सुब्रह्मण्यष्टोत्तरशत नामस्तोत्रम्

subrahmanya ashtottara sata nama stotram in hindi

शक्तिहस्तं विरूपाक्षं शिखिवाहं षडाननम् ।
दारुणं रिपुरोगघ्नं भावये कुक्कुटध्वजम् ॥

इति ध्यानम्

स्कंदो गुहः षण्मुखश्च फालनेत्रसुतः प्रभुः ।
पिंगलः कृत्तिकासूनुः शिखिवाहो द्विषड्भुजः ॥ 1 ॥

द्विषण्णेत्र-श्शक्तिधरः पिशिताश प्रभंजनः ।
तारकासुरसंहारी रक्षोबलविमर्दनः ॥ 2 ॥

मत्तः प्रमत्त उन्मत्तः सुरसैन्यसुरक्षकः ।
देवसेनापतिः प्राज्ञः कृपालु र्भक्तवत्सलः ॥ 3 ॥

उमासुत-श्शक्तिधरः कुमारः क्रौंचधारणः ।
सेनानी-रग्निजन्मा च विशाखः शंकरात्मजः ॥ 4 ॥

शिवस्वामी गणस्वामी सर्वस्वामी सनातनः ।
अनंतमूर्ति रक्षोभ्यः पार्वतीप्रियनंदनः ॥ 5 ॥

गंगासुत-श्शरोद्भूत आहूतः पावकात्मजः ।
जृंभः प्रजृंभ उज्जृंभः कमलासनसंस्तुतः ॥ 6 ॥

एकवर्णो द्विवर्णश्च त्रिवर्णः सुमनोहरः ।
चतुर्वर्णः पंचवर्णः प्रजापति-रहस्पतिः ॥ 7 ॥

अग्निगर्भ-श्शमीगर्भो विश्वरेता-स्सुरारिहा ।
हरिद्वर्ण-श्शुभकरो पटुश्च वटुवेषभृत् ॥ 8 ॥

पूषा गभस्ति-र्गहन श्चंद्रवर्णः कलाधरः ।
मायाधरो महामायी कैवल्य-श्शंकरात्मजः ॥ 9 ॥

विश्वयोनि-रमेयात्मा तेजोनिधि-रनामयः ।
परमेष्ठी परंब्रह्म वेदगर्भो विराट्सुतः ॥ 10 ॥

पुलिंदकन्याभर्ता च महासारस्वतावृतः ।
अश्रितोखिलदाता च चोरघ्नो रोगनाशनः ॥ 11 ॥

अनंतमूर्ति-रानंद-श्शिखंडीकृतकेतनः ।
डंभः परमडंभश्च महाडंभो वृषाकपिः ॥ 12 ॥

कारणोपात्तदेहश्च कारणातीतविग्रहः ।
अनीश्वरोऽमृतः प्राणः प्राणायामपरायणः ॥ 13 ॥

विरुद्धहंता वीरघ्नो रक्तश्यामगलोऽपि च ।
सुब्रह्मण्यो गुहः प्रीतो ब्रह्मण्यो ब्राह्मणप्रियः ॥ 14 ॥

वंशवृद्धिकरो वेदो वेद्योऽक्षयफलप्रदः ॥ 15 ॥

इति श्री सुब्रह्मण्याष्टोत्तर शतनामस्तोत्रं संपूर्णम् ।

subrahmanya ashtottara sata nama stotram in hindi