ମଣିକର୍ଣିକାଷ୍ଟକମ୍

mani karnika ashtakam in odia

ତ୍ଵତ୍ତୀରେ ମଣିକର୍ଣିକେ ହରିହରୌ ସାୟୁଜ୍ୟମୁକ୍ତିପ୍ରଦୌ
ଵାଦଂତୌ କୁରୁତଃ ପରସ୍ପରମୁଭୌ ଜଂତୋଃ ପ୍ରୟାଣୋତ୍ସଵେ ।
ମଦ୍ରୂପୋ ମନୁଜୋଽୟମସ୍ତୁ ହରିଣା ପ୍ରୋକ୍ତଃ ଶିଵସ୍ତତ୍କ୍ଷଣା-
ତ୍ତନ୍ମଧ୍ୟାଦ୍ଭୃଗୁଲାଂଛନୋ ଗରୁଡଗଃ ପୀତାଂବରୋ ନିର୍ଗତଃ ॥ 1 ॥

ଇଂଦ୍ରାଦ୍ୟାସ୍ତ୍ରିଦଶାଃ ପତଂତି ନିୟତଂ ଭୋଗକ୍ଷୟେ ୟେ ପୁନ-
ର୍ଜାୟଂତେ ମନୁଜାସ୍ତତୋପି ପଶଵଃ କୀଟାଃ ପତଂଗାଦୟଃ ।
ୟେ ମାତର୍ମଣିକର୍ଣିକେ ତଵ ଜଲେ ମଜ୍ଜଂତି ନିଷ୍କଲ୍ମଷାଃ
ସାୟୁଜ୍ୟେଽପି କିରୀଟକୌସ୍ତୁଭଧରା ନାରାୟଣାଃ ସ୍ୟୁର୍ନରାଃ ॥ 2 ॥

କାଶୀ ଧନ୍ୟତମା ଵିମୁକ୍ତନଗରୀ ସାଲଂକୃତା ଗଂଗୟା
ତତ୍ରେୟଂ ମଣିକର୍ଣିକା ସୁଖକରୀ ମୁକ୍ତିର୍ହି ତତ୍କିଂକରୀ ।
ସ୍ଵର୍ଲୋକସ୍ତୁଲିତଃ ସହୈଵ ଵିବୁଧୈଃ କାଶ୍ୟା ସମଂ ବ୍ରହ୍ମଣା
କାଶୀ କ୍ଷୋଣିତଲେ ସ୍ଥିତା ଗୁରୁତରା ସ୍ଵର୍ଗୋ ଲଘୁତ୍ଵଂ ଗତଃ ॥ 3 ॥

ଗଂଗାତୀରମନୁତ୍ତମଂ ହି ସକଲଂ ତତ୍ରାପି କାଶ୍ୟୁତ୍ତମା
ତସ୍ୟାଂ ସା ମଣିକର୍ଣିକୋତ୍ତମତମା ୟେତ୍ରେଶ୍ଵରୋ ମୁକ୍ତିଦଃ ।
ଦେଵାନାମପି ଦୁର୍ଲଭଂ ସ୍ଥଲମିଦଂ ପାପୌଘନାଶକ୍ଷମଂ
ପୂର୍ଵୋପାର୍ଜିତପୁଣ୍ୟପୁଂଜଗମକଂ ପୁଣ୍ୟୈର୍ଜନୈଃ ପ୍ରାପ୍ୟତେ ॥ 4 ॥

ଦୁଃଖାଂଭୋଧିଗତୋ ହି ଜଂତୁନିଵହସ୍ତେଷାଂ କଥଂ ନିଷ୍କୃତିଃ
ଜ୍ଞାତ୍ଵା ତଦ୍ଧି ଵିରିଂଚିନା ଵିରଚିତା ଵାରାଣସୀ ଶର୍ମଦା ।
ଲୋକାଃସ୍ଵର୍ଗସୁଖାସ୍ତତୋଽପି ଲଘଵୋ ଭୋଗାଂତପାତପ୍ରଦାଃ
କାଶୀ ମୁକ୍ତିପୁରୀ ସଦା ଶିଵକରୀ ଧର୍ମାର୍ଥମୋକ୍ଷପ୍ରଦା ॥ 5 ॥

ଏକୋ ଵେଣୁଧରୋ ଧରାଧରଧରଃ ଶ୍ରୀଵତ୍ସଭୂଷାଧରଃ
ୟୋଽପ୍ୟେକଃ କିଲ ଶଂକରୋ ଵିଷଧରୋ ଗଂଗାଧରୋ ମାଧଵଃ ।
ୟେ ମାତର୍ମଣିକର୍ଣିକେ ତଵ ଜଲେ ମଜ୍ଜଂତି ତେ ମାନଵାଃ
ରୁଦ୍ରା ଵା ହରୟୋ ଭଵଂତି ବହଵସ୍ତେଷାଂ ବହୁତ୍ଵଂ କଥମ୍ ॥ 6 ॥

ତ୍ଵତ୍ତୀରେ ମରଣଂ ତୁ ମଂଗଳକରଂ ଦେଵୈରପି ଶ୍ଲାଘ୍ୟତେ
ଶକ୍ରସ୍ତଂ ମନୁଜଂ ସହସ୍ରନୟନୈର୍ଦ୍ରଷ୍ଟୁଂ ସଦା ତତ୍ପରଃ ।
ଆୟାଂତଂ ସଵିତା ସହସ୍ରକିରଣୈଃ ପ୍ରତ୍ୟୁଦ୍ଗତୋଽଭୂତ୍ସଦା
ପୁଣ୍ୟୋଽସୌ ଵୃଷଗୋଽଥଵା ଗରୁଡଗଃ କିଂ ମଂଦିରଂ ୟାସ୍ୟତି ॥ 7 ॥

ମଧ୍ୟାହ୍ନେ ମଣିକର୍ଣିକାସ୍ନପନଜଂ ପୁଣ୍ୟଂ ନ ଵକ୍ତୁଂ କ୍ଷମଃ
ସ୍ଵୀୟୈରବ୍ଧଶତୈଶ୍ଚତୁର୍ମୁଖଧରୋ ଵେଦାର୍ଥଦୀକ୍ଷାଗୁରୁଃ ।
ୟୋଗାଭ୍ୟାସବଲେନ ଚଂଦ୍ରଶିଖରସ୍ତତ୍ପୁଣ୍ୟପାରଂଗତ-
ସ୍ତ୍ଵତ୍ତୀରେ ପ୍ରକରୋତି ସୁପ୍ତପୁରୁଷଂ ନାରାୟଣଂ ଵା ଶିଵମ୍ ॥ 8 ॥

କୃଚ୍ଛ୍ରୈ କୋଟିଶତୈଃ ସ୍ଵପାପନିଧନଂ ୟଚ୍ଚାଶ୍ଵମେଧୈଃ ଫଲଂ
ତତ୍ସର୍ଵେ ମଣିକର୍ଣିକାସ୍ନପନଜେ ପୁଣ୍ୟେ ପ୍ରଵିଷ୍ଟଂ ଭଵେତ୍ ।
ସ୍ନାତ୍ଵା ସ୍ତୋତ୍ରମିଦଂ ନରଃ ପଠତି ଚେତ୍ସଂସାରପାଥୋନିଧିଂ
ତୀର୍ତ୍ଵା ପଲ୍ଵଲଵତ୍ପ୍ରୟାତି ସଦନଂ ତେଜୋମୟଂ ବ୍ରହ୍ମଣଃ ॥ 9 ॥

mani karnika ashtakam in odia