අංබා ස්තවඃ

amba stavam in sinhala

යාමාමනංති මුනයඃ ප්රකෘතිං පුරාණීං
විද්යේති යාං ශ්රුතිරහස්යවිදෝ වදංති ।
තාමර්ධපල්ලවිතශංකරරූපමුද්රාං
දේවීමනන්යශරණඃ ශරණං ප්රපද්යේ ॥ 1 ॥

අංබ ස්තවේෂු තව තාවදකර්තෘකාණි
කුංඨීභවංති වචසාමපි ගුංභනානි ।
ඩිංභස්ය මේ ස්තුතිරසාවසමංජසාපි
වාත්සල්යනිඝ්නහෘදයාං භවතීං ධිනෝතු ॥ 2 ॥

ව්යෝමේති බිංදුරිති නාද ඉතීංදුලේඛා-
-රූපේති වාග්භවතනූරිති මාතෘකේති ।
නිඃස්යංදමානසුඛබෝධසුධාස්වරූපා
විද්යෝතසේ මනසි භාග්යවතාං ජනානාම් ॥ 3 ॥

ආවිර්භවත්පුලකසංතතිභිඃ ශරීරෛ-
-ර්නිඃස්යංදමානසලිලෛර්නයනෛශ්ච නිත්යම් ।
වාග්භිශ්ච ගද්ගදපදාභිරුපාසතේ යේ
පාදෞ තවාංබ භුවනේෂු ත ඒව ධන්යාඃ ॥ 4 ॥

වක්ත්රං යදුද්යතමභිෂ්ටුතයේ භවත්යා-
-ස්තුභ්යං නමෝ යදපි දේවි ශිරඃ කරෝති ।
චේතශ්ච යත්ත්වයි පරායණමංබ තානි
කස්යාපි කෛරපි භවංති තපෝවිශේෂෛඃ ॥ 5 ॥

මූලාලවාලකුහරාදුදිතා භවානි
නිර්භිද්ය ෂට්සරසිජානි තටිල්ලතේව ।
භූයෝऽපි තත්ර විශසි ධ්රුවමංඩලේංදු-
-නිඃස්යංදමානපරමාමෘතතෝයරූපා ॥ 6 ॥

දග්ධං යදා මදනමේකමනේකධා තේ
මුග්ධඃ කටාක්ෂවිධිරංකුරයාංචකාර ।
ධත්තේ තදාප්රභෘති දේවි ලලාටනේත්රං
සත්යං හ්රියෛව මුකුලීකෘතමිංදුමෞලේඃ ॥ 7 ॥

අජ්ඤාතසංභවමනාකලිතාන්වවායං
භික්ෂුං කපාලිනමවාසසමද්විතීයම් ।
පූර්වං කරග්රහණමංගලතෝ භවත්යාඃ
ශංභුං ක ඒව බුබුධේ ගිරිරාජකන්යේ ॥ 8 ॥

චර්මාංබරං ච ශවභස්මවිලේපනං ච
භික්ෂාටනං ච නටනං ච පරේතභූමෞ ।
වේතාලසංහතිපරිග්රහතා ච ශංභෝඃ
ශෝභාං බිභර්ති ගිරිජේ තව සාහචර්යාත් ॥ 9 ॥

කල්පෝපසංහරණකේලිෂු පංඩිතානි
චංඩානි ඛංඩපරශෝරපි තාංඩවානි ।
ආලෝකනේන තව කෝමලිතානි මාත-
-ර්ලාස්යාත්මනා පරිණමංති ජගද්විභූත්යෛ ॥ 10 ॥

ජංතෝරපශ්චිමතනෝඃ සති කර්මසාම්යේ
නිඃශේෂපාශපටලච්ඡිදුරා නිමේෂාත් ।
කල්යාණි දේශිකකටාක්ෂසමාශ්රයේණ
කාරුණ්යතෝ භවති ශාංභවවේදදීක්ෂා ॥ 11 ॥

