శ్రీ షణ్ముఖ షట్కం

sri shanmukha shatkam in telugu

గిరితనయాసుత గాంగపయోదిత గంధసువాసిత బాలతనో
గుణగణభూషణ కోమలభాషణ క్రౌంచవిదారణ కుందతనో ।
గజముఖసోదర దుర్జయదానవసంఘవినాశక దివ్యతనో
జయ జయ హే గుహ షణ్ముఖ సుందర దేహి రతిం తవ పాదయుగే ॥ 1 ॥

ప్రతిగిరిసంస్థిత భక్తహృదిస్థిత పుత్రధనప్రద రమ్యతనో
భవభయమోచక భాగ్యవిధాయక భూసుతవార సుపూజ్యతనో ।
బహుభుజశోభిత బంధవిమోచక బోధఫలప్రద బోధతనో
జయ జయ హే గుహ షణ్ముఖ సుందర దేహి రతిం తవ పాదయుగే ॥ 2 ॥

శమధనమానిత మౌనిహృదాలయ మోక్షకృదాలయ ముగ్ధతనో
శతమఖపాలక శంకరతోషక శంఖసువాదక శక్తితనో ।
దశశతమన్మథ సన్నిభసుందర కుండలమండిత కర్ణవిభో
జయ జయ హే గుహ షణ్ముఖ సుందర దేహి రతిం తవ పాదయుగే ॥ 3 ॥

గుహ తరుణారుణచేలపరిష్కృత తారకమారక మారతనో
జలనిధితీరసుశోభివరాలయ శంకరసన్నుత దేవగురో ।
విహితమహాధ్వరసామనిమంత్రిత సౌమ్యహృదంతర సోమతనో
జయ జయ హే గుహ షణ్ముఖ సుందర దేహి రతిం తవ పాదయుగే ॥ 4 ॥

లవలికయా సహ కేలికలాపర దేవసుతార్పిత మాల్యతనో
గురుపదసంస్థిత శంకరదర్శిత తత్త్వమయప్రణవార్థవిభో ।
విధిహరిపూజిత బ్రహ్మసుతార్పిత భాగ్యసుపూరక యోగితనో
జయ జయ హే గుహ షణ్ముఖ సుందర దేహి రతిం తవ పాదయుగే ॥ 5 ॥

కలిజనపాలన కంజసులోచన కుక్కుటకేతన కేలితనో
కృతబలిపాలన బర్హిణవాహన ఫాలవిలోచనశంభుతనో ।
శరవణసంభవ శత్రునిబర్హణ చంద్రసమానన శర్మతనో
జయ జయ హే గుహ షణ్ముఖ సుందర దేహి రతిం తవ పాదయుగే ॥ 6 ॥

సుఖదమనంతపదాన్విత రామసుదీక్షిత సత్కవిపద్యమిదం
శరవణ సంభవ తోషదమిష్టదమష్టసుసిద్ధిదమార్తిహరమ్ ।
పఠతి శృణోతి చ భక్తియుతో యది భాగ్యసమృద్ధిమథో లభతే
జయ జయ హే గుహ షణ్ముఖ సుందర దేహి రతిం తవ పాదయుగే ॥ 7 ॥

ఇతి శ్రీఅనంతరామదీక్షిత కృతం షణ్ముఖ షట్కమ్ ॥

sri shanmukha shatkam in telugu