ଦେଵୀ ଵୈଭଵାଶ୍ଚର୍ୟ ଅଷ୍ଟୋତ୍ତର ଶତ ନାମ ସ୍ତୋତ୍ରମ୍

devi vaibhava ashcharya ashtottara sata nama stotram in odia

ଅସ୍ୟ ଶ୍ରୀ ଦେଵୀଵୈଭଵାଶ୍ଚର୍ୟାଷ୍ଟୋତ୍ତରଶତଦିଵ୍ୟନାମ ସ୍ତୋତ୍ରମହାମଂତ୍ରସ୍ୟ ଆନଂଦଭୈରଵ ଋଷିଃ, ଅନୁଷ୍ଟୁପ୍ ଛଂଦଃ, ଶ୍ରୀ ଆନଂଦଭୈରଵୀ ଶ୍ରୀମହାତ୍ରିପୁରସୁଂଦରୀ ଦେଵତା, ଐଂ ବୀଜଂ, ହ୍ରୀଂ ଶକ୍ତିଃ, ଶ୍ରୀଂ କୀଲକଂ, ମମ ଶ୍ରୀଆନଂଦଭୈରଵୀ ଶ୍ରୀମହାତ୍ରିପୁରସୁଂଦରୀ ପ୍ରସାଦସିଦ୍ଧ୍ୟର୍ଥେ ଜପେ ଵିନିୟୋଗଃ ।

ଧ୍ୟାନମ୍
କୁଂକୁମପଂକସମାଭା-
-ମଂକୁଶପାଶେକ୍ଷୁକୋଦଂଡଶରାମ୍ ।
ପଂକଜମଧ୍ୟନିଷଣ୍ଣାଂ
ପଂକେରୁହଲୋଚନାଂ ପରାଂ ଵଂଦେ ॥

ପଂଚପୂଜା
ଲଂ ପୃଥିଵ୍ୟାତ୍ମିକାୟୈ ଗଂଧଂ ସମର୍ପୟାମି ।
ହଂ ଆକାଶାତ୍ମିକାୟୈ ପୁଷ୍ପୈଃ ପୂଜୟାମି ।
ୟଂ ଵାୟ୍ଵାତ୍ମିକାୟୈ ଧୂପମାଘ୍ରାପୟାମି ।
ରଂ ଅଗ୍ନ୍ୟାତ୍ମିକାୟୈ ଦୀପଂ ଦର୍ଶୟାମି ।
ଵଂ ଅମୃତାତ୍ମିକାୟୈ ଅମୃତଂ ମହାନୈଵେଦ୍ୟଂ ନିଵେଦୟାମି ।
ସଂ ସର୍ଵାତ୍ମିକାୟୈ ସର୍ଵୋପଚାରାନ୍ ସମର୍ପୟାମି ॥

ଓଂ ଐଂ ହ୍ରୀଂ ଶ୍ରୀମ୍ ।
ପରମାନଂଦଲହରୀ ପରଚୈତନ୍ୟଦୀପିକା ।
ସ୍ଵୟଂପ୍ରକାଶକିରଣା ନିତ୍ୟଵୈଭଵଶାଲିନୀ ॥ 1 ॥

ଵିଶୁଦ୍ଧକେଵଲାଖଂଡସତ୍ୟକାଲାତ୍ମରୂପିଣୀ ।
ଆଦିମଧ୍ୟାଂତରହିତା ମହାମାୟାଵିଲାସିନୀ ॥ 2 ॥

ଗୁଣତ୍ରୟପରିଚ୍ଛେତ୍ରୀ ସର୍ଵତତ୍ତ୍ଵପ୍ରକାଶିନୀ ।
ସ୍ତ୍ରୀପୁଂସଭାଵରସିକା ଜଗତ୍ସର୍ଗାଦିଲଂପଟା ॥ 3 ॥

