ଶ୍ରୀ ଷୋଡଶୀ (ତ୍ରିପୁର ସୁଂଦରୀ) ଅଷ୍ଟୋତ୍ତର ଶତ ନାମା ସ୍ତୋତ୍ରଂ

sri shodashi tripura sundari ashtottara satanama stotram in odia

ଭୃଗୁରୁଵାଚ
ଚତୁର୍ଵକ୍ତ୍ର ଜଗନ୍ନାଥ ସ୍ତୋତ୍ରଂ ଵଦ ମୟି ପ୍ରଭୋ ।
ୟସ୍ୟାନୁଷ୍ଠାନମାତ୍ରେଣ ନରୋ ଭକ୍ତିମଵାପ୍ନୁୟାତ୍ ॥ 1 ॥

ବ୍ରହ୍ମୋଵାଚ
ସହସ୍ରନାମ୍ନାମାକୃଷ୍ୟ ନାମ୍ନାମଷ୍ଟୋତ୍ତରଂ ଶତମ୍ ।
ଗୁହ୍ୟାଦ୍ଗୁହ୍ୟତରଂ ଗୁହ୍ୟଂ ସୁଂଦର୍ୟାଃ ପରିକୀର୍ତିତମ୍ ॥ 2 ॥

ଅସ୍ୟ ଶ୍ରୀଷୋଡଶ୍ୟଷ୍ଟୋତ୍ତରଶତନାମସ୍ତୋତ୍ରସ୍ୟ ଶଂଭୁରୃଷିଃ ଅନୁଷ୍ଟୁପ୍ ଛଂଦଃ ଶ୍ରୀଷୋଡଶୀ ଦେଵତା ଧର୍ମାର୍ଥକାମମୋକ୍ଷସିଦ୍ଧ୍ୟର୍ଥେ ଜପେ ଵିନିୟୋଗଃ ।

ତ୍ରିପୁରା ଷୋଡଶୀ ମାତା ତ୍ର୍ୟକ୍ଷରା ତ୍ରିତୟା ତ୍ରୟୀ ।
ସୁଂଦରୀ ସୁମୁଖୀ ସେଵ୍ୟା ସାମଵେଦପରାୟଣା ॥ 3 ॥

ଶାରଦା ଶବ୍ଦନିଲୟା ସାଗରା ସରିଦଂବରା ।
ଶୁଦ୍ଧା ଶୁଦ୍ଧତନୁଃ ସାଧ୍ଵୀ ଶିଵଧ୍ୟାନପରାୟଣା ॥ 4 ॥

ସ୍ଵାମିନୀ ଶଂଭୁଵନିତା ଶାଂଭଵୀ ଚ ସରସ୍ଵତୀ ।
ସମୁଦ୍ରମଥିନୀ ଶୀଘ୍ରଗାମିନୀ ଶୀଘ୍ରସିଦ୍ଧିଦା ॥ 5 ॥

ସାଧୁସେଵ୍ୟା ସାଧୁଗମ୍ୟା ସାଧୁସଂତୁଷ୍ଟମାନସା ।
ଖଟ୍ଵାଂଗଧାରିଣୀ ଖର୍ଵା ଖଡ୍ଗଖର୍ପରଧାରିଣୀ ॥ 6 ॥

ଷଡ୍ଵର୍ଗଭାଵରହିତା ଷଡ୍ଵର୍ଗପରିଚାରିକା ।
ଷଡ୍ଵର୍ଗା ଚ ଷଡଂଗା ଚ ଷୋଢା ଷୋଡଶଵାର୍ଷିକୀ ॥ 7 ॥

କ୍ରତୁରୂପା କ୍ରତୁମତୀ ଋଭୁକ୍ଷକ୍ରତୁମଂଡିତା ।
କଵର୍ଗାଦିପଵର୍ଗାଂତା ଅଂତସ୍ଥାଽନଂତରୂପିଣୀ ॥ 8 ॥

ଅକାରାକାରରହିତା କାଲମୃତ୍ୟୁଜରାପହା ।
ତନ୍ଵୀ ତତ୍ତ୍ଵେଶ୍ଵରୀ ତାରା ତ୍ରିଵର୍ଷା ଜ୍ଞାନରୂପିଣୀ ॥ 9 ॥