මුක්තාවිභූෂණවතී නවවිද්රුමාභා
යච්චේතසි ස්ඵුරසි තාරකිතේව සංධ්යා ।
ඒකඃ ස ඒව භුවනත්රයසුංදරීණාං
කංදර්පතාං ව්රජති පංචශරීං විනාපි ॥ 12 ॥

යේ භාවයංත්යමෘතවාහිභිරංශුජාලෛ-
-රාප්යායමානභුවනාමමෘතේශ්වරීං ත්වාම් ।
තේ ලංඝයංති නනු මාතරලංඝනීයාං
බ්රහ්මාදිභිඃ සුරවරෛරපි කාලකක්ෂාම් ॥ 13 ॥

යඃ ස්ඵාටිකාක්ෂගුණපුස්තකකුංඩිකාඪ්යාං
ව්යාඛ්යාසමුද්යතකරාං ශරදිංදුශුභ්රාම් ।
පද්මාසනාං ච හෘදයේ භවතීමුපාස්තේ
මාතඃ ස විශ්වකවිතාර්කිකචක්රවර්තී ॥ 14 ॥

බර්හාවතංසයුතබර්බරකේශපාශාං
ගුංජාවලීකෘතඝනස්තනහාරශෝභාම් ।
ශ්යාමාං ප්රවාලවදනාං සුකුමාරහස්තාං
ත්වාමේව නෞමි ශබරීං ශබරස්ය ජායාම් ॥ 15 ॥

අර්ධේන කිං නවලතාලලිතේන මුග්ධේ
ක්රීතං විභෝඃ පරුෂමර්ධමිදං ත්වයේති ।
ආලීජනස්ය පරිහාසවචාංසි මන්යේ
මංදස්මිතේන තව දේවි ජඩී භවංති ॥ 16 ॥

බ්රහ්මාංඩ බුද්බුදකදංබකසංකුලෝऽයං
මායෝදධිර්විවිධදුඃඛතරංගමාලඃ ।
ආශ්චර්යමංබ ඣටිති ප්රලයං ප්රයාති
ත්වද්ධ්යානසංතතිමහාබඩබාමුඛාග්නෞ ॥ 17 ॥

දාක්ෂායණීති කුටිලේති කුහාරිණීති
කාත්යායනීති කමලේති කලාවතීති ।
ඒකා සතී භගවතී පරමාර්ථතෝऽපි
සංදෘශ්යසේ බහුවිධා නනු නර්තකීව ॥ 18 ॥

ආනංදලක්ෂණමනාහතනාම්නි දේශේ
නාදාත්මනා පරිණතං තව රූපමීශේ ।
ප්රත්යඞ්මුඛේන මනසා පරිචීයමානං
ශංසංති නේත්රසලිලෛඃ පුලකෛශ්ච ධන්යාඃ ॥ 19 ॥

ත්වං චංද්රිකා ශශිනි තිග්මරුචෞ රුචිස්ත්වං
ත්වං චේතනාසි පුරුෂේ පවනේ බලං ත්වම් ।
ත්වං ස්වාදුතාසි සලිලේ ශිඛිනි ත්වමූෂ්මා
නිඃසාරමේව නිඛිලං ත්වදෘතේ යදි ස්යාත් ॥ 20 ॥

ජ්යෝතීංෂි යද්දිවි චරංති යදංතරික්ෂං
සූතේ පයාංසි යදහිර්ධරණීං ච ධත්තේ ।
යද්වාති වායුරනලෝ යදුදර්චිරාස්තේ
තත්සර්වමංබ තව කේවලමාජ්ඤයෛව ॥ 21 ॥

සංකෝචමිච්ඡසි යදා ගිරිජේ තදානීං
වාක්තර්කයෝස්ත්වමසි භූමිරනාමරූපා ।
යද්වා විකාසමුපයාසි යදා තදානීං
ත්වන්නාමරූපගණනාඃ සුකරා භවංති ॥ 22 ॥

