নারাযণীযং দশক 45 – শ্রীকৃষ্ণস্য বাললীলাঃ

narayaniyam dashaka 45 in assamese

অযি সবল মুরারে পাণিজানুপ্রচারৈঃ
কিমপি ভবনভাগান্ ভূষযংতৌ ভবংতৌ ।
চলিতচরণকংজৌ মংজুমংজীরশিংজা-
শ্রবণকুতুকভাজৌ চেরতুশ্চারুবেগাত্ ॥1॥

মৃদু মৃদু বিহসংতাবুন্মিষদ্দংতবংতৌ
বদনপতিতকেশৌ দৃশ্যপাদাব্জদেশৌ ।
ভুজগলিতকরাংতব্যালগত্কংকণাংকৌ
মতিমহরতমুচ্চৈঃ পশ্যতাং বিশ্বনৃণাম্ ॥2॥

অনুসরতি জনৌঘে কৌতুকব্যাকুলাক্ষে
কিমপি কৃতনিনাদং ব্যাহসংতৌ দ্রবংতৌ ।
বলিতবদনপদ্মং পৃষ্ঠতো দত্তদৃষ্টী
কিমিব ন বিদধাথে কৌতুকং বাসুদেব ॥3॥

দ্রুতগতিষু পতংতাবুত্থিতৌ লিপ্তপংকৌ
দিবি মুনিভিরপংকৈঃ সস্মিতং বংদ্যমানৌ ।
দ্রুতমথ জননীভ্যাং সানুকংপং গৃহীতৌ
মুহুরপি পরিরব্ধৌ দ্রাগ্যুবাং চুংবিতৌ চ ॥4॥

স্নুতকুচভরমংকে ধারযংতী ভবংতং
তরলমতি যশোদা স্তন্যদা ধন্যধন্যা ।
কপটপশুপ মধ্যে মুগ্ধহাসাংকুরং তে
দশনমুকুলহৃদ্যং বীক্ষ্য বক্ত্রং জহর্ষ ॥5॥

তদনুচরণচারী দারকৈস্সাকমারা-
ন্নিলযততিষু খেলন্ বালচাপল্যশালী ।
ভবনশুকবিডালান্ বত্সকাংশ্চানুধাবন্
কথমপি কৃতহাসৈর্গোপকৈর্বারিতোঽভূঃ ॥6॥

হলধরসহিতস্ত্বং যত্র যত্রোপযাতো
বিবশপতিতনেত্রাস্তত্র তত্রৈব গোপ্যঃ ।
বিগলিতগৃহকৃত্যা বিস্মৃতাপত্যভৃত্যা
মুরহর মুহুরত্যংতাকুলা নিত্যমাসন্ ॥7॥

প্রতিনবনবনীতং গোপিকাদত্তমিচ্ছন্
কলপদমুপগাযন্ কোমলং ক্বাপি নৃত্যন্ ।
সদযযুবতিলোকৈরর্পিতং সর্পিরশ্নন্
ক্বচন নববিপক্বং দুগ্ধমপ্যাপিবস্ত্বম্ ॥8॥

মম খলু বলিগেহে যাচনং জাতমাস্তা-
মিহ পুনরবলানামগ্রতো নৈব কুর্বে ।
ইতি বিহিতমতিঃ কিং দেব সংত্যজ্য যাচ্ঞাং
দধিঘৃতমহরস্ত্বং চারুণা চোরণেন ॥9॥

তব দধিঘৃতমোষে ঘোষযোষাজনানা-
মভজত হৃদি রোষো নাবকাশং ন শোকঃ ।
হৃদযমপি মুষিত্বা হর্ষসিংধৌ ন্যধাস্ত্বং
স মম শময রোগান্ বাতগেহাধিনাথ ॥10॥

শাখাগ্রে বিধুং বিলোক্য ফলমিত্যংবাং চ তাতং মুহুঃ
সংপ্রার্থ্যাথ তদা তদীযবচসা প্রোত্ক্ষিপ্তবাহৌ ত্বযি।
চিত্রং দেব শশী স তে কর্মগাত্ কিং ব্রূমহে সংপতঃ
জ্যোতির্মংডলপূরিতাখিলবপুঃ প্রাগা বিরাড্রূপতাম্ ॥ 11॥

কিং কিং বতেদমিতি সংভ্রম ভাজমেনং
ব্রহ্মার্ণবে ক্ষণমমুং পরিমজ্জ্য তাতম্ ।
মাযাং পুনস্তনয-মোহমযীং বিতন্বন্
আনংদচিন্ময জগন্ময পাহি রোগাত্ ॥12॥

narayaniyam dashaka 45 in assamese