ଅଶେଷନାମରୂପାଦିଭେଦଚ୍ଛେଦରଵିପ୍ରଭା ।
ଅନାଦିଵାସନାରୂପା ଵାସନୋଦ୍ୟତ୍ପ୍ରପଂଚିକା ॥ 4 ॥

ପ୍ରପଂଚୋପଶମପ୍ରୌଢା ଚରାଚରଜଗନ୍ମୟୀ ।
ସମସ୍ତଜଗଦାଧାରା ସର୍ଵସଂଜୀଵନୋତ୍ସୁକା ॥ 5 ॥

ଭକ୍ତଚେତୋମୟାନଂତସ୍ଵାର୍ଥଵୈଭଵଵିଭ୍ରମା ।
ସର୍ଵାକର୍ଷଣଵଶ୍ୟାଦିସର୍ଵକର୍ମଧୁରଂଧରା ॥ 6 ॥

ଵିଜ୍ଞାନପରମାନଂଦଵିଦ୍ୟା ସଂତାନସିଦ୍ଧିଦା ।
ଆୟୁରାରୋଗ୍ୟସୌଭାଗ୍ୟବଲଶ୍ରୀକୀର୍ତିଭାଗ୍ୟଦା ॥ 7 ॥

ଧନଧାନ୍ୟମଣୀଵସ୍ତ୍ରଭୂଷାଲେପନମାଲ୍ୟଦା ।
ଗୃହଗ୍ରାମମହାରାଜ୍ୟସାମ୍ରାଜ୍ୟସୁଖଦାୟିନୀ ॥ 8 ॥

ସପ୍ତାଂଗଶକ୍ତିସଂପୂର୍ଣସାର୍ଵଭୌମଫଲପ୍ରଦା ।
ବ୍ରହ୍ମଵିଷ୍ଣୁଶିଵେଂଦ୍ରାଦିପଦଵିଶ୍ରାଣନକ୍ଷମା ॥ 9 ॥

ଭୁକ୍ତିମୁକ୍ତିମହାଭକ୍ତିଵିରକ୍ତ୍ୟଦ୍ଵୈତଦାୟିନୀ ।
ନିଗ୍ରହାନୁଗ୍ରହାଧ୍ୟକ୍ଷା ଜ୍ଞାନନିର୍ଦ୍ଵୈତଦାୟିନୀ ॥ 10 ॥

ପରକାୟପ୍ରଵେଶାଦିୟୋଗସିଦ୍ଧିପ୍ରଦାୟିନୀ ।
ଶିଷ୍ଟସଂଜୀଵନପ୍ରୌଢା ଦୁଷ୍ଟସଂହାରସିଦ୍ଧିଦା ॥ 11 ॥

ଲୀଲାଵିନିର୍ମିତାନେକକୋଟିବ୍ରହ୍ମାଂଡମଂଡଲା ।
ଏକାନେକାତ୍ମିକା ନାନାରୂପିଣ୍ୟର୍ଧାଂଗନେଶ୍ଵରୀ ॥ 12 ॥

ଶିଵଶକ୍ତିମୟୀ ନିତ୍ୟଶୃଂଗାରୈକରସପ୍ରିୟା ।
ତୁଷ୍ଟା ପୁଷ୍ଟାଽପରିଚ୍ଛିନ୍ନା ନିତ୍ୟୟୌଵନମୋହିନୀ ॥ 13 ॥

ସମସ୍ତଦେଵତାରୂପା ସର୍ଵଦେଵାଧିଦେଵତା ।
ଦେଵର୍ଷିପିତୃସିଦ୍ଧାଦିୟୋଗିନୀଭୈରଵାତ୍ମିକା ॥ 14 ॥

ନିଧିସିଦ୍ଧିମଣୀମୁଦ୍ରା ଶସ୍ତ୍ରାସ୍ତ୍ରାୟୁଧଭାସୁରା ।
ଛତ୍ରଚାମରଵାଦିତ୍ରପତାକାଵ୍ୟଜନାଂଚିତା ॥ 15 ॥

ହସ୍ତ୍ୟଶ୍ଵରଥପାଦାତାମାତ୍ୟସେନାସୁସେଵିତା ।
ପୁରୋହିତକୁଲାଚାର୍ୟଗୁରୁଶିଷ୍ୟାଦିସେଵିତା ॥ 16 ॥

ସୁଧାସମୁଦ୍ରମଧ୍ୟୋଦ୍ୟତ୍ସୁରଦ୍ରୁମନିଵାସିନୀ ।
ମଣିଦ୍ଵୀପାଂତରପ୍ରୋଦ୍ୟତ୍କଦଂବଵନଵାସିନୀ ॥ 17 ॥

ଚିଂତାମଣିଗୃହାଂତଃସ୍ଥା ମଣିମଂଟପମଧ୍ୟଗା ।
ରତ୍ନସିଂହାସନପ୍ରୋଦ୍ୟଚ୍ଛିଵମଂଚାଧିଶାୟିନୀ ॥ 18 ॥

ସଦାଶିଵମହାଲିଂଗମୂଲସଂଘଟ୍ଟୟୋନିକା ।
ଅନ୍ୟୋନ୍ୟାଲିଂଗସଂଘର୍ଷକଂଡୂସଂକ୍ଷୁବ୍ଧମାନସା ॥ 19 ॥

କଳୋଦ୍ୟଦ୍ବିଂଦୁକାଳିନ୍ୟାତୁର୍ୟନାଦପରଂପରା ।
ନାଦାଂତାନଂଦସଂଦୋହସ୍ଵୟଂଵ୍ୟକ୍ତଵଚୋଽମୃତା ॥ 20 ॥

କାମରାଜମହାତଂତ୍ରରହସ୍ୟାଚାରଦକ୍ଷିଣା ।
ମକାରପଂଚକୋଦ୍ଭୂତପ୍ରୌଢାଂତୋଲ୍ଲାସସୁଂଦରୀ ॥ 21 ॥

ଶ୍ରୀଚକ୍ରରାଜନିଲୟା ଶ୍ରୀଵିଦ୍ୟାମଂତ୍ରଵିଗ୍ରହା ।
ଅଖଂଡସଚ୍ଚିଦାନଂଦଶିଵଶକ୍ତ୍ୟୈକ୍ୟରୂପିଣୀ ॥ 22 ॥

