નારાયણીયં દશક 35 – શ્રીરામાવતારમ્-2

narayaniyam dashaka 35 in gujarati

નીતસ્સુગ્રીવમૈત્રીં તદનુ હનુમતા દુંદુભેઃ કાયમુચ્ચૈઃ
ક્ષિપ્ત્વાંગુષ્ઠેન ભૂયો લુલુવિથ યુગપત્ પત્રિણા સપ્ત સાલાન્ ।
હત્વા સુગ્રીવઘાતોદ્યતમતુલબલં બાલિનં વ્યાજવૃત્ત્યા
વર્ષાવેલામનૈષીર્વિરહતરલિતસ્ત્વં મતંગાશ્રમાંતે ॥1॥

સુગ્રીવેણાનુજોક્ત્યા સભયમભિયતા વ્યૂહિતાં વાહિનીં તા-
મૃક્ષાણાં વીક્ષ્ય દિક્ષુ દ્રુતમથ દયિતામાર્ગણાયાવનમ્રામ્ ।
સંદેશં ચાંગુલીયં પવનસુતકરે પ્રાદિશો મોદશાલી
માર્ગે માર્ગે મમાર્ગે કપિભિરપિ તદા ત્વત્પ્રિયા સપ્રયાસૈઃ ॥2॥

ત્વદ્વાર્તાકર્ણનોદ્યદ્ગરુદુરુજવસંપાતિસંપાતિવાક્ય-
પ્રોત્તીર્ણાર્ણોધિરંતર્નગરિ જનકજાં વીક્ષ્ય દત્વાંગુલીયમ્ ।
પ્રક્ષુદ્યોદ્યાનમક્ષક્ષપણચણરણઃ સોઢબંધો દશાસ્યં
દૃષ્ટ્વા પ્લુષ્ટ્વા ચ લંકાં ઝટિતિ સ હનુમાન્ મૌલિરત્નં દદૌ તે ॥3॥

ત્વં સુગ્રીવાંગદાદિપ્રબલકપિચમૂચક્રવિક્રાંતભૂમી-
ચક્રોઽભિક્રમ્ય પારેજલધિ નિશિચરેંદ્રાનુજાશ્રીયમાણઃ ।
તત્પ્રોક્તાં શત્રુવાર્તાં રહસિ નિશમયન્ પ્રાર્થનાપાર્થ્યરોષ-
પ્રાસ્તાગ્નેયાસ્ત્રતેજસ્ત્રસદુદધિગિરા લબ્ધવાન્ મધ્યમાર્ગમ્ ॥4॥

કીશૈરાશાંતરોપાહૃતગિરિનિકરૈઃ સેતુમાધાપ્ય યાતો
યાતૂન્યામર્દ્ય દંષ્ટ્રાનખશિખરિશિલાસાલશસ્ત્રૈઃ સ્વસૈન્યૈઃ ।
વ્યાકુર્વન્ સાનુજસ્ત્વં સમરભુવિ પરં વિક્રમં શક્રજેત્રા
વેગાન્નાગાસ્ત્રબદ્ધઃ પતગપતિગરુન્મારુતૈર્મોચિતોઽભૂઃ ॥5॥

સૌમિત્રિસ્ત્વત્ર શક્તિપ્રહૃતિગલદસુર્વાતજાનીતશૈલ-
ઘ્રાણાત્ પ્રાણાનુપેતો વ્યકૃણુત કુસૃતિશ્લાઘિનં મેઘનાદમ્ ।
માયાક્ષોભેષુ વૈભીષણવચનહૃતસ્તંભનઃ કુંભકર્ણં
સંપ્રાપ્તં કંપિતોર્વીતલમખિલચમૂભક્ષિણં વ્યક્ષિણોસ્ત્વમ્ ॥6॥

ગૃહ્ણન્ જંભારિસંપ્રેષિતરથકવચૌ રાવણેનાભિયુદ્ધ્યન્
બ્રહ્માસ્ત્રેણાસ્ય ભિંદન્ ગલતતિમબલામગ્નિશુદ્ધાં પ્રગૃહ્ણન્ ।
દેવશ્રેણીવરોજ્જીવિતસમરમૃતૈરક્ષતૈઃ ઋક્ષસંઘૈ-
ર્લંકાભર્ત્રા ચ સાકં નિજનગરમગાઃ સપ્રિયઃ પુષ્પકેણ ॥7॥

પ્રીતો દિવ્યાભિષેકૈરયુતસમધિકાન્ વત્સરાન્ પર્યરંસી-
ર્મૈથિલ્યાં પાપવાચા શિવ! શિવ! કિલ તાં ગર્ભિણીમભ્યહાસીઃ ।
શત્રુઘ્નેનાર્દયિત્વા લવણનિશિચરં પ્રાર્દયઃ શૂદ્રપાશં
તાવદ્વાલ્મીકિગેહે કૃતવસતિરુપાસૂત સીતા સુતૌ તે ॥8॥

વાલ્મીકેસ્ત્વત્સુતોદ્ગાપિતમધુરકૃતેરાજ્ઞયા યજ્ઞવાટે
સીતાં ત્વય્યાપ્તુકામે ક્ષિતિમવિશદસૌ ત્વં ચ કાલાર્થિતોઽભૂઃ ।
હેતોઃ સૌમિત્રિઘાતી સ્વયમથ સરયૂમગ્નનિશ્શેષભૃત્યૈઃ
સાકં નાકં પ્રયાતો નિજપદમગમો દેવ વૈકુંઠમાદ્યમ્ ॥9॥

સોઽયં મર્ત્યાવતારસ્તવ ખલુ નિયતં મર્ત્યશિક્ષાર્થમેવં
વિશ્લેષાર્તિર્નિરાગસ્ત્યજનમપિ ભવેત્ કામધર્માતિસક્ત્યા ।
નો ચેત્ સ્વાત્માનુભૂતેઃ ક્વ નુ તવ મનસો વિક્રિયા ચક્રપાણે
સ ત્વં સત્ત્વૈકમૂર્તે પવનપુરપતે વ્યાધુનુ વ્યાધિતાપાન્ ॥10॥

narayaniyam dashaka 35 in gujarati