શ્રી વિનાયક સ્તવરાજઃ

sri vinayaka stavaraja stotram in gujarati

બીજાપૂરગદેક્ષુકાર્મુકરુજા ચક્રાબ્જપાશોત્પલ-
-વ્રીહ્યગ્રસ્વવિષાણરત્નકલશપ્રોદ્યત્કરાંભોરુહઃ ।
ધ્યેયો વલ્લભયા સપદ્મકરયાશ્લિષ્ટોજ્જ્વલદ્ભૂષયા
વિશ્વોત્પત્તિવિપત્તિસંસ્થિતિકરો વિઘ્નેશ ઇષ્ટાર્થદઃ ॥ 1 ॥

નમસ્તે સિદ્ધિલક્ષ્મીશ ગણાધિપ મહાપ્રભો ।
વિઘ્નેશ્વર જગન્નાથ ગૌરીપુત્ર જગત્પ્રભો ॥ 2 ॥

જય વિઘ્નેશ્વર વિભો વિનાયક મહેશ્વર ।
લંબોદર મહાબાહો સર્વદા ત્વં પ્રસીદ મે ॥ 3 ॥

મહાદેવ જગત્સ્વામિન્ મૂષિકારૂઢ શંકર ।
વિશાલાક્ષ મહાકાય માં ત્રાહિ પરમેશ્વર ॥ 4 ॥

કુંજરાસ્ય સુરાધીશ મહેશ કરુણાનિધે ।
માતુલુંગધર સ્વામિન્ ગદાચક્રસમન્વિત ॥ 5 ॥

દશબાહો મહારાજ ગજવક્ત્ર ચતુર્ભુજ ।
શૂર્પકર્ણ મહાકર્ણ ગણનાથ પ્રસીદ મે ॥ 6 ॥

શંખશૂલસમાયુક્ત બીજાપૂરસમન્વિત ।
ઇક્ષુકાર્મુકસંયુક્ત પદ્મહસ્ત પ્રસીદ મે ॥ 7 ॥

નાનાભરણસંયુક્ત રત્નકુંભકર પ્રભો ।
સર્ગસ્થિતિલયાધીશ પરમાત્મન્ જય પ્રભો ॥ 8 ॥

અનાથનાથ વિશ્વેશ વિઘ્નસંઘવિનાશન ।
ત્રયીમૂર્તે સુરપતે બ્રહ્મવિષ્ણુશિવાત્મક ॥ 9 ॥

ત્રયીગુણ મહાદેવ પાહિ માં સર્વપાલક ।
અણિમાદિગુણાધાર લક્ષ્મીશ્રીવિષ્ણુપૂજિત ॥ 10 ॥

ગૌરીશંકરસંપૂજ્ય જય ત્વં ગણનાયક ।
રતિમન્મથસંસેવ્ય મહીભૂદારસંસ્તુત ॥ 11 ॥

ઋદ્ધ્યામોદાદિસંસેવ્ય મહાગણપતે જય ।
શંખપદ્માદિસંસેવ્ય નિરાલંબ નિરીશ્વર ॥ 12 ॥

નિષ્કલંક નિરાધાર પાહિ માં નિત્યમવ્યય ।
અનાદ્ય જગતામાદ્ય પિતામહસુપૂજિત ॥ 13 ॥

ધૂમકેતો ગણાધ્યક્ષ મહામૂષકવાહન ।
અનંતપરમાનંદ જય વિઘ્નેશ્વરેશ્વર ॥ 14 ॥

રત્નસિંહાસનાસીન કિરીટેન સુશોભિત ।
પરાત્પર પરેશાન પરપૂરુષ પાહિ મામ્ ॥ 15 ॥

નિર્દ્વંદ્વ નિર્ગુણાભાસ જપાપુષ્પસમપ્રભ ।
સર્વપ્રમથસંસ્તુત્ય ત્રાહિ માં વિઘ્નનાયક ॥ 16 ॥

કુમારસ્ય ગુરો દેવ સર્વૈશ્વર્યપ્રદાયક ।
સર્વાભીષ્ટપ્રદ સ્વામિન્ સર્વપ્રત્યૂહનાશક ॥ 17 ॥

શરણ્ય સર્વલોકાનાં શરણાગતવત્સલ ।
મહાગણપતે નિત્યં માં પાલય કૃપાનિધે ॥ 18 ॥

એવં શ્રીગણનાથસ્ય સ્તવરાજમનુત્તમમ્ ।
યઃ પઠેચ્છૃણુયાન્નિત્યં પ્રત્યૂહૈઃ સ વિમુચ્યતે ॥ 19 ॥

અશ્વમેધસમં પુણ્યફલં પ્રાપ્નોત્યનુત્તમમ્ ।
વશીકરોતિ ત્રૈલોક્યં પ્રાપ્ય સૌભાગ્યમુત્તમમ્ ॥ 20 ॥

સર્વાભીષ્ટમવાપ્નોતિ શીઘ્રમેવ સુદુર્લભમ્ ।
મહાગણેશસાન્નિધ્યં પ્રાપ્નોત્યેવ ન સંશયઃ ॥ 21 ॥

ઇતિ શ્રીરુદ્રયામલે શ્રીવિનાયકસ્તવરાજઃ સંપૂર્ણમ્ ।

sri vinayaka stavaraja stotram in gujarati