అపరాధ క్షమాపణ స్తోత్రం

aparadha kshamapana stotram devi in telugu

అపరాధసహస్రాణి క్రియంతేఽహర్నిశం మయా ।
దాసోఽయమితి మాం మత్వా క్షమస్వ పరమేశ్వరి ॥ 1 ॥

ఆవాహనం న జానామి న జానామి విసర్జనమ్ ।
పూజాం చైవ న జానామి క్షమ్యతాం పరమేశ్వరి ॥ 2 ॥

మంత్రహీనం క్రియాహీనం భక్తిహీనం సురేశ్వరి ।
యత్పూజితం మయా దేవి పరిపూర్ణం తదస్తు మే ॥ 3 ॥

అపరాధశతం కృత్వా జగదంబేతి చోచ్చరేత్ ।
యాం గతిం సమవాప్నోతి న తాం బ్రహ్మాదయః సురాః ॥ 4 ॥

సాపరాధోఽస్మి శరణం ప్రాప్తస్త్వాం జగదంబికే ।
ఇదానీమనుకంప్యోఽహం యథేచ్ఛసి తథా కురు ॥ 5 ॥

అజ్ఞానాద్విస్మృతేర్భ్రాంత్యా యన్న్యూనమధికం కృతమ్ ।
విపరీతం చ తత్సర్వం క్షమస్వ పరమేశ్వరి ॥ 6 ॥

కామేశ్వరి జగన్మాతః సచ్చిదానందవిగ్రహే ।
గృహాణార్చామిమాం ప్రీత్యా ప్రసీద పరమేశ్వరి ॥ 7 ॥

యదక్షరపదభ్రష్టం మాత్రాహీనం చ యద్భవేత్ ।
తత్సర్వం క్షమ్యతాం దేవి ప్రసీద పరమేశ్వరి ॥ 8 ॥

గుహ్యాతిగుహ్యగోప్త్రీ త్వం గృహాణాస్మత్కృతం జపమ్ ।
సిద్ధిర్భవతు మే దేవి త్వత్ప్రసాదాన్మహేశ్వరి ॥ 9 ॥

సర్వరూపమయీ దేవీ సర్వం దేవీమయం జగత్ ।
అతోఽహం విశ్వరూపాం త్వాం నమామి పరమేశ్వరీమ్ ॥ 10 ॥

ఇతి అపరాధక్షమాపణస్తోత్రం సమాప్తమ్ ॥

aparadha kshamapana stotram devi in telugu