অংবা স্তবঃ

amba stavam in assamese

যামামনংতি মুনযঃ প্রকৃতিং পুরাণীং
বিদ্যেতি যাং শ্রুতিরহস্যবিদো বদংতি ।
তামর্ধপল্লবিতশংকররূপমুদ্রাং
দেবীমনন্যশরণঃ শরণং প্রপদ্যে ॥ 1 ॥

অংব স্তবেষু তব তাবদকর্তৃকাণি
কুংঠীভবংতি বচসামপি গুংভনানি ।
ডিংভস্য মে স্তুতিরসাবসমংজসাপি
বাত্সল্যনিঘ্নহৃদযাং ভবতীং ধিনোতু ॥ 2 ॥

ব্যোমেতি বিংদুরিতি নাদ ইতীংদুলেখা-
-রূপেতি বাগ্ভবতনূরিতি মাতৃকেতি ।
নিঃস্যংদমানসুখবোধসুধাস্বরূপা
বিদ্যোতসে মনসি ভাগ্যবতাং জনানাম্ ॥ 3 ॥

আবির্ভবত্পুলকসংততিভিঃ শরীরৈ-
-র্নিঃস্যংদমানসলিলৈর্নযনৈশ্চ নিত্যম্ ।
বাগ্ভিশ্চ গদ্গদপদাভিরুপাসতে যে
পাদৌ তবাংব ভুবনেষু ত এব ধন্যাঃ ॥ 4 ॥

বক্ত্রং যদুদ্যতমভিষ্টুতযে ভবত্যা-
-স্তুভ্যং নমো যদপি দেবি শিরঃ করোতি ।
চেতশ্চ যত্ত্বযি পরাযণমংব তানি
কস্যাপি কৈরপি ভবংতি তপোবিশেষৈঃ ॥ 5 ॥

মূলালবালকুহরাদুদিতা ভবানি
নির্ভিদ্য ষট্সরসিজানি তটিল্লতেব ।
ভূযোঽপি তত্র বিশসি ধ্রুবমংডলেংদু-
-নিঃস্যংদমানপরমামৃততোযরূপা ॥ 6 ॥

দগ্ধং যদা মদনমেকমনেকধা তে
মুগ্ধঃ কটাক্ষবিধিরংকুরযাংচকার ।
ধত্তে তদাপ্রভৃতি দেবি ললাটনেত্রং
সত্যং হ্রিযৈব মুকুলীকৃতমিংদুমৌলেঃ ॥ 7 ॥

অজ্ঞাতসংভবমনাকলিতান্ববাযং
ভিক্ষুং কপালিনমবাসসমদ্বিতীযম্ ।
পূর্বং করগ্রহণমংগলতো ভবত্যাঃ
শংভুং ক এব বুবুধে গিরিরাজকন্যে ॥ 8 ॥

চর্মাংবরং চ শবভস্মবিলেপনং চ
ভিক্ষাটনং চ নটনং চ পরেতভূমৌ ।
বেতালসংহতিপরিগ্রহতা চ শংভোঃ
শোভাং বিভর্তি গিরিজে তব সাহচর্যাত্ ॥ 9 ॥

কল্পোপসংহরণকেলিষু পংডিতানি
চংডানি খংডপরশোরপি তাংডবানি ।
আলোকনেন তব কোমলিতানি মাত-
-র্লাস্যাত্মনা পরিণমংতি জগদ্বিভূত্যৈ ॥ 10 ॥

জংতোরপশ্চিমতনোঃ সতি কর্মসাম্যে
নিঃশেষপাশপটলচ্ছিদুরা নিমেষাত্ ।
কল্যাণি দেশিককটাক্ষসমাশ্রযেণ
কারুণ্যতো ভবতি শাংভববেদদীক্ষা ॥ 11 ॥

মুক্তাবিভূষণবতী নববিদ্রুমাভা
যচ্চেতসি স্ফুরসি তারকিতেব সংধ্যা ।
একঃ স এব ভুবনত্রযসুংদরীণাং
কংদর্পতাং ব্রজতি পংচশরীং বিনাপি ॥ 12 ॥

যে ভাবযংত্যমৃতবাহিভিরংশুজালৈ-
-রাপ্যাযমানভুবনামমৃতেশ্বরীং ত্বাম্ ।
তে লংঘযংতি ননু মাতরলংঘনীযাং
ব্রহ্মাদিভিঃ সুরবরৈরপি কালকক্ষাম্ ॥ 13 ॥

যঃ স্ফাটিকাক্ষগুণপুস্তককুংডিকাঢ্যাং
ব্যাখ্যাসমুদ্যতকরাং শরদিংদুশুভ্রাম্ ।
পদ্মাসনাং চ হৃদযে ভবতীমুপাস্তে
মাতঃ স বিশ্বকবিতার্কিকচক্রবর্তী ॥ 14 ॥

বর্হাবতংসযুতবর্বরকেশপাশাং
গুংজাবলীকৃতঘনস্তনহারশোভাম্ ।
শ্যামাং প্রবালবদনাং সুকুমারহস্তাং
ত্বামেব নৌমি শবরীং শবরস্য জাযাম্ ॥ 15 ॥

অর্ধেন কিং নবলতাললিতেন মুগ্ধে
ক্রীতং বিভোঃ পরুষমর্ধমিদং ত্বযেতি ।
আলীজনস্য পরিহাসবচাংসি মন্যে
মংদস্মিতেন তব দেবি জডী ভবংতি ॥ 16 ॥

