ଶ୍ରୀ ଧୂମାଵତୀ ଅଷ୍ଟୋତ୍ତର ଶତ ନାମା ସ୍ତୋତ୍ରଂ

sri dhumavati ashtottara satanama stotram in odia

ଈଶ୍ଵର ଉଵାଚ
ଓଂ ଧୂମାଵତୀ ଧୂମ୍ରଵର୍ଣା ଧୂମ୍ରପାନପରାୟଣା ।
ଧୂମ୍ରାକ୍ଷମଥିନୀ ଧନ୍ୟା ଧନ୍ୟସ୍ଥାନନିଵାସିନୀ ॥ 1 ॥

ଅଘୋରାଚାରସଂତୁଷ୍ଟା ଅଘୋରାଚାରମଂଡିତା ।
ଅଘୋରମଂତ୍ରସଂପ୍ରୀତା ଅଘୋରମଂତ୍ରପୂଜିତା ॥ 2 ॥

ଅଟ୍ଟାଟ୍ଟହାସନିରତା ମଲିନାଂବରଧାରିଣୀ ।
ଵୃଦ୍ଧା ଵିରୂପା ଵିଧଵା ଵିଦ୍ୟା ଚ ଵିରଳଦ୍ଵିଜା ॥ 3 ॥

ପ୍ରଵୃଦ୍ଧଘୋଣା କୁମୁଖୀ କୁଟିଲା କୁଟିଲେକ୍ଷଣା ।
କରାଳୀ ଚ କରାଳାସ୍ୟା କଂକାଳୀ ଶୂର୍ପଧାରିଣୀ ॥ 4 ॥

କାକଧ୍ଵଜରଥାରୂଢା କେଵଲା କଠିନା କୁହୂଃ ।
କ୍ଷୁତ୍ପିପାସାର୍ଦିତା ନିତ୍ୟା ଲଲଜ୍ଜିହ୍ଵା ଦିଗଂବରୀ ॥ 5 ॥

ଦୀର୍ଘୋଦରୀ ଦୀର୍ଘରଵା ଦୀର୍ଘାଂଗୀ ଦୀର୍ଘମସ୍ତକା ।
ଵିମୁକ୍ତକୁଂତଲା କୀର୍ତ୍ୟା କୈଲାସସ୍ଥାନଵାସିନୀ ॥ 6 ॥

କ୍ରୂରା କାଲସ୍ଵରୂପା ଚ କାଲଚକ୍ରପ୍ରଵର୍ତିନୀ ।
ଵିଵର୍ଣା ଚଂଚଲା ଦୁଷ୍ଟା ଦୁଷ୍ଟଵିଧ୍ଵଂସକାରିଣୀ ॥ 7 ॥

ଚଂଡୀ ଚଂଡସ୍ଵରୂପା ଚ ଚାମୁଂଡା ଚଂଡନିଃସ୍ଵନା ।
ଚଂଡଵେଗା ଚଂଡଗତିଶ୍ଚଂଡମୁଂଡଵିନାଶିନୀ ॥ 8 ॥

ଚାଂଡାଲିନୀ ଚିତ୍ରରେଖା ଚିତ୍ରାଂଗୀ ଚିତ୍ରରୂପିଣୀ ।
କୃଷ୍ଣା କପର୍ଦିନୀ କୁଲ୍ଲା କୃଷ୍ଣାରୂପା କ୍ରିୟାଵତୀ ॥ 9 ॥

କୁଂଭସ୍ତନୀ ମହୋନ୍ମତ୍ତା ମଦିରାପାନଵିହ୍ଵଲା ।
ଚତୁର୍ଭୁଜା ଲଲଜ୍ଜିହ୍ଵା ଶତ୍ରୁସଂହାରକାରିଣୀ ॥ 10 ॥

ଶଵାରୂଢା ଶଵଗତା ଶ୍ମଶାନସ୍ଥାନଵାସିନୀ ।
ଦୁରାରାଧ୍ୟା ଦୁରାଚାରା ଦୁର୍ଜନପ୍ରୀତିଦାୟିନୀ ॥ 11 ॥

ନିର୍ମାଂସା ଚ ନିରାକାରା ଧୂମହସ୍ତା ଵରାନ୍ଵିତା ।
କଲହା ଚ କଲିପ୍ରୀତା କଲିକଲ୍ମଷନାଶିନୀ ॥ 12 ॥

ମହାକାଲସ୍ଵରୂପା ଚ ମହାକାଲପ୍ରପୂଜିତା ।
ମହାଦେଵପ୍ରିୟା ମେଧା ମହାସଂକଟନାଶିନୀ ॥ 13 ॥

ଭକ୍ତପ୍ରିୟା ଭକ୍ତଗତିର୍ଭକ୍ତଶତ୍ରୁଵିନାଶିନୀ ।
ଭୈରଵୀ ଭୁଵନା ଭୀମା ଭାରତୀ ଭୁଵନାତ୍ମିକା ॥ 14 ॥

ଭେରୁଂଡା ଭୀମନୟନା ତ୍ରିନେତ୍ରା ବହୁରୂପିଣୀ ।
ତ୍ରିଲୋକେଶୀ ତ୍ରିକାଲଜ୍ଞା ତ୍ରିସ୍ଵରୂପା ତ୍ରୟୀତନୁଃ ॥ 15 ॥

ତ୍ରିମୂର୍ତିଶ୍ଚ ତଥା ତନ୍ଵୀ ତ୍ରିଶକ୍ତିଶ୍ଚ ତ୍ରିଶୂଲିନୀ ।
ଇତି ଧୂମାମହତ୍ ସ୍ତୋତ୍ରଂ ନାମ୍ନାମଷ୍ଟଶତାତ୍ମକମ୍ ॥ 16 ॥

ମୟା ତେ କଥିତଂ ଦେଵି ଶତ୍ରୁସଂଘଵିନାଶନମ୍ ।
କାରାଗାରେ ରିପୁଗ୍ରସ୍ତେ ମହୋତ୍ପାତେ ମହାଭୟେ ॥ 17 ॥

ଇଦଂ ସ୍ତୋତ୍ରଂ ପଠେନ୍ମର୍ତ୍ୟୋ ମୁଚ୍ୟତେ ସର୍ଵସଂକଟୈଃ ।
ଗୁହ୍ୟାଦ୍ଗୁହ୍ୟତରଂ ଗୁହ୍ୟଂ ଗୋପନୀୟଂ ପ୍ରୟତ୍ନତଃ ॥ 18 ॥

ଚତୁଷ୍ପଦାର୍ଥଦଂ ନୄଣାଂ ସର୍ଵସଂପତ୍ପ୍ରଦାୟକମ୍ ॥ 19 ॥

ଇତି ଶ୍ରୀଧୂମାଵତ୍ୟଷ୍ଟୋତ୍ତରଶତନାମସ୍ତୋତ୍ରମ୍ ।

sri dhumavati ashtottara satanama stotram in odia