അംബാ സ്തവഃ

amba stavam in malayalam

യാമാമനംതി മുനയഃ പ്രകൃതിം പുരാണീം
വിദ്യേതി യാം ശ്രുതിരഹസ്യവിദോ വദംതി ।
താമര്ധപല്ലവിതശംകരരൂപമുദ്രാം
ദേവീമനന്യശരണഃ ശരണം പ്രപദ്യേ ॥ 1 ॥

അംബ സ്തവേഷു തവ താവദകര്തൃകാണി
കുംഠീഭവംതി വചസാമപി ഗുംഭനാനി ।
ഡിംഭസ്യ മേ സ്തുതിരസാവസമംജസാപി
വാത്സല്യനിഘ്നഹൃദയാം ഭവതീം ധിനോതു ॥ 2 ॥

വ്യോമേതി ബിംദുരിതി നാദ ഇതീംദുലേഖാ-
-രൂപേതി വാഗ്ഭവതനൂരിതി മാതൃകേതി ।
നിഃസ്യംദമാനസുഖബോധസുധാസ്വരൂപാ
വിദ്യോതസേ മനസി ഭാഗ്യവതാം ജനാനാമ് ॥ 3 ॥

ആവിര്ഭവത്പുലകസംതതിഭിഃ ശരീരൈ-
-ര്നിഃസ്യംദമാനസലിലൈര്നയനൈശ്ച നിത്യമ് ।
വാഗ്ഭിശ്ച ഗദ്ഗദപദാഭിരുപാസതേ യേ
പാദൌ തവാംബ ഭുവനേഷു ത ഏവ ധന്യാഃ ॥ 4 ॥

വക്ത്രം യദുദ്യതമഭിഷ്ടുതയേ ഭവത്യാ-
-സ്തുഭ്യം നമോ യദപി ദേവി ശിരഃ കരോതി ।
ചേതശ്ച യത്ത്വയി പരായണമംബ താനി
കസ്യാപി കൈരപി ഭവംതി തപോവിശേഷൈഃ ॥ 5 ॥

മൂലാലവാലകുഹരാദുദിതാ ഭവാനി
നിര്ഭിദ്യ ഷട്സരസിജാനി തടില്ലതേവ ।
ഭൂയോഽപി തത്ര വിശസി ധ്രുവമംഡലേംദു-
-നിഃസ്യംദമാനപരമാമൃതതോയരൂപാ ॥ 6 ॥

ദഗ്ധം യദാ മദനമേകമനേകധാ തേ
മുഗ്ധഃ കടാക്ഷവിധിരംകുരയാംചകാര ।
ധത്തേ തദാപ്രഭൃതി ദേവി ലലാടനേത്രം
സത്യം ഹ്രിയൈവ മുകുലീകൃതമിംദുമൌലേഃ ॥ 7 ॥

അജ്ഞാതസംഭവമനാകലിതാന്വവായം
ഭിക്ഷും കപാലിനമവാസസമദ്വിതീയമ് ।
പൂർവം കരഗ്രഹണമംഗലതോ ഭവത്യാഃ
ശംഭും ക ഏവ ബുബുധേ ഗിരിരാജകന്യേ ॥ 8 ॥

ചര്മാംബരം ച ശവഭസ്മവിലേപനം ച
ഭിക്ഷാടനം ച നടനം ച പരേതഭൂമൌ ।
വേതാലസംഹതിപരിഗ്രഹതാ ച ശംഭോഃ
ശോഭാം ബിഭര്തി ഗിരിജേ തവ സാഹചര്യാത് ॥ 9 ॥

കല്പോപസംഹരണകേലിഷു പംഡിതാനി
ചംഡാനി ഖംഡപരശോരപി താംഡവാനി ।
ആലോകനേന തവ കോമലിതാനി മാത-
-ര്ലാസ്യാത്മനാ പരിണമംതി ജഗദ്വിഭൂത്യൈ ॥ 10 ॥

ജംതോരപശ്ചിമതനോഃ സതി കര്മസാമ്യേ
നിഃശേഷപാശപടലച്ഛിദുരാ നിമേഷാത് ।
കല്യാണി ദേശികകടാക്ഷസമാശ്രയേണ
കാരുണ്യതോ ഭവതി ശാംഭവവേദദീക്ഷാ ॥ 11 ॥

