ନାରାୟଣୀୟଂ ଦଶକ 22 – ଅଜାମିଲୋପାଖ୍ୟାନମ୍

narayaniyam dashaka 22 in odia

ଅଜାମିଲୋ ନାମ ମହୀସୁରଃ ପୁରା
ଚରନ୍ ଵିଭୋ ଧର୍ମପଥାନ୍ ଗୃହାଶ୍ରମୀ ।
ଗୁରୋର୍ଗିରା କାନନମେତ୍ୟ ଦୃଷ୍ଟଵାନ୍
ସୁଧୃଷ୍ଟଶୀଲାଂ କୁଲଟାଂ ମଦାକୁଲାମ୍ ॥1॥

ସ୍ଵତଃ ପ୍ରଶାଂତୋଽପି ତଦାହୃତାଶୟଃ
ସ୍ଵଧର୍ମମୁତ୍ସୃଜ୍ୟ ତୟା ସମାରମନ୍ ।
ଅଧର୍ମକାରୀ ଦଶମୀ ଭଵନ୍ ପୁନ-
ର୍ଦଧୌ ଭଵନ୍ନାମୟୁତେ ସୁତେ ରତିମ୍ ॥2॥

ସ ମୃତ୍ୟୁକାଲେ ୟମରାଜକିଂକରାନ୍
ଭୟଂକରାଂସ୍ତ୍ରୀନଭିଲକ୍ଷୟନ୍ ଭିୟା ।
ପୁରା ମନାକ୍ ତ୍ଵତ୍ସ୍ମୃତିଵାସନାବଲାତ୍
ଜୁହାଵ ନାରାୟଣନାମକଂ ସୁତମ୍ ॥3॥

ଦୁରାଶୟସ୍ୟାପି ତଦାତ୍ଵନିର୍ଗତ-
ତ୍ଵଦୀୟନାମାକ୍ଷରମାତ୍ରଵୈଭଵାତ୍ ।
ପୁରୋଽଭିପେତୁର୍ଭଵଦୀୟପାର୍ଷଦାଃ
ଚତୁର୍ଭୁଜାଃ ପୀତପଟା ମନୋରମାଃ ॥4॥

ଅମୁଂ ଚ ସଂପାଶ୍ୟ ଵିକର୍ଷତୋ ଭଟାନ୍
ଵିମୁଂଚତେତ୍ୟାରୁରୁଧୁର୍ବଲାଦମୀ ।
ନିଵାରିତାସ୍ତେ ଚ ଭଵଜ୍ଜନୈସ୍ତଦା
ତଦୀୟପାପଂ ନିଖିଲଂ ନ୍ୟଵେଦୟନ୍ ॥5॥

ଭଵଂତୁ ପାପାନି କଥଂ ତୁ ନିଷ୍କୃତେ
କୃତେଽପି ଭୋ ଦଂଡନମସ୍ତି ପଂଡିତାଃ ।
ନ ନିଷ୍କୃତିଃ କିଂ ଵିଦିତା ଭଵାଦୃଶା-
ମିତି ପ୍ରଭୋ ତ୍ଵତ୍ପୁରୁଷା ବଭାଷିରେ ॥6॥

ଶ୍ରୁତିସ୍ମୃତିଭ୍ୟାଂ ଵିହିତା ଵ୍ରତାଦୟଃ
ପୁନଂତି ପାପଂ ନ ଲୁନଂତି ଵାସନାମ୍ ।
ଅନଂତସେଵା ତୁ ନିକୃଂତତି ଦ୍ଵୟୀ-
ମିତି ପ୍ରଭୋ ତ୍ଵତ୍ପୁରୁଷା ବଭାଷିରେ ॥7॥

ଅନେନ ଭୋ ଜନ୍ମସହସ୍ରକୋଟିଭିଃ
କୃତେଷୁ ପାପେଷ୍ଵପି ନିଷ୍କୃତିଃ କୃତା ।
ୟଦଗ୍ରହୀନ୍ନାମ ଭୟାକୁଲୋ ହରେ-
ରିତି ପ୍ରଭୋ ତ୍ଵତ୍ପୁରୁଷା ବଭାଷିରେ ॥8॥

ନୃଣାମବୁଦ୍ଧ୍ୟାପି ମୁକୁଂଦକୀର୍ତନଂ
ଦହତ୍ୟଘୌଘାନ୍ ମହିମାସ୍ୟ ତାଦୃଶଃ ।
ୟଥାଗ୍ନିରେଧାଂସି ୟଥୌଷଧଂ ଗଦା –
ନିତି ପ୍ରଭୋ ତ୍ଵତ୍ପୁରୁଷା ବଭାଷିରେ ॥9॥

ଇତୀରିତୈର୍ୟାମ୍ୟଭଟୈରପାସୃତେ
ଭଵଦ୍ଭଟାନାଂ ଚ ଗଣେ ତିରୋହିତେ ।
ଭଵତ୍ସ୍ମୃତିଂ କଂଚନ କାଲମାଚରନ୍
ଭଵତ୍ପଦଂ ପ୍ରାପି ଭଵଦ୍ଭଟୈରସୌ ॥10॥

ସ୍ଵକିଂକରାଵେଦନଶଂକିତୋ ୟମ-
ସ୍ତ୍ଵଦଂଘ୍ରିଭକ୍ତେଷୁ ନ ଗମ୍ୟତାମିତି ।
ସ୍ଵକୀୟଭୃତ୍ୟାନଶିଶିକ୍ଷଦୁଚ୍ଚକୈଃ
ସ ଦେଵ ଵାତାଲୟନାଥ ପାହି ମାମ୍ ॥11॥

narayaniyam dashaka 22 in odia