ଶ୍ରୀ କୃଷ୍ଣ କୃତ ଦୁର୍ଗା ସ୍ତୋତ୍ରମ୍

sri krishna kruta durga stotram in odia

ଶ୍ରୀକୃଷ୍ଣ ଉଵାଚ ।
ତ୍ଵମେଵ ସର୍ଵଜନନୀ ମୂଲପ୍ରକୃତିରୀଶ୍ଵରୀ ।
ତ୍ଵମେଵାଦ୍ୟା ସୃଷ୍ଟିଵିଧୌ ସ୍ଵେଚ୍ଛୟା ତ୍ରିଗୁଣାତ୍ମିକା ॥ 1 ॥

କାର୍ୟାର୍ଥେ ସଗୁଣା ତ୍ଵଂ ଚ ଵସ୍ତୁତୋ ନିର୍ଗୁଣା ସ୍ଵୟମ୍ ।
ପରବ୍ରହ୍ମସ୍ଵରୂପା ତ୍ଵଂ ସତ୍ୟା ନିତ୍ୟା ସନାତନୀ ॥ 2 ॥

ତେଜଃ ସ୍ଵରୂପା ପରମା ଭକ୍ତାନୁଗ୍ରଵିଗ୍ରହା ।
ସର୍ଵସ୍ଵରୂପା ସର୍ଵେଶା ସର୍ଵାଧାରା ପରାତ୍ପରା ॥ 3 ॥

ସର୍ଵବୀଜସ୍ଵରୂପା ଚ ସର୍ଵପୂଜ୍ୟା ନିରାଶ୍ରୟା ।
ସର୍ଵଜ୍ଞା ସର୍ଵତୋଭଦ୍ରା ସର୍ଵମଂଗଳମଂଗଳା ॥ 4 ॥

ସର୍ଵବୁଦ୍ଧିସ୍ଵରୂପା ଚ ସର୍ଵଶକ୍ତିସ୍ଵରୂପିଣୀ ।
ସର୍ଵଜ୍ଞାନପ୍ରଦା ଦେଵୀ ସର୍ଵଜ୍ଞା ସର୍ଵଭାଵିନୀ ॥ 5 ॥

ତ୍ଵଂ ସ୍ଵାହା ଦେଵଦାନେ ଚ ପିତୃଦାନେ ସ୍ଵଧା ସ୍ଵୟମ୍ ।
ଦକ୍ଷିଣା ସର୍ଵଦାନେ ଚ ସର୍ଵଶକ୍ତିସ୍ଵରୂପିଣୀ ॥ 6 ॥

ନିଦ୍ରା ତ୍ଵଂ ଚ ଦୟା ତ୍ଵଂ ଚ ତୃଷ୍ଣା ତ୍ଵଂ ଚାତ୍ମନଃ ପ୍ରିୟା ।
କ୍ଷୁତ୍ କ୍ଷାଂତିଃ ଶାଂତିରୀଶା ଚ କାଂତିସ୍ତୁଷ୍ଟିଶ୍ଚ ଶାଶ୍ଵତୀ ॥ 7 ॥

ଶ୍ରଦ୍ଧା ପୁଷ୍ଟିଶ୍ଚ ତଂଦ୍ରା ଚ ଲଜ୍ଜା ଶୋଭା ଦୟା ତଥା ।
ସତାଂ ସଂପତ୍ସ୍ଵରୂପା ଶ୍ରୀର୍ଵିପତ୍ତିରସତାମିହ ॥ 8 ॥

ପ୍ରୀତିରୂପା ପୁଣ୍ୟଵତାଂ ପାପିନାଂ କଲହାଂକୁରା ।
ଶଶ୍ଵତ୍କର୍ମମୟୀ ଶକ୍ତିଃ ସର୍ଵଦା ସର୍ଵଜୀଵିନାମ୍ ॥ 9 ॥

ଦେଵେଭ୍ୟଃ ସ୍ଵପଦୋ ଦାତ୍ରୀ ଧାତୁର୍ଧାତ୍ରୀ କୃପାମୟୀ ।
ହିତାୟ ସର୍ଵଦେଵାନାଂ ସର୍ଵାସୁରଵିନାଶିନୀ ॥ 10 ॥

ୟୋଗିନିଦ୍ରା ୟୋଗରୂପା ୟୋଗଦାତ୍ରୀ ଚ ୟୋଗିନାମ୍ ।
ସିଦ୍ଧିସ୍ଵରୂପା ସିଦ୍ଧାନାଂ ସିଦ୍ଧିଦା ସିଦ୍ଧୟୋଗିନୀ ॥ 11 ॥

