ଶ୍ରୀମଦ୍ଭଗଵଦ୍ଗୀତା ପାରାୟଣ – ଏକାଦଶୋଽଧ୍ୟାୟଃ

bhagavadgita parayana chapter 11 in odia

ଓଂ ଶ୍ରୀ ପରମାତ୍ମନେ ନମଃ
ଅଥ ଏକାଦଶୋଽଧ୍ୟାୟଃ
ଵିଶ୍ଵରୂପସଂଦର୍ଶନୟୋଗଃ

ଅର୍ଜୁନ ଉଵାଚ
ମଦନୁଗ୍ରହାୟ ପରମଂ ଗୁହ୍ୟମଧ୍ୟାତ୍ମସଂଜ୍ଞିତମ୍ ।
ୟତ୍ତ୍ଵୟୋକ୍ତଂ ଵଚସ୍ତେନ ମୋହୋଽୟଂ ଵିଗତୋ ମମ ॥1॥

ଭଵାପ୍ୟୟୌ ହି ଭୂତାନାଂ ଶ୍ରୁତୌ ଵିସ୍ତରଶୋ ମୟା ।
ତ୍ଵତ୍ତଃ କମଲପତ୍ରାକ୍ଷ ମାହାତ୍ମ୍ୟମପି ଚାଵ୍ୟୟମ୍ ॥2॥

ଏଵମେତଦ୍ୟଥାଽଽତ୍ଥ ତ୍ଵମ୍ ଆତ୍ମାନଂ ପରମେଶ୍ଵର ।
ଦ୍ରଷ୍ଟୁମିଚ୍ଛାମି ତେ ରୂପମ୍ ଐଶ୍ଵରଂ ପୁରୁଷୋତ୍ତମ ॥3॥

ମନ୍ୟସେ ୟଦି ତଚ୍ଛକ୍ୟଂ ମୟା ଦ୍ରଷ୍ଟୁମିତି ପ୍ରଭୋ ।
ୟୋଗେଶ୍ଵର ତତୋ ମେ ତ୍ଵଂ ଦର୍ଶୟାତ୍ମାନମଵ୍ୟୟମ୍ ॥4॥

ଶ୍ରୀ ଭଗଵାନୁଵାଚ
ପଶ୍ୟ ମେ ପାର୍ଥ ରୂପାଣି ଶତଶୋଽଥ ସହସ୍ରଶଃ ।
ନାନାଵିଧାନି ଦିଵ୍ୟାନି ନାନାଵର୍ଣାକୃତୀନି ଚ ॥5॥

ପଶ୍ୟାଦିତ୍ୟାନ୍ଵସୂନ୍ରୁଦ୍ରାନ୍ ଅଶ୍ଵିନୌ ମରୁତସ୍ତଥା ।
ବହୂନ୍ୟଦୃଷ୍ଟପୂର୍ଵାଣି ପଶ୍ୟାଶ୍ଚର୍ୟାଣି ଭାରତ ॥6॥

ଇହୈକସ୍ଥଂ ଜଗତ୍କୃତ୍ସ୍ନଂ ପଶ୍ୟାଦ୍ୟ ସଚରାଚରମ୍ ।
ମମ ଦେହେ ଗୁଡାକେଶ ୟଚ୍ଚାନ୍ୟତ୍ ଦ୍ରଷ୍ଟୁମିଚ୍ଛସି ॥7॥

ନ ତୁ ମାଂ ଶକ୍ୟସେ ଦ୍ରଷ୍ଟୁମ୍ ଅନେନୈଵ ସ୍ଵଚକ୍ଷୁଷା ।
ଦିଵ୍ୟଂ ଦଦାମି ତେ ଚକ୍ଷୁଃ ପଶ୍ୟ ମେ ୟୋଗମୈଶ୍ଵରମ୍ ॥8॥

