ଶ୍ରୀ ଵିନାୟକ ସ୍ତଵରାଜଃ

sri vinayaka stavaraja stotram in odia

ବୀଜାପୂରଗଦେକ୍ଷୁକାର୍ମୁକରୁଜା ଚକ୍ରାବ୍ଜପାଶୋତ୍ପଲ-
-ଵ୍ରୀହ୍ୟଗ୍ରସ୍ଵଵିଷାଣରତ୍ନକଲଶପ୍ରୋଦ୍ୟତ୍କରାଂଭୋରୁହଃ ।
ଧ୍ୟେୟୋ ଵଲ୍ଲଭୟା ସପଦ୍ମକରୟାଶ୍ଲିଷ୍ଟୋଜ୍ଜ୍ଵଲଦ୍ଭୂଷୟା
ଵିଶ୍ଵୋତ୍ପତ୍ତିଵିପତ୍ତିସଂସ୍ଥିତିକରୋ ଵିଘ୍ନେଶ ଇଷ୍ଟାର୍ଥଦଃ ॥ 1 ॥

ନମସ୍ତେ ସିଦ୍ଧିଲକ୍ଷ୍ମୀଶ ଗଣାଧିପ ମହାପ୍ରଭୋ ।
ଵିଘ୍ନେଶ୍ଵର ଜଗନ୍ନାଥ ଗୌରୀପୁତ୍ର ଜଗତ୍ପ୍ରଭୋ ॥ 2 ॥