କାଲୀ କରାଲୀ କାମେଶୀ ଛାୟା ସଂଜ୍ଞାପ୍ୟରୁଂଧତୀ ।
ନିର୍ଵିକଲ୍ପା ମହାଵେଗା ମହୋତ୍ସାହା ମହୋଦରୀ ॥ 10 ॥

ମେଘା ବଲାକା ଵିମଲା ଵିମଲଜ୍ଞାନଦାୟିନୀ ।
ଗୌରୀ ଵସୁଂଧରା ଗୋପ୍ତ୍ରୀ ଗଵାଂ ପତିନିଷେଵିତା ॥ 11 ॥

ଭଗାଂଗା ଭଗରୂପା ଚ ଭକ୍ତିଭାଵପରାୟଣା ।
ଛିନ୍ନମସ୍ତା ମହାଧୂମା ତଥା ଧୂମ୍ରଵିଭୂଷଣା ॥ 12 ॥

ଧର୍ମକର୍ମାଦିରହିତା ଧର୍ମକର୍ମପରାୟଣା ।
ସୀତା ମାତଂଗିନୀ ମେଧା ମଧୁଦୈତ୍ୟଵିନାଶିନୀ ॥ 13 ॥

ଭୈରଵୀ ଭୁଵନା ମାତାଽଭୟଦା ଭଵସୁଂଦରୀ ।
ଭାଵୁକା ବଗଲା କୃତ୍ୟା ବାଲା ତ୍ରିପୁରସୁଂଦରୀ ॥ 14 ॥

ରୋହିଣୀ ରେଵତୀ ରମ୍ୟା ରଂଭା ରାଵଣଵଂଦିତା ।
ଶତୟଜ୍ଞମୟୀ ସତ୍ତ୍ଵା ଶତକ୍ରତୁଵରପ୍ରଦା ॥ 15 ॥

ଶତଚଂଦ୍ରାନନା ଦେଵୀ ସହସ୍ରାଦିତ୍ୟସନ୍ନିଭା ।
ସୋମସୂର୍ୟାଗ୍ନିନୟନା ଵ୍ୟାଘ୍ରଚର୍ମାଂବରାଵୃତା ॥ 16 ॥

ଅର୍ଧେଂଦୁଧାରିଣୀ ମତ୍ତା ମଦିରା ମଦିରେକ୍ଷଣା ।
ଇତି ତେ କଥିତଂ ଗୋପ୍ୟଂ ନାମ୍ନାମଷ୍ଟୋତ୍ତରଂ ଶତମ୍ ॥ 17 ॥

ସୁଂଦର୍ୟାଃ ସର୍ଵଦଂ ସେଵ୍ୟଂ ମହାପାତକନାଶନମ୍ ।
ଗୋପନୀୟଂ ଗୋପନୀୟଂ ଗୋପନୀୟଂ କଲୌ ୟୁଗେ ॥ 18 ॥

ସହସ୍ରନାମପାଠସ୍ୟ ଫଲଂ ୟଦ୍ଵୈ ପ୍ରକୀର୍ତିତମ୍ ।
ତସ୍ମାତ୍କୋଟିଗୁଣଂ ପୁଣ୍ୟଂ ସ୍ତଵସ୍ୟାସ୍ୟ ପ୍ରକୀର୍ତନାତ୍ ॥ 19 ॥

ପଠେତ୍ସଦା ଭକ୍ତିୟୁତୋ ନରୋ ୟୋ
ନିଶୀଥକାଲେଽପ୍ୟରୁଣୋଦୟେ ଵା ।
ପ୍ରଦୋଷକାଲେ ନଵମୀଦିନେଽଥଵା
ଲଭେତ ଭୋଗାନ୍ପରମାଦ୍ଭୁତାନ୍ପ୍ରିୟାନ୍ ॥ 20 ॥

ଇତି ବ୍ରହ୍ମୟାମଲେ ପୂର୍ଵଖଂଡେ ଷୋଡଶ୍ୟଷ୍ଟୋତ୍ତରଶତନାମ ସ୍ତୋତ୍ରମ୍ ।

sri shodashi tripura sundari ashtottara satanama stotram in odia