ସଂଜୟ ଉଵାଚ
ଏଵମୁକ୍ତ୍ଵା ତତୋ ରାଜନ୍ ମହାୟୋଗେଶ୍ଵରୋ ହରିଃ ।
ଦର୍ଶୟାମାସ ପାର୍ଥାୟ ପରମଂ ରୂପମୈଶ୍ଵରମ୍ ॥9॥

ଅନେକଵକ୍ତ୍ରନୟନମ୍ ଅନେକାଦ୍ଭୁତଦର୍ଶନମ୍ ।
ଅନେକଦିଵ୍ୟାଭରଣଂ ଦିଵ୍ୟାନେକୋଦ୍ୟତାୟୁଧମ୍ ॥10॥

ଦିଵ୍ୟମାଲ୍ୟାଂବରଧରଂ ଦିଵ୍ୟଗଂଧାନୁଲେପନମ୍ ।
ସର୍ଵାଶ୍ଚର୍ୟମୟଂ ଦେଵମ୍ ଅନଂତଂ ଵିଶ୍ଵତୋମୁଖମ୍ ॥11॥

ଦିଵି ସୂର୍ୟସହସ୍ରସ୍ୟ ଭଵେଦ୍ୟୁଗପଦୁତ୍ଥିତା ।
ୟଦି ଭାଃ ସଦୃଶୀ ସା ସ୍ୟାତ୍ ଭାସସ୍ତସ୍ୟ ମହାତ୍ମନଃ ॥12॥

ତତ୍ରୈକସ୍ଥଂ ଜଗତ୍କୃତ୍ସ୍ନଂ ପ୍ରଵିଭକ୍ତମନେକଧା ।
ଅପଶ୍ୟଦ୍ଦେଵଦେଵସ୍ୟ ଶରୀରେ ପାଂଡଵସ୍ତଦା ॥13॥

ତତଃ ସ ଵିସ୍ମୟାଵିଷ୍ଟଃ ହୃଷ୍ଟରୋମା ଧନଂଜୟଃ ।
ପ୍ରଣମ୍ୟ ଶିରସା ଦେଵଂ କୃତାଂଜଲିରଭାଷତ ॥14॥

ଅର୍ଜୁନ ଉଵାଚ
ପଶ୍ୟାମି ଦେଵାଂସ୍ତଵ ଦେଵ ଦେହେ ସର୍ଵାଂସ୍ତଥା ଭୂତଵିଶେଷସଂଘାନ୍ ।
ବ୍ରହ୍ମାଣମୀଶଂ କମଲାସନସ୍ଥମ୍ ଋଷୀଂଶ୍ଚ ସର୍ଵାନୁରଗାଂଶ୍ଚ ଦିଵ୍ୟାନ୍ ॥15॥

ଅନେକବାହୂଦରଵକ୍ତ୍ରନେତ୍ରଂ ପଶ୍ୟାମି ତ୍ଵା ସର୍ଵତୋଽନଂତରୂପମ୍ ।
ନାଂତଂ ନ ମଧ୍ୟଂ ନ ପୁନସ୍ତଵାଦିଂ ପଶ୍ୟାମି ଵିଶ୍ଵେଶ୍ଵର ଵିଶ୍ଵରୂପ ॥16॥

କିରୀଟିନଂ ଗଦିନଂ ଚକ୍ରିଣଂ ଚ ତେଜୋରାଶିଂ ସର୍ଵତୋ ଦୀପ୍ତିମଂତମ୍ ।
ପଶ୍ୟାମି ତ୍ଵାଂ ଦୁର୍ନିରୀକ୍ଷ୍ୟଂ ସମଂତାତ୍ ଦୀପ୍ତାନଲାର୍କଦ୍ୟୁତିମପ୍ରମେୟମ୍ ॥17॥

