శ్రీ సీతారామ స్తోత్రం

sri sita rama stotram in telugu

అయోధ్యాపురనేతారం మిథిలాపురనాయికామ్ ।
రాఘవాణామలంకారం వైదేహానామలంక్రియామ్ ॥ 1 ॥

రఘూణాం కులదీపం చ నిమీనాం కులదీపికామ్ ।
సూర్యవంశసముద్భూతం సోమవంశసముద్భవామ్ ॥ 2 ॥

పుత్రం దశరథస్యాద్యం పుత్రీం జనకభూపతేః ।
వశిష్ఠానుమతాచారం శతానందమతానుగామ్ ॥ 3 ॥

కౌసల్యాగర్భసంభూతం వేదిగర్భోదితాం స్వయమ్ ।
పుండరీకవిశాలాక్షం స్ఫురదిందీవరేక్షణామ్ ॥ 4 ॥

చంద్రకాంతాననాంభోజం చంద్రబింబోపమాననామ్ ।
మత్తమాతంగగమనం మత్తహంసవధూగతామ్ ॥ 5 ॥

చందనార్ద్రభుజామధ్యం కుంకుమార్ద్రకుచస్థలీమ్ ।
చాపాలంకృతహస్తాబ్జం పద్మాలంకృతపాణికామ్ ॥ 6 ॥

శరణాగతగోప్తారం ప్రణిపాదప్రసాదికామ్ ।
కాలమేఘనిభం రామం కార్తస్వరసమప్రభామ్ ॥ 7 ॥

దివ్యసింహాసనాసీనం దివ్యస్రగ్వస్త్రభూషణామ్ ।
అనుక్షణం కటాక్షాభ్యాం అన్యోన్యేక్షణకాంక్షిణౌ ॥ 8 ॥

అన్యోన్యసదృశాకారౌ త్రైలోక్యగృహదంపతీ।
ఇమౌ యువాం ప్రణమ్యాహం భజామ్యద్య కృతార్థతామ్ ॥ 9 ॥

అనేన స్తౌతి యః స్తుత్యం రామం సీతాం చ భక్తితః ।
తస్య తౌ తనుతాం పుణ్యాః సంపదః సకలార్థదాః ॥ 10 ॥

ఏవం శ్రీరామచంద్రస్య జానక్యాశ్చ విశేషతః ।
కృతం హనూమతా పుణ్యం స్తోత్రం సద్యో విముక్తిదమ్ ।
యః పఠేత్ప్రాతరుత్థాయ సర్వాన్ కామానవాప్నుయాత్ ॥ 11 ॥

ఇతి హనూమత్కృత-సీతారామ స్తోత్రం సంపూర్ణమ్ ॥

sri sita rama stotram in telugu