മുക്താവിഭൂഷണവതീ നവവിദ്രുമാഭാ
യച്ചേതസി സ്ഫുരസി താരകിതേവ സംധ്യാ ।
ഏകഃ സ ഏവ ഭുവനത്രയസുംദരീണാം
കംദര്പതാം വ്രജതി പംചശരീം വിനാപി ॥ 12 ॥

യേ ഭാവയംത്യമൃതവാഹിഭിരംശുജാലൈ-
-രാപ്യായമാനഭുവനാമമൃതേശ്വരീം ത്വാമ് ।
തേ ലംഘയംതി നനു മാതരലംഘനീയാം
ബ്രഹ്മാദിഭിഃ സുരവരൈരപി കാലകക്ഷാമ് ॥ 13 ॥

യഃ സ്ഫാടികാക്ഷഗുണപുസ്തകകുംഡികാഢ്യാം
വ്യാഖ്യാസമുദ്യതകരാം ശരദിംദുശുഭ്രാമ് ।
പദ്മാസനാം ച ഹൃദയേ ഭവതീമുപാസ്തേ
മാതഃ സ വിശ്വകവിതാര്കികചക്രവര്തീ ॥ 14 ॥

ബര്ഹാവതംസയുതബര്ബരകേശപാശാം
ഗുംജാവലീകൃതഘനസ്തനഹാരശോഭാമ് ।
ശ്യാമാം പ്രവാലവദനാം സുകുമാരഹസ്താം
ത്വാമേവ നൌമി ശബരീം ശബരസ്യ ജായാമ് ॥ 15 ॥

അര്ധേന കിം നവലതാലലിതേന മുഗ്ധേ
ക്രീതം വിഭോഃ പരുഷമര്ധമിദം ത്വയേതി ।
ആലീജനസ്യ പരിഹാസവചാംസി മന്യേ
മംദസ്മിതേന തവ ദേവി ജഡീ ഭവംതി ॥ 16 ॥

ബ്രഹ്മാംഡ ബുദ്ബുദകദംബകസംകുലോഽയം
മായോദധിർവിവിധദുഃഖതരംഗമാലഃ ।
ആശ്ചര്യമംബ ഝടിതി പ്രലയം പ്രയാതി
ത്വദ്ധ്യാനസംതതിമഹാബഡബാമുഖാഗ്നൌ ॥ 17 ॥

ദാക്ഷായണീതി കുടിലേതി കുഹാരിണീതി
കാത്യായനീതി കമലേതി കലാവതീതി ।
ഏകാ സതീ ഭഗവതീ പരമാര്ഥതോഽപി
സംദൃശ്യസേ ബഹുവിധാ നനു നര്തകീവ ॥ 18 ॥

ആനംദലക്ഷണമനാഹതനാമ്നി ദേശേ
നാദാത്മനാ പരിണതം തവ രൂപമീശേ ।
പ്രത്യങ്മുഖേന മനസാ പരിചീയമാനം
ശംസംതി നേത്രസലിലൈഃ പുലകൈശ്ച ധന്യാഃ ॥ 19 ॥

ത്വം ചംദ്രികാ ശശിനി തിഗ്മരുചൌ രുചിസ്ത്വം
ത്വം ചേതനാസി പുരുഷേ പവനേ ബലം ത്വമ് ।
ത്വം സ്വാദുതാസി സലിലേ ശിഖിനി ത്വമൂഷ്മാ
നിഃസാരമേവ നിഖിലം ത്വദൃതേ യദി സ്യാത് ॥ 20 ॥

ജ്യോതീംഷി യദ്ദിവി ചരംതി യദംതരിക്ഷം
സൂതേ പയാംസി യദഹിര്ധരണീം ച ധത്തേ ।
യദ്വാതി വായുരനലോ യദുദര്ചിരാസ്തേ
തത്സർവമംബ തവ കേവലമാജ്ഞയൈവ ॥ 21 ॥

സംകോചമിച്ഛസി യദാ ഗിരിജേ തദാനീം
വാക്തര്കയോസ്ത്വമസി ഭൂമിരനാമരൂപാ ।
യദ്വാ വികാസമുപയാസി യദാ തദാനീം
ത്വന്നാമരൂപഗണനാഃ സുകരാ ഭവംതി ॥ 22 ॥