ତ୍ଵମକ୍ଷରଂ ପରମଂ ଵେଦିତଵ୍ୟଂ ତ୍ଵମସ୍ୟ ଵିଶ୍ଵସ୍ୟ ପରଂ ନିଧାନମ୍ ।
ତ୍ଵମଵ୍ୟୟଃ ଶାଶ୍ଵତଧର୍ମଗୋପ୍ତା ସନାତନସ୍ତ୍ଵଂ ପୁରୁଷୋ ମତୋ ମେ ॥18॥

ଅନାଦିମଧ୍ୟାଂତମନଂତଵୀର୍ୟମ୍ ଅନଂତବାହୁଂ ଶଶିସୂର୍ୟନେତ୍ରମ୍ ।
ପଶ୍ୟାମି ତ୍ଵାଂ ଦୀପ୍ତହୁତାଶଵକ୍ତ୍ରଂ ସ୍ଵତେଜସା ଵିଶ୍ଵମିଦଂ ତପଂତମ୍ ॥19॥

ଦ୍ୟାଵାପୃଥିଵ୍ୟୋରିଦମଂତରଂ ହି ଵ୍ୟାପ୍ତଂ ତ୍ଵୟୈକେନ ଦିଶଶ୍ଚ ସର୍ଵାଃ ।
ଦୃଷ୍ଟ୍ଵାଦ୍ଭୁତଂ ରୂପମିଦଂ ତଵୋଗ୍ରଂ ଲୋକତ୍ରୟଂ ପ୍ରଵ୍ୟଥିତଂ ମହାତ୍ମନ୍ ॥20॥

ଅମୀ ହି ତ୍ଵା ସୁରସଂଘା ଵିଶଂତି କେଚିଦ୍ଭୀତାଃ ପ୍ରାଂଜଲୟୋ ଗୃଣଂତି ।
ସ୍ଵସ୍ତୀତ୍ୟୁକ୍ତ୍ଵା ମହର୍ଷିସିଦ୍ଧସଂଘାଃ ସ୍ତୁଵଂତି ତ୍ଵାଂ ସ୍ତୁତିଭିଃ ପୁଷ୍କଲାଭିଃ ॥21॥

ରୁଦ୍ରାଦିତ୍ୟା ଵସଵୋ ୟେ ଚ ସାଧ୍ୟାଃ ଵିଶ୍ଵେଽଶ୍ଵିନୌ ମରୁତଶ୍ଚୋଷ୍ମପାଶ୍ଚ ।
ଗଂଧର୍ଵୟକ୍ଷାସୁରସିଦ୍ଧସଂଘାଃ ଵୀକ୍ଷଂତେ ତ୍ଵାଂ ଵିସ୍ମିତାଶ୍ଚୈଵ ସର୍ଵେ ॥22॥

ରୂପଂ ମହତ୍ତେ ବହୁଵକ୍ତ୍ର ନେତ୍ରଂ ମହାବାହୋ ବହୁବାହୂରୁପାଦମ୍ ।
ବହୂଦରଂ ବହୁଦଂଷ୍ଟ୍ରାକରାଲଂ ଦୃଷ୍ଟ୍ଵା ଲୋକାଃ ପ୍ରଵ୍ୟଥିତାସ୍ତଥାଽହମ୍ ॥23॥

ନଭଃ ସ୍ପୃଶଂ ଦୀପ୍ତମନେକଵର୍ଣଂ ଵ୍ୟାତ୍ତାନନଂ ଦୀପ୍ତଵିଶାଲନେତ୍ରମ୍ ।
ଦୃଷ୍ଟ୍ଵା ହି ତ୍ଵାଂ ପ୍ରଵ୍ୟଥିତାଂତରାତ୍ମା ଧୃତିଂ ନ ଵିଂଦାମି ଶମଂ ଚ ଵିଷ୍ଣୋ ॥24॥

ଦଂଷ୍ଟ୍ରାକରାଲାନି ଚ ତେ ମୁଖାନି ଦୃଷ୍ଟ୍ଵୈଵ କାଲାନଲସନ୍ନିଭାନି ।
ଦିଶୋ ନ ଜାନେ ନ ଲଭେ ଚ ଶର୍ମ ପ୍ରସୀଦ ଦେଵେଶ ଜଗନ୍ନିଵାସ ॥25॥