භෝගාය දේවි භවතීං කෘතිනඃ ප්රණම්ය
භ්රූකිංකරීකෘතසරෝජගෘහාඃ සහස්රම් ।
චිංතාමණිප්රචයකල්පිතකේලිශෛලේ
කල්පද්රුමෝපවන ඒව චිරං රමංතේ ॥ 23 ॥

හර්තුං ත්වමේව භවසි ත්වදධීනමීශේ
සංසාරතාපමඛිලං දයයා පශූනාම් ।
වෛකර්තනී කිරණසංහතිරේව ශක්තා
ධර්මං නිජං ශමයිතුං නිජයෛව වෘෂ්ට්යා ॥ 24 ॥

ශක්තිඃ ශරීරමධිදෛවතමංතරාත්මා
ජ්ඤානං ක්රියා කරණමාසනජාලමිච්ඡා ।
ඓශ්වර්යමායතනමාවරණානි ච ත්වං
කිං තන්න යද්භවසි දේවි ශශාංකමෞලේඃ ॥ 25 ॥

භූමෞ නිවෘත්තිරුදිතා පයසි ප්රතිෂ්ඨා
විද්යාऽනලේ මරුති ශාංතිරතීවකාංතිඃ ।
ව්යෝම්නීති යාඃ කිල කලාඃ කලයංති විශ්වං
තාසාං හි දූරතරමංබ පදං ත්වදීයම් ॥ 26 ॥

යාවත්පදං පදසරෝජයුගං ත්වදීයං
නාංගීකරෝති හෘදයේෂු ජගච්ඡරණ්යේ ।
තාවද්විකල්පජටිලාඃ කුටිලප්රකාරා-
-ස්තර්කග්රහාඃ සමයිනාං ප්රලයං න යාංති ॥ 27 ॥

නිර්දේවයානපිතෘයානවිහාරමේකේ
කෘත්වා මනඃ කරණමංඩලසාර්වභෞමම් ।
ධ්යානේ නිවේශ්ය තව කාරණපංචකස්ය
පර්වාණි පාර්වති නයංති නිජාසනත්වම් ॥ 28 ॥

ස්ථූලාසු මූර්තිෂු මහීප්රමුඛාසු මූර්තේඃ
කස්යාශ්චනාපි තව වෛභවමංබ යස්යාඃ ।
පත්යා ගිරාමපි න ශක්යත ඒව වක්තුං
සාපි ස්තුතා කිල මයේති තිතික්ෂිතව්යම් ॥ 29 ॥

කාලාග්නිකෝටිරුචිමංබ ෂඩධ්වශුද්ධෞ
ආප්ලාවනේෂු භවතීමමෘතෞඝවෘෂ්ටිම් ।
ශ්යාමාං ඝනස්තනතටාං ශකලීකෘතාඝාං
ධ්යායංත ඒව ජගතාං ගුරවෝ භවංති ॥ 30 ॥

විද්යාං පරාං කතිචිදංබරමංබ කේචි-
-දානංදමේව කතිචිත්කතිචිච්ච මායාම් ।
ත්වාං විශ්වමාහුරපරේ වයමාමනාමඃ
සාක්ෂාදපාරකරුණාං ගුරුමූර්තිමේව ॥ 31 ॥

කුවලයදලනීලං බර්බරස්නිග්ධකේශං
පෘථුතරකුචභාරාක්රාංතකාංතාවලග්නම් ।
කිමිහ බහුභිරුක්තෛස්ත්වත්ස්වරූපං පරං නඃ
සකලජනනි මාතඃ සංතතං සන්නිධත්තාම් ॥ 32 ॥

ඉති ශ්රීකාළිදාස විරචිත පංචස්තව්යාං චතුර්ථඃ අංබාස්තවඃ ।

amba stavam in sinhala