નારાયણીયં દશક 45 – શ્રીકૃષ્ણસ્ય બાલલીલાઃ

narayaniyam dashaka 45 in gujarati

અયિ સબલ મુરારે પાણિજાનુપ્રચારૈઃ
કિમપિ ભવનભાગાન્ ભૂષયંતૌ ભવંતૌ ।
ચલિતચરણકંજૌ મંજુમંજીરશિંજા-
શ્રવણકુતુકભાજૌ ચેરતુશ્ચારુવેગાત્ ॥1॥

મૃદુ મૃદુ વિહસંતાવુન્મિષદ્દંતવંતૌ
વદનપતિતકેશૌ દૃશ્યપાદાબ્જદેશૌ ।
ભુજગલિતકરાંતવ્યાલગત્કંકણાંકૌ
મતિમહરતમુચ્ચૈઃ પશ્યતાં વિશ્વનૃણામ્ ॥2॥

અનુસરતિ જનૌઘે કૌતુકવ્યાકુલાક્ષે
કિમપિ કૃતનિનાદં વ્યાહસંતૌ દ્રવંતૌ ।
વલિતવદનપદ્મં પૃષ્ઠતો દત્તદૃષ્ટી
કિમિવ ન વિદધાથે કૌતુકં વાસુદેવ ॥3॥

દ્રુતગતિષુ પતંતાવુત્થિતૌ લિપ્તપંકૌ
દિવિ મુનિભિરપંકૈઃ સસ્મિતં વંદ્યમાનૌ ।
દ્રુતમથ જનનીભ્યાં સાનુકંપં ગૃહીતૌ
મુહુરપિ પરિરબ્ધૌ દ્રાગ્યુવાં ચુંબિતૌ ચ ॥4॥

સ્નુતકુચભરમંકે ધારયંતી ભવંતં
તરલમતિ યશોદા સ્તન્યદા ધન્યધન્યા ।
કપટપશુપ મધ્યે મુગ્ધહાસાંકુરં તે
દશનમુકુલહૃદ્યં વીક્ષ્ય વક્ત્રં જહર્ષ ॥5॥

તદનુચરણચારી દારકૈસ્સાકમારા-
ન્નિલયતતિષુ ખેલન્ બાલચાપલ્યશાલી ।
ભવનશુકવિડાલાન્ વત્સકાંશ્ચાનુધાવન્
કથમપિ કૃતહાસૈર્ગોપકૈર્વારિતોઽભૂઃ ॥6॥

હલધરસહિતસ્ત્વં યત્ર યત્રોપયાતો
વિવશપતિતનેત્રાસ્તત્ર તત્રૈવ ગોપ્યઃ ।
વિગલિતગૃહકૃત્યા વિસ્મૃતાપત્યભૃત્યા
મુરહર મુહુરત્યંતાકુલા નિત્યમાસન્ ॥7॥

પ્રતિનવનવનીતં ગોપિકાદત્તમિચ્છન્
કલપદમુપગાયન્ કોમલં ક્વાપિ નૃત્યન્ ।
સદયયુવતિલોકૈરર્પિતં સર્પિરશ્નન્
ક્વચન નવવિપક્વં દુગ્ધમપ્યાપિબસ્ત્વમ્ ॥8॥

મમ ખલુ બલિગેહે યાચનં જાતમાસ્તા-
મિહ પુનરબલાનામગ્રતો નૈવ કુર્વે ।
ઇતિ વિહિતમતિઃ કિં દેવ સંત્યજ્ય યાચ્ઞાં
દધિઘૃતમહરસ્ત્વં ચારુણા ચોરણેન ॥9॥

તવ દધિઘૃતમોષે ઘોષયોષાજનાના-
મભજત હૃદિ રોષો નાવકાશં ન શોકઃ ।
હૃદયમપિ મુષિત્વા હર્ષસિંધૌ ન્યધાસ્ત્વં
સ મમ શમય રોગાન્ વાતગેહાધિનાથ ॥10॥

શાખાગ્રે વિધું વિલોક્ય ફલમિત્યંબાં ચ તાતં મુહુઃ
સંપ્રાર્થ્યાથ તદા તદીયવચસા પ્રોત્ક્ષિપ્તબાહૌ ત્વયિ।
ચિત્રં દેવ શશી સ તે કર્મગાત્ કિં બ્રૂમહે સંપતઃ
જ્યોતિર્મંડલપૂરિતાખિલવપુઃ પ્રાગા વિરાડ્રૂપતામ્ ॥ 11॥

કિં કિં બતેદમિતિ સંભ્રમ ભાજમેનં
બ્રહ્માર્ણવે ક્ષણમમું પરિમજ્જ્ય તાતમ્ ।
માયાં પુનસ્તનય-મોહમયીં વિતન્વન્
આનંદચિન્મય જગન્મય પાહિ રોગાત્ ॥12॥

narayaniyam dashaka 45 in gujarati