ব্রহ্মাংড বুদ্বুদকদংবকসংকুলোঽযং
মাযোদধির্বিবিধদুঃখতরংগমালঃ ।
আশ্চর্যমংব ঝটিতি প্রলযং প্রযাতি
ত্বদ্ধ্যানসংততিমহাবডবামুখাগ্নৌ ॥ 17 ॥

দাক্ষাযণীতি কুটিলেতি কুহারিণীতি
কাত্যাযনীতি কমলেতি কলাবতীতি ।
একা সতী ভগবতী পরমার্থতোঽপি
সংদৃশ্যসে বহুবিধা ননু নর্তকীব ॥ 18 ॥

আনংদলক্ষণমনাহতনাম্নি দেশে
নাদাত্মনা পরিণতং তব রূপমীশে ।
প্রত্যঙ্মুখেন মনসা পরিচীযমানং
শংসংতি নেত্রসলিলৈঃ পুলকৈশ্চ ধন্যাঃ ॥ 19 ॥

ত্বং চংদ্রিকা শশিনি তিগ্মরুচৌ রুচিস্ত্বং
ত্বং চেতনাসি পুরুষে পবনে বলং ত্বম্ ।
ত্বং স্বাদুতাসি সলিলে শিখিনি ত্বমূষ্মা
নিঃসারমেব নিখিলং ত্বদৃতে যদি স্যাত্ ॥ 20 ॥

জ্যোতীংষি যদ্দিবি চরংতি যদংতরিক্ষং
সূতে পযাংসি যদহির্ধরণীং চ ধত্তে ।
যদ্বাতি বাযুরনলো যদুদর্চিরাস্তে
তত্সর্বমংব তব কেবলমাজ্ঞযৈব ॥ 21 ॥

সংকোচমিচ্ছসি যদা গিরিজে তদানীং
বাক্তর্কযোস্ত্বমসি ভূমিরনামরূপা ।
যদ্বা বিকাসমুপযাসি যদা তদানীং
ত্বন্নামরূপগণনাঃ সুকরা ভবংতি ॥ 22 ॥

ভোগায দেবি ভবতীং কৃতিনঃ প্রণম্য
ভ্রূকিংকরীকৃতসরোজগৃহাঃ সহস্রম্ ।
চিংতামণিপ্রচযকল্পিতকেলিশৈলে
কল্পদ্রুমোপবন এব চিরং রমংতে ॥ 23 ॥

হর্তুং ত্বমেব ভবসি ত্বদধীনমীশে
সংসারতাপমখিলং দযযা পশূনাম্ ।
বৈকর্তনী কিরণসংহতিরেব শক্তা
ধর্মং নিজং শমযিতুং নিজযৈব বৃষ্ট্যা ॥ 24 ॥

শক্তিঃ শরীরমধিদৈবতমংতরাত্মা
জ্ঞানং ক্রিযা করণমাসনজালমিচ্ছা ।
ঐশ্বর্যমাযতনমাবরণানি চ ত্বং
কিং তন্ন যদ্ভবসি দেবি শশাংকমৌলেঃ ॥ 25 ॥

ভূমৌ নিবৃত্তিরুদিতা পযসি প্রতিষ্ঠা
বিদ্যাঽনলে মরুতি শাংতিরতীবকাংতিঃ ।
ব্যোম্নীতি যাঃ কিল কলাঃ কলযংতি বিশ্বং
তাসাং হি দূরতরমংব পদং ত্বদীযম্ ॥ 26 ॥

যাবত্পদং পদসরোজযুগং ত্বদীযং
নাংগীকরোতি হৃদযেষু জগচ্ছরণ্যে ।
তাবদ্বিকল্পজটিলাঃ কুটিলপ্রকারা-
-স্তর্কগ্রহাঃ সমযিনাং প্রলযং ন যাংতি ॥ 27 ॥

নির্দেবযানপিতৃযানবিহারমেকে
কৃত্বা মনঃ করণমংডলসার্বভৌমম্ ।
ধ্যানে নিবেশ্য তব কারণপংচকস্য
পর্বাণি পার্বতি নযংতি নিজাসনত্বম্ ॥ 28 ॥

স্থূলাসু মূর্তিষু মহীপ্রমুখাসু মূর্তেঃ
কস্যাশ্চনাপি তব বৈভবমংব যস্যাঃ ।
পত্যা গিরামপি ন শক্যত এব বক্তুং
সাপি স্তুতা কিল মযেতি তিতিক্ষিতব্যম্ ॥ 29 ॥

কালাগ্নিকোটিরুচিমংব ষডধ্বশুদ্ধৌ
আপ্লাবনেষু ভবতীমমৃতৌঘবৃষ্টিম্ ।
শ্যামাং ঘনস্তনতটাং শকলীকৃতাঘাং
ধ্যাযংত এব জগতাং গুরবো ভবংতি ॥ 30 ॥

বিদ্যাং পরাং কতিচিদংবরমংব কেচি-
-দানংদমেব কতিচিত্কতিচিচ্চ মাযাম্ ।
ত্বাং বিশ্বমাহুরপরে বযমামনামঃ
সাক্ষাদপারকরুণাং গুরুমূর্তিমেব ॥ 31 ॥

কুবলযদলনীলং বর্বরস্নিগ্ধকেশং
পৃথুতরকুচভারাক্রাংতকাংতাবলগ্নম্ ।
কিমিহ বহুভিরুক্তৈস্ত্বত্স্বরূপং পরং নঃ
সকলজননি মাতঃ সংততং সন্নিধত্তাম্ ॥ 32 ॥

ইতি শ্রীকালিদাস বিরচিত পংচস্তব্যাং চতুর্থঃ অংবাস্তবঃ ।

amba stavam in assamese