ગાયત્ર્યષ્ટકં (ગયત્રી અષ્ટકં)

gayatryashtakam gayatri ashtakam in gujarati

વિશ્વામિત્રતપઃફલાં પ્રિયતરાં વિપ્રાલિસંસેવિતાં
નિત્યાનિત્યવિવેકદાં સ્મિતમુખીં ખંડેંદુભૂષોજ્જ્વલામ્ ।
તાંબૂલારુણભાસમાનવદનાં માર્તાંડમધ્યસ્થિતાં
ગાયત્રીં હરિવલ્લભાં ત્રિણયનાં ધ્યાયામિ પંચાનનામ્ ॥ 1 ॥

જાતીપંકજકેતકીકુવલયૈઃ સંપૂજિતાંઘ્રિદ્વયાં
તત્ત્વાર્થાત્મિકવર્ણપંક્તિસહિતાં તત્ત્વાર્થબુદ્ધિપ્રદામ્ ।
પ્રાણાયામપરાયણૈર્બુધજનૈઃ સંસેવ્યમાનાં શિવાં
ગાયત્રીં હરિવલ્લભાં ત્રિણયનાં ધ્યાયામિ પંચાનનામ્ ॥ 2 ॥

મંજીરધ્વનિભિઃ સમસ્તજગતાં મંજુત્વસંવર્ધનીં
વિપ્રપ્રેંખિતવારિવારિતમહારક્ષોગણાં મૃણ્મયીમ્ ।
જપ્તુઃ પાપહરાં જપાસુમનિભાં હંસેન સંશોભિતાં
ગાયત્રીં હરિવલ્લભાં ત્રિણયનાં ધ્યાયામિ પંચાનનામ્ ॥ 3 ॥

કાંચીચેલવિભૂષિતાં શિવમયીં માલાર્ધમાલાદિકા-
-ન્બિભ્રાણાં પરમેશ્વરીં શરણદાં મોહાંધબુદ્ધિચ્છિદામ્ ।
ભૂરાદિત્રિપુરાં ત્રિલોકજનનીમધ્યાત્મશાખાનુતાં
ગાયત્રીં હરિવલ્લભાં ત્રિણયનાં ધ્યાયામિ પંચાનનામ્ ॥ 4 ॥

ધ્યાતુર્ગર્ભકૃશાનુતાપહરણાં સામાત્મિકાં સામગાં
સાયંકાલસુસેવિતાં સ્વરમયીં દૂર્વાદલશ્યામલામ્ ।
માતુર્દાસ્યવિલોચનૈકમતિમત્ખેટીંદ્રસંરાજિતાં
ગાયત્રીં હરિવલ્લભાં ત્રિણયનાં ધ્યાયામિ પંચાનનામ્ ॥ 5 ॥

સંધ્યારાગવિચિત્રવસ્ત્રવિલસદ્વિપ્રોત્તમૈઃ સેવિતાં
તારાહારસુમાલિકાં સુવિલસદ્રત્નેંદુકુંભાંતરામ્ ।
રાકાચંદ્રમુખીં રમાપતિનુતાં શંખાદિભાસ્વત્કરાં
ગાયત્રીં હરિવલ્લભાં ત્રિણયનાં ધ્યાયામિ પંચાનનામ્ ॥ 6 ॥

વેણીભૂષિતમાલકધ્વનિકરૈર્ભૃંગૈઃ સદા શોભિતાં
તત્ત્વજ્ઞાનરસાયનજ્ઞરસનાસૌધભ્રમદ્ભ્રામરીમ્ ।
નાસાલંકૃતમૌક્તિકેંદુકિરણૈઃ સાયંતમશ્છેદિનીં
ગાયત્રીં હરિવલ્લભાં ત્રિણયનાં ધ્યાયામિ પંચાનનામ્ ॥ 7 ॥

પાદાબ્જાંતરરેણુકુંકુમલસત્ફાલદ્યુરામાવૃતાં
રંભાનાટ્યવિલોકનૈકરસિકાં વેદાંતબુદ્ધિપ્રદામ્ ।
વીણાવેણુમૃદંગકાહલરવાન્ દેવૈઃ કૃતાંછૃણ્વતીં
ગાયત્રીં હરિવલ્લભાં ત્રિણયનાં ધ્યાયામિ પંચાનનામ્ ॥ 8 ॥

હત્યાપાનસુવર્ણતસ્કરમહાગુર્વંગનાસંગમા-
-ંદોષાંછૈલસમાન્ પુરંદરસમાઃ સંચ્છિદ્ય સૂર્યોપમાઃ ।
ગાયત્રીં શ્રુતિમાતુરેકમનસા સંધ્યાસુ યે ભૂસુરા
જપ્ત્વા યાંતિ પરાં ગતિં મનુમિમં દેવ્યાઃ પરં વૈદિકાઃ ॥ 9 ॥

ઇતિ શ્રીમચ્છંકરાચાર્ય વિરચિતં શ્રી ગાયત્ર્યષ્ટકમ્ ।

gayatryashtakam gayatri ashtakam in gujarati