ଅମୀ ଚ ତ୍ଵାଂ ଧୃତରାଷ୍ଟ୍ରସ୍ୟ ପୁତ୍ରାଃ ସର୍ଵେ ସହୈଵାଵନିପାଲସଂଘୈଃ ।
ଭୀଷ୍ମୋ ଦ୍ରୋଣଃ ସୂତପୁତ୍ରସ୍ତଥାଽସୌ ସହାସ୍ମଦୀୟୈରପି ୟୋଧମୁଖ୍ୟୈଃ ॥26॥

ଵକ୍ତ୍ରାଣି ତେ ତ୍ଵରମାଣା ଵିଶଂତି ଦଂଷ୍ଟ୍ରାକରାଲାନି ଭୟାନକାନି ।
କେଚିଦ୍ଵିଲଗ୍ନା ଦଶନାଂତରେଷୁ ସଂଦୃଶ୍ୟଂତେ ଚୂର୍ଣିତୈରୁତ୍ତମାଂଗୈଃ ॥27॥

ୟଥା ନଦୀନାଂ ବହଵୋଽଂବୁଵେଗାଃ ସମୁଦ୍ରମେଵାଭିମୁଖା ଦ୍ରଵଂତି ।
ତଥା ତଵାମୀ ନରଲୋକଵୀରାଃ ଵିଶଂତି ଵକ୍ତ୍ରାଣ୍ୟଭିଵିଜ୍ଵଲଂତି ॥28॥

ୟଥା ପ୍ରଦୀପ୍ତଂ ଜ୍ଵଲନଂ ପତଂଗାଃ ଵିଶଂତି ନାଶାୟ ସମୃଦ୍ଧଵେଗାଃ ।
ତଥୈଵ ନାଶାୟ ଵିଶଂତି ଲୋକାଃ ତଵାପି ଵକ୍ତ୍ରାଣି ସମୃଦ୍ଧଵେଗାଃ ॥29॥

ଲେଲିହ୍ୟସେ ଗ୍ରସମାନଃ ସମଂତାତ୍ ଲୋକାନ୍ସମଗ୍ରାନ୍ଵଦନୈର୍ଜ୍ଵଲଦ୍ଭିଃ ।
ତେଜୋଭିରାପୂର୍ୟ ଜଗତ୍ସମଗ୍ରଂ ଭାସସ୍ତଵୋଗ୍ରାଃ ପ୍ରତପଂତି ଵିଷ୍ଣୋ ॥30॥

ଆଖ୍ୟାହି ମେ କୋ ଭଵାନୁଗ୍ରରୂପଃ ନମୋଽସ୍ତୁ ତେ ଦେଵଵର ପ୍ରସୀଦ ।
ଵିଜ୍ଞାତୁମିଚ୍ଛାମି ଭଵଂତମାଦ୍ୟଂ ନ ହି ପ୍ରଜାନାମି ତଵ ପ୍ରଵୃତ୍ତିମ୍ ॥31॥

ଶ୍ରୀ ଭଗଵାନୁଵାଚ
କାଲୋଽସ୍ମି ଲୋକକ୍ଷୟକୃତ୍ପ୍ରଵୃଦ୍ଧଃ ଲୋକାନ୍ସମାହର୍ତୁମିହ ପ୍ରଵୃତ୍ତଃ ।
ଋତେଽପି ତ୍ଵା ନ ଭଵିଷ୍ୟଂତି ସର୍ଵେ ୟେଽଵସ୍ଥିତାଃ ପ୍ରତ୍ୟନୀକେଷୁ ୟୋଧାଃ ॥32॥

