നാരായണീയം ദശക 35 – ശ്രീരാമാവതാരമ്-2

narayaniyam dashaka 35 in malayalam

നീതസ്സുഗ്രീവമൈത്രീം തദനു ഹനുമതാ ദുംദുഭേഃ കായമുച്ചൈഃ
ക്ഷിപ്ത്വാംഗുഷ്ഠേന ഭൂയോ ലുലുവിഥ യുഗപത് പത്രിണാ സപ്ത സാലാന് ।
ഹത്വാ സുഗ്രീവഘാതോദ്യതമതുലബലം ബാലിനം വ്യാജവൃത്ത്യാ
വര്ഷാവേലാമനൈഷീർവിരഹതരലിതസ്ത്വം മതംഗാശ്രമാംതേ ॥1॥

സുഗ്രീവേണാനുജോക്ത്യാ സഭയമഭിയതാ വ്യൂഹിതാം വാഹിനീം താ-
മൃക്ഷാണാം വീക്ഷ്യ ദിക്ഷു ദ്രുതമഥ ദയിതാമാര്ഗണായാവനമ്രാമ് ।
സംദേശം ചാംഗുലീയം പവനസുതകരേ പ്രാദിശോ മോദശാലീ
മാര്ഗേ മാര്ഗേ മമാര്ഗേ കപിഭിരപി തദാ ത്വത്പ്രിയാ സപ്രയാസൈഃ ॥2॥

ത്വദ്വാര്താകര്ണനോദ്യദ്ഗരുദുരുജവസംപാതിസംപാതിവാക്യ-
പ്രോത്തീര്ണാര്ണോധിരംതര്നഗരി ജനകജാം വീക്ഷ്യ ദത്വാംഗുലീയമ് ।
പ്രക്ഷുദ്യോദ്യാനമക്ഷക്ഷപണചണരണഃ സോഢബംധോ ദശാസ്യം
ദൃഷ്ട്വാ പ്ലുഷ്ട്വാ ച ലംകാം ഝടിതി സ ഹനുമാന് മൌലിരത്നം ദദൌ തേ ॥3॥

ത്വം സുഗ്രീവാംഗദാദിപ്രബലകപിചമൂചക്രവിക്രാംതഭൂമീ-
ചക്രോഽഭിക്രമ്യ പാരേജലധി നിശിചരേംദ്രാനുജാശ്രീയമാണഃ ।
തത്പ്രോക്താം ശത്രുവാര്താം രഹസി നിശമയന് പ്രാര്ഥനാപാര്ഥ്യരോഷ-
പ്രാസ്താഗ്നേയാസ്ത്രതേജസ്ത്രസദുദധിഗിരാ ലബ്ധവാന് മധ്യമാര്ഗമ് ॥4॥

കീശൈരാശാംതരോപാഹൃതഗിരിനികരൈഃ സേതുമാധാപ്യ യാതോ
യാതൂന്യാമര്ദ്യ ദംഷ്ട്രാനഖശിഖരിശിലാസാലശസ്ത്രൈഃ സ്വസൈന്യൈഃ ।
വ്യാകുർവന് സാനുജസ്ത്വം സമരഭുവി പരം വിക്രമം ശക്രജേത്രാ
വേഗാന്നാഗാസ്ത്രബദ്ധഃ പതഗപതിഗരുന്മാരുതൈര്മോചിതോഽഭൂഃ ॥5॥

സൌമിത്രിസ്ത്വത്ര ശക്തിപ്രഹൃതിഗലദസുർവാതജാനീതശൈല-
ഘ്രാണാത് പ്രാണാനുപേതോ വ്യകൃണുത കുസൃതിശ്ലാഘിനം മേഘനാദമ് ।
മായാക്ഷോഭേഷു വൈഭീഷണവചനഹൃതസ്തംഭനഃ കുംഭകര്ണം
സംപ്രാപ്തം കംപിതോർവീതലമഖിലചമൂഭക്ഷിണം വ്യക്ഷിണോസ്ത്വമ് ॥6॥

ഗൃഹ്ണന് ജംഭാരിസംപ്രേഷിതരഥകവചൌ രാവണേനാഭിയുദ്ധ്യന്
ബ്രഹ്മാസ്ത്രേണാസ്യ ഭിംദന് ഗലതതിമബലാമഗ്നിശുദ്ധാം പ്രഗൃഹ്ണന് ।
ദേവശ്രേണീവരോജ്ജീവിതസമരമൃതൈരക്ഷതൈഃ ഋക്ഷസംഘൈ-
ര്ലംകാഭര്ത്രാ ച സാകം നിജനഗരമഗാഃ സപ്രിയഃ പുഷ്പകേണ ॥7॥

പ്രീതോ ദിവ്യാഭിഷേകൈരയുതസമധികാന് വത്സരാന് പര്യരംസീ-
ര്മൈഥില്യാം പാപവാചാ ശിവ! ശിവ! കില താം ഗര്ഭിണീമഭ്യഹാസീഃ ।
ശത്രുഘ്നേനാര്ദയിത്വാ ലവണനിശിചരം പ്രാര്ദയഃ ശൂദ്രപാശം
താവദ്വാല്മീകിഗേഹേ കൃതവസതിരുപാസൂത സീതാ സുതൌ തേ ॥8॥

വാല്മീകേസ്ത്വത്സുതോദ്ഗാപിതമധുരകൃതേരാജ്ഞയാ യജ്ഞവാടേ
സീതാം ത്വയ്യാപ്തുകാമേ ക്ഷിതിമവിശദസൌ ത്വം ച കാലാര്ഥിതോഽഭൂഃ ।
ഹേതോഃ സൌമിത്രിഘാതീ സ്വയമഥ സരയൂമഗ്നനിശ്ശേഷഭൃത്യൈഃ
സാകം നാകം പ്രയാതോ നിജപദമഗമോ ദേവ വൈകുംഠമാദ്യമ് ॥9॥

സോഽയം മര്ത്യാവതാരസ്തവ ഖലു നിയതം മര്ത്യശിക്ഷാര്ഥമേവം
വിശ്ലേഷാര്തിര്നിരാഗസ്ത്യജനമപി ഭവേത് കാമധര്മാതിസക്ത്യാ ।
നോ ചേത് സ്വാത്മാനുഭൂതേഃ ക്വ നു തവ മനസോ വിക്രിയാ ചക്രപാണേ
സ ത്വം സത്ത്വൈകമൂര്തേ പവനപുരപതേ വ്യാധുനു വ്യാധിതാപാന് ॥10॥

narayaniyam dashaka 35 in malayalam