ನಾರಾಯಣೀಯಂ ದಶಕ 65 – ಗೋಪಿಕಾನಾಂ ಭಗವತ್ಸಾಮೀಪ್ಯಪ್ರಾಪ್ತಿಃ

narayaniyam dashaka 65 in kannada

ಗೋಪೀಜನಾಯ ಕಥಿತಂ ನಿಯಮಾವಸಾನೇ
ಮಾರೋತ್ಸವಂ ತ್ವಮಥ ಸಾಧಯಿತುಂ ಪ್ರವೃತ್ತಃ ।
ಸಾಂದ್ರೇಣ ಚಾಂದ್ರಮಹಸಾ ಶಿಶಿರೀಕೃತಾಶೇ
ಪ್ರಾಪೂರಯೋ ಮುರಲಿಕಾಂ ಯಮುನಾವನಾಂತೇ ॥1॥

ಸಮ್ಮೂರ್ಛನಾಭಿರುದಿತಸ್ವರಮಂಡಲಾಭಿಃ
ಸಮ್ಮೂರ್ಛಯಂತಮಖಿಲಂ ಭುವನಾಂತರಾಲಮ್ ।
ತ್ವದ್ವೇಣುನಾದಮುಪಕರ್ಣ್ಯ ವಿಭೋ ತರುಣ್ಯ-
ಸ್ತತ್ತಾದೃಶಂ ಕಮಪಿ ಚಿತ್ತವಿಮೋಹಮಾಪುಃ ॥2॥

ತಾ ಗೇಹಕೃತ್ಯನಿರತಾಸ್ತನಯಪ್ರಸಕ್ತಾಃ
ಕಾಂತೋಪಸೇವನಪರಾಶ್ಚ ಸರೋರುಹಾಕ್ಷ್ಯಃ ।
ಸರ್ವಂ ವಿಸೃಜ್ಯ ಮುರಲೀರವಮೋಹಿತಾಸ್ತೇ
ಕಾಂತಾರದೇಶಮಯಿ ಕಾಂತತನೋ ಸಮೇತಾಃ ॥3॥

ಕಾಶ್ಚಿನ್ನಿಜಾಂಗಪರಿಭೂಷಣಮಾದಧಾನಾ
ವೇಣುಪ್ರಣಾದಮುಪಕರ್ಣ್ಯ ಕೃತಾರ್ಧಭೂಷಾಃ ।
ತ್ವಾಮಾಗತಾ ನನು ತಥೈವ ವಿಭೂಷಿತಾಭ್ಯ-
ಸ್ತಾ ಏವ ಸಂರುರುಚಿರೇ ತವ ಲೋಚನಾಯ ॥4॥

ಹಾರಂ ನಿತಂಬಭುವಿ ಕಾಚನ ಧಾರಯಂತೀ
ಕಾಂಚೀಂ ಚ ಕಂಠಭುವಿ ದೇವ ಸಮಾಗತಾ ತ್ವಾಮ್ ।
ಹಾರಿತ್ವಮಾತ್ಮಜಘನಸ್ಯ ಮುಕುಂದ ತುಭ್ಯಂ
ವ್ಯಕ್ತಂ ಬಭಾಷ ಇವ ಮುಗ್ಧಮುಖೀ ವಿಶೇಷಾತ್ ॥5॥

ಕಾಚಿತ್ ಕುಚೇ ಪುನರಸಜ್ಜಿತಕಂಚುಲೀಕಾ
ವ್ಯಾಮೋಹತಃ ಪರವಧೂಭಿರಲಕ್ಷ್ಯಮಾಣಾ ।
ತ್ವಾಮಾಯಯೌ ನಿರುಪಮಪ್ರಣಯಾತಿಭಾರ-
ರಾಜ್ಯಾಭಿಷೇಕವಿಧಯೇ ಕಲಶೀಧರೇವ ॥6॥

ಕಾಶ್ಚಿತ್ ಗೃಹಾತ್ ಕಿಲ ನಿರೇತುಮಪಾರಯಂತ್ಯ-
ಸ್ತ್ವಾಮೇವ ದೇವ ಹೃದಯೇ ಸುದೃಢಂ ವಿಭಾವ್ಯ ।
ದೇಹಂ ವಿಧೂಯ ಪರಚಿತ್ಸುಖರೂಪಮೇಕಂ
ತ್ವಾಮಾವಿಶನ್ ಪರಮಿಮಾ ನನು ಧನ್ಯಧನ್ಯಾಃ ॥7॥

ಜಾರಾತ್ಮನಾ ನ ಪರಮಾತ್ಮತಯಾ ಸ್ಮರಂತ್ಯೋ
ನಾರ್ಯೋ ಗತಾಃ ಪರಮಹಂಸಗತಿಂ ಕ್ಷಣೇನ ।
ತಂ ತ್ವಾಂ ಪ್ರಕಾಶಪರಮಾತ್ಮತನುಂ ಕಥಂಚಿ-
ಚ್ಚಿತ್ತೇ ವಹನ್ನಮೃತಮಶ್ರಮಮಶ್ನುವೀಯ ॥8॥

ಅಭ್ಯಾಗತಾಭಿರಭಿತೋ ವ್ರಜಸುಂದರೀಭಿ-
ರ್ಮುಗ್ಧಸ್ಮಿತಾರ್ದ್ರವದನಃ ಕರುಣಾವಲೋಕೀ ।
ನಿಸ್ಸೀಮಕಾಂತಿಜಲಧಿಸ್ತ್ವಮವೇಕ್ಷ್ಯಮಾಣೋ
ವಿಶ್ವೈಕಹೃದ್ಯ ಹರ ಮೇ ಪವನೇಶ ರೋಗಾನ್ ॥9॥

narayaniyam dashaka 65 in kannada