ତ୍ରିପୁରା ତ୍ରିପୁରେଶାନୀ ମହାତ୍ରିପୁରସୁଂଦରୀ ।
ତ୍ରିପୁରାଵାସରସିକା ତ୍ରିପୁରାଶ୍ରୀସ୍ଵରୂପିଣୀ ॥ 23 ॥

ମହାପଦ୍ମଵନାଂତସ୍ଥା ଶ୍ରୀମତ୍ତ୍ରିପୁରମାଲିନୀ ।
ମହାତ୍ରିପୁରସିଦ୍ଧାଂବା ଶ୍ରୀମହାତ୍ରିପୁରାଂବିକା ॥ 24 ॥

ନଵଚକ୍ରକ୍ରମାଦେଵୀ ମହାତ୍ରିପୁରଭୈରଵୀ ।
ଶ୍ରୀମାତା ଲଲିତା ବାଲା ରାଜରାଜେଶ୍ଵରୀ ଶିଵା ॥ 25 ॥

ଉତ୍ପତ୍ତିସ୍ଥିତିସଂହାରକ୍ରମଚକ୍ରନିଵାସିନୀ ।
ଅର୍ଧମେର୍ଵାତ୍ମଚକ୍ରସ୍ଥା ସର୍ଵଲୋକମହେଶ୍ଵରୀ ॥ 26 ॥

ଵଲ୍ମୀକପୁରମଧ୍ୟସ୍ଥା ଜଂବୂଵନନିଵାସିନୀ ।
ଅରୁଣାଚଲଶୃଂଗସ୍ଥା ଵ୍ୟାଘ୍ରାଲୟନିଵାସିନୀ ॥ 27 ॥

ଶ୍ରୀକାଲହସ୍ତିନିଲୟା କାଶୀପୁରନିଵାସିନୀ ।
ଶ୍ରୀମତ୍କୈଲାସନିଲୟା ଦ୍ଵାଦଶାଂତମହେଶ୍ଵରୀ ॥ 28 ॥

ଶ୍ରୀଷୋଡଶାଂତମଧ୍ୟସ୍ଥା ସର୍ଵଵେଦାଂତଲକ୍ଷିତା ।
ଶ୍ରୁତିସ୍ମୃତିପୁରାଣେତିହାସାଗମକଲେଶ୍ଵରୀ ॥ 29 ॥

ଭୂତଭୌତିକତନ୍ମାତ୍ରଦେଵତାପ୍ରାଣହୃନ୍ମୟୀ ।
ଜୀଵେଶ୍ଵରବ୍ରହ୍ମରୂପା ଶ୍ରୀଗୁଣାଢ୍ୟା ଗୁଣାତ୍ମିକା ॥ 30 ॥

ଅଵସ୍ଥାତ୍ରୟନିର୍ମୁକ୍ତା ଵାଗ୍ରମୋମାମହୀମୟୀ ।
ଗାୟତ୍ରୀଭୁଵନେଶାନୀଦୁର୍ଗାକାଳ୍ୟାଦିରୂପିଣୀ ॥ 31 ॥

ମତ୍ସ୍ୟକୂର୍ମଵରାହାଦିନାନାରୂପଵିଲାସିନୀ ।
ମହାୟୋଗୀଶ୍ଵରାରାଧ୍ୟା ମହାଵୀରଵରପ୍ରଦା ॥ 32 ॥

ସିଦ୍ଧେଶ୍ଵରକୁଲାରାଧ୍ୟା ଶ୍ରୀମଚ୍ଚରଣଵୈଭଵା ॥ 33 ॥

ପୁନର୍ଧ୍ୟାନମ୍
କୁଂକୁମପଂକସମାଭା-
-ମଂକୁଶପାଶେକ୍ଷୁକୋଦଂଡଶରାମ୍ ।
ପଂକଜମଧ୍ୟନିଷଣ୍ଣାଂ
ପଂକେରୁହଲୋଚନାଂ ପରାଂ ଵଂଦେ ॥

ଇତି ଶ୍ରୀଗର୍ଭକୁଲାର୍ଣଵତଂତ୍ରେ ଦେଵୀ ଵୈଭଵାଶ୍ଚର୍ୟାଷ୍ଟୋତ୍ତରଶତନାମ ସ୍ତୋତ୍ରମ୍ ।

devi vaibhava ashcharya ashtottara sata nama stotram in odia