ભવાની ભુજંગ પ્રયાત સ્તોત્રં

bhavani bhujanga prayata stotram in gujarati

ષડાધારપંકેરુહાંતર્વિરાજ-
-ત્સુષુમ્નાંતરાલેઽતિતેજોલ્લસંતીમ્ ।
સુધામંડલં દ્રાવયંતીં પિબંતીં
સુધામૂર્તિમીડે ચિદાનંદરૂપામ્ ॥ 1 ॥

જ્વલત્કોટિબાલાર્કભાસારુણાંગીં
સુલાવણ્યશૃંગારશોભાભિરામામ્ ।
મહાપદ્મકિંજલ્કમધ્યે વિરાજ-
-ત્ત્રિકોણે નિષણ્ણાં ભજે શ્રીભવાનીમ્ ॥ 2 ॥

ક્વણત્કિંકિણીનૂપુરોદ્ભાસિરત્ન-
-પ્રભાલીઢલાક્ષાર્દ્રપાદાબ્જયુગ્મમ્ ।
અજેશાચ્યુતાદ્યૈઃ સુરૈઃ સેવ્યમાનં
મહાદેવિ મન્મૂર્ધ્નિ તે ભાવયામિ ॥ 3 ॥

સુશોણાંબરાબદ્ધનીવીવિરાજ-
-ન્મહારત્નકાંચીકલાપં નિતંબમ્ ।
સ્ફુરદ્દક્ષિણાવર્તનાભિં ચ તિસ્રો
વલીરંબ તે રોમરાજિં ભજેઽહમ્ ॥ 4 ॥

લસદ્વૃત્તમુત્તુંગમાણિક્યકુંભો-
-પમશ્રિ સ્તનદ્વંદ્વમંબાંબુજાક્ષિ ।
ભજે દુગ્ધપૂર્ણાભિરામં તવેદં
મહાહારદીપ્તં સદા પ્રસ્નુતાસ્યમ્ ॥ 5 ॥

શિરીષપ્રસૂનોલ્લસદ્બાહુદંડૈ-
-ર્જ્વલદ્બાણકોદંડપાશાંકુશૈશ્ચ ।
ચલત્કંકણોદારકેયૂરભૂષો-
-જ્જ્વલદ્ભિર્લસંતીં ભજે શ્રીભવાનીમ્ ॥ 6 ॥

શરત્પૂર્ણચંદ્રપ્રભાપૂર્ણબિંબા-
-ધરસ્મેરવક્ત્રારવિંદાં સુશાંતામ્ ।
સુરત્નાવળીહારતાટંકશોભાં
મહાસુપ્રસન્નાં ભજે શ્રીભવાનીમ્ ॥ 7 ॥

સુનાસાપુટં સુંદરભ્રૂલલાટં
તવૌષ્ઠશ્રિયં દાનદક્ષં કટાક્ષમ્ ।
લલાટે લસદ્ગંધકસ્તૂરિભૂષં
સ્ફુરચ્છ્રીમુખાંભોજમીડેઽહમંબ ॥ 8 ॥

ચલત્કુંતલાંતર્ભ્રમદ્ભૃંગબૃંદં
ઘનસ્નિગ્ધધમ્મિલ્લભૂષોજ્જ્વલં તે ।
સ્ફુરન્મૌળિમાણિક્યબદ્ધેંદુરેખા-
-વિલાસોલ્લસદ્દિવ્યમૂર્ધાનમીડે ॥ 9 ॥

ઇતિ શ્રીભવાનિ સ્વરૂપં તવેદં
પ્રપંચાત્પરં ચાતિસૂક્ષ્મં પ્રસન્નમ્ ।
સ્ફુરત્વંબ ડિંભસ્ય મે હૃત્સરોજે
સદા વાઙ્મયં સર્વતેજોમયં ચ ॥ 10 ॥

ગણેશાભિમુખ્યાખિલૈઃ શક્તિબૃંદૈ-
-ર્વૃતાં વૈ સ્ફુરચ્ચક્રરાજોલ્લસંતીમ્ ।
પરાં રાજરાજેશ્વરિ ત્રૈપુરિ ત્વાં
શિવાંકોપરિસ્થાં શિવાં ભાવયામિ ॥ 11 ॥

ત્વમર્કસ્ત્વમિંદુસ્ત્વમગ્નિસ્ત્વમાપ-
-સ્ત્વમાકાશભૂવાયવસ્ત્વં મહત્ત્વમ્ ।
ત્વદન્યો ન કશ્ચિત્ પ્રપંચોઽસ્તિ સર્વં
સદાનંદસંવિત્સ્વરૂપં ભજેઽહમ્ ॥ 12 ॥

શ્રુતીનામગમ્યે સુવેદાગમજ્ઞા
મહિમ્નો ન જાનંતિ પારં તવાંબ ।
સ્તુતિં કર્તુમિચ્છામિ તે ત્વં ભવાનિ
ક્ષમસ્વેદમત્ર પ્રમુગ્ધઃ કિલાહમ્ ॥ 13 ॥

ગુરુસ્ત્વં શિવસ્ત્વં ચ શક્તિસ્ત્વમેવ
ત્વમેવાસિ માતા પિતા ચ ત્વમેવ ।
ત્વમેવાસિ વિદ્યા ત્વમેવાસિ બંધુ-
-ર્ગતિર્મે મતિર્દેવિ સર્વં ત્વમેવ ॥ 14 ॥

શરણ્યે વરેણ્યે સુકારુણ્યમૂર્તે
હિરણ્યોદરાદ્યૈરગણ્યે સુપુણ્યે ।
ભવારણ્યભીતેશ્ચ માં પાહિ ભદ્રે
નમસ્તે નમસ્તે નમસ્તે ભવાનિ ॥ 15 ॥

ઇતીમાં મહચ્છ્રીભવાનીભુજંગં
સ્તુતિં યઃ પઠેદ્ભક્તિયુક્તશ્ચ તસ્મૈ ।
સ્વકીયં પદં શાશ્વતં વેદસારં
શ્રિયં ચાષ્ટસિદ્ધિં ભવાની દદાતિ ॥ 16 ॥

ભવાની ભવાની ભવાની ત્રિવારં
ઉદારં મુદા સર્વદા યે જપંતિ ।
ન શોકં ન મોહં ન પાપં ન ભીતિઃ
કદાચિત્કથંચિત્કુતશ્ચિજ્જનાનામ્ ॥ 17 ॥

॥ ઇતિ શ્રીમચ્છંકરાચાર્યવિરચિતા ભવાની ભુજંગં સંપૂર્ણમ્ ॥

bhavani bhujanga prayata stotram in gujarati