નારાયણીયં દશક 95 – ધ્યાનયોગઃ – મોક્ષપ્રાપ્તિમાર્ગઃ

narayaniyam dashaka 95 in gujarati

આદૌ હૈરણ્યગર્ભીં તનુમવિકલજીવાત્મિકામાસ્થિતસ્ત્વં
જીવત્વં પ્રાપ્ય માયાગુણગણખચિતો વર્તસે વિશ્વયોને ।
તત્રોદ્વૃદ્ધેન સત્ત્વેન તુ ગુણયુગલં ભક્તિભાવં ગતેન
છિત્વા સત્ત્વં ચ હિત્વા પુનરનુપહિતો વર્તિતાહે ત્વમેવ ॥1॥

સત્ત્વોન્મેષાત્ કદાચિત્ ખલુ વિષયરસે દોષબોધેઽપિ ભૂમન્
ભૂયોઽપ્યેષુ પ્રવૃત્તિસ્સતમસિ રજસિ પ્રોદ્ધતે દુર્નિવારા ।
ચિત્તં તાવદ્ગુણાશ્ચ ગ્રથિતમિહ મિથસ્તાનિ સર્વાણિ રોદ્ધું
તુર્યે ત્વય્યેકભક્તિશ્શરણમિતિ ભવાન્ હંસરૂપી ન્યગાદીત્ ॥2॥

સંતિ શ્રેયાંસિ ભૂયાંસ્યપિ રુચિભિદયા કર્મિણાં નિર્મિતાનિ
ક્ષુદ્રાનંદાશ્ચ સાંતા બહુવિધગતયઃ કૃષ્ણ તેભ્યો ભવેયુઃ ।
ત્વં ચાચખ્યાથ સખ્યે નનુ મહિતતમાં શ્રેયસાં ભક્તિમેકાં
ત્વદ્ભક્ત્યાનંદતુલ્યઃ ખલુ વિષયજુષાં સમ્મદઃ કેન વા સ્યાત્ ॥3॥

ત્વત્ભક્ત્યા તુષ્ટબુદ્ધેઃ સુખમિહ ચરતો વિચ્યુતાશસ્ય ચાશાઃ
સર્વાઃ સ્યુઃ સૌખ્યમય્યઃ સલિલકુહરગસ્યેવ તોયૈકમય્યઃ ।
સોઽયં ખલ્વિંદ્રલોકં કમલજભવનં યોગસિદ્ધીશ્ચ હૃદ્યાઃ
નાકાંક્ષત્યેતદાસ્તાં સ્વયમનુપતિતે મોક્ષસૌખ્યેઽપ્યનીહઃ ॥4॥

ત્વદ્ભક્તો બાધ્યમાનોઽપિ ચ વિષયરસૈરિંદ્રિયાશાંતિહેતો-
ર્ભક્ત્યૈવાક્રમ્યમાણૈઃ પુનરપિ ખલુ તૈર્દુર્બલૈર્નાભિજય્યઃ ।
સપ્તાર્ચિર્દીપિતાર્ચિર્દહતિ કિલ યથા ભૂરિદારુપ્રપંચં
ત્વદ્ભક્ત્યોઘે તથૈવ પ્રદહતિ દુરિતં દુર્મદઃ ક્વેંદ્રિયાણામ્ ॥5॥

ચિત્તાર્દ્રીભાવમુચ્ચૈર્વપુષિ ચ પુલકં હર્ષવાષ્પં ચ હિત્વા
ચિત્તં શુદ્ધ્યેત્કથં વા કિમુ બહુતપસા વિદ્યયા વીતભક્તેઃ ।
ત્વદ્ગાથાસ્વાદસિદ્ધાંજનસતતમરીમૃજ્યમાનોઽયમાત્મા
ચક્ષુર્વત્તત્ત્વસૂક્ષ્મં ભજતિ ન તુ તથાઽભ્યસ્તયા તર્કકોટ્યા॥6॥

ધ્યાનં તે શીલયેયં સમતનુસુખબદ્ધાસનો નાસિકાગ્ર-
ન્યસ્તાક્ષઃ પૂરકાદ્યૈર્જિતપવનપથશ્ચિત્તપદ્મં ત્વવાંચમ્।
ઊર્ધ્વાગ્રં ભાવયિત્વા રવિવિધુશિખિનઃ સંવિચિંત્યોપરિષ્ટાત્
તત્રસ્થં ભાવયે ત્વાં સજલજલધરશ્યામલં કોમલાંગમ્ ॥7॥

આનીલશ્લક્ષ્ણકેશં જ્વલિતમકરસત્કુંડલં મંદહાસ-
સ્યંદાર્દ્રં કૌસ્તુભશ્રીપરિગતવનમાલોરુહારાભિરામમ્ ।
શ્રીવત્સાંકં સુબાહું મૃદુલસદુદરં કાંચનચ્છાયચેલં
ચારુસ્નિગ્ધોરુમંભોરુહલલિતપદં ભાવયેઽહં ભવંતમ્ ॥8॥

સર્વાંગેષ્વંગ રંગત્કુતુકમિતિ મુહુર્ધારયન્નીશ ચિત્તં
તત્રાપ્યેકત્ર યુંજે વદનસરસિજે સુંદરે મંદહાસે
તત્રાલીનં તુ ચેતઃ પરમસુખચિદદ્વૈતરૂપે વિતન્વ-
ન્નન્યન્નો ચિંતયેયં મુહુરિતિ સમુપારૂઢયોગો ભવેયમ્ ॥9॥

ઇત્થં ત્વદ્ધ્યાનયોગે સતિ પુનરણિમાદ્યષ્ટસંસિદ્ધયસ્તાઃ
દૂરશ્રુત્યાદયોઽપિ હ્યહમહમિકયા સંપતેયુર્મુરારે ।
ત્વત્સંપ્રાપ્તૌ વિલંબાવહમખિલમિદં નાદ્રિયે કામયેઽહં
ત્વામેવાનંદપૂર્ણં પવનપુરપતે પાહિ માં સર્વતાપાત્ ॥10॥

narayaniyam dashaka 95 in gujarati