ഭോഗായ ദേവി ഭവതീം കൃതിനഃ പ്രണമ്യ
ഭ്രൂകിംകരീകൃതസരോജഗൃഹാഃ സഹസ്രമ് ।
ചിംതാമണിപ്രചയകല്പിതകേലിശൈലേ
കല്പദ്രുമോപവന ഏവ ചിരം രമംതേ ॥ 23 ॥

ഹര്തും ത്വമേവ ഭവസി ത്വദധീനമീശേ
സംസാരതാപമഖിലം ദയയാ പശൂനാമ് ।
വൈകര്തനീ കിരണസംഹതിരേവ ശക്താ
ധര്മം നിജം ശമയിതും നിജയൈവ വൃഷ്ട്യാ ॥ 24 ॥

ശക്തിഃ ശരീരമധിദൈവതമംതരാത്മാ
ജ്ഞാനം ക്രിയാ കരണമാസനജാലമിച്ഛാ ।
ഐശ്വര്യമായതനമാവരണാനി ച ത്വം
കിം തന്ന യദ്ഭവസി ദേവി ശശാംകമൌലേഃ ॥ 25 ॥

ഭൂമൌ നിവൃത്തിരുദിതാ പയസി പ്രതിഷ്ഠാ
വിദ്യാഽനലേ മരുതി ശാംതിരതീവകാംതിഃ ।
വ്യോമ്നീതി യാഃ കില കലാഃ കലയംതി വിശ്വം
താസാം ഹി ദൂരതരമംബ പദം ത്വദീയമ് ॥ 26 ॥

യാവത്പദം പദസരോജയുഗം ത്വദീയം
നാംഗീകരോതി ഹൃദയേഷു ജഗച്ഛരണ്യേ ।
താവദ്വികല്പജടിലാഃ കുടിലപ്രകാരാ-
-സ്തര്കഗ്രഹാഃ സമയിനാം പ്രലയം ന യാംതി ॥ 27 ॥

നിര്ദേവയാനപിതൃയാനവിഹാരമേകേ
കൃത്വാ മനഃ കരണമംഡലസാർവഭൌമമ് ।
ധ്യാനേ നിവേശ്യ തവ കാരണപംചകസ്യ
പർവാണി പാർവതി നയംതി നിജാസനത്വമ് ॥ 28 ॥

സ്ഥൂലാസു മൂര്തിഷു മഹീപ്രമുഖാസു മൂര്തേഃ
കസ്യാശ്ചനാപി തവ വൈഭവമംബ യസ്യാഃ ।
പത്യാ ഗിരാമപി ന ശക്യത ഏവ വക്തും
സാപി സ്തുതാ കില മയേതി തിതിക്ഷിതവ്യമ് ॥ 29 ॥

കാലാഗ്നികോടിരുചിമംബ ഷഡധ്വശുദ്ധൌ
ആപ്ലാവനേഷു ഭവതീമമൃതൌഘവൃഷ്ടിമ് ।
ശ്യാമാം ഘനസ്തനതടാം ശകലീകൃതാഘാം
ധ്യായംത ഏവ ജഗതാം ഗുരവോ ഭവംതി ॥ 30 ॥

വിദ്യാം പരാം കതിചിദംബരമംബ കേചി-
-ദാനംദമേവ കതിചിത്കതിചിച്ച മായാമ് ।
ത്വാം വിശ്വമാഹുരപരേ വയമാമനാമഃ
സാക്ഷാദപാരകരുണാം ഗുരുമൂര്തിമേവ ॥ 31 ॥

കുവലയദലനീലം ബര്ബരസ്നിഗ്ധകേശം
പൃഥുതരകുചഭാരാക്രാംതകാംതാവലഗ്നമ് ।
കിമിഹ ബഹുഭിരുക്തൈസ്ത്വത്സ്വരൂപം പരം നഃ
സകലജനനി മാതഃ സംതതം സന്നിധത്താമ് ॥ 32 ॥

ഇതി ശ്രീകാളിദാസ വിരചിത പംചസ്തവ്യാം ചതുര്ഥഃ അംബാസ്തവഃ ।

amba stavam in malayalam