ମାହେଶ୍ଵରୀ ଚ ବ୍ରହ୍ମାଣୀ ଵିଷ୍ଣୁମାୟା ଚ ଵୈଷ୍ଣଵୀ ।
ଭଦ୍ରଦା ଭଦ୍ରକାଲୀ ଚ ସର୍ଵଲୋକଭୟଂକରୀ ॥ 12 ॥

ଗ୍ରାମେ ଗ୍ରାମେ ଗ୍ରାମଦେଵୀ ଗୃହଦେଵୀ ଗୃହେ ଗୃହେ ।
ସତାଂ କୀର୍ତିଃ ପ୍ରତିଷ୍ଠା ଚ ନିଂଦା ତ୍ଵମସତାଂ ସଦା ॥ 13 ॥

ମହାୟୁଦ୍ଧେ ମହାମାରୀ ଦୁଷ୍ଟସଂହାରରୂପିଣୀ ।
ରକ୍ଷାସ୍ଵରୂପା ଶିଷ୍ଟାନାଂ ମାତେଵ ହିତକାରିଣୀ ॥ 14 ॥

ଵଂଦ୍ୟା ପୂଜ୍ୟା ସ୍ତୁତା ତ୍ଵଂ ଚ ବ୍ରହ୍ମାଦୀନାଂ ଚ ସର୍ଵଦା ।
ବ୍ରହ୍ମଣ୍ୟରୂପା ଵିପ୍ରାଣାଂ ତପସ୍ୟା ଚ ତପସ୍ଵିନାମ୍ ॥ 15 ॥

ଵିଦ୍ୟା ଵିଦ୍ୟାଵତାଂ ତ୍ଵଂ ଚ ବୁଦ୍ଧିର୍ବୁଦ୍ଧିମତାଂ ସତାମ୍ ।
ମେଧା ସ୍ମୃତିସ୍ଵରୂପା ଚ ପ୍ରତିଭା ପ୍ରତିଭାଵତାମ୍ ॥ 16 ॥

ରାଜ୍ଞାଂ ପ୍ରତାପରୂପା ଚ ଵିଶାଂ ଵାଣିଜ୍ୟରୂପିଣୀ ।
ସୃଷ୍ଟୌ ସୃଷ୍ଟିସ୍ଵରୂପା ତ୍ଵଂ ରକ୍ଷାରୂପା ଚ ପାଲନେ ॥ 17 ॥

ତଥାଂତେ ତ୍ଵଂ ମହାମାରୀ ଵିଶ୍ଵେ ଵିଶ୍ଵୈଶ୍ଚ ପୂଜିତେ ।
କାଲରାତ୍ରିର୍ମହାରାତ୍ରିର୍ମୋହରାତ୍ରିଶ୍ଚ ମୋହିନୀ ॥ 18 ॥

ଦୁରତ୍ୟୟା ମେ ମାୟା ତ୍ଵଂ ୟୟା ସମ୍ମୋହିତଂ ଜଗତ୍ ।
ୟୟା ମୁଗ୍ଧୋ ହି ଵିଦ୍ଵାଂଶ୍ଚ ମୋକ୍ଷମାର୍ଗଂ ନ ପଶ୍ୟତି ॥ 19 ॥

ଇତ୍ୟାତ୍ମନା କୃତଂ ସ୍ତୋତ୍ରଂ ଦୁର୍ଗାୟା ଦୁର୍ଗନାଶନମ୍ ।
ପୂଜାକାଲେ ପଠେଦ୍ୟୋ ହି ସିଦ୍ଧିର୍ଭଵତି ଵାଂଛିତା ॥ 20 ॥

ଇତି ଶ୍ରୀବ୍ରହ୍ମଵୈଵର୍ତେ ମହାପୁରାଣେ ଦ୍ଵିତୀୟେ ପ୍ରକୃତିଖଂଡେ ନାରଦନାରାୟଣସଂଵାଦେ ଦୁର୍ଗୋପାଖ୍ୟାନେ ଷଟ୍ଷଷ୍ଟିତମୋଽଧ୍ୟାୟେ ଶ୍ରୀ ଦୁର୍ଗା ସ୍ତୋତ୍ରମ୍ ।

sri krishna kruta durga stotram in odia