ତସ୍ମାତ୍ତ୍ଵମୁତ୍ତିଷ୍ଠ ୟଶୋ ଲଭସ୍ଵ ଜିତ୍ଵା ଶତ୍ରୂନ୍ଭୁଂକ୍ଷ୍ଵ ରାଜ୍ୟଂ ସମୃଦ୍ଧମ୍ ।
ମୟୈଵୈତେ ନିହତାଃ ପୂର୍ଵମେଵ ନିମିତ୍ତମାତ୍ରଂ ଭଵ ସଵ୍ୟସାଚିନ୍ ॥33॥

ଦ୍ରୋଣଂ ଚ ଭୀଷ୍ମଂ ଚ ଜୟଦ୍ରଥଂ ଚ କର୍ଣଂ ତଥାନ୍ୟାନପି ୟୋଧଵୀରାନ୍ ।
ମୟା ହତାଂସ୍ତ୍ଵଂ ଜହି ମା ଵ୍ୟଥିଷ୍ଠାଃ ୟୁଧ୍ୟସ୍ଵ ଜେତାସି ରଣେ ସପତ୍ନାନ୍ ॥34॥

ସଂଜୟ ଉଵାଚ
ଏତଚ୍ଛ୍ରୁତ୍ଵା ଵଚନଂ କେଶଵସ୍ୟ କୃତାଂଜଲିର୍ଵେପମାନଃ କିରୀଟୀ ।
ନମସ୍କୃତ୍ଵା ଭୂୟ ଏଵାହ କୃଷ୍ଣଂ ସଗଦ୍ଗଦଂ ଭୀତଭୀତଃ ପ୍ରଣମ୍ୟ ॥35॥

ଅର୍ଜୁନ ଉଵାଚ
ସ୍ଥାନେ ହୃଷୀକେଶ ତଵ ପ୍ରକୀର୍ତ୍ୟା ଜଗତ୍ପ୍ରହୃଷ୍ୟତ୍ୟନୁରଜ୍ୟତେ ଚ ।
ରକ୍ଷାଂସି ଭୀତାନି ଦିଶୋ ଦ୍ରଵଂତି ସର୍ଵେ ନମସ୍ୟଂତି ଚ ସିଦ୍ଧସଂଘାଃ ॥36॥

କସ୍ମାଚ୍ଚ ତେ ନ ନମେରନ୍ମହାତ୍ମନ୍ ଗରୀୟସେ ବ୍ରହ୍ମଣୋଽପ୍ୟାଦିକର୍ତ୍ରେ ।
ଅନଂତ ଦେଵେଶ ଜଗନ୍ନିଵାସ ତ୍ଵମକ୍ଷରଂ ସଦସତ୍ତତ୍ପରଂ ୟତ୍ ॥37॥

ତ୍ଵମାଦିଦେଵଃ ପୁରୁଷଃ ପୁରାଣଃ ତ୍ଵମସ୍ୟ ଵିଶ୍ଵସ୍ୟ ପରଂ ନିଧାନମ୍ ।
ଵେତ୍ତାଽସି ଵେଦ୍ୟଂ ଚ ପରଂ ଚ ଧାମ ତ୍ଵୟା ତତଂ ଵିଶ୍ଵମନଂତରୂପ ॥38॥

ଵାୟୁର୍ୟମୋଽଗ୍ନିର୍ଵରୁଣଃ ଶଶାଂକଃ ପ୍ରଜାପତିସ୍ତ୍ଵଂ ପ୍ରପିତାମହଶ୍ଚ ।
ନମୋ ନମସ୍ତେଽସ୍ତୁ ସହସ୍ରକୃତ୍ଵଃ ପୁନଶ୍ଚ ଭୂୟୋଽପି ନମୋ ନମସ୍ତେ ॥39॥

ନମଃ ପୁରସ୍ତାଦଥ ପୃଷ୍ଠତସ୍ତେ ନମୋଽସ୍ତୁ ତେ ସର୍ଵତ ଏଵ ସର୍ଵ ।
ଅନଂତଵୀର୍ୟାମିତଵିକ୍ରମସ୍ତ୍ଵଂ ସର୍ଵଂ ସମାପ୍ନୋଷି ତତୋଽସି ସର୍ଵଃ ॥40॥

