Sri Bagalamukhi Hrudayam

asya śrībagalāmukhī hṛdayastotrasya nārada ṛṣiḥ anuṣṭup chandaḥ śrībagalāmukhī devatā hlīṃ bījaṃ klīṃ śaktiḥ aiṃ kīlakaṃ śrībagalāmukhī prasādasiddhyarthe jape viniyogaḥ ||

ṛṣyādinyāsaḥ –
oṃ nāradaṛṣaye namaḥ śirasi |
oṃ anuṣṭup chandase namaḥ mukhe |
oṃ śrībagalāmukhī devatāyai namaḥ hṛdaye |
oṃ hlīṃ bījāya namaḥ guhye |
oṃ klīṃ śaktaye namaḥ pādayoḥ |
oṃ aiṃ kīlakāya namaḥ sarvāṅge |

karanyāsaḥ –
oṃ hlīṃ aṅguṣṭhābhyāṃ namaḥ |
oṃ klīṃ tarjanībhyāṃ namaḥ |
oṃ aiṃ madhyamābhyāṃ namaḥ |
oṃ hlīṃ anāmikābhyāṃ namaḥ |
oṃ klīṃ kaniṣṭhikābhyāṃ namaḥ |
oṃ aiṃ karatalakarapṛṣṭhābhyāṃ namaḥ |

aṅganyāsaḥ –
oṃ hlīṃ hṛdayāya namaḥ |
oṃ klīṃ śirase svāhā |
oṃ aiṃ śikhāyai vaṣaṭ |
oṃ hlīṃ kavacāya hum |
oṃ klīṃ netratrayāya vauṣaṭ |
oṃ aiṃ astrāya phaṭ |
oṃ hlīṃ klīṃ aiṃ iti digbandhaḥ ||

dhyānam –
pītāmbarāṃ pītamālyāṃ pītābharaṇabhūṣitām |
pītakañjapadadvandvāṃ bagalāṃ cintaye’niśam ||

(iti dhyātvā sampūjya ca)

prārthanā –
pītaśaṅkhagadāhaste pītacandanacarcite |
bagale me varaṃ dehi śatrusaṅghavidāriṇi ||

(iti samprārthya)

manuḥ –
oṃ hlīṃ klīṃ aiṃ bagalāmukhyai gadādhāriṇyai pretāsanādhyāsinyai svāhā ||

(iti mantraṃ japitvā punaḥ pūrvavaddhṛdayādi ṣaḍaṅganyāsaṃ kṛtvā stotraṃ paṭhet tadyathā)

karanyāsaḥ –
oṃ hlīṃ aṅguṣṭhābhyāṃ namaḥ |
oṃ klīṃ tarjanībhyāṃ namaḥ |
oṃ aiṃ madhyamābhyāṃ namaḥ |
oṃ hlīṃ anāmikābhyāṃ namaḥ |
oṃ klīṃ kaniṣṭhikābhyāṃ namaḥ |
oṃ aiṃ karatalakarapṛṣṭhābhyāṃ namaḥ |

aṅganyāsaḥ –
oṃ hlīṃ hṛdayāya namaḥ |
oṃ klīṃ śirase svāhā |
oṃ aiṃ śikhāyai vaṣaṭ |
oṃ hlīṃ kavacāya hum |
oṃ klīṃ netratrayāya vauṣaṭ |
oṃ aiṃ astrāya phaṭ |
oṃ hlīṃ klīṃ aiṃ iti digvimokaḥ ||

hṛdayastotram –
vande’haṃ bagalāṃ devīṃ pītabhūṣaṇabhūṣitām |
tejorūpamayīṃ devīṃ pītatejaḥsvarūpiṇīm || 1 ||

gadābhramaṇabhinnābhrāṃ bhrukuṭībhīṣaṇānanām |
bhīṣayantīṃ bhīmaśatrūn bhaje bhavyasya bhaktidām || 2 ||

pūrṇacandrasamānāsyāṃ pītagandhānulepanām |
pītāmbaraparīdhānāṃ pavitrāmāśrayāmyaham || 3 ||

pālayantīmanupalaṃ prasamīkṣyā’vanītale |
pītācāraratāṃ bhaktāstāṃ bhavānīṃ bhajāmyaham || 4 ||

pītapadmapadadvandvāṃ campakāraṇyavāsinīm |
pītāvataṃsāṃ paramāṃ vande padmajavanditām || 5 ||

lasaccārusiñjatsumañjīrapādāṃ
calatsvarṇakarṇāvataṃsāñcitāsyām |
valatpītacandrānanāṃ candravandyāṃ
bhaje padmajādīḍyasatpādapadmām || 6 ||

supītābhayāmālayā pūtamantraṃ
paraṃ te japanto jayaṃ sallabhante |
raṇe rāgaroṣāplutānāṃ ripūṇāṃ
vivāde balādvairakṛdghātamātaḥ || 7 ||

