ಶ್ರೀ ಬಗಲಾಮುಖೀ ಸೂಕ್ತಂ (ಕೃತ್ಯಾಪರಿಹರಣಸೂಕ್ತಂ)

(ಅ.ವೇ.ಕಾ-೫.ಸೂ-೩೧)

ಯಾಂ ತೇ॑ ಚ॒ಕ್ರುರಾ॒ಮೇ ಪಾತ್ರೇ॒ ಯಾಂ ಚ॒ಕ್ರುರ್ಮಿ॒ಶ್ರಧಾ॑ನ್ಯೇ ।
ಆ॒ಮೇ ಮಾಂ॒ಸೇ ಕೃ॒ತ್ಯಾಂ ಯಾಂ ಚ॒ಕ್ರುಃ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೧ ॥

ಯಾಂ ತೇ॑ ಚ॒ಕ್ರುಃ ಕೃ॑ಕ॒ವಾಕಾ॑ವ॒ಜೇ ವಾ॒ ಯಾಂ ಕು॑ರೀ॒ರಿಣಿ॑ ।
ಅವ್ಯಾಂ ತೇ ಕೃತ್ಯಾಂ ಯಾಂ ಚ॒ಕ್ರುಃ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೨ ॥

ಯಾಂ ತೇ॑ ಚ॒ಕ್ರುರೇಕ॑ಶಫೇ ಪಶೂ॒ನಾಮುಭ॒ಯಾದ॑ತಿ ।
ಗ॒ರ್ದ॒ಭೇ ಕೃ॒ತ್ಯಾಂ ಯಾಂ ಚ॒ಕ್ರುಃ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೩ ॥

ಯಾಂ ತೇ॑ ಚ॒ಕ್ರುರ॑ಮೂ॒ಲಾಯಾಂ॑ ವಲ॒ಗಂ ವಾ॑ ನರಾ॒ಚ್ಯಾಂ ।
ಕ್ಷೇತ್ರೇ॑ ತೇ ಕೃ॒ತ್ಯಾಂ ಯಾಂ ಚ॒ಕ್ರುಃ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೪ ॥

ಯಾಂ ತೇ॑ ಚ॒ಕ್ರುರ್ಗಾರ್ಹ॑ಪತ್ಯೇ ಪೂರ್ವಾ॒ಗ್ನಾವು॒ತ ದು॒ಶ್ಚಿತ॑: ।
ಶಾಲಾ॑ಯಾಂ ಕೃ॒ತ್ಯಾಂ ಯಾಂ ಚ॒ಕ್ರುಃ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೫ ॥

ಯಾಂ ತೇ॑ ಚ॒ಕ್ರುಃ ಸ॒ಭಾಯಾಂ॒ ಯಾಂ ಚ॒ಕ್ರುರ॑ಧಿ॒ದೇವ॑ನೇ ।
ಅ॒ಕ್ಷೇಷು॑ ಕೃ॒ತ್ಯಾಂ ಯಾಂ ಚ॒ಕ್ರುಃ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೬ ॥

ಯಾಂ ತೇ॑ ಚ॒ಕ್ರುಃ ಸೇನಾ॑ಯಾಂ॒ ಯಾಂ ಚ॒ಕ್ರುರಿ॑ಷ್ವಾಯು॒ಧೇ ।
ದುಂ॒ದು॒ಭೌ ಕೃ॒ತ್ಯಾಂ ಯಾಂ ಚ॒ಕ್ರುಃ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೭ ॥

ಯಾಂ ತೇ॑ ಕೃ॒ತ್ಯಾಂ ಕೂಪೇ॑ಽವದ॒ಧುಃ ಶ್ಮ॑ಶಾ॒ನೇ ವಾ॑ ನಿಚ॒ಖ್ನುಃ ।
ಸದ್ಮ॑ನಿ ಕೃ॒ತ್ಯಾಂ ಯಾಂ ಚ॒ಕ್ರುಃ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೮ ॥

ಯಾಂ ತೇ॑ ಚ॒ಕ್ರುಃ ಪು॑ರುಷಾ॒ಸ್ಥೇ ಅ॒ಗ್ನೌ ಸಂಕ॑ಸುಕೇ ಚ॒ ಯಾಂ ।
ಮ್ರೋ॒ಕಂ ನಿ॑ರ್ದಾ॒ಹಂ ಕ್ರ॒ವ್ಯಾದಂ॒ ಪುನ॒: ಪ್ರತಿ॑ ಹರಾಮಿ॒ ತಾಂ ॥ ೯ ॥

ಅಪ॑ಥೇ॒ನಾ ಜ॑ಭಾರೈಣಾಂ॒ ತಾಂ ಪ॒ಥೇತಃ ಪ್ರ ಹಿ॑ಣ್ಮಸಿ ।
ಅಧೀ॑ರೋ ಮರ್ಯಾ॒ಧೀರೇ॑ಭ್ಯ॒: ಸಂ ಜ॑ಭಾ॒ರಾಚಿ॑ತ್ತ್ಯಾ ॥ ೧೦ ॥

ಯಶ್ಚ॒ಕಾರ॒ ನ ಶ॒ಶಾಕ॒ ಕರ್ತುಂ॑ ಶ॒ಶ್ರೇ ಪಾದ॑ಮಂ॒ಗುರಿಂ॑ ।
ಚ॒ಕಾರ॑ ಭ॒ದ್ರಮ॒ಸ್ಮಭ್ಯ॑ಮಭ॒ಗೋ ಭಗ॑ವದ್ಭ್ಯಃ ॥ ೧೧ ॥

ಕೃ॒ತ್ಯಾ॒ಕೃತಂ॑ ವಲ॒ಗಿನಂ॑ ಮೂ॒ಲಿನಂ॑ ಶಪಥೇ॒ಯ್ಯಂ ।
ಇಂದ್ರ॒ಸ್ತಂ ಹಂ॑ತು ಮಹ॒ತಾ ವ॒ಧೇನಾ॒ಗ್ನಿರ್ವಿ॑ಧ್ಯತ್ವ॒ಸ್ತಯಾ॑ ॥ ೧೨ ॥

ಇತಿ ಅಥರ್ವವೇದೇ ಪಂಚಮಕಾಂಡೇ ಷಷ್ಠೋಽನುವಾಕೇ ಕೃತ್ಯಾಪರಿಹರಣ ಸೂಕ್ತಂ ॥