତ୍ୟୋ
ନାର୍ୟୋ ଗତାଃ ପରମହଂସଗତିଂ କ୍ଷଣେନ ।
ତଂ ତ୍ଵାଂ ପ୍ରକାଶପରମାତ୍ମତନୁଂ କଥଂଚି-
ଚ୍ଚିତ୍ତେ ଵହନ୍ନମୃତମଶ୍ରମମଶ୍ନୁଵୀୟ ॥8॥

ଅଭ୍ୟାଗତାଭିରଭିତୋ ଵ୍ରଜସୁଂଦରୀଭି-
ର୍ମୁଗ୍ଧସ୍ମିତାର୍ଦ୍ରଵଦନଃ କରୁଣାଵଲୋକୀ ।
ନିସ୍ସୀମକାଂତିଜଲଧିସ୍ତ୍ଵମଵେକ୍ଷ୍ୟମାଣୋ
ଵିଶ୍ଵୈକହୃଦ୍ୟ ହର ମେ ପଵନେଶ ରୋଗାନ୍ ॥9॥

narayaniyam dashaka 65 in odia