ସଖେତି ମତ୍ଵା ପ୍ରସଭଂ ୟଦୁକ୍ତଂ ହେ କୃଷ୍ଣ ହେ ୟାଦଵ ହେ ସଖେତି ।
ଅଜାନତା ମହିମାନଂ ତଵେଦଂ ମୟା ପ୍ରମାଦାତ୍ପ୍ରଣୟେନ ଵାଽପି ॥41॥

ୟଚ୍ଚାପହାସାର୍ଥମସତ୍କୃତୋଽସି ଵିହାରଶୟ୍ୟାସନଭୋଜନେଷୁ ।
ଏକୋଽଥଵାପ୍ୟଚ୍ୟୁତ ତତ୍ସମକ୍ଷଂ ତତ୍କ୍ଷାମୟେ ତ୍ଵାମହମପ୍ରମେୟମ୍ ॥42॥

ପିତାସି ଲୋକସ୍ୟ ଚରାଚରସ୍ୟ ତ୍ଵମସ୍ୟ ପୂଜ୍ୟଶ୍ଚ ଗୁରୁର୍ଗରୀୟାନ୍ ।
ନ ତ୍ଵତ୍ସମୋଽସ୍ତ୍ୟଭ୍ୟଧିକଃ କୁତୋଽନ୍ୟଃ ଲୋକତ୍ରୟେଽପ୍ୟପ୍ରତିମପ୍ରଭାଵ ॥43॥

ତସ୍ମାତ୍ପ୍ରଣମ୍ୟ ପ୍ରଣିଧାୟ କାୟଂ ପ୍ରସାଦୟେ ତ୍ଵାମହମୀଶମୀଡ୍ୟମ୍ ।
ପିତେଵ ପୁତ୍ରସ୍ୟ ସଖେଵ ସଖ୍ୟୁଃ ପ୍ରିୟଃ ପ୍ରିୟାୟାର୍ହସି ଦେଵ ସୋଢୁମ୍ ॥44॥

ଅଦୃଷ୍ଟପୂର୍ଵଂ ହୃଷିତୋଽସ୍ମି ଦୃଷ୍ଟ୍ଵା ଭୟେନ ଚ ପ୍ରଵ୍ୟଥିତଂ ମନୋ ମେ ।
ତଦେଵ ମେ ଦର୍ଶୟ ଦେଵରୂପଂ ପ୍ରସୀଦ ଦେଵେଶ ଜଗନ୍ନିଵାସ ॥45॥

କିରୀଟିନଂ ଗଦିନଂ ଚକ୍ରହସ୍ତମ୍ ଇଚ୍ଛାମି ତ୍ଵାଂ ଦ୍ରଷ୍ଟୁମହଂ ତଥୈଵ ।
ତେନୈଵ ରୂପେଣ ଚତୁର୍ଭୁଜେନ ସହସ୍ରବାହୋ ଭଵ ଵିଶ୍ଵମୂର୍ତେ ॥46॥

ଶ୍ରୀ ଭଗଵାନୁଵାଚ –
ମୟା ପ୍ରସନ୍ନେନ ତଵାର୍ଜୁନେଦଂ ରୂପଂ ପରଂ ଦର୍ଶିତମାତ୍ମୟୋଗାତ୍ ।
ତେଜୋମୟଂ ଵିଶ୍ଵମନଂତମାଦ୍ୟଂ ୟନ୍ମେ ତ୍ଵଦନ୍ୟେନ ନ ଦୃଷ୍ଟପୂର୍ଵମ୍ ॥47॥