ଜୟ ଵିଘ୍ନେଶ୍ଵର ଵିଭୋ ଵିନାୟକ ମହେଶ୍ଵର ।
ଲଂବୋଦର ମହାବାହୋ ସର୍ଵଦା ତ୍ଵଂ ପ୍ରସୀଦ ମେ ॥ 3 ॥

ମହାଦେଵ ଜଗତ୍ସ୍ଵାମିନ୍ ମୂଷିକାରୂଢ ଶଂକର ।
ଵିଶାଲାକ୍ଷ ମହାକାୟ ମାଂ ତ୍ରାହି ପରମେଶ୍ଵର ॥ 4 ॥

କୁଂଜରାସ୍ୟ ସୁରାଧୀଶ ମହେଶ କରୁଣାନିଧେ ।
ମାତୁଲୁଂଗଧର ସ୍ଵାମିନ୍ ଗଦାଚକ୍ରସମନ୍ଵିତ ॥ 5 ॥

ଦଶବାହୋ ମହାରାଜ ଗଜଵକ୍ତ୍ର ଚତୁର୍ଭୁଜ ।
ଶୂର୍ପକର୍ଣ ମହାକର୍ଣ ଗଣନାଥ ପ୍ରସୀଦ ମେ ॥ 6 ॥

ଶଂଖଶୂଲସମାୟୁକ୍ତ ବୀଜାପୂରସମନ୍ଵିତ ।
ଇକ୍ଷୁକାର୍ମୁକସଂୟୁକ୍ତ ପଦ୍ମହସ୍ତ ପ୍ରସୀଦ ମେ ॥ 7 ॥

ନାନାଭରଣସଂୟୁକ୍ତ ରତ୍ନକୁଂଭକର ପ୍ରଭୋ ।
ସର୍ଗସ୍ଥିତିଲୟାଧୀଶ ପରମାତ୍ମନ୍ ଜୟ ପ୍ରଭୋ ॥ 8 ॥

ଅନାଥନାଥ ଵିଶ୍ଵେଶ ଵିଘ୍ନସଂଘଵିନାଶନ ।
ତ୍ରୟୀମୂର୍ତେ ସୁରପତେ ବ୍ରହ୍ମଵିଷ୍ଣୁଶିଵାତ୍ମକ ॥ 9 ॥

ତ୍ରୟୀଗୁଣ ମହାଦେଵ ପାହି ମାଂ ସର୍ଵପାଲକ ।
ଅଣିମାଦିଗୁଣାଧାର ଲକ୍ଷ୍ମୀଶ୍ରୀଵିଷ୍ଣୁପୂଜିତ ॥ 10 ॥

ଗୌରୀଶଂକରସଂପୂଜ୍ୟ ଜୟ ତ୍ଵଂ ଗଣନାୟକ ।
ରତିମନ୍ମଥସଂସେଵ୍ୟ ମହୀଭୂଦାରସଂସ୍ତୁତ ॥ 11 ॥

ଋଦ୍ଧ୍ୟାମୋଦାଦିସଂସେଵ୍ୟ ମହାଗଣପତେ ଜୟ ।
ଶଂଖପଦ୍ମାଦିସଂସେଵ୍ୟ ନିରାଲଂବ ନିରୀଶ୍ଵର ॥ 12 ॥

ନିଷ୍କଲଂକ ନିରାଧାର ପାହି ମାଂ ନିତ୍ୟମଵ୍ୟୟ ।
ଅନାଦ୍ୟ ଜଗତାମାଦ୍ୟ ପିତାମହସୁପୂଜିତ ॥ 13 ॥

ଧୂମକେତୋ ଗଣାଧ୍ୟକ୍ଷ ମହାମୂଷକଵାହନ ।
ଅନଂତପରମାନଂଦ ଜୟ ଵିଘ୍ନେଶ୍ଵରେଶ୍ଵର ॥ 14 ॥

ରତ୍ନସିଂହାସନାସୀନ କିରୀଟେନ ସୁଶୋଭିତ ।
ପରାତ୍ପର ପରେଶାନ ପରପୂରୁଷ ପାହି ମାମ୍ ॥ 15 ॥

ନିର୍ଦ୍ଵଂଦ୍ଵ ନିର୍ଗୁଣାଭାସ ଜପାପୁଷ୍ପସମପ୍ରଭ ।
ସର୍ଵପ୍ରମଥସଂସ୍ତୁତ୍ୟ ତ୍ରାହି ମାଂ ଵିଘ୍ନନାୟକ ॥ 16 ॥

କୁମାରସ୍ୟ ଗୁରୋ ଦେଵ ସର୍ଵୈଶ୍ଵର୍ୟପ୍ରଦାୟକ ।
ସର୍ଵାଭୀଷ୍ଟପ୍ରଦ ସ୍ଵାମିନ୍ ସର୍ଵପ୍ରତ୍ୟୂହନାଶକ ॥ 17 ॥

ଶରଣ୍ୟ ସର୍ଵଲୋକାନାଂ ଶରଣାଗତଵତ୍ସଲ ।
ମହାଗଣପତେ ନିତ୍ୟଂ ମାଂ ପାଲୟ କୃପାନିଧେ ॥ 18 ॥

ଏଵଂ ଶ୍ରୀଗଣନାଥସ୍ୟ ସ୍ତଵରାଜମନୁତ୍ତମମ୍ ।
ୟଃ ପଠେଚ୍ଛୃଣୁୟାନ୍ନିତ୍ୟଂ ପ୍ରତ୍ୟୂହୈଃ ସ ଵିମୁଚ୍ୟତେ ॥ 19 ॥

ଅଶ୍ଵମେଧସମଂ ପୁଣ୍ୟଫଲଂ ପ୍ରାପ୍ନୋତ୍ୟନୁତ୍ତମମ୍ ।
ଵଶୀକରୋତି ତ୍ରୈଲୋକ୍ୟଂ ପ୍ରାପ୍ୟ ସୌଭାଗ୍ୟମୁତ୍ତମମ୍ ॥ 20 ॥

ସର୍ଵାଭୀଷ୍ଟମଵାପ୍ନୋତି ଶୀଘ୍ରମେଵ ସୁଦୁର୍ଲଭମ୍ ।
ମହାଗଣେଶସାନ୍ନିଧ୍ୟଂ ପ୍ରାପ୍ନୋତ୍ୟେଵ ନ ସଂଶୟଃ ॥ 21 ॥

ଇତି ଶ୍ରୀରୁଦ୍ରୟାମଲେ ଶ୍ରୀଵିନାୟକସ୍ତଵରାଜଃ ସଂପୂର୍ଣମ୍ ।

sri vinayaka stavaraja stotram in odia