bharatpītabhāsvatprabhāhaskarābhāṃ
gadāgañjitāmitragarvāṃ gariṣṭhām |
garīyo guṇāgāragātrāṃ guṇāḍhyāṃ
gaṇeśādigamyāṃ śraye nirguṇāḍhyām || 8 ||

janā ye japantyugrabījaṃ jagatsu
paraṃ pratyahaṃ te smarantaḥ svarūpam |
bhavedvādināṃ vāṅmukhastambha ādye
jayo jāyate jalpatāmāśu teṣām || 9 ||

tava dhyānaniṣṭhāpratiṣṭhātmaprajñā-
-vatāṃ pādapadmārcane premayuktāḥ |
prasannā nṛpāḥ prākṛtāḥ paṇḍitā vā
purāṇādikā dāsatulyā bhavanti || 10 ||

namāmaste mātaḥ kanakakamanīyāṅghrijalajaṃ
baladvidyudvarṇāṃ ghanatimiravidhvaṃsakaraṇam |
bhavābdhau magnātmottaraṇakaraṇaṃ sarvaśaraṇaṃ
prapannānāṃ mātarjagati bagale duḥkhadamanam || 11 ||

jvalajjyotsnāratnākaramaṇiviṣaktāṅkabhavanaṃ
smarāmaste dhāma smaraharaharīndrendu pramukhaiḥ |
ahorātraṃ prātaḥ praṇayanavanīyaṃ suviśadaṃ
paraṃ pītākāraṃ paricitamaṇidvīpavasanam || 12 ||

vadāmaste mātaḥ śrutisukhakaraṃ nāma lalitaṃ
lasanmātrāvarṇaṃ jagati bagaleti pracaritam |
calantastiṣṭhanto vayamupaviśanto’pi śayane
bhajāmo yacchreyo divi duravalabhyaṃ diviṣadām || 13 ||

padārcāyāṃ prītiḥ pratidinamapūrvā prabhavatu
yathā te prāsannyaṃ pratiphalamapekṣyaṃ praṇamatām |
analpaṃ tanmātarbhavati bhṛtabhaktyā bhavatu no
diśātaḥ sadbhaktiṃ bhuvi bhagavatāṃ bhūri bhavadām || 14 ||

mama sakalaripūṇāṃ vāṅmukhe stambhayāśu
bhagavati ripujihvāṃ kīlaya prasthatulyām |
vyavasitakhalabuddhiṃ nāśayāśu pragalbhāṃ
mama kuru bahukāryaṃ satkṛpe’mba prasīda || 15 ||

vrajatu mama ripūṇāṃ sadmani pretasaṃsthā
karadhṛtagadayā tān ghātayitvāśu roṣāt |
saghanavasanadhānyaṃ sadma teṣāṃ pradahya
punarapi bagalā svasthānamāyātu śīghram || 16 ||

karadhṛtaripujihvāpīḍanaṃ vyagrahastāṃ
punarapi gadayā tāṃstāḍayantīṃ sutantrām |
praṇatasuragaṇānāṃ pālikāṃ pītavastrāṃ
bahubala bagalāṃ tāṃ pītavastrāṃ namāmaḥ || 17 ||

hṛdayavacanakāyaiḥ kurvatāṃ bhaktipuñjaṃ
prakaṭita karuṇārdrāṃ prīṇati jalpatīti |
dhanamatha bahudhānyaṃ putrapautrādivṛddhiḥ
sakalamapi kimebhyo deyamevaṃ tvavaśyam || 18 ||

tava caraṇasarojaṃ sarvadā sevyamānaṃ
druhiṇahariharādyairdevabṛndaiḥ śaraṇyam |
mṛdulamapi śaraṃ te śarmadaṃ sūrisevyaṃ
vayamiha karavāmo mātaretadvidheyam || 19 ||

bagalāhṛdayastotramidaṃ bhakti samanvitaḥ |
paṭhedyo bagalā tasya prasannā pāṭhato bhavet || 20 ||

pītādhyānaparo bhakto yaḥ śṛṇotyavikalpataḥ |
niṣkalmaṣo bhavenmartyo mṛto mokṣamavāpnuyāt || 21 ||

āśvinasya site pakṣe mahāṣṭamyāṃ divāniśam |
yastvidaṃ paṭhate premṇā bagalā prītimeti saḥ || 22 ||

devyālaye paṭhan martyo bagalāṃ dhyāyatīśvarīm |
pītavastrāvṛto yastu tasya naśyanti śatravaḥ || 23 ||

pītācārarato nityaṃ pītabhūṣāṃ vicintayan |
bagalāyāḥ paṭhennityaṃ hṛdayastotramuttamam || 24 ||

na kiñciddurlabhaṃ tasya dṛśyate jagatītale |
śatravo glānimāyānti tasya darśanamātrataḥ || 25 ||

iti siddheśvaratantre uttarakhaṇḍe śrībagalāpaṭale śrī bagalāmukhī hṛdaya stotram ||