ନ ଵେଦୟଜ୍ଞାଧ୍ୟୟନୈର୍ନ ଦାନୈଃ ନ ଚ କ୍ରିୟାଭିର୍ନ ତପୋଭିରୁଗ୍ରୈଃ ।
ଏଵଂରୂପଃ ଶକ୍ୟ ଅହଂ ନୃଲୋକେ ଦ୍ରଷ୍ଟୁଂ ତ୍ଵଦନ୍ୟେନ କୁରୁପ୍ରଵୀର ॥48॥

ମା ତେ ଵ୍ୟଥା ମା ଚ ଵିମୂଢଭାଵଃ ଦୃଷ୍ଟ୍ଵା ରୂପଂ ଘୋରମୀଦୃଙ୍ମମେଦମ୍ ।
ଵ୍ୟପେତଭୀଃ ପ୍ରୀତମନାଃ ପୁନସ୍ତ୍ଵଂ ତଦେଵ ମେ ରୂପମିଦଂ ପ୍ରପଶ୍ୟ ॥49॥

ସଂଜୟ ଉଵାଚ
ଇତ୍ୟର୍ଜୁନଂ ଵାସୁଦେଵସ୍ତଥୋକ୍ତ୍ଵା ସ୍ଵକଂ ରୂପଂ ଦର୍ଶୟାମାସ ଭୂୟଃ ।
ଆଶ୍ଵାସୟାମାସ ଚ ଭୀତମେନଂ ଭୂତ୍ଵା ପୁନଃ ସୌମ୍ୟଵପୁର୍ମହାତ୍ମା ॥50॥

ଅର୍ଜୁନ ଉଵାଚ
ଦୃଷ୍ଟ୍ଵେଦଂ ମାନୁଷଂ ରୂପଂ ତଵ ସୌମ୍ୟଂ ଜନାର୍ଦନ ।
ଇଦାନୀମସ୍ମି ସଂଵୃତ୍ତଃ ସଚେତାଃ ପ୍ରକୃତିଂ ଗତଃ ॥51॥

ଶ୍ରୀ ଭଗଵାନୁଵାଚ
ସୁଦୁର୍ଦର୍ଶମିଦଂ ରୂପଂ ଦୃଷ୍ଟଵାନସି ୟନ୍ମମ ।
ଦେଵା ଅପ୍ୟସ୍ୟ ରୂପସ୍ୟ ନିତ୍ୟଂ ଦର୍ଶନକାଂକ୍ଷିଣଃ ॥52॥

ନାହଂ ଵେଦୈର୍ନ ତପସା ନ ଦାନେନ ନ ଚେଜ୍ୟୟା ।
ଶକ୍ୟ ଏଵଂଵିଧୋ ଦ୍ରଷ୍ଟୁଂ ଦୃଷ୍ଟଵାନସି ମାଂ ୟଥା ॥53॥

ଭକ୍ତ୍ୟା ତ୍ଵନନ୍ୟୟା ଶକ୍ୟଃ ଅହମେଵଂଵିଧୋଽର୍ଜୁନ ।
ଜ୍ଞାତୁଂ ଦ୍ରଷ୍ଟୁଂ ଚ ତତ୍ତ୍ଵେନ ପ୍ରଵେଷ୍ଟୁଂ ଚ ପରଂତପ ॥54॥

ମତ୍କର୍ମକୃନ୍ମତ୍ପରମଃ ମଦ୍ଭକ୍ତଃ ସଂଗଵର୍ଜିତଃ ।
ନିର୍ଵୈରଃ ସର୍ଵଭୂତେଷୁ ୟଃ ସ ମାମେତି ପାଂଡଵ ॥55॥

॥ ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୁ ଉପନିଷତ୍ସୁ ବ୍ରହ୍ମଵିଦ୍ୟାୟାଂ
ୟୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ ଵିଶ୍ଵରୂପସଂଦର୍ଶନୟୋଗୋ ନାମ ଏକାଦଶୋଽଧ୍ୟାୟଃ ॥

bhagavadgita parayana chapter 11 in odia