ନାରାୟଣୀୟଂ ଦଶକ 45 – ଶ୍ରୀକୃଷ୍ଣସ୍ୟ ବାଲଲୀଲାଃ

narayaniyam dashaka 45 in odia

ଅୟି ସବଲ ମୁରାରେ ପାଣିଜାନୁପ୍ରଚାରୈଃ
କିମପି ଭଵନଭାଗାନ୍ ଭୂଷୟଂତୌ ଭଵଂତୌ ।
ଚଲିତଚରଣକଂଜୌ ମଂଜୁମଂଜୀରଶିଂଜା-
ଶ୍ରଵଣକୁତୁକଭାଜୌ ଚେରତୁଶ୍ଚାରୁଵେଗାତ୍ ॥1॥

ମୃଦୁ ମୃଦୁ ଵିହସଂତାଵୁନ୍ମିଷଦ୍ଦଂତଵଂତୌ
ଵଦନପତିତକେଶୌ ଦୃଶ୍ୟପାଦାବ୍ଜଦେଶୌ ।
ଭୁଜଗଲିତକରାଂତଵ୍ୟାଲଗତ୍କଂକଣାଂକୌ
ମତିମହରତମୁଚ୍ଚୈଃ ପଶ୍ୟତାଂ ଵିଶ୍ଵନୃଣାମ୍ ॥2॥

ଅନୁସରତି ଜନୌଘେ କୌତୁକଵ୍ୟାକୁଲାକ୍ଷେ
କିମପି କୃତନିନାଦଂ ଵ୍ୟାହସଂତୌ ଦ୍ରଵଂତୌ ।
ଵଲିତଵଦନପଦ୍ମଂ ପୃଷ୍ଠତୋ ଦତ୍ତଦୃଷ୍ଟୀ
କିମିଵ ନ ଵିଦଧାଥେ କୌତୁକଂ ଵାସୁଦେଵ ॥3॥

ଦ୍ରୁତଗତିଷୁ ପତଂତାଵୁତ୍ଥିତୌ ଲିପ୍ତପଂକୌ
ଦିଵି ମୁନିଭିରପଂକୈଃ ସସ୍ମିତଂ ଵଂଦ୍ୟମାନୌ ।
ଦ୍ରୁତମଥ ଜନନୀଭ୍ୟାଂ ସାନୁକଂପଂ ଗୃହୀତୌ
ମୁହୁରପି ପରିରବ୍ଧୌ ଦ୍ରାଗ୍ୟୁଵାଂ ଚୁଂବିତୌ ଚ ॥4॥

ସ୍ନୁତକୁଚଭରମଂକେ ଧାରୟଂତୀ ଭଵଂତଂ
ତରଲମତି ୟଶୋଦା ସ୍ତନ୍ୟଦା ଧନ୍ୟଧନ୍ୟା ।
କପଟପଶୁପ ମଧ୍ୟେ ମୁଗ୍ଧହାସାଂକୁରଂ ତେ
ଦଶନମୁକୁଲହୃଦ୍ୟଂ ଵୀକ୍ଷ୍ୟ ଵକ୍ତ୍ରଂ ଜହର୍ଷ ॥5॥

ତଦନୁଚରଣଚାରୀ ଦାରକୈସ୍ସାକମାରା-
ନ୍ନିଲୟତତିଷୁ ଖେଲନ୍ ବାଲଚାପଲ୍ୟଶାଲୀ ।
ଭଵନଶୁକଵିଡାଲାନ୍ ଵତ୍ସକାଂଶ୍ଚାନୁଧାଵନ୍
କଥମପି କୃତହାସୈର୍ଗୋପକୈର୍ଵାରିତୋଽଭୂଃ ॥6॥

ହଲଧରସହିତସ୍ତ୍ଵଂ ୟତ୍ର ୟତ୍ରୋପୟାତୋ
ଵିଵଶପତିତନେତ୍ରାସ୍ତତ୍ର ତତ୍ରୈଵ ଗୋପ୍ୟଃ ।
ଵିଗଲିତଗୃହକୃତ୍ୟା ଵିସ୍ମୃତାପତ୍ୟଭୃତ୍ୟା
ମୁରହର ମୁହୁରତ୍ୟଂତାକୁଲା ନିତ୍ୟମାସନ୍ ॥7॥

ପ୍ରତିନଵନଵନୀତଂ ଗୋପିକାଦତ୍ତମିଚ୍ଛନ୍
କଲପଦମୁପଗାୟନ୍ କୋମଲଂ କ୍ଵାପି ନୃତ୍ୟନ୍ ।
ସଦୟୟୁଵତିଲୋକୈରର୍ପିତଂ ସର୍ପିରଶ୍ନନ୍
କ୍ଵଚନ ନଵଵିପକ୍ଵଂ ଦୁଗ୍ଧମପ୍ୟାପିବସ୍ତ୍ଵମ୍ ॥8॥

ମମ ଖଲୁ ବଲିଗେହେ ୟାଚନଂ ଜାତମାସ୍ତା-
ମିହ ପୁନରବଲାନାମଗ୍ରତୋ ନୈଵ କୁର୍ଵେ ।
ଇତି ଵିହିତମତିଃ କିଂ ଦେଵ ସଂତ୍ୟଜ୍ୟ ୟାଚ୍ଞାଂ
ଦଧିଘୃତମହରସ୍ତ୍ଵଂ ଚାରୁଣା ଚୋରଣେନ ॥9॥

ତଵ ଦଧିଘୃତମୋଷେ ଘୋଷୟୋଷାଜନାନା-
ମଭଜତ ହୃଦି ରୋଷୋ ନାଵକାଶଂ ନ ଶୋକଃ ।
ହୃଦୟମପି ମୁଷିତ୍ଵା ହର୍ଷସିଂଧୌ ନ୍ୟଧାସ୍ତ୍ଵଂ
ସ ମମ ଶମୟ ରୋଗାନ୍ ଵାତଗେହାଧିନାଥ ॥10॥

ଶାଖାଗ୍ରେ ଵିଧୁଂ ଵିଲୋକ୍ୟ ଫଲମିତ୍ୟଂବାଂ ଚ ତାତଂ ମୁହୁଃ
ସଂପ୍ରାର୍ଥ୍ୟାଥ ତଦା ତଦୀୟଵଚସା ପ୍ରୋତ୍କ୍ଷିପ୍ତବାହୌ ତ୍ଵୟି।
ଚିତ୍ରଂ ଦେଵ ଶଶୀ ସ ତେ କର୍ମଗାତ୍ କିଂ ବ୍ରୂମହେ ସଂପତଃ
ଜ୍ୟୋତିର୍ମଂଡଲପୂରିତାଖିଲଵପୁଃ ପ୍ରାଗା ଵିରାଡ୍ରୂପତାମ୍ ॥ 11॥

କିଂ କିଂ ବତେଦମିତି ସଂଭ୍ରମ ଭାଜମେନଂ
ବ୍ରହ୍ମାର୍ଣଵେ କ୍ଷଣମମୁଂ ପରିମଜ୍ଜ୍ୟ ତାତମ୍ ।
ମାୟାଂ ପୁନସ୍ତନୟ-ମୋହମୟୀଂ ଵିତନ୍ଵନ୍
ଆନଂଦଚିନ୍ମୟ ଜଗନ୍ମୟ ପାହି ରୋଗାତ୍ ॥12॥

narayaniyam dashaka 45 in odia